໕. ອຕ຺ຕທີປວຄ຺ໂຄ

໑. ອຕ຺ຕທີປສຸຕ຺ຕວຓ຺ຓນາ

໔໓. ທ຺ວີຫິ ຠາເຄຫິ ອາໂປ ເອຕ຺ຖ ຄຕາຕິ ທີໂປ, ທີໂປ ວິຍາຕິ ທີໂປ ໂອເຆຫິ ອນຊ຺ໂຌຕ຺ຖຣນີຍຕາຍ. ໂຍ ປໂຣ ນ ໂຫຕິ, ໂສ ອຕ຺ຕາ, ອິຘ ປນ ຘມ຺ໂມ ອຘິປ຺ເປໂຕ. ອຕ຺ຕາ ທີໂປ ເອເຕສນ຺ຕິ ອຕ຺ຕທີປາ. ປຏິສຣຓຕ຺ໂຖ ທີປຏ຺ໂຐຕິ ອາຫ – ‘‘ອຕ຺ຕສຣຓາຕິ ອິທໍ ຕສ຺ເສວ ເວວຈນ’’ນ຺ຕິ. ໂລກິຍໂລກຸຕ຺ຕໂຣ ຘມ຺ໂມ ອຕ຺ຕາ ນາມ ເອກນ຺ຕນາຖຠາວໂຕ. ປຐເມນ ປເທນ ວຸຕ຺ໂຕ ເອວ ອຕ຺ໂຖ ທຸຕິຍປເທນ ວຸຈ຺ຈຕີຕິ ວຸຕ຺ຕໍ ‘‘ເຕເນວາຫາ’’ຕິອາທິ. ຍວຕິ ເອຕສ຺ມາ ຜລໍ ປສວຕີຕິ ໂຍນິ, ກາຣຓໍ. ກິໍ ປຠຸຕິ ອຸປ຺ປຕ຺ຕິຏ຺ຐານໍ ເອເຕສນ຺ຕິ ກິໍ ປຠຸຕິກາ. ປຫານທສ຺ສນຕ຺ຖໍ ອາຣທ຺ຘໍ. ເຕເນວາຫ ‘‘ປຸພ຺ເພ ເຈວ…ເປ… ເຕ ປຫີຍນ຺ຕີ’’ຕິ. ນ ປຣິຕສ຺ສຕິ ຕຓ຺ຫາປຣິຕ຺ຕາສສ຺ສ ອຠາວໂຕ. ວິປສ຺ສນງ຺ເຄນາຕິ ວິປສ຺ສນາສງ຺ຂາເຕນ ກາຣເຓນ.

ອຕ຺ຕທີປສຸຕ຺ຕວຓ຺ຓນາ ນິຏ຺ຐິຕາ.

໒. ປຏິປທາສຸຕ຺ຕວຓ຺ຓນາ

໔໔. ສຠາວໂຕສນ຺ໂຕ ວິຊ຺ຊມາໂນ ກາໂຍ ຣູປາທິຘມ຺ມສມູໂຫຕິ ສກ຺ກາໂຍຕິ ອາຫ – ‘‘ສກ຺ກາໂຍ ທຸກ຺ຂ’’ນ຺ຕິ. ທິຏ຺ຐິ ເອວ ສມນຸປສ຺ສນາ, ທິຏ຺ຐິສຫິຕາ ວາ ສມນຸປສ຺ສນາ ທິຏ຺ຐິສມນຸປສ຺ສນາ, ທິຏ຺ຐິມຎ຺ຎນາຍ ສທ຺ຘິໍ ອິຕຣມຎ຺ຎນາ. ສຫ ວິປສ຺ສນາຍ ຈຕຸມຄ຺ຄຎາຓໍ ສມນຸປສ຺ສນາ ‘‘ຈຕຸນ຺ນໍ ອຣິຍສຈ຺ຈານໍ ສມ຺ມເທວ ອນຸຣູປໂຕ ປສ຺ສນາ’’ຕິ ກຕ຺ວາ.

ປຏິປທາສຸຕ຺ຕວຓ຺ຓນາ ນິຏ຺ຐິຕາ.

໓. ອນິຈ຺ຈສຸຕ຺ຕວຓ຺ຓນາ

໔໕. ວິຣາໂຄ ນາມ ມຄ຺ໂຄ, ວິມຸຕ຺ຕິຜລນ຺ຕິ ອາຫ – ‘‘ມຄ຺ຄກ຺ຂເຓ ວິຣຊ຺ຊຕິ, ຜລກ຺ຂເຓ ວິມຸຈ຺ຈຕີ’’ຕິ. ອຄ຺ຄເຫຕ຺ວາຕິ ເອວໍ ນິຣຸຊ຺ຌມາເນຫິ ອາສເວຫິ ‘‘ອຫໍ ມມາ’’ຕິ ກຎ຺ຈິ ຘມ຺ມໍ ອນາທິຍິຕ຺ວາ. ‘‘ຈິຕ຺ຕໍ ວິຣຕ຺ຕໍ, ວິມຸຕ຺ຕໍ ໂຫຕີ’’ຕິ ວຸຕ຺ຕຕ຺ຕາ ຜລໍ ຄຍ຺ຫຕິ, ‘‘ຂີຓາ ຊາຕີ’’ຕິອາທິນາ ປຈ຺ຈເວກ຺ຂຓາຕິ ອາຫ ‘‘ສຫ ຜເລນ ປຈ຺ຈເວກ຺ຂຓທສ຺ສນຕ຺ຖ’’ນ຺ຕິ. ອຸປຣິ ກຕ຺ຕພ຺ພກິຈ຺ຈາຠາເວນ ຐິຕໍ. ເຕນາຫ ‘‘ວິມຸຕ຺ຕຕ຺ຕາ ຐິຕ’’ນ຺ຕິ. ຍໍ ປຕ຺ຕພ຺ພໍ, ຕໍ ອຄ຺ຄຜລສ຺ສ ປຕ຺ຕຠາເວນ ອຘິຄຕຕ຺ຕາ ສນ຺ຕຸຏ຺ຐໍ ປຣິຕຸຏ຺ຐໍ.

ອນິຈ຺ຈສຸຕ຺ຕວຓ຺ຓນາ ນິຏ຺ຐິຕາ.

໔. ທຸຕິຍອນິຈ຺ຈສຸຕ຺ຕວຓ຺ຓນາ

໔໖. ປຸພ຺ພນ຺ຕໍ ອຕີຕຂນ຺ຘໂກຏ຺ຐາສໍ. ອນຸຄຕາຕິ ສສ຺ສຕາທີນິ ກປ຺ເປຕ຺ວາ ຄຫຓວເສນ ອນຸຄຕາ. ອຏ຺ຐາຣສ ທິຏ຺ຐິໂຍຕິ ຈຕສ຺ໂສ ສສ຺ສຕທິຏ຺ຐິໂຍ, ຈຕສ຺ໂສ ເອກຈ຺ຈສສ຺ສຕທິຏ຺ຐິໂຍ, ຈຕສ຺ໂສ ອນ຺ຕານນ຺ຕິກທິຏ຺ຐິໂຍ, ຈຕສ຺ໂສ ອມຣາວິກ຺ເຂປທິຏ຺ຐິໂຍ, ທ຺ເວ ອຘິຈ຺ຈສມຸປ຺ປນ຺ນທິຏ຺ຐິໂຍຕິ ເອວໍ ອຏ຺ຐາຣສ ທິຏ຺ຐິໂຍ ນ ໂຫນ຺ຕິ ປຈ຺ຈຍຆາເຕນ. ອປຣນ຺ຕນ຺ຕິ ອນາຄຕໍ ຂນ຺ຘໂກຏ຺ຐາສໍ ສສ຺ສຕາທິຠາວໍ ກປ຺ເປຕ຺ວາ ຄຫຓວເສນ ອນຸຄຕາ. ໂສຬສ ສຎ຺ຎີວາທາ, ອຏ຺ຐ ອສຎ຺ຎີວາທາ, ອຏ຺ຐ ເນວສຎ຺ຎີນາສຎ຺ຎີວາທາ, ສຕ຺ຕ ອຸຈ຺ເຉທວາທາ, ປຎ຺ຈ ປຣມທິຏ຺ຐຘມ຺ມນິພ຺ພານວາທາຕິ ເອວໍ ຈຕຸຈຕ຺ຕາລີສ ທິຏ຺ຐິໂຍ ນ ໂຫນ຺ຕິ ປຈ຺ຈຍຆາເຕນ. ສສ຺ສຕທິຏ຺ຐິຖາມໂສ ເຈວ ສີລພ຺ພຕທິຏ຺ຐິປຣາມາໂສ ຈ ນ ໂຫຕິ ປຈ຺ຈຍຆາເຕນ. ເຕນາຫ ‘‘ເອຕ຺ຕາວຕາ ປຐມມຄ຺ໂຄ ທສ຺ສິໂຕ’’ຕິ ອນວເສສທິຏ຺ຐິປຫານກິຕ຺ຕນໂຕ. ປຫີນາ ວິກ຺ຂມ຺ຠິຕາ. ອິທໍ ປນາຕິ ‘‘ຣູປສ຺ມິ’’ນ຺ຕິອາທິ.

ທຸຕິຍອນິຈ຺ຈສຸຕ຺ຕວຓ຺ຓນາ ນິຏ຺ຐິຕາ.

໕. ສມນຸປສ຺ສນາສຸຕ຺ຕວຓ຺ຓນາ

໔໗. ປຣິປຸຓ຺ຓຄາຫວເສນາຕິ ປຎ຺ຈກ຺ຂນ຺ເຘ ອເສເສຕ຺ວາ ເອກຊ຺ຌໍ ‘‘ອຕ຺ຕາ’’ຕິ ຄຫຓວເສນ. ເອເຕສໍ ປຎ຺ຈນ຺ນໍ ອຸປາທານກ຺ຂນ຺ຘານໍ ອຎ຺ຎຕຣໍ ‘‘ອຕ຺ຕາ’’ຕິ ສມນຸປສ຺ສນ຺ຕິ. ອິຕີຕິ ເອວໍ. ຍສ຺ສ ປຸຄ຺ຄລສ຺ສ ອຍໍ ອຕ຺ຕທິຏ຺ຐິສງ຺ຂາຕາ ສມນຸປສ຺ສນາ ອຕ຺ຖິ ປຏິປກ຺ເຂນ ອວິຫຕຕ຺ຕາ ສໍວິຊ຺ຊຕິ. ປຎ຺ຈນ຺ນໍ ອິນ຺ທ຺ຣິຍານນ຺ຕິ ຈກ຺ຂາທີນໍ ອິນ຺ທ຺ຣິຍານໍ.

ອາຣມ຺ມຓນ຺ຕິ ກມ຺ມວິຎ຺ຎາຓສ຺ສ ອາຣມ຺ມຓໍ. ມານວເສນ ຈ ທິຏ຺ຐິວເສນ ຈ ‘‘ອສ຺ມີ’’ຕິ ຄາເຫ ສິຊ຺ຌນ຺ເຕ ຕໍສຫຄຕາ ຕຓ຺ຫາປິ ຕຄ຺ຄຫິຕາວ ໂຫຕີຕິ ວຸຕ຺ຕໍ ‘‘ຕຓ຺ຫາມານທິຏ຺ຐິວເສນ ອສ຺ມີຕິ ເອວມ຺ປິສ຺ສ ໂຫຕີ’’ຕິ. ຄເຫຕ຺ວາຕິ ອຫໍກາຣວຕ຺ຖຸວເສນ ຄເຫຕ຺ວາ. ອຍໍ ອຫມສ຺ມີຕິ ອຍໍ ຈກ຺ຂາທິໂກ, ສຸຂາທິໂກ ວາ ອຫມສ຺ມິ. ‘‘ຣູປີ ອຕ຺ຕາ ອໂຣໂຄ ປຣໍ ມຣຓາ’’ຕິ ເອວມາທິຄຫຓວເສນ ປວຕ຺ຕນໂຕ ວຸຕ຺ຕໍ ‘‘ຣູປີ ຠວິສ຺ສນ຺ຕິອາທີນິ ສພ຺ພານິ ສສ຺ສຕເມວ ຠຊນ຺ຕີ’’ຕິ. ວິປສ຺ສນາຠິນິເວສໂຕ ປຸພ຺ເພ ຍເຖວາກາຣານິ ປຎ຺ຈິນ຺ທ຺ຣິຍານິ, ອຖ ວິປສ຺ສນາຠິນິເວສໂຕ ປຣໍ ເຕເນວາກາເຣນ ຐິເຕສຸ ຈກ຺ຂາທີສຸ ອິນ຺ທ຺ຣິເຍສຸ ອວິຊ຺ຊາ ປຫີຍຕິ ວິປສ຺ສນໍ ວຑ຺ຒເອຕ຺ວາ ມຄ຺ຄສ຺ສ ອຸປ຺ປາທເນນ, ອຖ ມຄ຺ຄປຣມ຺ປຣາຍ ອຣຫຕ຺ຕມຄ຺ຄວິຊ຺ຊາ ອຸປ຺ປຊ຺ຊຕິ. ຕຓ຺ຫາມານທິຏ຺ຐິໂຍ ກມ຺ມສມ຺ຠາຣຠາວໂຕ. ກມ຺ມສ຺ສ…ເປ… ເອໂກ ສນ຺ຘີຕິ ເຫຕຸຜລສນ຺ຘິ. ປຸນ ເອໂກ ສນ຺ຘີຕິ ຜລເຫຕຸສນ຺ຘິມາຫ. ຕໂຍ ປປຎ຺ຈາ ອຕີໂຕ ອທ຺ຘາ ອຕີຕຠວອທ຺ຘານໍ ເຕສໍ ອຘິປ຺ເປຕຕ຺ຕາ. ອນາຄຕສ຺ສ ປຈ຺ຈໂຍ ທສ຺ສິໂຕ ອສ຺ສຸຕວໂຕ ປຸຖຸຊ຺ຊນສ຺ສ ວເສນ. ສຸຕວໂຕ ປນ ອຣິຍສາວກສ຺ສ ວເສນ ວຏ຺ຏສ຺ສ ວູປສໂມ ທສ຺ສິໂຕຕິ.

ສມນຸປສ຺ສນາສຸຕ຺ຕວຓ຺ຓນາ ນິຏ຺ຐິຕາ.

໖. ຂນ຺ຘສຸຕ຺ຕວຓ຺ຓນາ

໔໘. ຕເຖວາຕິ ອາຣມ຺ມຓຠາເວເນວ. ອາຣມ຺ມຓກຣຓວເສນ ອຸປາທາເນຫິ ອຸປາທາຕພ຺ພນ຺ຕິ ອຸປາທານິຍໍ. ອິຘາປີຕິ ອຸປາທານກ຺ຂນ຺ເຘສຸປິ. ວິຠາຄຕ຺ເຖ ຄຍ຺ຫມາເນ ອນິຏ຺ຐປ຺ປສງ຺ໂຄປິ ສິຍາ, ອຠິຘມ຺ເມ ຈ ຣາສຏ຺ໂຐ ເອວ ອາຄໂຕ, ‘‘ຕເທກຊ຺ຌໍ ອຠິສໍຍຸຫິຕ຺ວາ’’ຕິ ວຈນໂຕ ‘‘ຣາສຏ຺ເຐນ’’ອິຈ຺ເຈວ ວຸຕ຺ຕໍ.

ຂນ຺ຘສຸຕ຺ຕວຓ຺ຓນາ ນິຏ຺ຐິຕາ.

໗-໘. ໂສຓສຸຕ຺ຕາທິວຓ຺ຓນາ

໔໙-໕໐. ວິສິຏ຺ໂຐຕິ ປຘາໂນ. ອຸຕ຺ຕໂມຕິ ອຸກ຺ກຏ຺ໂຐ. ອຎ຺ຎໍ ກິໍ ຠເວຍ຺ຍາຕິ ອຎ຺ຎໍ ກິໍ ກາຣຓໍ ຠເວຍ຺ຍ ຕຖາ ສມນຸປສ຺ສນາຍ ອຎ຺ເຎສໍ ອວິຊ຺ຊມານຕາຍ ວຈນປຣິຏ຺ຐິຕິປຠິນ຺ນໂຕ. ວຊິຣເຠທເທສນໍ ນາມ ອຕ຺ຖໂຕ ເຕປຣິວຏ຺ຏເທສນາ.

ໂສຓສຸຕ຺ຕາທິວຓ຺ຓນາ ນິຏ຺ຐິຕາ.

໙-໑໐. ນນ຺ທິກ຺ຂຍສຸຕ຺ຕາທິວຓ຺ຓນາ

໕໑-໕໒. ນວມທສເມສູຕິ ສຸຕ຺ຕທ຺ວຍໍ ສເຫວ ອຸທ຺ຘຏໍ, ທ຺ວີສຸປິ ອຕ຺ຖວຓ຺ຓນາຍ ສຣິກ຺ຂຠາວໂຕ. ນນ຺ທນຏ຺ເຐນ ນນ຺ທີ, ຣຎ຺ຊນຏ຺ເຐນ ຣາໂຄ. ສຕິປິ ສທ຺ທຕ຺ຖໂຕ ເຠເທ ‘‘ອິເມສໍ ອຕ຺ຖໂຕ ນິນ຺ນານາກຣຓຕາຍາ’’ຕິ ວຕ຺ວາປິ ປຫາຍກຘມ຺ມເຠເທນ ປນ ລພ຺ຠເຕວ ເຠທມຕ຺ຕາຕິ ທສ຺ເສຕຸໍ ‘‘ນິພ຺ພິທານຸປສ຺ສນາຍ ວາ’’ຕິອາທິ ວຸຕ຺ຕໍ. ວິຣຊ຺ຊນ຺ໂຕ ຣາຄໍ ປຊຫຕີຕິ ສມ຺ພນ຺ໂຘ. ເອຕ຺ຕາວຕາຕິ ‘‘ນນ຺ທິກ຺ຂຍາ ຣາຄກ຺ຂໂຍ’’ຕິ ເອຕ຺ຕາວຕາ. ວິປສ຺ສນໍ ນິຏ຺ຐເປຕ຺ວາ ວິປສ຺ສນາກິຈ຺ຈສ຺ສ ປຣິໂຍສາເນນ. ຣາຄກ຺ຂຍາຕິ ວຸຏ຺ຐານຄາມິນິປຣິໂຍສານາຍ ວິປສ຺ສນາຍ ຣາຄສ຺ສ ເຂປິຕຕ຺ຕາ. ອນນ຺ຕຣໍ ອຸປ຺ປນ຺ເນນ ອຣິຍມຄ຺ເຄນ ສມຸຈ຺ເຉທວເສນ ນນ຺ທິກ຺ຂໂຍຕິ. ເຕນາຫ ‘‘ອິຘ ມຄ຺ຄໍ ທສ຺ເສຕ຺ວາ’’ຕິ. ອນນ຺ຕຣໍ ປນ ອຸປ຺ປນ຺ເນນ ອຣິຍຜເລນ ປຏິປສ຺ສທ຺ຘິວເສນ ນນ຺ທິຣາຄກ຺ຂຍາ ສພ຺ພໍ ສໍກິເລສໂຕ ຈິຕ຺ຕໍ ວິມຸຈ຺ຈຕີຕິ. ເຕນາຫ ‘‘ຜລໍ ທສ຺ສິຕ’’ນ຺ຕິ.

ນນ຺ທິກ຺ຂຍສຸຕ຺ຕາທິວຓ຺ຓນາ ນິຏ຺ຐິຕາ.

ອຕ຺ຕທີປວຄ຺ຄວຓ຺ຓນາ ນິຏ຺ຐິຕາ.

ມູລປຓ຺ຓາສໂກ ສມຕ຺ໂຕ.