໖. ສມ຺ມາສມ຺ພຸທ຺ຘສຸຕ຺ຕວຓ຺ຓນາ

໕໘. ອຘິກໍ ສວິເສສໍ ປຍສຕິ ປຍຸຎ຺ຊຕິ ເອເຕນາຕິ ອຘິປ຺ປຍາໂສ, ວິສິຏ຺ຐປໂຍໂຄ. ເຕນາຫ ‘‘ອຘິກປໂຍໂຄ’’ຕິ. ອິມຎ຺ຫິ ມຄ຺ຄນ຺ຕິ ອຏ຺ຐງ຺ຄິກໍ ອຣິຍມຄ຺ຄມາຫ. ອິຘາຕິ ອິມສ຺ມິໍ ສຸຕ຺ເຕ. ອວຕ຺ຕມານຏ຺ເຐນາຕິ ພຸທ຺ຘຸປ຺ປາທໂຕ ປຸພ຺ເພ ນ ວຕ຺ຕມານຠາເວນ. ມຄ຺ຄໍ ຊານາຕີຕິ ສມຸທາຄມໂຕ ປຏ຺ຐາຍ ສປຸພ຺ພຠາຄໍ ສສມ຺ຠາຣວິສຍໍ ສຜລໍ ສອຸທ຺ຣຍໍ ອຣິຍໍ ມຄ຺ຄໍ ຊານາຕິ ອວພຸຊ຺ຌຕີຕິ ມຄ຺ຄຎ຺ຎູ. ວິທິຕນ຺ຕິ ອຎ຺ເຎສມ຺ປິ ຎາຕໍ ປຏິລທ຺ຘໍ ຫຕ຺ຖຕເລ ອາມລກໍ ວິຍ ປາກຏໍ ອກາສິ, ຕຖາ ກຕ຺ວາ ເທເສສິ. ອມຄ຺ເຄ ປຣິວຊ຺ຊເນນ ມຄ຺ເຄ ປຏິປຕ຺ຕີຕິ ຕສ຺ສ ມຄ຺ຄກຸສລຕາ ວິຍ ອມຄ຺ຄກຸສລຕາປິ ອິຈ຺ຉິຕພ຺ພາຕິ ອາຫ ‘‘ມຄ຺ເຄ ຈ ອມຄ຺ເຄ ຈ ໂກວິໂທ’’ຕິ. ອຫໍ ປຐມໍ ຄໂຕຕິ ອຫໍ ປຐມມຄ຺ເຄນ ສມນ຺ນາຄໂຕ.

ສມ຺ມາສມ຺ພຸທ຺ຘສຸຕ຺ຕວຓ຺ຓນາ ນິຏ຺ຐິຕາ.