໙. ໂອປມ຺ມສໍຍຸຕ຺ຕໍ

໑. ກູຏສຸຕ຺ຕວຓ຺ຓນາ

໒໒໓. ກູຏໍ ຄຈ຺ຉນ຺ຕີຕິ ກູຏຈ຺ຉິທ຺ທສ຺ສ ອນຸປວິສນວເສນ ກູຏໍ ຄຈ຺ຉນ຺ຕິ. ຍາ ຈ ໂຄປານສິໂຍ ໂຄປານສນ຺ຕຣຄຕາ, ຕາປິ ກູຏໍ ອາຫຈ຺ຈ ຐາເນນ ກູຏງ຺ຄມາ. ທຸວິຘາປິ ກູເຏ ສໂມສຣຓາ. ກູຏສ຺ສ ສມຸຄ຺ຆາເຕນ ວິນາເສນ ຠິຊ຺ຊເນນ. ອວິຊ຺ຊາຍ ສມຸຄ຺ຆາເຕນາຕິ ອວິຊ຺ຊາຍ ອຈ຺ຈນ຺ຕເມວ ອປ຺ປວຕ຺ຕິຍາ. ເຕນ ຈ ໂມກ຺ຂຘມ຺ມາຘິຄເມນ ຕທນຸຣູປຘມ຺ມາຘິຄໂມ ທສ຺ສິໂຕ. ອປ຺ປມຕ຺ຕາຕິ ປນ ອິມິນາ ຕສ຺ສ ອຸປາໂຍ ທສ຺ສິໂຕ.

ກູຏສຸຕ຺ຕວຓ຺ຓນາ ນິຏ຺ຐິຕາ.

໒. ນຂສິຂສຸຕ຺ຕວຓ຺ຓນາ

໒໒໔. ເອວໍ ອປ຺ປກາ ຍຖາ ນຂສິຂາຍ ອາໂຣປິຕປໍສຸ, ສຸຄຕິສໍວຕ຺ຕນິຍສ຺ສ ກມ຺ມສ຺ສ ອປ຺ປກຕ຺ຕາ ເອວໍ ເທເວສຸປີຕິ ຫີນູທາຫຣຓວເສນ ວຸຕ຺ຕໍ. ອປ຺ປຕຣາ ຫິ ສຕ຺ຕາ ເຍ ເທເວສຸ ຊາຍນ຺ຕິ, ຕຎ຺ຈ ໂຂ ກາມເທເວສຸ. ອິຕເຣສຸ ປນ ວຕ຺ຕພ຺ພເມວ ນຕ຺ຖິ.

ນຂສິຂສຸຕ຺ຕວຓ຺ຓນາ ນິຏ຺ຐິຕາ.

໓. ກຸລສຸຕ຺ຕວຓ຺ຓນາ

໒໒໕. ວິຘໍສຍນ຺ຕິ ວິເຫຐຍນ຺ຕິ. ວຑ຺ຒິຕາຕິ ຠາວນາປາຣິປູຣິວເສນ ປຣິພ຺ຣູຫິຕາ. ປຸນປ຺ປຸນໍ ກຕາຕິ ຠາວນາຍ ພຫຸລີກຣເຓນ ອປຣາປຣໍ ປວຕ຺ຕິຕາ ຍຸຕ຺ຕຍານໍ ວິຍ ກຕາຕິ ຍຖາ ຍຸຕ຺ຕໍ ອາຊຎ຺ຎຣຖໍ ເຉເກນ ສາຣຖິນາ ອຘິຏ຺ຐິຕໍ ຍຖາຣຸຈິ ປວຕ຺ຕຕິ, ເອວໍ ຍຖາຣຸຈິ ປວຕ຺ຕິຍາ ຄມິຕາ. ປຕິຏ຺ຐານຏ຺ເຐນາຕິ ອຘິຏ຺ຐານຏ຺ເຐນ. ວຕ຺ຖຸ ວິຍ ກຕາ ສພ຺ພໂສ ອຸປກ຺ກິເລສວິໂສຘເນນ ສຸວິໂສຘິຕມຣິຍາທໍ ວິຍ ກຕາ. ອຘິຏ຺ຐິຕາຕິ ປຏິປກ຺ຂທູຣີຠາວໂຕ ສຸຠາວິຕຠາເວນ ອວິກມ຺ປເນຍ຺ຍຕາຍ ຐປິຕາ. ສມນ຺ຕໂຕ ຈິຕາຕິ ສພ຺ພຠາເຄນ ຠາວນູປຈຍໍ ຄມິຕາ. ເຕນາຫ ‘‘ສຸວຑ຺ຒິຕາ’’ຕິ. ສຸຏ຺ຐຸ ສມາຣທ຺ຘາຕິ ເມຕ຺ຕາຠາວນາຍ ມຕ຺ຖກປ຺ປຕ຺ຕິຍາ ສມ຺ມເທວ ສມ຺ປາທິຕາ.

ກຸລສຸຕ຺ຕວຓ຺ຓນາ ນິຏ຺ຐິຕາ.

໔. ໂອກ຺ຂາສຸຕ຺ຕວຓ຺ຓນາ

໒໒໖. ມຫາມຸຂອຸກ຺ຂລີນນ຺ຕິ ມຫາມຸຂານໍ ມຫນ຺ຕໂກຬຸມ຺ພານໍ ສຕໍ. ປຓີຕໂຠຊນຠຣິຕານນ຺ຕິ ສປ຺ປິມຘຸສກ຺ກຣາທີຫິ ອຸປນີຕປຓີຕໂຠຊເນຫິ ປຣິປຸຓ຺ຓານໍ. ຕສ຺ສາຕິ ປາຐສ຺ສ. ໂຄທຸຫນມຕ຺ຕນ຺ຕິ ໂຄໂທຫນເວລາມຕ຺ຕໍ. ຕໍ ປນ ກິຕ຺ຕກໍ ອຘິປ຺ເປຕນ຺ຕິ ອາຫ ‘‘ຄາວິຍາ’’ຕິອາທິ. ສພ຺ພສຕ຺ເຕສຸ ຫິຕຜຣຓນ຺ຕິ ອໂນຘິໂສເມຕ຺ຕາຠາວນມາຫ – ເມຕ຺ຕຈິຕ຺ຕໍ ອປ຺ປນາປ຺ປຕ຺ຕໍ ຠາເວຕຸໍ ສກ຺ໂກຕີຕິ ອຘິປ຺ປາໂຍ. ຕມ຺ປິ ຕໂຕ ຍຖາວຸຕ຺ຕທານໂຕ ມຫປ຺ຜລຕຣນ຺ຕິ.

ໂອກ຺ຂາສຸຕ຺ຕວຓ຺ຓນາ ນິຏ຺ຐິຕາ.

໕. ສຕ຺ຕິສຸຕ຺ຕວຓ຺ຓນາ

໒໒໗. ອຄ຺ເຄ ປຫຣິຕ຺ວາຕິ ຕິຓ຺ຫຜລສຕ຺ຕິຍາ ອຄ຺ເຄ ຫຕ຺ເຖນ ວາ ມຸຏ຺ຐິນາ ວາ ປຫາຣໍ ທຕ຺ວາ. ກປ຺ປາສວຏ຺ຏິໍ ວິຍາຕິ ປຫຕກປ຺ປາສປິຓ຺ຑໍ ວິຍ. ນິຍ຺ຍາສວຏ຺ຏິໍ ວິຍາຕິ ຜລສຓ຺ຐານໍ ນິຍ຺ຍາສປິຓ຺ຑໍ ວິຍ. ເອກໂຕ ກຕ຺ວາຕິ ກລິກາທິຠາເວນ ວີສຕິໍສປິຓ຺ຑານິ ເອກຊ຺ຌໍ ກຕ຺ວາ. ອລ຺ລິຍາເປນ຺ໂຕ ປິຓ຺ຑໍ ກໂຣນ຺ໂຕ. ປຏິເລເຓຕີຕິ ປຏິລີນຍຕິ ນາເມຕິ. ອລ຺ລິຍາເປນ຺ໂຕ ເຕ ທ຺ເວປິ ຘາຣາ ເອກໂຕ ສມ຺ຜຸສາເປນ຺ໂຕ. ປຏິໂກຏ຺ເຏຕີຕິ ປຏິປຫຣຕິ. ຕຕ຺ຖ ຂຓ຺ຑໍ ວິຍ ນິຍ຺ຍາໂສ. ກປ຺ປາສວຏ຺ຏນກຣຓີຍນ຺ຕິ ວິຫຕສ຺ສ ກປ຺ປາສສ຺ສ ປຏິສໍຫຣຓວເສນ ພນ຺ຘນທຓ຺ຑໍ. ປວຕ຺ເຕນ຺ໂຕຕິ ກປ຺ປາສສ຺ສ ສໍເວລ຺ລນວເສນ ປວຕ຺ເຕນ຺ໂຕ.

ສຕ຺ຕິສຸຕ຺ຕວຓ຺ຓນາ ນິຏ຺ຐິຕາ.

໖. ຘນຸຄ຺ຄຫສຸຕ຺ຕວຓ຺ຓນາ

໒໒໘. ທຬ຺ຫຘນຸໂນຕິ ຖິຣຕຣຘນຸໂນ. ອິທານິ ຕສ຺ສ ຖິຣຕຣຠາວໍ ປຣິຈ຺ເຉທໂຕ ທສ຺ເສຕຸໍ ‘‘ທຬ຺ຫຘນູ’’ຕິອາທິ ວຸຕ຺ຕໍ. ຕຕ຺ຖ ທ຺ວິສຫສ຺ສຖາມນ຺ຕິ ປລານໍ ທ຺ວິສຫສ຺ສຖາມໍ. ວຸຕ຺ຕເມວຕ຺ຖໍ ປາກຏຕຣໍ ກຕ຺ວາ ທສ຺ເສຕຸໍ ‘‘ຍສ຺ສາ’’ຕິອາທິມາຫ. ຕຕ຺ຖ ຍສ຺ສາຕິ ຘນຸໂນ. ອາໂຣປິຕສ຺ສາຕິ ຊິຍໍ ອາໂຣປິຕສ຺ສ. ຊິຍາພທ຺ໂຘຕິ ຊິຍາຍ ພທ຺ໂຘ. ປຖວິໂຕ ມຸຈ຺ຈຕິ, ເອຕໍ ‘‘ທ຺ວິສຫສ຺ສຖາມ’’ນ຺ຕິ ເວທິຕພ຺ພໍ. ໂລຫສີສາທີນນ຺ຕິ ກາຬໂລຫຕມ຺ພໂລຫສີສາທີນໍ. ຠາໂຣຕິ ປຸຣິສຠາໂຣ, ໂສ ປນ ມຊ຺ຌິມປຸຣິສສ຺ສ ວເສນ ເອທິສໍ ຕສ຺ສ ພລໍ ທຏ຺ຐພ຺ພໍ. ອຸຄ຺ຄຫິຕສິປ຺ປາ ຘນຸເວທສິກ຺ຂາວເສນ. ຈິຓ຺ຓວສີຠາວາ ລກ຺ເຂສຸ ອວິຣຊ຺ຌນສຣກ຺ເຂປວເສນ. ກຕໍ ຣາຊກຸລາທີສຸ ອຸປຄນ຺ຕ຺ວາ ອສນໍ ສຣກ຺ເຂໂປ ເອເຕຫີຕິ ກຕູປສນາຕິ ອາຫ ‘‘ຣາຊກຸລາທີສຸ ທສ຺ສິຕສິປ຺ປາ’’ຕິ.

‘‘ໂພຘິສຕ຺ໂຕ ຈຕ຺ຕາຣິ ກຓ຺ຑານິ ອາຫຣີ’’ຕິ ວຕ຺ວາ ຕເມວ ອຕ຺ຖໍ ວິຕ຺ຖາຣໂຕ ທສ຺ເສນ຺ໂຕ ‘‘ຕທາ ກິຣາ’’ຕິອາທິມາຫ. ຕຕ຺ຖ ຊວິສ຺ສາມາຕິ ຘາວິສ຺ສາມ. ອຄ຺ຄິ ອຸຏ຺ຐຫີຕິ ສີຆປຕນສນ຺ຕາເປນ ຈ ສູຣິຍຣສ຺ມິສນ຺ຕາປສ຺ສ ອາສນ຺ນຠາເວນ ຈ ອຸສຸມາ ອຸຏ຺ຐຫິ. ປກ຺ຂປຎ຺ຊເຣນາຕິ ປກ຺ຂຊາລນ຺ຕເຣນ.

ນິວຕ຺ຕິຕ຺ວາຕິ ‘‘ນິປ຺ປໂຍຊນມິທໍ ຊວນ’’ນ຺ຕິ ນິວຕ຺ຕິຕ຺ວາ. ປຕ຺ຕກຏາເຫນ ໂອຕ຺ຖຏປຕ຺ໂຕ ວິຍາຕິ ປິຫິຕປຕ຺ໂຕ ວິຍ ອໂຫສິ, ເວຄສາ ປຕເນນ ນຄຣສ຺ສ ອຸປຣິ ອາກາສສ຺ສ ນິຣິກ຺ຂຓໍ ອໂຫສິ. ສຎ຺ຈາຣິຕຕ຺ຕາ ອເນກຫໍສສຫສ຺ສສທິໂສ ປຎ຺ຎາຍິ ເສຍ຺ຍຖາປິ ໂພຘິສຕ຺ຕສ຺ສ ຘນຸຄ຺ຄຫກາເລ ສຣກູຏາທິທສ຺ສເນ.

ທຸກ຺ກຣນ຺ຕິ ຕສ຺ສ ອທສ຺ສນໍ ສນ຺ຘາຍາຫ, ນ ອຕ຺ຕໂນ ປຕນໍ. ສູຣິຍມຓ຺ຑລຎ຺ຫິ ອຕິສີເຆນ ຊເວນ ຄຈ຺ຉນ຺ຕມ຺ປິ ປຎ຺ຎາສໂຍຊນາຍາມວິຕ຺ຖຕໍ ອຕ຺ຕໂນ ວິປຸລຕາຍ ປຠສ຺ສຣຕາຍ ຈ ສຕ຺ຕານໍ ຈກ຺ຂຸສ຺ສ ໂຄຈຣຠາວໍ ຄຈ຺ຉຕິ, ຊວນຫໍໂສ ປນ ຕາທິເສນ ສູຣິເຍນ ສທ຺ຘິໍ ຊເວນ ຄຈ຺ຉນ຺ໂຕ ນ ປຎ຺ຎາເຍຍ຺ຍ. ຕສ຺ມາ ວຸຕ຺ຕໍ ‘‘ນ ສກ຺ກາ ຕຍາ ປສ຺ສິຕຸ’’ນ຺ຕິ. ຈຕ຺ຕາໂຣ ອກ຺ຂຓເວຘິໂນ. ຄນ຺ຕ຺ວາ ຄຫິເຕ ໂສຕຸໍ ຆຓ຺ຑໍ ປິຬນ຺ຘາເປຕ຺ວາ ສຍໍ ປຸຣຕ຺ຖາຠິມຸໂຂ ນິສິນ຺ໂນ. ປຸຣຕ຺ຖິມທິສາຠິມຸຂໍ ຄຕກຓ຺ຑໍ ສນ຺ຘາຍາຫ ‘‘ປຐມກຓ຺ເຑເນວ ສທ຺ຘິໍ ອຸປ຺ປຕິຕ຺ວາ’’ຕິ. ເຕ ຈຕ຺ຕາຣິ ກຓ຺ຑານິ ເອກກ຺ຂເຓເຍວ ຂິປິໍສຸ.

ອາຍຸໍ ສງ຺ຂໂຣຕິ ເອເຕນາຕິ ອາຍຸສງ຺ຂາໂຣ. ຍຖາ ຫິ ກມ຺ມຊຣູປານໍ ປວຕ຺ຕິ ຊີວິຕິນ຺ທ຺ຣິຍປຏິພທ຺ຘາ, ເອວໍ ອຕ຺ຕຠາວສ຺ສ ປວຕ຺ຕິ ຕປ຺ປຏິພທ຺ຘາຕິ. ພຫຸວຈນນິທ຺ເທໂສ ປນ ປາຬິຍໍ ເອກສ຺ມິໍ ຂເຓ ອເນກສຕສງ຺ຂສ຺ສ ຊີວິຕິນ຺ທ຺ຣິຍສ຺ສ ອຸປລພ຺ຠນໂຕ. ຕໍ ຊີວິຕິນ຺ທ຺ຣິຍໍ. ຕໂຕ ຍຖາວຸຕ຺ຕເທວຕານໍ ຊວໂຕ ສີຆຕຣໍ ຂີຍຕິ ອິຕ຺ຕຣຂຓຕ຺ຕາ. ວຸຕ຺ຕຎ຺ເຫຕໍ –

‘‘ຊີວິຕໍ ອຕ຺ຕຠາໂວ ຈ, ສຸຂທຸກ຺ຂາ ຈ ເກວລາ;

ເອກຈິຕ຺ຕສມາຍຸຕ຺ຕາ, ລຫຸໂສ ວຕ຺ຕເຕ ຂໂຓ’’ຕິ. (ມຫານິ. ໑໐);

ເຠໂທຕິ ຠງ຺ໂຄ. ນ ສກ຺ກາ ປຎ຺ຎາເປຕຸໍ ຕໂຕປິ ອຕິວິຍ ອິຕ຺ຕຣຂຓຕ຺ຕາ.

ຘນຸຄ຺ຄຫສຸຕ຺ຕວຓ຺ຓນາ ນິຏ຺ຐິຕາ.

໗. ອາຓິສຸຕ຺ຕວຓ຺ຓນາ

໒໒໙. ອຎ຺ເຎ ຣາຊາໂນ ຈ ຠາຄໍ ຄຓ຺ຫນ຺ຕາ ອິເມ ວິຍ ທສຠາຄໍ ຄຓ຺ຫນ຺ຕີຕິ ເຕສມຍໍ ອນຸຄຕິ ປຎ຺ຎາຍຕິ. ມຫາຊນສ຺ສ ອານຍນໂຕ ອານໂກຕິ ອາຫ ‘‘ເອວໍລທ຺ຘນາໂມ’’ຕິ. ອິທານິ ຕໍ ອາທິໂຕ ປຏ຺ຐາຍ ອາຄມນານຸກ຺ກມໍ ທສ຺ເສຕຸໍ ‘‘ຫິມວນ຺ເຕ ກິຣາ’’ຕິອາທິມາຫ. ກເຣຓຸນ຺ຕິ ກເຣຓຸກໍ, ຫຕ຺ຖິນິນ຺ຕິ ອຕ຺ໂຖ. ສກ຺ກຣິໍສູຕິ ອນຕ຺ຖປຣິຫຣຓວເສນ ປສຕ຺ຖູປຫາຣວເສນ ຈ ປູເຊສຸໍ. ໂອຕຣີຕິ ກຸຬີຣທຫໍ ປາວິສິ. ປຏິກ຺ກມິຕ຺ວາ ຐປນວເສນ ອປກ຺ກມິຕ຺ວາ ປຕິ.

ສຸວຓ຺ຓຣຊຕາທິມຍນ຺ຕິ ກິສ຺ມິຎ຺ຈິ ຉິທ຺ເທ ສຸວຓ຺ຓມຍໍ, ກິສ຺ມິຎ຺ຈິ ຣຊຕມຍໍ, ກິສ຺ມິຎ຺ຈິ ຜລິກມຍໍ ອາຓິໍ ຆຏຍິໍສຸ ພນ຺ຘິໍສຸ. ປຸພ຺ເພ ຜຣິຕ຺ວາ ຕິຏ຺ຐນ຺ຕສ຺ສ ທ຺ວາທສ ໂຍຊນານິ ປມາໂຓ ເອຕສ຺ສາຕິ ທ຺ວາທສໂຍຊນປ຺ປມາໂຓ, ສທ຺ໂທ. ອຖສ຺ສ ອເນກສຕກາເລ ຄຈ຺ຉນ຺ເຕ ອນ຺ໂຕສາລາຍມ຺ປິ ທຸກ຺ເຂນ ສຸຍ຺ຍິຕ຺ຖ ອາຓິສງ຺ຆາຏມຕ຺ຕຕ຺ຕາ.

ຄມ຺ຠີຣາຕິ ອຄາຘາ ທຸກ຺ໂຂຄາຬ຺ຫາ. ສລ຺ລສຸຕ຺ຕຎ຺ຫິ ‘‘ອນິມິຕ຺ຕມນຎ຺ຎາຕ’’ນ຺ຕິອາທິນາ ປາຬິວເສນ ຄມ຺ຠີຣໍ, ນ ອຕ຺ຖຄມ຺ຠີຣໍ. ຕຖາ ຫິ ຕຕ຺ຖ ຕາ ຕາ ຄາຖາ ທຸວິຎ຺ເຎຍ຺ຍຣູປາ ຕິຏ຺ຐນ຺ຕິ, ທຸວິຎ຺ເຎຍ຺ຍໍ ຎາເຓນ ທຸກ຺ໂຂຄາຫນ຺ຕິ ກຕ຺ວາ ‘‘ຄມ຺ຠີຣ’’ນ຺ຕິ ວຸຈ຺ຈຕິ. ປຸພ຺ພາປຣມ຺ເປຕ຺ຖ ກາສຎ຺ຈິ ຄາຖານໍ ທຸວິຎ຺ເຎຍ຺ຍຕາຍ ທຸກ຺ໂຂຄາຫເມວ, ຕສ຺ມາ ຕໍ ປາຬິວເສນ ‘‘ຄມ຺ຠີຣ’’ນ຺ຕິ ວຸຕ຺ຕໍ ‘‘ປາຬິວເສນ ຄມ຺ຠີຣາ ສລ຺ລສຸຕ຺ຕສທິສາ’’ຕິ. ອິມິນາ ນເຍນ ‘‘ອຕ຺ຖວເສນ ຄມ຺ຠີຣາ’’ຕິ ເອຕ຺ຖ ອຕ຺ໂຖ ເວທິຕພ຺ໂພ. ມຫາເວທລ຺ລສຸຕ຺ຕສ຺ສ ອຕ຺ຖວເສນ ຄມ຺ຠີຣຕາ ປາກຏາເຍວ. ໂລກໍ ອຸຕ຺ຕຣຕີຕິ ໂລກຸຕ຺ຕໂຣ, ນວວິຘອປ຺ປມາຓຘມ຺ໂມ, ໂສ ອຕ຺ຖຠູໂຕ ເອເຕສໍ ອຕ຺ຖີຕິ ໂລກຸຕ຺ຕຣາ. ເຕນາຫ ‘‘ໂລກຸຕ຺ຕຣອຕ຺ຖທີປກາ’’ຕິ. ສຕ຺ຕສຸຎ຺ຎຕຘມ຺ມມຕ຺ຕເມວາຕິ ສຕ຺ເຕນ ອຕ຺ຕນາ ສຸຎ຺ຎຕໍ ເກວລໍ ຘມ຺ມມຕ຺ຕເມວ. ອຸຄ຺ຄເຫຕພ຺ພໍ ປຣິຍາປຸຓິຕພ຺ພນ຺ຕິ ຈ ລິງ຺ຄວຈນວິປລ຺ລາເສນ ວຸຕ຺ຕນ຺ຕິ ອາຫ ‘‘ອຸຄ຺ຄເຫຕພ຺ເພ ຈ ປຣິຍາປຸຓິຕພ຺ເພ ຈາ’’ຕິ. ກວິຕາຕິ ກວິໂນ ກມ຺ມໍ ກວິກຕາ. ຍສ຺ສ ປນ ຍໍ ກມ຺ມໍ, ຕໍ ເຕນ ກຕນ຺ຕິ ວຸຈ຺ຈຕີຕິ ອາຫ ‘‘ກວິຕາຕິ ກວີຫິ ກຕາ’’ຕິ. ອິຕຣໍ ‘‘ກາເວຍ຺ຍາ’’ຕິ ປທໍ, ກພ຺ພນ຺ຕິ ວຸຕ຺ຕໍ ໂຫຕິ. ‘‘ກພ຺ພ’’ນ຺ຕິ ຈ ກວິນາ ວຸຕ຺ຕນ຺ຕິ ອຕ຺ໂຖ. ເຕນາຫ ‘‘ຕສ຺ເສວ ເວວຈນ’’ນ຺ຕິ. ຈິຕ຺ຕກ຺ຂຣາຕິ ວິຈິຕ຺ຣາກາຣອກ຺ຂຣາ. ສາສນໂຕ ພຫິຠູຕາຕິ ນ ສາສນາວຈຣາ. ເຕສໍ ສາວເກຫີຕິ ‘‘ພຸທ຺ຘານໍ ສາວກາ’’ຕິ ອປຎ຺ຎາຕານໍ ເຍສໍ ເກສຎ຺ຈິ ສາວເກຫິ. ອນຸຄ຺ຄຍ຺ຫມານາຕິ ນ ອຸຄ຺ຄຍ຺ຫມານາ ສວນຘາຣຓປຣິຈຍອຕ຺ຖູປປຣິກ຺ຂາທິວເສນ ອນຸຄ຺ຄຍ຺ຫມານາ. ອນ຺ຕຣຘາຍນ຺ຕິ ອທສ຺ສນໍ ຄຈ຺ຉນ຺ຕິ.

ອາຓິສຸຕ຺ຕວຓ຺ຓນາ ນິຏ຺ຐິຕາ.

໘. ກລິງ຺ຄຣສຸຕ຺ຕວຓ຺ຓນາ

໒໓໐. ກລິງ຺ຄຣໍ ວຸຈ຺ຈຕິ ຂຸທ຺ທກທາຣຸຂຓ຺ຑໍ, ຕໍ ອຸປຘານໍ ເອເຕສນ຺ຕິ ກລິງ຺ຄຣູປຘານາ. ລິຈ຺ຉວີ ປນ ຂທິຣທຓ຺ຑໍ ອຸປຘານໍ ກຕ຺ວາ ຕທາ ວິຫຣິໍສຸ. ຕສ຺ມາ ວຸຕ຺ຕໍ ‘‘ຂທິຣຆຏິກາສູ’’ຕິອາທິ. ປກຕິວິຊ຺ຊຸສຎ຺ຎິໂຕ ນຕ຺ຖິ ເອເຕສໍ ຂໂຓ ວິຊ຺ຌເນຕິ ອກ຺ຂຓເວຘິໂນ ຕໂຕ ສີຆຕຣໍ ວິຊ຺ຌນໂຕ. ‘‘ອກ຺ຂຓ’’ນ຺ຕິ ວິຊ຺ຊຸ ວຸຈ຺ຈຕິ ອິຕ຺ຕຣຂຓຕ຺ຕາ. ອກ຺ຂໂຓຠາເສນ ລກ຺ຂຓເວຘກາ ອກ຺ຂຓເວຘິໂນ. ອເນກຘາ ຠິນ຺ນສ຺ສ ວາລສ຺ສ ວິຊ຺ຌເນນ ວາລເວຘິໂນ. ວາເລກເທໂສ ຫິ ອິຘ ‘‘ວາໂລ’’ຕິ ຄຫິໂຕ.

ພຫຸເທວ ທິວສຠາຄໍ ປຘານານຸໂຍຄໂຕ ອຸປ຺ປນ຺ນທຣຖປຣິສ຺ສມວິໂນທນຕ຺ຖໍ ນ຺ຫາຍິຕ຺ວາ. ເຕ ສນ຺ຘາຍາຕິ ເຕ ຕຖາຣູເປ ປຘານກມ຺ມິກຠິກ຺ຂູ ສນ຺ຘາຍ. ອິທໍ ອິທານິ ວຸຈ຺ຈມານໍ ອຕ຺ຖຊາຕໍ ວຸຕ຺ຕໍ ໂປຣາຓຏ຺ຐກຖາຍໍ. ອຍມ຺ປິ ທີໂປຕິ ຕມ຺ພປຓ຺ຓິທີປມາຫ. ປຘານານຸຍຸຎ຺ຊນເວລາຍ ນິເວທນວເສນ ຕຕ຺ຖ ຕຕ຺ຖ ເອກຊ຺ຌໍ ປຫຕຆຓ຺ຑິນິຄ຺ໂຆເສເນວ ເອກຆຓ຺ຑິນິຄ຺ໂຆໂສ, ຕຕ຺ຖ ຕຕ຺ຖ ປຓ຺ຓສາລາທີສຸ ວສນ຺ຕານໍ ຠິກ຺ຂູນໍ ວເສນ ເອກປຘານຠູໂຕ. ນານາມຸໂຂຕິ ອນຸຣາຘປຸຣສ຺ສ ປຈ຺ຉິມທິສາຍໍ ເອໂກ ວິຫາໂຣ, ປິລິຈ຺ຉິໂກຬິນຄຣສ຺ສ ປຸຣຕ຺ຖິມທິສາຍໍ. ອຸຠຍຕ຺ຖ ປວຕ຺ຕຆຓ຺ຑິສທ຺ທາ ອນ຺ຕຣາປວຕ຺ຕຆຓ຺ຑິສທ຺ເທຫິ ມິສ຺ເສຕ຺ວາ ໂອສຣນ຺ຕິ. ກລ຺ຍາຓິຍໍ ປວຕ຺ຕຆຓ຺ຑິສທ຺ໂທ ຕຖາ ນາຄທີເປ.

ກລິງ຺ຄຣສຸຕ຺ຕວຓ຺ຓນາ ນິຏ຺ຐິຕາ.

໙. ນາຄສຸຕ຺ຕວຓ຺ຓນາ

໒໓໑. ອຕິກ຺ກນ຺ຕເວລນ຺ຕິ ຠຕ຺ຕານຸໂມທນອຸປນິສິນ຺ນກຖາເວລໂຕ ອຕິກ຺ກນ຺ຕເວລໍ. ອສມ຺ຠິນ຺ເນນາຕິ ສຣສມ຺ປຕ຺ຕິໂຕ ອສມ຺ຠິນ຺ເນນ, ສຣສ຺ສ ອຸຈ຺ຈາຣຓສມ຺ປຕ຺ຕິໍ ອປຣິຫາເປຕ຺ວາຕິ ອຕ຺ໂຖ. ອປຣິສຸທ຺ຘາສຍຕາຍ ເນວ ຄຸຓວຓ຺ຓາຍ ນ ຎາຓພລາຍ ໂຫຕິ. ຕນ຺ຕິ ຕໍ ຕຖາ ປຈ຺ຈຍານໍ ປຣິຠຸຎ຺ຊນໍ, ຕໍ ຕຖາ ມິຈ຺ຉາປຏິປຊ຺ຊນໍ.

ນາຄສຸຕ຺ຕວຓ຺ຓນາ ນິຏ຺ຐິຕາ.

໑໐. ພິຬາຣສຸຕ຺ຕວຓ຺ຓນາ

໒໓໒. ຆຣານໍ ສນ຺ຘີຕິ ຆເຣນ ຆຣສ຺ສ ສມ຺ພນ຺ຘຏ຺ຐານໍ. ສຫ ມເລນ ວຕ຺ຕຕີຕິ ສມລໍ. ເຄຫໂຕ ຄາມໂຕ ຈ ນິກ຺ຂມນຈນ຺ທນິກຏ຺ຐານໍ. ສງ຺ກາຣຏ຺ຐານນ຺ຕິ ສງ຺ກາຣກູຏໍ. ເກຈິ ‘‘ສນ຺ຘິສງ຺ກາຣກູຏຏ຺ຐານ’’ນ຺ຕິ ວທນ຺ຕິ. ວຸຏ຺ຐານນ຺ຕິ ອາປນ຺ນອາປຕ຺ຕິໂຕ, ນ ກິເລສໂຕ ວຸຏ຺ຐານໍ, ສຸທ຺ຘນ຺ເຕ ອຘິຏ຺ຐານໍ. ຕໍ ປນ ຍຖາອາປນ຺ນາຍ ອາປຕ຺ຕິຍາ ‘‘ເທສນາ’’ຕ຺ເວວ ວຸຈ຺ຈຕີຕິ ອາຫ ‘‘ເທສນາ ປຎ຺ຎາຍຕີ’’ຕິ.

ພິຬາຣສຸຕ຺ຕວຓ຺ຓນາ ນິຏ຺ຐິຕາ.

໑໑. ສິງ຺ຄາລສຸຕ຺ຕວຓ຺ຓນາ

໒໓໓. ເອຕ຺ຕກມ຺ປີຕິ ອິມິນາ ຊຣສິງ຺ຄາເລນ ລທ຺ຘພ຺ພໍ ຈິຕ຺ຕສ຺ສາທມຕ຺ຕມ຺ປິ ນ ລຠິສ຺ສຕິ ສກລເມວ ກປ຺ປໍ ສພ຺ພໂສ ອວີຈິຊາລາຫິ ນິຣນ຺ຕຣໍ ຌາຍມານຕາຍ ນິຈ຺ຈທຸກ຺ຂາຕຸຣຠາວໂຕ.

ສິງ຺ຄາລສຸຕ຺ຕວຓ຺ຓນາ ນິຏ຺ຐິຕາ.

໑໒. ທຸຕິຍສິງ຺ຄາລສຸຕ຺ຕວຓ຺ຓນາ

໒໓໔. ກຕຊານນນ຺ຕິ ກຕູປກາຣຊານນໍ. ກຕເວທິຕາຕິ ຕສ຺ເສວ ປເຣສໍ ປາກຏກຣຓວເສນ ຊານນເມວ. ອາຈາຣເມວາຕິ ກຕາປຣາຘເມວ.

ທຸຕິຍສິງ຺ຄາລສຸຕ຺ຕວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ໂອປມ຺ມສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.