໘. ຉນ຺ນສຸຕ຺ຕວຓ຺ຓນາ

໙໐. ມກ຺ຂີຕິ ຄຸຓມກ຺ຂນລກ຺ຂເຓນ ມກ຺ເຂນ ສມນ຺ນາຄໂຕ. ປຬາສີຕິ ຍຸຄຄ຺ຄາຫລກ຺ຂເຓນ ປຬາເສນ ສມນ຺ນາຄໂຕ. ເອຕໍ ອໂວຈາຕິ ‘‘ໂອວທນ຺ຕຸ ມໍ…ເປ… ປສ຺ເສຍ຺ຍ’’ນ຺ຕິ ເອຕໍ ອໂວຈ.

ເຖຣນ຺ຕິ ຉນ຺ນຕ຺ເຖຣໍ. ອຕ຺ຕໂນ ທຸຄ຺ຄຫເຓນ ກຎ຺ຈິ ອຸປາຣມ຺ຠມ຺ປິ ກເຣຍ຺ຍ. ເຕນ ວຸຕ຺ຕໍ ‘‘ເອວໍ ກິຣ ເນສໍ ອໂຫສີ’’ຕິອາທິ. ນິທ຺ໂທສເມວສ຺ສ ກຕ຺ວາຕິ ອາທິໂຕ ອນຸຣູປຕ຺ຕເມວ ກຕ຺ວາ ສທ຺ຘມ຺ມໍ ກເຖສ຺ສາມາຕິ.

ປຣິຕສ຺ສນາ ອຸປາທານນ຺ຕິ ຠຍປຣິຕສ຺ສນາ ທິຏ຺ຐຸປາທານໍ. ອນຕ຺ຕນິ ສຕິ ອນຕ຺ຕກຕານິ ກມ຺ມານິ ກມຕ຺ຕານໍ ຜຸສິສ຺ສນ຺ຕີຕິ ຠຍປຣິຕສ຺ສນາ ເຈວ ທິຏ຺ຐຸປາທານຎ຺ຈ ອຸປ຺ປຊ຺ຊຕິ. ປຏິນິວຕ຺ຕຕີຕິ ຍຖາຣທ຺ຘວິປສ຺ສນາໂຕ ປຏິນິວຕ຺ຕຕິ, ນາສກ຺ຂີຕິ ອຕ຺ໂຖ. ກສ຺ມາ ປເນຕສ຺ສ ວິປສ຺ສນມນຸຍຸຎ຺ຊນ຺ຕສ຺ສ ເອວໍ ອໂຫສີຕິ ຕຕ຺ຖ ກາຣຓໍ ວທຕິ ‘‘ອຍໍ ກິຣາ’’ຕິອາທິນາ. ເອວນ຺ຕິ ‘‘ໂກ ນຸ ໂຂ ເມ ອຕ຺ຕາ’’ຕິ ເອວໍ ນ ໂຫຕິ. ຕາວຕິກາ ວິສ຺ສຕ຺ຖີຕິ ‘‘ມຍ຺ຫໍ ຘມ຺ມໍ ເທເສຕູ’’ຕິ ວຸຕ຺ຕວິສ຺ສາໂສ ອຕ຺ຖີຕິ ອຕ຺ໂຖ. ອິທໍ ກຈ຺ຈານສຕ຺ຖໍ ອທ຺ທສາຕິ ໂຍຊນາ. ‘‘ທ຺ວຍນິສ຺ສິໂຕ, ກຈ຺ຈານ, ໂລໂກ’’ຕິອາທິ ທິຏ຺ຐິວິນິເວຐນາ. ‘‘ເອເຕ ເຕ, ກຈ຺ຈານ, ອຸໂຠ ອນ຺ເຕ ອນຸປຄມ຺ມາ’’ຕິອາທິ ພຸທ຺ຘພລທີປນາ.

ຉນ຺ນສຸຕ຺ຕວຓ຺ຓນາ ນິຏ຺ຐິຕາ.