໗. ອາຓິສຸຕ຺ຕວຓ຺ຓນາ

໒໒໙. ອຎ຺ເຎ ຣາຊາໂນ ຈ ຠາຄໍ ຄຓ຺ຫນ຺ຕາ ອິເມ ວິຍ ທສຠາຄໍ ຄຓ຺ຫນ຺ຕີຕິ ເຕສມຍໍ ອນຸຄຕິ ປຎ຺ຎາຍຕິ. ມຫາຊນສ຺ສ ອານຍນໂຕ ອານໂກຕິ ອາຫ ‘‘ເອວໍລທ຺ຘນາໂມ’’ຕິ. ອິທານິ ຕໍ ອາທິໂຕ ປຏ຺ຐາຍ ອາຄມນານຸກ຺ກມໍ ທສ຺ເສຕຸໍ ‘‘ຫິມວນ຺ເຕ ກິຣາ’’ຕິອາທິມາຫ. ກເຣຓຸນ຺ຕິ ກເຣຓຸກໍ, ຫຕ຺ຖິນິນ຺ຕິ ອຕ຺ໂຖ. ສກ຺ກຣິໍສູຕິ ອນຕ຺ຖປຣິຫຣຓວເສນ ປສຕ຺ຖູປຫາຣວເສນ ຈ ປູເຊສຸໍ. ໂອຕຣີຕິ ກຸຬີຣທຫໍ ປາວິສິ. ປຏິກ຺ກມິຕ຺ວາ ຐປນວເສນ ອປກ຺ກມິຕ຺ວາ ປຕິ.

ສຸວຓ຺ຓຣຊຕາທິມຍນ຺ຕິ ກິສ຺ມິຎ຺ຈິ ຉິທ຺ເທ ສຸວຓ຺ຓມຍໍ, ກິສ຺ມິຎ຺ຈິ ຣຊຕມຍໍ, ກິສ຺ມິຎ຺ຈິ ຜລິກມຍໍ ອາຓິໍ ຆຏຍິໍສຸ ພນ຺ຘິໍສຸ. ປຸພ຺ເພ ຜຣິຕ຺ວາ ຕິຏ຺ຐນ຺ຕສ຺ສ ທ຺ວາທສ ໂຍຊນານິ ປມາໂຓ ເອຕສ຺ສາຕິ ທ຺ວາທສໂຍຊນປ຺ປມາໂຓ, ສທ຺ໂທ. ອຖສ຺ສ ອເນກສຕກາເລ ຄຈ຺ຉນ຺ເຕ ອນ຺ໂຕສາລາຍມ຺ປິ ທຸກ຺ເຂນ ສຸຍ຺ຍິຕ຺ຖ ອາຓິສງ຺ຆາຏມຕ຺ຕຕ຺ຕາ.

ຄມ຺ຠີຣາຕິ ອຄາຘາ ທຸກ຺ໂຂຄາຬ຺ຫາ. ສລ຺ລສຸຕ຺ຕຎ຺ຫິ ‘‘ອນິມິຕ຺ຕມນຎ຺ຎາຕ’’ນ຺ຕິອາທິນາ ປາຬິວເສນ ຄມ຺ຠີຣໍ, ນ ອຕ຺ຖຄມ຺ຠີຣໍ. ຕຖາ ຫິ ຕຕ຺ຖ ຕາ ຕາ ຄາຖາ ທຸວິຎ຺ເຎຍ຺ຍຣູປາ ຕິຏ຺ຐນ຺ຕິ, ທຸວິຎ຺ເຎຍ຺ຍໍ ຎາເຓນ ທຸກ຺ໂຂຄາຫນ຺ຕິ ກຕ຺ວາ ‘‘ຄມ຺ຠີຣ’’ນ຺ຕິ ວຸຈ຺ຈຕິ. ປຸພ຺ພາປຣມ຺ເປຕ຺ຖ ກາສຎ຺ຈິ ຄາຖານໍ ທຸວິຎ຺ເຎຍ຺ຍຕາຍ ທຸກ຺ໂຂຄາຫເມວ, ຕສ຺ມາ ຕໍ ປາຬິວເສນ ‘‘ຄມ຺ຠີຣ’’ນ຺ຕິ ວຸຕ຺ຕໍ ‘‘ປາຬິວເສນ ຄມ຺ຠີຣາ ສລ຺ລສຸຕ຺ຕສທິສາ’’ຕິ. ອິມິນາ ນເຍນ ‘‘ອຕ຺ຖວເສນ ຄມ຺ຠີຣາ’’ຕິ ເອຕ຺ຖ ອຕ຺ໂຖ ເວທິຕພ຺ໂພ. ມຫາເວທລ຺ລສຸຕ຺ຕສ຺ສ ອຕ຺ຖວເສນ ຄມ຺ຠີຣຕາ ປາກຏາເຍວ. ໂລກໍ ອຸຕ຺ຕຣຕີຕິ ໂລກຸຕ຺ຕໂຣ, ນວວິຘອປ຺ປມາຓຘມ຺ໂມ, ໂສ ອຕ຺ຖຠູໂຕ ເອເຕສໍ ອຕ຺ຖີຕິ ໂລກຸຕ຺ຕຣາ. ເຕນາຫ ‘‘ໂລກຸຕ຺ຕຣອຕ຺ຖທີປກາ’’ຕິ. ສຕ຺ຕສຸຎ຺ຎຕຘມ຺ມມຕ຺ຕເມວາຕິ ສຕ຺ເຕນ ອຕ຺ຕນາ ສຸຎ຺ຎຕໍ ເກວລໍ ຘມ຺ມມຕ຺ຕເມວ. ອຸຄ຺ຄເຫຕພ຺ພໍ ປຣິຍາປຸຓິຕພ຺ພນ຺ຕິ ຈ ລິງ຺ຄວຈນວິປລ຺ລາເສນ ວຸຕ຺ຕນ຺ຕິ ອາຫ ‘‘ອຸຄ຺ຄເຫຕພ຺ເພ ຈ ປຣິຍາປຸຓິຕພ຺ເພ ຈາ’’ຕິ. ກວິຕາຕິ ກວິໂນ ກມ຺ມໍ ກວິກຕາ. ຍສ຺ສ ປນ ຍໍ ກມ຺ມໍ, ຕໍ ເຕນ ກຕນ຺ຕິ ວຸຈ຺ຈຕີຕິ ອາຫ ‘‘ກວິຕາຕິ ກວີຫິ ກຕາ’’ຕິ. ອິຕຣໍ ‘‘ກາເວຍ຺ຍາ’’ຕິ ປທໍ, ກພ຺ພນ຺ຕິ ວຸຕ຺ຕໍ ໂຫຕິ. ‘‘ກພ຺ພ’’ນ຺ຕິ ຈ ກວິນາ ວຸຕ຺ຕນ຺ຕິ ອຕ຺ໂຖ. ເຕນາຫ ‘‘ຕສ຺ເສວ ເວວຈນ’’ນ຺ຕິ. ຈິຕ຺ຕກ຺ຂຣາຕິ ວິຈິຕ຺ຣາກາຣອກ຺ຂຣາ. ສາສນໂຕ ພຫິຠູຕາຕິ ນ ສາສນາວຈຣາ. ເຕສໍ ສາວເກຫີຕິ ‘‘ພຸທ຺ຘານໍ ສາວກາ’’ຕິ ອປຎ຺ຎາຕານໍ ເຍສໍ ເກສຎ຺ຈິ ສາວເກຫິ. ອນຸຄ຺ຄຍ຺ຫມານາຕິ ນ ອຸຄ຺ຄຍ຺ຫມານາ ສວນຘາຣຓປຣິຈຍອຕ຺ຖູປປຣິກ຺ຂາທິວເສນ ອນຸຄ຺ຄຍ຺ຫມານາ. ອນ຺ຕຣຘາຍນ຺ຕິ ອທສ຺ສນໍ ຄຈ຺ຉນ຺ຕິ.

ອາຓິສຸຕ຺ຕວຓ຺ຓນາ ນິຏ຺ຐິຕາ.