໓. ອຸທານສຸຕ຺ຕວຓ຺ຓນາ

໕໕. ອຸທານໍ ອຸທາຫຣີຕິ ອຕ຺ຕມນວາຈໍ ນິຈ຺ຉາເຣສິ. ເອສ ວຸຕ຺ຕປ຺ປກາໂຣ ອຸທາຫາໂຣ. ຠຸໂສ ນິສ຺ສໂຍ ອຸປນິສ຺ສໂຍ, ທານເມວ ອຸປນິສ຺ສໂຍ ທານູປນິສ຺ສໂຍ. ເອສ ນໂຍ ເສເສສຸປິ. ຕຕ຺ຖ ທານູປນິສ຺ສໂຍ ອນ຺ນາທິວຕ຺ຖູສຸ ພລວາຕິ ພລວຠາເວນ ໂຫຕິ, ຕສ຺ມາ ອຸປນິສ຺ສຍພຫຸໂລ ກາມຣາຄປ຺ປຫາເນເນວ ກຕປຣິຈຍຕ຺ຕາ ວິປສ຺ສນມນຸຍຸຎ຺ຊນ຺ໂຕ ນ ຈິຣສ຺ເສວ ອນາຄາມິຜລໍ ປາປຸຓາຕິ, ຕຖາ ສຸວິສຸທ຺ຘສີລູປນິສ຺ສໂຍ ກາມໂທສຊິຄຸຈ຺ຉເນນ. ຍທິ ເອວໍ ກສ຺ມາ ອິເມ ທ຺ເວ ອຸປນິສ຺ສຍາ ທຸພ຺ພລາຕິ ວຸຕ຺ຕາ? ວິຊ຺ຊູປມຎ຺ຎາຓສ຺ເສວ ປຈ຺ຈຍຠາວໂຕ. ໂສປິ ຠາວນູປນິສ຺ສຍສຫາຍລາເຠເນວ, ນ ເກວລໍ. ຠາວນາ ປນ ປຏິເວຘສ຺ສ ວິເສສເຫຕຸຠາວໂຕ ພລວາ ອຸປນິສ຺ສໂຍ. ຕຖາ ຫິ ສາ ວຊິຣູປມຎາຓສ຺ສ ວິເສສປຈ຺ຈໂຍ. ເຕນາຫ ‘‘ຠາວນູປນິສ຺ສໂຍ ອຣຫຕ຺ຕໍ ປາເປຕີ’’ຕິ.

ໂສຕິ ມິລກຕ຺ເຖໂຣ. ວິຫາຣນ຺ຕິ ວສນຏ຺ຐານໍ. ວິຫາຣປຈ຺ຈນ຺ເຕ ຫິ ປຓ຺ຓສາລາຍ ເຖໂຣ ວິຫຣຕິ. ອຸປຏ຺ຐາຕິ ເອກລກ຺ຂເຓນ. ກູຏໂຄໂຓ ວິຍ ຄມນວີຖິໍ. ຕຕ຺ຖາຕິ ອລ຺ລກຏ຺ຐຣາສິມ຺ຫິ. ອຸທກມຓິການນ຺ຕິ ອຸທກເຖວານໍ.

ອຕ຺ຕນິເຍວ ອຸປເນສິ ອຸທານກຖາຍ ວຸຕ຺ຕຘມ຺ມານໍ ປຣິປຸຓ຺ຓານໍ ອຕ຺ຕນິ ສໍວິຊ຺ຊມານຕ຺ຕາ. ເຕນາຫ ‘‘ອຸຏ຺ຐານວຕາ’’ຕິອາທິ. ອຍຎ຺ຫິ ມິລກຕ຺ເຖໂຣ ສິກ຺ຂາຍ ຄາຣໂວ ສປ຺ປຕິສ຺ໂສ ວຕ຺ຕປຏິວຕ຺ຕໍ ປູເຣນ຺ໂຕ ວິສຸທ຺ຘສີໂລ ຫຸຕ຺ວາ ຐິໂຕ, ຕສ຺ມາ ‘‘ທຸພ຺ພລູປນິສ຺ສເຍ’’ຕິ ວຸຕ຺ຕໍ. ເຕນາຫ ຠຄວາ ອຸທາເນນ຺ໂຕ ‘‘ໂນ ຈສ຺ສໍ…ເປ… ສຎ຺ໂຎຊນານີ’’ຕິ.

ສເຈ ອຫໍ ນ ຠເວຍ຺ຍນ຺ຕິ ຍທິ ອຫໍ ນາມ ໂກຈິ ນ ຠເວຍ຺ຍໍ ຕາທິສສ຺ສ ອຫໍສທ຺ທວຈນີຍສ຺ສ ກສ຺ສຈິ ອຕ຺ຖສ຺ສ ອຠາວໂຕ. ຕໂຕ ເອວ ມມ ປຣິກ຺ຂາໂຣປິ ນ ຠເວຍ຺ຍຕສ຺ສ ຈ ປຠງ຺ຄຸຠາເວນ ອນວຏ຺ຐິຕຠາວໂຕ. ເອວໍ ອຕ຺ຕຸທ຺ເທສິກຠາເວນ ປທທ຺ວຍສ຺ສ ອຕ຺ຖໍ ວຕ຺ວາ ອິທານິ ກມ຺ມຜລວເສນ ວຕ຺ຕຸໍ ‘‘ສເຈ ວາ ປນາ’’ຕິອາທິ ວຸຕ຺ຕໍ. ອຕີຕປຈ຺ຈຸປ຺ປນ຺ນວເສນ ສຸຎ຺ຎຕໍ ທສ຺ເສຕ຺ວາ ອິທານິ ປຈ຺ຈຸປ຺ປນ຺ນານາຄຕວເສນ ຕໍ ທສ຺ເສນ຺ໂຕ ‘‘ອິທານິ ປນາ’’ຕິອາທິ ວຸຕ຺ຕໍ. ເອວໍ ອຘິມຸຈ຺ຈນ຺ໂຕຕິ ເອທິສໍ ອຘິມຸຕ຺ຕິໍ ປວຕ຺ເຕນ຺ໂຕ. ວິຠວິສ຺ສຕີຕິ ວິນສ຺ສິສ຺ສຕິ. ວິຠໂວ ຫິ ວິນາໂສ. ເຕນາຫ ‘‘ຠິຊ຺ຊິສ຺ສຕີ’’ຕິ. ວິຠວທສ຺ສນໍ ວິຠໂວຕິ ອຸຕ຺ຕຣປທໂລເປນ ວຸຕ຺ຕນ຺ຕິ ອາຫ ‘‘ວິຠວທສ຺ສເນນາ’’ຕິ. ວິຠວທສ຺ສນໍ ນາມ ອຈ຺ຈນ຺ຕາຍ ວິນາສສ຺ສ ທສ຺ສນໍ. ຕນ຺ຕິ ອຣິຍມຄ຺ຄໍ. ສາມຎ຺ຎໂຊຕນາ ເຫສາ ວິເສສນິຏ຺ຐາ ໂຫຕີຕິ ຕຕິຍມຄ຺ຄວເສນ ອຕ຺ໂຖ ເວທິຕພ຺ໂພ.

ອຸປຣິ ມຄ຺ຄຜລນ຺ຕິ ອຄ຺ຄມຄ຺ຄຜລໍ. ນຕ຺ຖິ ເອຕິສ຺ສາ ຊາຕິຍາ ອນ຺ຕຣນ຺ຕິ ອນນ຺ຕຣາ, ອນນ຺ຕຣາ ວິປສ຺ສນາ ມຄ຺ຄສ຺ສ. ໂຄຕ຺ຣຠູ ປນ ອນຸໂລມວີຖິປຣິຍາປນ຺ນຕ຺ຕາ ວິປສ຺ສນາຄຕິກໍ ວາ ສິຍາ, ນິພ຺ພານາຣມ຺ມຓຕ຺ຕາ ມຄ຺ຄຄຕິກໍ ວາຕິ ນ ເຕນ ມຄ຺ໂຄ ອນ຺ຕຣິໂກ ນາມ ໂຫຕິ. ເຕນາຫ ‘‘ວິປສ຺ສນາ ມຄ຺ຄສ຺ສ ອາສນ຺ນານນ຺ຕຣໍ ນາມາ’’ຕິ. ຜລໍ ປນ ນິພ຺ພານາຣມ຺ມຓຕ຺ຕາ ກິເລສານໍ ປຊຫນວເສນ ປວຕ຺ຕນໂຕ ໂລກຸຕ຺ຕຣຠາວໂຕ ຈ ກມ຺ມມຄ຺ຄຄຕິກເມວ, ກຸສລວິປາກຠາເວນ ປນ ເນສໍ ອຕ຺ໂຖ ປເຠໂທຕິ ວິປສ຺ສນາຍ ຜລສ຺ສ ສິຍາ ອນນ຺ຕຣຕາຕິ ວຸຕ຺ຕໍ ‘‘ຜລສ຺ສ ທູຣານນ຺ຕຣໍ ນາມາ’’ຕິ. ‘‘ອາສວານໍ ຂໂຍ’’ຕິ ປນ ອຄ຺ຄມຄ຺ເຄ ວຸຈ຺ຈມາເນ ວິປສ຺ສນານໍ ອາສນ຺ນຕາຍ ວຕ຺ຕພ຺ພເມວ ນຕ຺ຖິ. ອຕສິຕາເຍຕິ ນ ຕສິຕພ຺ເພ ຕາສໍ ອນາປຊ຺ຊິຕພ຺ເພ. ຕາໂສຕິ ຕາສເຫຕຸ ‘‘ຕສຕິ ເອຕສ຺ມາ’’ຕິ ກຕ຺ວາ. ໂສຕິ ອສ຺ສຸຕວາ ປຸຖຸຊ຺ຊໂນ. ຕິລກ຺ຂຓາຫຕນ຺ຕິ ອນິຈ຺ຈຕາທິລກ຺ຂຓຕ຺ຕຍລກ຺ຂິຕໍ. ມນມ຺ຫິ ນຏ຺ໂຐຕິ ອີສກໍ ນຏ຺ໂຐມ຺ຫິ, ຕໂຕ ປຣມ຺ປິ ຕຕ຺ເຖວ ຐຕ຺ວາ ກິຎ຺ຈິ ອປູຣິຕຕ຺ຕາ ເອວ ມຸຕ຺ໂຕຕິ ອຘິປ຺ປາໂຍ. ‘‘ນ ຕາໂສ ນາມ ໂຫຕີ’’ຕິ ວຕ຺ວາ ຕສ຺ສ ອຕາສຠາວໍ ທສ຺ເສຕຸໍ ‘‘ນ ຫີ’’ຕິອາທິ ວຸຕ຺ຕໍ. ກລ຺ຍາຓປຸຖຸຊ຺ຊໂນ ຫິ ຠຍຕຸປຏ຺ຐານຎາເຓນ ‘‘ສຠຍາ ສງ຺ຂາຣາ’’ຕິ ວິປສ຺ສນ຺ໂຕ ນ ອຸຕ຺ຕສຕິ.

ອຸທານສຸຕ຺ຕວຓ຺ຓນາ ນິຏ຺ຐິຕາ.