໘. ລກ຺ຂຓສໍຍຸຕ຺ຕໍ

໑. ປຐມວຄ຺ໂຄ

໑. ອຏ຺ຐິສຸຕ຺ຕວຓ຺ຓນາ

໒໐໒. ອາຍສ຺ມາ ຈ ລກ຺ຂໂຓຕິອາທີສຸ ‘‘ໂກ ນາມາຍສ຺ມາ ລກ຺ຂໂຓ, ກສ຺ມາ ຈ ‘ລກ຺ຂໂຓ’ຕິ ນາມໍ ອໂຫສິ, ໂກ ຈາຍສ຺ມາ ໂມຄ຺ຄລ຺ລາໂນ, ກສ຺ມາ ຈ ສິຕໍ ປາຕ຺ວາກາສີ’’ຕິ ຕໍ ສພ຺ພໍ ປກາເສຕຸໍ ‘‘ຍ຺ວາຍ’’ນ຺ຕິອາທິ ອາຣທ຺ຘໍ. ລກ຺ຂຓສມ຺ປນ຺ເນນາຕິ ປຸຣິສລກ຺ຂຓສມ຺ປນ຺ເນນ.

ອີສໍ ຫສິຕໍ ‘‘ສິຕ’’ນ຺ຕິ ວຸຈ຺ຈຕີຕິ ອາຫ ‘‘ມນ຺ທຫສິຕ’’ນ຺ຕິ. ອຏ຺ຐິສງ຺ຂລິກນ຺ຕິ ນຍິທໍ ອວິຎ຺ຎາຓກໍ ອຏ຺ຐິສງ຺ຂລິກມຕ຺ຕໍ, ອຖ ໂຂ ເອໂກ ເປໂຕຕິ ອາຫ ‘‘ເປຕໂລເກ ນິພ຺ພຕ຺ຕ’’ນ຺ຕິ. ເອເຕ ອຕ຺ຕຠາວາຕິ ເປຕຕ຺ຕຠາວາ. ນ ອາປາຖໍ ອາຄຈ຺ຉນ຺ຕີຕິ ເທວຕ຺ຕຠາວາ ວິຍ ນ ອາປາຖໍ ອາຄຈ຺ຉນ຺ຕິ ປກຕິຍາ. ເຕສໍ ປນ ຣຸຈິຍາ ອາປາຖໍ ອາຄຈ຺ເຉຍ຺ຍຸໍ ມນຸສ຺ສານໍ. ທຸກ຺ຂາຠິຠູຕານໍ ອນາຖຠາວທສ຺ສນປທຏ຺ຐານາ ກຣຸຓາຕິ ອາຫ ‘‘ກາຣຸຎ຺ເຎ ກຕ຺ຕພ຺ເພ’’ຕິ. ອຕ຺ຕໂນ ຈ ສມ຺ປຕ຺ຕິໍ ພຸທ຺ຘຎາຓສ຺ສ ຈ ສມ຺ປຕ຺ຕິນ຺ຕິ ປຈ຺ເຈກໍ ສມ຺ປຕ຺ຕິສທ຺ໂທ ໂຍເຊຕພ຺ໂພ. ຕທຸຠຍໍ ວິຠາເວຕຸໍ ‘‘ຕໍ ຫີ’’ຕິອາທິ ວຸຕ຺ຕໍ. ຕຕ຺ຖ ອຕ຺ຕໂນ ສມ຺ປຕ຺ຕິໍ ອນຸສ຺ສຣິຕ຺ວາ ສິຕໍ ປາຕ຺ວາກາສີຕິ ປທໍ ອາເນຕ຺ວາ ສມ຺ພນ຺ຘິຕພ຺ພໍ. ຘມ຺ມຘາຕູຕິ ສພ຺ພຎ຺ຎຸຕຎ຺ຎາຓໍ ສນ຺ຘາຍ ວທຕິ. ຘມ຺ມຘາຕູຕິ ວາ ຘມ຺ມານໍ ສຠາໂວ.

ອິຕໂຣຕິ ລກ຺ຂຓຕ຺ເຖໂຣ. ອຸປປຕ຺ຕີຕິ ຊາຕິ. ອຸປປຕ຺ຕິສີເສນ ຫິ ຕຖາຣູປໍ ອຕ຺ຕຠາວໍ ວທຕິ. ໂລຫຕຸຓ຺ຑເກຫີຕິ ໂລຫມເຍເຫວ ຕຸຓ຺ຑເກຫິ. ຈຣນ຺ຕີຕິ ອາກາເສນ ຄຈ຺ຉນ຺ຕິ. ອຈ຺ຉຣິຍໍ ວຕາຕິ ຄຣຫຈ຺ຉຣິຍໍ ນາເມຕໍ. ຈກ຺ຂຸຠູຕາຕິ ສມ຺ປຕ຺ຕທິພ຺ພຈກ຺ຂຸກາ, ໂລກສ຺ສ ຈກ຺ຂຸຠູຕາຕິ ເອວໍ ວາ ເອຕ຺ຖ ອຕ຺ໂຖ ທຏ຺ຐພ຺ໂພ.

ຍຕ຺ຣາຕິ ເຫຕຸອຕ຺ເຖ ນິປາໂຕຕິ ອາຫ ‘‘ຍຕ຺ຣາຕິ ກາຣຓວຈນ’’ນ຺ຕິ. ອຎ຺ຎຕ຺ຣ ຫິ ‘‘ຍຕ຺ຣ ຫິ ນາມາ’’ຕິ ອຕ຺ໂຖ ວຸຈ຺ຈຕິ. ອປ຺ປມາເຓ ສຕ຺ຕນິກາເຍ ເຕ ຈ ໂຂ ວິຠາເຄນ ກາມຠວາທິເຠເທ ຠເວ, ນິຣຍາທິເຠທາ ຄຕິໂຍ, ນານຕ຺ຕກາຍນານຕ຺ຕສຎ຺ຎິອາທິວິຎ຺ຎາຓຏ຺ຐິຕິໂຍ, ຕຖາຣູເປ ສຕ຺ຕາວາເສ ຈ ສພ຺ພຎ຺ຎຸຕຎ຺ຎາຓຎ຺ຈ ເມ ອຸປເນຕຸໍ ປຈ຺ຈກ຺ຂໍ ກໂຣນ຺ເຕນ.

ໂຄຆາຕໂກຕິ ຄຸນ຺ນໍ ອຠິຓ຺ຫໍ ຫນນໂກ. ເຕນາຫ ‘‘ວຘິຕ຺ວາ ວຘິຕ຺ວາ’’ຕິ. ຕສ຺ສາຕິ ຄຸນ຺ນໍ ວຘກກມ຺ມສ຺ສ. ອປຣາປຣິຍກມ຺ມສ຺ສາຕິ ອປຣາປຣິຍເວທນີຍກມ຺ມສ຺ສ. ພລວຕາ ໂຄຆາຕກກມ຺ເມນ ວິປາເກ ທີຍມາເນ ອລທ຺ໂຘກາສໍ ອປຣາປຣິຍເວທນີຍໍ ຕສ຺ມິໍ ວິປກ຺ກວິປາເກ ອິທານິ ລທ຺ໂຘກາສໍ ‘‘ອວເສສກມ຺ມ’’ນ຺ຕິ ວຸຕ຺ຕໍ. ປຏິສນ຺ຘີຕິ ປາປກມ຺ມຊນິຕາ ປຏິສນ຺ຘິ. ກມ຺ມສຠາຄຕາຍາຕິ ກມ຺ມສທິສຠາເວນ. ອາຣມ຺ມຓສຠາຄຕາຍາຕິ ອາຣມ຺ມຓສ຺ສ ສຠາຄຠາເວນ ສທິສຠາເວນ. ຍາທິເສ ຫິ ອາຣມ຺ມເຓ ປຸພ຺ເພ ຕໍ ກມ຺ມໍ ຕສ຺ສ ຈ ວິປາໂກ ປວຕ຺ໂຕ, ຕາທິເສເຍວ ອາຣມ຺ມເຓ ອິທໍ ກມ຺ມໍ ອິມສ຺ສ ວິປາໂກ ຈ ປວຕ຺ໂຕຕິ ກຕ຺ວາ ວຸຕ຺ຕໍ ‘‘ຕສ຺ເສວ ກມ຺ມສ຺ສ ວິປາກາວເສເສນາ’’ຕິ. ຠວຕິ ຫິ ຕໍສທິເສປິ ຕພ຺ໂພຫາໂຣ ຍຖາ ‘‘ໂສ ເອວ ຕິຕ຺ຕິໂຣ, ຕານິເຍວ ໂອສຘານີ’’ຕິ. ນິມິຕ຺ຕໍ ອໂຫສີຕິ ປຸພ຺ເພ ກຕູປຈິຕສ຺ສ ເປຕູປປຕ຺ຕິນິພ຺ພຕ຺ຕນວເສນ ກໂຕກາສສ຺ສ ຕສ຺ສ ກມ຺ມສ຺ສ ນິມິຕ຺ຕຠູຕໍ ອິທານິ ຕຖາ ອຸປຏ຺ຐຫນ຺ຕໍ ຕສ຺ສ ວິປາກສ຺ສ ນິມິຕ຺ຕໍ ອາຣມ຺ມຓໍ ອໂຫສິ. ໂສຕິ ໂຄຆາຕໂກ. ອຏ຺ຐິສງ຺ຂລິກເປໂຕ ຊາໂຕ ກມ຺ມສຣິກ຺ຂກວິປາກຕາວເສນ.

ອຏ຺ຐິສຸຕ຺ຕວຓ຺ຓນາ ນິຏ຺ຐິຕາ.

໒. ເປສິສຸຕ຺ຕວຓ຺ຓນາ

໒໐໓. ໂຄມໍສເປສິໂຍ ກຕ຺ວາຕິ ຄາວິໍ ວຘິຕ຺ວາ ວຘິຕ຺ວາ ໂຄມໍສໍ ຜາເລຕ຺ວາ ເປສິໂຍ ກຕ຺ວາ. ສຸກ຺ຂາເປຕ຺ວາຕິ ກາລນ຺ຕຣໍ ຐປນຕ຺ຖໍ ສຸກ຺ຂາເປຕ຺ວາ. ສຸກ຺ຂາປິຍມານານໍ ມໍສເປສີນຎ຺ຫິ ວລ຺ລູຣສມຎ຺ຎາ.

ເປສິສຸຕ຺ຕວຓ຺ຓນາ ນິຏ຺ຐິຕາ.

໓. ປິຓ຺ຑສຸຕ຺ຕວຓ຺ຓນາ

໒໐໔. ນິປ຺ປກ຺ຂຈມ຺ເມຕິ ວິຄຕປກ຺ຂຈມ຺ເມ.

໔. ນິຈ຺ຉວິສຸຕ຺ຕວຓ຺ຓນາ

໒໐໕. ອຸຣພ຺ເຠ ຫນຕີຕິ ໂອຣພ຺ຠິໂກ. ເອຬເກຕິ ອເຊ.

໕. ອສິໂລມສຸຕ຺ຕວຓ຺ຓນາ

໒໐໖. ນິວາປປຸຏ຺ເຐຕິ ອຕ຺ຕນາ ທິນ຺ນນິວາເປນ ໂປສິເຕ. ອສິນາ ວຘິຕ຺ວາ ວຘິຕ຺ວາ ວິກ຺ກິຓນ຺ໂຕ.

໖. ສຕ຺ຕິສຸຕ຺ຕວຓ຺ຓນາ

໒໐໗. ເອກໍ ມິຄນ຺ຕິ ເອກໍ ທີປກມິຄໍ.

໗. ອຸສຸໂລມສຸຕ຺ຕວຓ຺ຓນາ

໒໐໘. ກາຣຓາຫີຕິ ຍາຕນາຫິ. ຎຕ຺ວາຕິ ກມ຺ມຏ຺ຐານໍ ຎຕ຺ວາ.

໘. ສູຈິໂລມສຸຕ຺ຕວຓ຺ຓນາ

໒໐໙. ສຸໂຓຕິ ປູເຣຕີຕິ ສູໂຕ, ອສ຺ສທມກາທິໂກ.

໙. ທຸຕິຍສູຈິໂລມສຸຕ຺ຕວຓ຺ຓນາ

໒໑໐. ເປສຸຎ຺ຎູປສໍຫາຣວເສນ ອິໂຕ ສຸຕໍ ອມຸຕ຺ຣ, ອມຸຕ຺ຣ ວາ ສຸຕໍ ອິຘ ສູເຈຕີຕິ ສູຈໂກ. ອນຍພ຺ຍສນໍ ປາເປສິ ມນຸສ຺ເສຕິ ສມ຺ພນ຺ໂຘ.

໑໐. ກຸມ຺ຠຓ຺ຑສຸຕ຺ຕວຓ຺ຓນາ

໒໑໑. ວິນິຈ຺ຉຍາມຈ຺ໂຈຕິ ຣຎ຺ຎາ ອຑ຺ຑກຣເຓ ຐປິໂຕ ວິນິຈ຺ຉຍມຫາມຕ຺ໂຕ. ໂສ ຫິ ຄາມຊນກາຍໍ ກູເຏຕິ ວຎ຺ເຈຕີຕິ ຄາມກູຏໂກຕິ ວຸຈ຺ຈຕິ. ເກຈິ ‘‘ຕາທິໂສ ເອວ ຄາມເຊຏ຺ຐໂກ ຄາມກູຏໂກ’’ຕິ ວທນ຺ຕິ. ສເມນ ຠວິຕພ຺ພໍ, ‘‘ຘມ຺ມຏ຺ໂຐ’’ຕິ ວຕ຺ຕພ຺ພໂຕ. ຣຫສ຺ສງ຺ເຄ ນິສີທນວເສນ ວິສມາ ນິສຊ຺ຊາວ ອໂຫສິ.

ກຸມ຺ຠຓ຺ຑສຸຕ຺ຕວຓ຺ຓນາ ນິຏ຺ຐິຕາ.

ປຐມວຄ຺ຄວຓ຺ຓນາ ນິຏ຺ຐິຕາ.

໒. ທຸຕິຍວຄ຺ໂຄ

໑. ສສີສກສຸຕ຺ຕວຓ຺ຓນາ

໒໑໒. ຜຸສນ຺ໂຕຕິ ເຖຍ຺ຍາຍ ຜຸສນ຺ໂຕ.

໓. ນິຈ຺ຉວິຕ຺ຖິສຸຕ຺ຕວຓ຺ຓນາ

໒໑໔. ມາຕຸຄາໂມ ສສ຺ສາມິໂກ ອຕ຺ຕໂນ ຜສ຺ເສ ອນິສ຺ສໂຣ. ວຏ຺ຏິຕ຺ວາຕິ ຠສ຺ສິຕ຺ວາ ອປຣໍ ຄນ຺ຕ຺ວາ.

໔. ມງ຺ຄຸລິຕ຺ຖິສຸຕ຺ຕວຓ຺ຓນາ

໒໑໕. ມງ຺ຄນວເສນ ອຸລຕີຕິ ມງ຺ຄຸລິ, ວິຣູປພີຠຈ຺ຉຠາເວນ ປວຕ຺ຕຕີຕິ ອຕ຺ໂຖ. ເຕນາຫ ‘‘ວິຣູປໍ ທຸທ຺ທສິກໍ ພີຠຈ຺ຉ’’ນ຺ຕິ.

໕. ໂອກິລິນີສຸຕ຺ຕວຓ຺ຓນາ

໒໑໖. ອຸທ຺ຘໍ ອຸທ຺ຘໍ ອຄ຺ຄິນາ ປກ຺ກສຣີຣຕາຍ ອຸປ຺ປກ຺ກໍ. ເຫຏ຺ຐໂຕ ປຄ຺ຆຣຓວເສນ ກິລິນ຺ນສຣີຣຕາຍ ໂອກິລິນີ. ອິໂຕ ຈິໂຕ ຈ ອງ຺ຄາຣສມ຺ປຣິກິຓ຺ຓຕາຍ ໂອກິຣິນີ. ເຕນາຫ ‘‘ສາ ກິຣາ’’ຕິອາທິ. ອງ຺ຄາຣຈິຕເກຕິ ອງ຺ຄາຣສຎ຺ຈເຍ. ສຣີຣໂຕ ປຄ຺ຆຣນ຺ຕິ ອສຸຈິທຸຄ຺ຄນ຺ຘເຊຄຸຈ຺ຉານິ ເສທຄຕານິ. ຕສ຺ສ ກິຣ ຣຎ຺ໂຎຕິ ຕສ຺ສ ກາລິງ຺ຄສ຺ສ ຣຎ຺ໂຎ. ນາຏກິນີຕິ ນຈ຺ເຈ ອຘິກຕາ ອິຕ຺ຖີ. ເສທນ຺ຕິ ເສທນໍ, ຕາປນນ຺ຕິ ອຕ຺ໂຖ.

ໂອກິລິນີສຸຕ຺ຕວຓ຺ຓນາ ນິຏ຺ຐິຕາ.

໖. ອສີສກສຸຕ຺ຕວຓ຺ຓນາ

໒໑໗. ອສີສກໍ ກພນ຺ຘໍ ຫຸຕ຺ວາ ນິພ຺ພຕ຺ຕິ ກມ຺ມາຍູຫນກາເລ ຕຖາ ນິມິຕ຺ຕຄ຺ຄຫຓປຣິຈຍໂຕ.

໗-໑໑. ປາປຠິກ຺ຂຸສຸຕ຺ຕາທິວຓ຺ຓນາ

໒໑໘-໒໒໒. ລາມກຠິກ຺ຂູຕິ ຫີນາຈາຣຕາຍ ລາມໂກ, ຠິກ຺ຂຸເວສຕາຍ, ຠິກ຺ຂາຫາເຣນ ຊີວນໂຕ ຈ ຠິກ຺ຂຸ. ຈິຕ຺ຕເກຬິນ຺ຕິ ຈິຕ຺ຕຣຸຈິຍໍ ຕໍ ຕໍ ກີຬນ຺ໂຕ. ອຍເມວາຕິ ຠິກ຺ຂຸວຕ຺ຖຸສ຺ມິໍ ວຸຕ຺ຕນໂຍ ເອວ.

ປາປຠິກ຺ຂຸສຸຕ຺ຕາທິວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ລກ຺ຂຓສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.