໔. ອນມຕຄ຺ຄສໍຍຸຕ຺ຕໍ

໑. ປຐມວຄ຺ໂຄ

໑. ຕິຓກຏ຺ຐສຸຕ຺ຕວຓ຺ຓນາ

໑໒໔. ອຸປສຄ຺ໂຄ ສມາສວິສເຍ ສສາຘນໍ ກິຣິຍໍ ທສ຺ເສຕີຕິ ວຸຕ຺ຕໍ ‘‘ຎາເຓນ ອນຸຄນ຺ຕ຺ວາປີ’’ຕິ. ວສ຺ສສຕໍ ວສ຺ສສຫສ຺ສນ຺ຕິ ນິທສ຺ສນມຕ຺ຕເມຕໍ, ຕໂຕ ຠິຍ຺ໂຍປິ ອນຸຄນ຺ຕ຺ວາ ອນມຕຄ຺ໂຄ ເອວ ສໍສາໂຣ. ອຄ຺ຄ-ສທ຺ໂທ ອິຘ ມຣິຍາທວຈໂນ, ອນຸທ຺ເທສິກຎ຺ເຈຕໍ ວຈນນ຺ຕິ ອາຫ ‘‘ອປຣິຈ຺ຉິນ຺ນປຸພ຺ພາປຣໂກຏິໂກ’’ຕິ. ອຎ຺ຎຖາ ອນ຺ຕິມຠວິກປຣິຈ຺ຉິນ຺ນກຕວິມຸຕ຺ຕິປຣິປາຈນີຍຘມ຺ມາທີນໍ ວເສນ ອປຣິຈ຺ຉິນ຺ນປຸພ຺ພາປຣໂກຏິ ນ ສກ຺ກາ ວຕ຺ຕຸໍ. ສໍສຣຓໍ ສໍສາໂຣ. ປຈ຺ຉິມາປິ ນ ປຎ຺ຎາຍຕິ ອນ຺ຘພາລານໍ ວເສນາຕິ ອຘິປ຺ປາໂຍ. ເຕນາຫ ຠຄວາ ‘‘ທີໂຆ ພາລານ ສໍສາໂຣ’’ຕິ (ຘ. ປ. ໖໐). ເວມຊ຺ເຌເຍວ ປນ ສຕ຺ຕາ ສໍສຣນ຺ຕິ ປຸພ຺ພາປຣໂກຏີນໍ ອລພ຺ຠນີຍຕ຺ຕາ. ອຕ຺ໂຖ ປຣິຕ຺ໂຕ ໂຫຕິ ຍຖາຠູຕາວໂພຘາຠາວໂຕ. ພຸທ຺ຘສມເຍຕິ ສາສເນຕິ ອຕ຺ໂຖ. ອຕ຺ໂຖ ມຫາ ຍຖາຠູຕາວໂພຘິສມ຺ຠວໂຕ, ອຕ຺ຖສ຺ສ ວິປຸລຕາຍ ຕໍສທິສາ ອຸປມາ ນຕ຺ຖີຕິ ປຣິຕ຺ຕໍເຍວ ອຸປມໍ ອາຫຣນ຺ຕີຕິ ອຘິປ຺ປາໂຍ. ອິທານິ ວຸຕ຺ຕເມວຕ຺ຖໍ ‘‘ປາຬິຍໍ ຫີ’’ຕິອາທິນາ ສມຕ຺ເຖຕິ. ມາຕຸ ມາຕໂຣຕິ ມາຕຸ ມາຕາມຫິໂຍ. ຕສ຺ເສວາຕິ ທຸກ຺ຂສ຺ເສວ. ຕິພ຺ພນ຺ຕິ ທຸກ຺ຂປຣິຍາໂຍຕິ.

ຕິຓກຏ຺ຐສຸຕ຺ຕວຓ຺ຓນາ ນິຏ຺ຐິຕາ.

໒. ປຖວີສຸຕ຺ຕວຓ຺ຓນາ

໑໒໕. ມຫາປຖວິນ຺ຕິ ອວິເສເສນ ອນວເສສປຣິຍາທາຍິນີຕິ ອາຫ ‘‘ຈກ຺ກວາຬປຣິຍນ຺ຕ’’ນ຺ຕິ. ປຣິກປ຺ປວຈນຎ຺ເຈຕໍ.

ປຖວີສຸຕ຺ຕວຓ຺ຓນາ ນິຏ຺ຐິຕາ.

໓. ອສ຺ສຸສຸຕ຺ຕວຓ຺ຓນາ

໑໒໖. ກນ຺ທນໍ ສສທ຺ທໍ, ໂຣທນໍ ປນ ເກວລເມວາຕິ ອາຫ ‘‘ກນ຺ທນ຺ຕານນ຺ຕິ ສສທ຺ທໍ ຣຸທມານານ’’ນ຺ຕິ. ປວຕ຺ຕນ຺ຕິ ສນ຺ທນວເສນ ປວຕ຺ຕໍ. ‘‘ສິເນຣຸຣສ຺ມີຫິ ປຣິຈ຺ຉິນ຺ເນສູ’’ຕິ ສງ຺ເຂເປນ ວຸຕ຺ຕມຕ຺ຖໍ ວິວຣນ຺ໂຕ ‘‘ສິເນຣຸສ຺ສາ’’ຕິອາທິມາຫ. ມຓິມຍນ຺ຕິ ອິນ຺ທນີລມຓິມຍໍ. ສິເນຣຸສ຺ສ ປຸພ຺ພທກ຺ຂິຓໂກຓສມປເທສາ ‘‘ປຸພ຺ພທກ຺ຂິຓປສ຺ສາ’’ຕິ ອຘິປ຺ເປຕາ. ເຕຫິ ນິກ຺ຂນ຺ຕຣຊຕຣສ຺ມິໂຍ ອິນ຺ທນີລຣສ຺ມິໂຍ ຈ ເອກໂຕ ຫຸຕ຺ວາ. ຕາສໍ ຣສ຺ມີນໍ ອນ຺ຕເຣສູຕິ ຕາສໍ ຈຕູຫິ ໂກເຓຫິ ນິກ຺ຂນ຺ຕຣສ຺ມີນໍ ຈຕູສຸ ອນ຺ຕເຣສຸ. ຈຕ຺ຕາໂຣຕິ ທກ຺ຂິຓາທິເຠທາ ຈຕ຺ຕາໂຣ ມຫາສມຸທ຺ທາ ໂຫນ຺ຕິ. ວິອສນນ຺ຕິ ວິເສເສນ ເຂປນໍ. ກິໍ ປນ ຕນ຺ຕິ ອາຫ ‘‘ວິນາໂສຕິ ອຕ຺ໂຖ’’ຕິ.

ອສ຺ສຸສຸຕ຺ຕວຓ຺ຓນາ ນິຏ຺ຐິຕາ.

໔. ຂີຣສຸຕ຺ຕວຓ຺ຓນາ

໑໒໗. ມາຕຸຖຎ຺ຎນ຺ຕິ ປີຕໍ ມາຕຸຍາ ຖນໂຕ ນິພ຺ພຕ຺ຕຂີຣໍ ພຫຸຕຣນ຺ຕິ ເວທິຕພ຺ພໍ.

ຂີຣສຸຕ຺ຕວຓ຺ຓນາ ນິຏ຺ຐິຕາ.

໕. ປພ຺ພຕສຸຕ຺ຕວຓ຺ຓນາ

໑໒໘. ‘‘ອນມຕຄ຺ຄສ຺ສ ສໍສາຣສ຺ສ ທີຆຕມຕ຺ຕາ ນ ສຸກຣໍ ນສຸກຣ’’ນ຺ຕິ ອຏ຺ຐກຖາປາໂຐ. ກຖໍ ນຈ຺ຉິນ຺ທຕີຕິ ກຖໍ ນ ປຣິໂຍສາເປຕິ, ກາຍຈິປິ ຄຫຓຕາຍາຕິ ອຘິປ຺ປາໂຍ. ຕໂຍ ກປ຺ປາສໍສູຕິ ຕໂຍ ເອກກປ຺ປາສໍສູ. ເຍຫິ ນໍ ຜຸຏ຺ຐໍ, ຕໂຕປິ ສຸຂຸມຕຣໍ ສາສປມຕ຺ຕໍ ຂີເຍຍ຺ຍ ປພ຺ພຕໍ ສພ຺ພຠາເຄຫິ ອຕິຈິຣເວລໍ ປຣິມຊ຺ຊນ຺ເຕ.

ປພ຺ພຕສຸຕ຺ຕວຓ຺ຓນາ ນິຏ຺ຐິຕາ.

໖. ສາສປສຸຕ຺ຕວຓ຺ຓນາ

໑໒໙. ນຄຣນ຺ຕິ ນຄຣສງ຺ເຂເປນ ປາກາເຣນ ປຣິກ຺ຂິຕ຺ຕຕໍ ສນ຺ຘາຍ ວຸຕ຺ຕໍ. ອນ຺ໂຕ ປນ ສພ຺ພໂສ ວິຈິຕ຺ຕສາສເປຫິ ເອວ ປຸຓ຺ຓໍ, ເອວໍ ຈຸຓ຺ຓິກາພທ຺ຘໍ. ເຕນາຫ ‘‘ນ ປນ…ເປ… ທຏ຺ຐພ຺ພ’’ນ຺ຕິ.

ສາສປສຸຕ຺ຕວຓ຺ຓນາ ນິຏ຺ຐິຕາ.

໗. ສາວກສຸຕ຺ຕວຓ຺ຓນາ

໑໓໐. ຕສ຺ສ ຐິຕຏ຺ຐານໂຕຕິ ຠິກ຺ຂຸໂນ ອນຸສ຺ສຣິຕ຺ວາ ຐິຕຏ຺ຐານໂຕ, ເຕນ ອນຸສ຺ສຣິຕສ຺ສ ສຕສຫສ຺ສກປ຺ປສ຺ສ ອນນ຺ຕຣກປ຺ປໂຕ ປຏ຺ຐາຍາຕິ ອຕ຺ໂຖ. ເອວນ຺ຕິ ວຸຕ຺ຕປ຺ປກາເຣນ. ຈຕ຺ຕາໂຣປິ ຠິກ຺ຂູ ອຠິຎ຺ຎາລາຠິໂນ. ຈຕ຺ຕາຣິ ກປ຺ປສຕສຫສ຺ສານິ ທິວເສ ທິວເສ ອນຸສ຺ສເຣຍ຺ຍຸນ຺ຕິ ປຣິກປ຺ປນວເສນ ວທນ຺ຕິ.

ສາວກສຸຕ຺ຕວຓ຺ຓນາ ນິຏ຺ຐິຕາ.

໘. ຄງ຺ຄາສຸຕ຺ຕວຓ຺ຓນາ

໑໓໑. ເອຕສ຺ມິໍ ອນ຺ຕເຣຕິ ເອຕສ຺ມິໍ ປຠວສມຸທ຺ທປເທສປຣິຈ຺ຉິນ຺ເນ ອາຍາມໂຕ ປຎ຺ຈໂຍຊນສຕິເກ ອຕິເຣກໂຍຊນສຕິເກ ວາ ຐາເນ.

ຄງ຺ຄາສຸຕ຺ຕວຓ຺ຓນາ ນິຏ຺ຐິຕາ.

໙. ທຓ຺ຑສຸຕ຺ຕວຓ຺ຓນາ

໑໓໒. ນວເມ ຂິຕ຺ໂຕຕິ ປຸນປ຺ປຸນໍ ຂິຕ຺ໂຕ. ເອກວາຣຎ຺ຫິ ຂິຕ຺ໂຕ ມູລາທີສຸ ເອເກເນວ ນິປເຕຍ຺ຍ. ຕຖາ ສຕິ ອຘິປ຺ເປໂຕ ປາຕສ຺ສ ອນິຍໂມ ນ ນິທສ຺ສິໂຕ ສິຍາ. ຕຕ຺ຖ ຈ ຘມ຺ມໍ ສຸຓນ຺ຕາ ຠິກ຺ຂູ ມນຸສ຺ສໂລເກ, ເຕ ສນ຺ຘາຍ ‘‘ອສ຺ມາ ໂລກາ’’ຕິ ອາຫ, ຕທຎ຺ຎໍ ສນ຺ຘາຍ ‘‘ປຣໂລກ’’ນ຺ຕິ. ຕສ຺ສ ຕສ຺ສ ວາ ປຸຄ຺ຄລສ຺ສ ຍຖາຘິປ຺ເປໂຕ ອຍໍ ໂລໂກ, ຕທຎ຺ໂຎ ປຣໂລໂກ.

ທຓ຺ຑສຸຕ຺ຕວຓ຺ຓນາ ນິຏ຺ຐິຕາ.

໑໐. ປຸຄ຺ຄລສຸຕ຺ຕວຓ຺ຓນາ

໑໓໓. ສມຏ຺ຐິກາໂລຕິ ສເມນ ອາກາເຣນ ລທ຺ຘພ຺ພອຏ຺ຐິກາໂລ. ຄິຣິປຣິກ຺ເຂເປຕິ ປຎ຺ຈຫິ ຄິຣີຫິ ປຣິກ຺ຂິຕ຺ຕຕ຺ຕາ ‘‘ຄິຣິປຣິກ຺ເຂໂປ’’ຕິ ລທ຺ຘນາເມ ຣາຊຄເຫ.

ປຸຄ຺ຄລສຸຕ຺ຕວຓ຺ຓນາ ນິຏ຺ຐິຕາ.

ປຐມວຄ຺ຄວຓ຺ຓນາ ນິຏ຺ຐິຕາ.

໒. ທຸຕິຍວຄ຺ໂຄ

໑. ທຸຄ຺ຄຕສຸຕ຺ຕວຓ຺ຓນາ

໑໓໔. ທຸຄ຺ຄຕນ຺ຕິ ກິຈ຺ຉຊີວິກຕ຺ຕາ ສພ຺ພຖາ ທຸກ຺ຂໍ ຄຕໍ ອຸປຄຕໍ. ຕຖາຠູໂຕ ປນ ທລິທ຺ໂທ ວຣາໂກ ນາມ ໂຫຕີຕິ ວຸຕ຺ຕໍ ‘‘ທລິທ຺ທໍ ກປຓ’’ນ຺ຕິ. ຫຕ຺ຖປາເທຫີຕິ ນິທສ຺ສນມຕ຺ຕໍ, ອຎ຺ເຎຫິປິ ສຣີຣາວຍເວຫິ ທຸສ຺ສຓ຺ຐາເນຫິ ອຸເປໂຕ ທຸຣຸເປໂຕ ເອວາຕິ.

ທຸຄ຺ຄຕສຸຕ຺ຕວຓ຺ຓນາ ນິຏ຺ຐິຕາ.

໒. ສຸຂິຕສຸຕ຺ຕວຓ຺ຓນາ

໑໓໕. ສຸຂິຕນ຺ຕິ ສຎ຺ຊາຕສຸຂໍ. ເຕນາຫ ‘‘ສຸຂສມປ຺ປິຕ’’ນ຺ຕິອາທິ. ສຸສຊ຺ຊິຕນ຺ຕິ ສຸຂຸມຸປກຣເຓຫິ ສພ຺ພຖາ ສຊ຺ຊິຕໍ.

ສຸຂິຕສຸຕ຺ຕວຓ຺ຓນາ ນິຏ຺ຐິຕາ.

໓. ຕິໍສມຕ຺ຕສຸຕ຺ຕວຓ຺ຓນາ

໑໓໖. ຘຸຕງ຺ຄສມາທານວເສນ, ນ ອຣຎ຺ຎວາສາທິມຕ຺ເຕນ. ສສໍໂຍຊນາ ສພ຺ພໂສ ສໍໂຍຊນານໍ ອປ຺ປຫີນຕ຺ຕາ, ນ ປຸຖຸຊ຺ຊນຠາວໂຕ. ເອເກກວຓ຺ຓກາໂລວ ຄເຫຕພ຺ໂພຕິ ເອເຕນ ມຫິໍສາທີນໍ ຣສ຺ສທີຆປິງ຺ຄລາທີສຸ ເອເກກາເນວ ຄເຫຕ຺ວາ ທສ຺ເສຕິ.

ຕິໍສມຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໔-໙. ມາຕຸສຸຕ຺ຕາທິວຓ຺ຓນາ

໑໓໗-໑໔໒. ລິງ຺ຄນິຍເມນ ເຈວ ຈກ຺ກວາຬນິຍເມນ ຈາຕິ ‘‘ປຸຣິສານຎ຺ຫິ ມາຕຸຄາມກາໂລ, ມາຕຸຄາມານຎ຺ຈ ປຸຣິສກາໂລ’’ຕິ ຍຖາ ສຕ຺ຕສນ຺ຕາເນ ລິງ຺ຄນິຍໂມ ນຕ຺ຖິ, ເອວໍ ກທາຈິ ອິມສ຺ມິໍ ຈກ຺ກວາເຬ ນິພ຺ພຕ຺ຕນ຺ຕິ, ກທາຈິ ອຎ຺ຎຕຣສ຺ມິນ຺ຕິ ຈກ຺ກວາຬນິຍໂມປິ ນຕ຺ຖິ. ເອວເມວ ຐິເຕ

ຈກ຺ກວາເຬ ມາຕຸຄາມກາເລ ນມາຕາຠູຕປຸພ຺ໂພ ນຕ຺ຖີຕິອາທິນາ ລິງ຺ຄນິຍເມນ ຈກ຺ກວາຬນິຍໂມ ຈ ເວທິຕພ຺ໂພ. ເຕນາຫ ‘‘ເຕສູ’’ຕິອາທິ.

ມາຕຸສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ເວປຸລ຺ລປພ຺ພຕສຸຕ຺ຕວຓ຺ຓນາ

໑໔໓. ເອກໍ ອປທານໍ ອາຫຣິຕ຺ວາ ທສ຺ເສຕິ ‘‘ເອວໍ ສໍເວຄໍ ຊເນຕ຺ວາ ຠິກ຺ຂູ ວິເສສໍ ປາເປສ຺ສາມີ’’ຕິ. ຈຕູເຫນ ອາໂຣຫນ຺ຕິ ຈຕຸໂຍຊນຸພ຺ເພຘຕ຺ຕາ. ທ຺ວິນ຺ນໍ ພຸທ຺ຘານນ຺ຕິ ກກຸສນ຺ຘສ຺ສ ໂກຓາຄມນສ຺ສ ຈາຕິ ອິເມສໍ ທ຺ວິນ຺ນໍ ພຸທ຺ຘານໍ. ‘‘ຕິວຣາ ໂຣຫິຕສ຺ສາ ສຸປ຺ປິຍາ’’ຕິ ມນຸສ຺ສານໍ ຕສ຺ມິໍ ຕສ຺ມິໍ ກາເລ ສມຎ຺ຎາ ຕຕ຺ຖ ເທສນາມວເສນ ຊາຕາຕິ ເວທິຕພ຺ພາ, ຍຖາ ເອຕຣຫິ ມາຄຘາຕິ.

ປຸນ ວສ຺ສສຕນ຺ຕິ ປຐມວສ຺ສສຕໂຕ ອຸປຣິວສ຺ສສຕໍ ຊີວນໂກ ນາມ ມນຸສ຺ໂສ ນຕ຺ຖິ. ປຣິຫີນສທິສໍ ກຕໍ ເທສນາຍ. ວຑ຺ຒິຕ຺ວາຕິ ທສວສ຺ສາຍຸກຠາວໂຕ ປຏ຺ຐາຍ ຍາວ ອສງ຺ຂ຺ເຍຍ຺ຍາຍຸກຠາວາ ວຑ຺ຒິຕ຺ວາ. ‘‘ປຣິຫີນ’’ນ຺ຕິ ວຕ຺ວາ ຕໍ ປຣິຫີນຠາວໍ ທສ຺ເສນ຺ໂຕ ‘‘ກຖ’’ນ຺ຕິອາທິມາຫ. ຍໍ ອາຍຸປ຺ປມາເຓສູຕິ ຍຕ຺ຕກໍ ອາຍຸປ຺ປມາເຓສູຕິ.

ເວປຸລ຺ລປພ຺ພຕສຸຕ຺ຕວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ອນມຕຄ຺ຄສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.