໓. ເຜຓປິຓ຺ຑູປມສຸຕ຺ຕວຓ຺ຓນາ

໙໕. ເກນຈິ ກາຣເຓນ ຍຸຊ຺ຌິຕ຺ວາ ຄເຫຕຸໍ ນ ສກ຺ກາຕິ ອຍຸຊ຺ຌາ ນາມ. ນິວຕ຺ຕນຏ຺ຐາເນຕິ ອຸທກປ຺ປວາຫສ຺ສ ນິວຕ຺ຕິຕຏ຺ຐາເນ.

ອນຸໂສຕາຄມເນຕິ ອນຸໂສຕໍ ອາຄມນເຫຕຸ, ‘‘ອນຸໂສຕາຄມເນນາ’’ຕິ ວາ ປາໂຐ. ອນຸປຸພ຺ເພນ ປວຑ຺ຒິຕ຺ວາຕິ ຕຕ຺ຖ ຕຕ຺ຖ ອຸຏ຺ຐິຕານໍ ຂຸທ຺ທກມຫນ຺ຕານໍ ເຜຓປິຓ຺ຑານໍ ສໍສຄ຺ເຄນ ປກາຣໂຕ ວຸທ຺ຘິໍ ປຕ຺ວາ. ອາວເຫຍ຺ຍາຕິ ອາເນຕ຺ວາ ວເຫຍ຺ຍ. ກາຣເຓນ ອຸປປຣິກ຺ເຂຍ຺ຍາຕິ ຎາເຓນ ວີມໍເສຍ຺ຍ. ‘‘ສາໂຣ ນາມ ກິໍ ຠເວຍ຺ຍາ’’ຕິ ວຕ຺ວາ ສພ຺ພໂສ ຕທຠາວໍ ທສ຺ເສນ຺ໂຕ ‘‘ວິລີຍິຕ຺ວາ ວິທ຺ຘໍເສຍ຺ເຍວາ’’ຕິ ອາຫ. ເຕນ ຣູປມ຺ປິ ນິສ຺ສາຣຕາຍ ຠິຊ຺ຊເຕວາຕິ ທສ຺ເສຕິ. ຍຖາ ຫິ ອນິຈ຺ຈຕາຍ ອສາຣຕາສິທ຺ຘິ, ເອວໍ ອສາຣຕາຍປິ ອນິຈ຺ຈຕາສິທ຺ຘີຕິ ອນິຈ຺ຈຕາຍ ເອວ ນິຈ຺ຈສາຣໍ ຖິຣຠາວສາຣໍ ຘຸວສາຣໍ ສາມີນິວາສີກາຣກຠູຕສ຺ສ ອຕ຺ຕໂນ ວເສ ປວຕ຺ຕນມ຺ເປຕ຺ຖ ນຕ຺ຖີຕິ ອາຫ ‘‘ຣູປມ຺ປິ…ເປ… ນິສ຺ສາຣເມວາ’’ຕິ. ໂສຕິ ເຜຓປິຓ຺ໂຑ. ຄຫິໂຕປິ ອຸປາເຍນ ຕມຕ຺ຖໍ ນ ສາເຘຕິ ອນຣຫຕ຺ຕາ. ອເນກສນ຺ຘິຆຏິໂຕ ຕຖາ ຕຖາ ຆຏິໂຕ ຫຸຕ຺ວາ.

ພ຺ຍາມມຕ຺ຕມ຺ປິ ເອຕຣຫິ ມນຸສ຺ສານໍ ວເສນ. ອວສ຺ສເມວ ຠິຊ຺ຊຕິ ຕຣງ຺ຄພ຺ຠາຫຕໍ ຫຸຕ຺ວາ.

ຕສ຺ມິໍ ຕສ຺ມິໍ ອຸທກພິນ຺ທຸມ຺ຫິ ປຕິເຕ. ອຸທກຕລນ຺ຕິ ອຸທກປິຏ຺ຐິໍ. ອຎ຺ຎໂຕ ປຕນ຺ຕໍ ອຸທກພິນ຺ທຸໍ. ອຸທກຊລ຺ລນ຺ຕິ ສນ຺ຕານກໍ ຫຸຕ຺ວາ ຐິຕໍ ອຸທກມລໍ. ຕຎ຺ຫິ ສໍກຑ຺ຒິຕ຺ວາ ຕໂຕ ອຸທກໍ ປຸຏໍ ກໂຣຕິ, ຕສ຺ມິໍ ປຸເຏ ປຸພ຺ພຸຬສມຎ຺ຎາ. ວຕ຺ຖຸນ຺ຕິ ຈກ຺ຂາທິວຕ຺ຖຸໍ. ອາຣມ຺ມຓນ຺ຕິ ຣູປາທິອາຣມ຺ມຓໍ. ກິເລສຊລ຺ລນ຺ຕິ ປຸຣິມສິທ຺ຘໍ, ປຏິລພ຺ຠມານໍ ວາ ກິເລສມລໍ. ຜສ຺ສສງ຺ຆຏ຺ຏນນ຺ຕິ ຜສ຺ສສໂມຘານໍ. ປຸພ຺ພຸຬສທິສາ ມຸຫຸຕ຺ຕຣມຓີຍຕາຍ. ຍສ຺ມາ ຆມ຺ມກາເລ ສູຣິຍາຕປສນ຺ຕາປາຠິນິພ຺ພຕ຺ຕຣສ຺ມິຊາລນິປາເຕ ຕາທິເສ ຠູມິປເທເສ ອິໂຕ ຈິໂຕ ສມຸຄ຺ຄຕວາຕເວຄສມຸທ຺ຘຏວິຣຸຬ຺ຫສງ຺ຂາເຕສຸ ປຣິພ຺ຠມນ຺ເຕສຸ ອຓຸປຣມາຓຸຕຊ຺ຊາຣິປ຺ປກາເຣສຸ ຠູຕສງ຺ຆາເຕສຸ ມຣີຈິສມຎ຺ຎາ, ຕສ຺ມາ ສພ຺ພໂສ ສາຣວິຣຫິຕາຕິ ວຸຕ຺ຕໍ ‘‘ສຎ຺ຎາປິ ອສາຣກຏ຺ເຐນ ມຣີຈິສທິສາ’’ຕິ. ຍສ຺ມາ ຈ ປສ຺ສນ຺ຕານໍ ເຍຠຸຍ຺ເຍນ ອຸທກາກາເຣນ ຂາຍຕິ, ຕສ຺ມາ ‘‘ຄເຫຕ຺ວາ ປິວິຕຸໍ ວາ’’ຕິອາທິ ວຸຕ຺ຕໍ. ນີລາທິອນຸຠວນຕ຺ຖາຍາຕິ ນີລາທິອາຣມ຺ມຓສ຺ສ ອນຸຠວນຕ຺ຖາຍ. ຜນ຺ທຕີຕິ ຜນ຺ທນາກາຣປ຺ປຕ຺ຕາ ວິຍ ໂຫຕິ ອປ຺ປຫີນຕຓ຺ຫສ຺ສ ປຸຄ຺ຄລສ຺ສ. ວິປ຺ປລມ຺ເຠຕິ ອປ຺ປຫີນວິປລ຺ລາສໍ ປຸຄ຺ຄລໍ. ເຕນາຫ ‘‘ອິທໍ ນີລກ’’ນ຺ຕິອາທິ. ສຎ຺ຎາວິປລ຺ລາສໂຕ ຫິ ຈິຕ຺ຕວິປລ຺ລາໂສ, ຕໂຕ ທິຏ຺ຐິວິປລ຺ລາໂສຕິ. ວິປ຺ປລມ຺ຠເນນາຕິ ວິປ຺ປກາຣວເສເນວ ອາຣມ຺ມຓສ຺ສ ລມ຺ຠເນນ. ວິປ຺ປກາຣວເສນ ຫິ ເອຕໍ ລມ຺ຠນໍ, ຍທິທໍ ອນຸທກເມວ ອຸທກໍ ກຕ຺ວາ ທສ຺ສນໍ ອນຄຣເມວ ນຄຣໍ ກຕ຺ວາ ຄນ຺ຘພ຺ພນາຏກາທິທສ຺ສນໍ.

ກຸກ຺ກຸກໍ ວຸຈ຺ຈຕິ ກທລິກ຺ຂນ຺ຘສ຺ສ ສພ຺ພປຕ຺ຕວຏ຺ຏີນໍ ອພ຺ຠນ຺ຕເຣ ທຓ຺ຑກນ຺ຕິ ອາຫ ‘‘ອກຸກ຺ກຸກຊາຕນ຺ຕິ ອນ຺ໂຕ ອສຎ຺ຊາຕຆນທຓ຺ຑກ’’ນ຺ຕິ. ນ ຕຖາ ໂຫຕີຕິ ຍທຕ຺ຖາຍ ອຸປນີຕໍ, ຕທຕ຺ຖາຍ ນ ໂຫຕິ. ນານາລກ຺ຂໂຓຕິ ນານາສຠາໂວ. ສງ຺ຂາຣກ຺ຂນ຺ໂຘວາຕິ ເອໂກ ສງ຺ຂາຣກ຺ຂນ຺ໂຘຕ຺ເວວ ວຸຈ຺ຈຕິ.

ອສ຺ສາຕິ ປຸຣິສສ຺ສ. ອປຄຕປຏລປິຬກນ຺ຕິ ອປຄຕປຏລໂທສຎ຺ເຈວ ອປຄຕປິຬກໂທສຎ຺ຈ. ອສາຣຠາວທສ຺ສນສມຕ຺ຖນ຺ຕິ ອສາຣສ຺ສ ອສາຣຠາວທສ຺ສນສມຕ຺ຖໍ. ອິຕ຺ຕຣາຕິ ປຣິຕ຺ຕກາລາ, ນ ຈິຣຏ຺ຐິຕິກາ. ເຕນາຫ ‘‘ລຫຸປຈ຺ຈຸປຏ຺ຐານາ’’ຕິ. ອຎ຺ຎເທວ ຈ ອາຄມນກາເລ ຈິຕ຺ຕນ຺ຕິ ອິທຎ຺ຈ ໂອຬາຣິກວເສເນວ ວຸຕ຺ຕໍ. ຕຖາ ຫິ ເອກຈ຺ຉຣກ຺ຂເຓ ອເນກໂກຏິສຕສຫສ຺ສສງ຺ຂານິ ຈິຕ຺ຕານິ ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕິ. ມາຍາຍ ທສ຺ສິຕໍ ຣູປໍ ມາຍາຕິ ວຸຕ຺ຕໍ. ຍໍກິຎ຺ຈິເທວ ກປາລິຏ຺ຐກປາສາຓວາລິກາທິໍ. ວຎ຺ເຈຕີຕິ ອສຸວຓ຺ຓເມວ ສຸວຓ຺ຓນ຺ຕິ, ອມຸຕ຺ຕເມວ ມຸຕ຺ຕາຕິອາທິນາ ວຎ຺ເຈຕິ. ນນຸ ຈ ສຎ຺ຎາປິ ມຣີຈິ ວິຍ ວິປ຺ປລມ຺ເຠຕິ ວຎ຺ເຈຕິ, ອິທມ຺ປິ ວິຎ຺ຎາຓໍ ມາຍາ ວິຍ ວຎ຺ເຈຕີຕິ ໂກ ອິເມສໍ ວິເສໂສຕິ? ວຈນຕ຺ໂຖ ເນສໍ ສາຘາຣໂຓ. ຕຖາປິ ສຎ຺ຎາ ອນຸທກໍເຍວ ອຸທກໍ ກຕ຺ວາ ຄາຫາເປນ຺ຕີ, ອປຸຣິສຎ຺ເຎວ ປຸຣິສໍ ກຕ຺ວາ ຄາຫາເປນ຺ຕີ ວິປ຺ປລມ຺ຠນວເສນ ອປ຺ປວິສຍາ, ວິຎ຺ຎາຓໍ ປນ ຍໍ ກິຎ຺ຈິ ອຕໍສຠາວໍ ຕໍ ກຕ຺ວາ ທສ຺ເສນ຺ຕີ ມາຍາ ວິຍ ມຫາວິສຍາ. ເຕນາຫ ‘‘ຍໍກິຎ຺ຈິເທວາ’’ຕິອາທິ. ເອວມ຺ປີຕິ ອຕິວິຍ ລຫຸປຣິວຕ຺ຕິຠາເວນປິ ມາຍາສທິສນ຺ຕິ.

ເທສິຕາຕິ ເອວໍ ເທສິຕາ ເຜຓປິຓ຺ຑາທິອຸປມາຫິ.

ຠູຣິ ວຸຈ຺ຈຕິ ປຖວີ, ສຓ຺ຫຏ຺ເຐນ ວິປຸລຏ຺ເຐນ ຈ ຠູຣິສທິສປຎ຺ຎຕາຍ ຠູຣິປຎ຺ໂຎ. ເຕນາຫ ‘‘ສຓ຺ຫປຎ຺ເຎນ ເຈວາ’’ຕິອາທິ. ກິມິຄຓາທີນນ຺ຕິ ອາທິ-ສທ຺ເທນ ອເນກຄິຊ຺ຌາທິເກ ສງ຺ຄຓ຺ຫາຕິ. ປເວຓີຕິ ຘມ຺ມປພນ຺ໂຘ. ພາລລາປິນີ ‘‘ອຫໍ ມມາ’’ຕິອາທິນາ. ເສສຘາຕຸໂຍ ຄເຫຕ຺ວາວ ຠິຊ຺ຊຕິ ເອກຸປ຺ປາເທກນິໂຣຘຕ຺ຕາ, ວຕ຺ຖຸຣູປນິສ຺ສຍປຈ຺ຈຍຕ຺ຕາ ‘‘ອຍ’’ນ຺ຕິ ນ ວິສຸໍ ຄຫິຕໍ. ວຘຠາວໂຕຕິ ວຘສ຺ສ ມຣຓສ຺ສ ອຕ຺ຖິຠາວໂຕ. ສຣຓນ຺ຕິ ປຏິສຣຓໍ.

ເຜຓປິຓ຺ຑູປມສຸຕ຺ຕວຓ຺ຓນາ ນິຏ຺ຐິຕາ.