໕. ສມາຘິສຸຕ຺ຕວຓ຺ຓນາ

໕. ສມາຘີຕິ ອປ຺ປນາສມາຘິ, ອຸປຈາຣສມາຘິ ວາ. ກມ຺ມຏ຺ຐານນ຺ຕິ ສມາຘິປາທກໍ ວິປສ຺ສນາກມ຺ມຏ຺ຐານໍ. ‘‘ຜາຕິໍ ຄມິສ຺ສຕີ’’ຕິ ປາໂຐ. ປຕ຺ເຖຕີຕິ ‘‘ອໂຫ ວຕ ເມ ອີທິສໍ ຣູປໍ ຠເວຍ຺ຍາ’’ຕິ. ອຠິວທຕີຕິ ຕຓ຺ຫາທິຏ຺ຐິວເສນ ອຠິນິເວສໍ ວທຕິ. ເຕນາຫ ‘‘ຕາຍ ອຠິນນ຺ທນາຍາ’’ຕິອາທິ. ‘‘ອໂຫ ປິຍໍ ອິຏ຺ຐ’’ນ຺ຕິ ວຈີເຠເທ ອສຕິປິ ຕຖາ ໂລຠຸປ຺ປາເທ ສຕິ ອຠິວທຕິເຍວ ນາມ. ເຕນາຫ ‘‘ວາຈໍ ອຠິນ຺ທນ຺ໂຕ’’ຕິ. ‘‘ມມ ອິທ’’ນ຺ຕິ ອຕ຺ຕໂນ ປຣິຓາເມຕ຺ວາ ອນຎ຺ຎໂຄຈຣໍ ວິຍ ກຕ຺ວາ ຄຓ຺ຫນ຺ໂຕ ອຊ຺ໂຌສາຍ ຕິຏ຺ຐຕິ ນາມາຕິ ທສ຺ເສນ຺ໂຕ ອາຫ ‘‘ຄິລິຕ຺ວາຕິ ປຣິນິຏ຺ຐເປຕ຺ວາ ຄຓ຺ຫາຕີ’’ຕິ. ‘‘ອຠິນນ຺ທຕີ’’ຕິອາທໂຍ ປຸພ຺ພຠາຄວເສນ ວຸຕ຺ຕາ, ‘‘ອຸປ຺ປຊ຺ຊຕິ ນນ຺ທີ’’ຕິ ທ຺ວາຣປ຺ປຕ຺ຕວເສນ. ປຐເມຫິ ປເທຫິ ອນຸສໂຍ, ປຈ຺ຉິເມນ ປຣິຍຸຏ຺ຐານນ຺ຕິ ເກຈິ ‘‘ຄຫຓຏ຺ເຐນ ອຸປາທານ’’ນ຺ຕິ ກຕ຺ວາ. ນາຠິນນ຺ທຕິ ນາຠິວທຕີຕິ ເອຕ຺ຖ ເຫຏ຺ຐາ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ. ນ ‘‘ອິຏ຺ຐໍ ກນ຺ຕ’’ນ຺ຕິ ວທຕີຕິ ‘‘ອິຏ຺ຐ’’ນ຺ຕິ ນ ວທຕິ, ‘‘ກນ຺ຕ’’ນ຺ຕິ ນ ວທຕິ. ນາຠິວທຕິເຍວ ຕຓ຺ຫາຍ ອນຸປາທິຍຕ຺ຕາ.

ສມາຘິສຸຕ຺ຕວຓ຺ຓນາ ນິຏ຺ຐິຕາ.