໒. ອຠິສມຍສໍຍຸຕ຺ຕໍ

໑. ນຂສິຂາສຸຕ຺ຕວຓ຺ຓນາ

໗໔. ສຸຂຸມາຕິ ຕຣຸຓາ ປຣິຕ຺ຕາ ເກສຄ຺ຄມຕ຺ຕຠາວໂຕ. ຍຖາ ເກສາ ທີຆໂສ ທ຺ວງ຺ຄຸລມຕ຺ຕາຍ ສພ຺ພສ຺ມິໍ ກາເລ ເອຕປ຺ປມາຓາວ, ນ ຕຈ຺ຉິນ຺ທນໍ, ເອວໍ ນຂຄ຺ຄາປິ ເກສຄ຺ຄມຕ຺ຕາວ, ນ ເຕສໍ ຉິນ຺ທນໍ ອວຑ຺ຒນໂຕ. ປຣໂຕຕິ ‘‘ສຫສ຺ສິມໍ ສຕສຫສ຺ສິມ’’ນ຺ຕິ ວຸຕ຺ຕຏ຺ຐາເນ. ອຠິສເມຕ຺ວາຕິ ປຏິວິຊ຺ຌິຕ຺ວາ, ຕສ຺ມາ ອຠິສເມຕາວິໂນ ປຏິວິທ຺ຘສຈ຺ຈສ຺ສາຕິ ອຕ຺ໂຖ. ກາມໍ ປຸຣິມປທໍ ທຸກ຺ຂກ຺ຂນ຺ຘສ຺ສ ອຕີຕຠາວໍ ອຸປາທາຍປິ ວຕ຺ຕຸໍ ຍຸຕ຺ຕໍ. ປຸເຣຕຣໍເຍວ ປນ ວຸຕ຺ຕຠາວໍ ອຸປາທາຍ ວຸຕ຺ຕນ຺ຕິ ທສ຺ເສຕຸໍ ‘‘ປຸຣິມໍ ທຸກ຺ຂກ຺ຂນ຺ຘ’’ນ຺ຕິອາທິ ວຸຕ຺ຕໍ. ປຸຣິມໍ ນາມ ປຈ຺ຉິມໍ ອເປກ຺ຂິຕ຺ວາ. ປຸຣິມປຈ຺ຉິມຕາ ຫິ ຕໍ ຕໍ ອຸປາທາຍ ວຸຈ຺ຈຕີຕິ ອິຘາຘິປ຺ເປຕໍ ປຸຣິມໍ ນີຫຣິຕ຺ວາ ທສ຺ເສຕຸໍ ‘‘ກຕມໍ ປນາ’’ຕິອາທິ ວຸຕ຺ຕໍ. ‘‘ອຕີຕມ຺ປິ ປຣິກ຺ຂີຓ’’ນ຺ຕິ ອິຘາຘິປ຺ເປຕໍ ປຣິກ຺ຂີຓເມວ ວິຠາເວຕຸໍ ‘‘ກຕມໍ ປນ ປຣິກ຺ຂີຓ’’ນ຺ຕິອາທິ ວຸຕ຺ຕໍ. ໂສຕາປນ຺ນສ຺ສ ທຸກ຺ຂກ຺ຂໂຍ ອິຘ ໂຈທິໂຕຕິ ຕໍ ທສ຺ເສຕຸໍ ‘‘ປຐມມຄ຺ຄສ຺ສ ອຠາວິຕຕ຺ຕາ ອຸປ຺ປຊ຺ເຊຍ຺ຍາ’’ຕິ ວຕ຺ວາ ອິທານິ ຕໍ ສຣູປໂຕ ທສ຺ເສຕຸໍ ປຸນ ‘‘ກຕມ’’ນ຺ຕິອາທິ ວຸຕ຺ຕໍ. ສຕ຺ຕສຸ ອຕ຺ຕຠາເວສຸ ຍໍ ອປາເຍ ອຸປ຺ປຊ຺ເຊຍ຺ຍ ອຏ຺ຐມໍ ປຏິສນ຺ຘິໍ ອາທິໍ ກຕ຺ວາ ຍຕ຺ຖ ກຕ຺ຖຈິ ອປາເຍສຸ ຈາຕິ ຍໍ ທຸກ຺ຂໍ ອຸປ຺ປຊ຺ເຊຍ຺ຍ, ຕໍ ສພ຺ພໍ ປຣິກ຺ຂີຓນ຺ຕິ ທຏ຺ຐພ຺ພໍ. ອສ຺ສາຕິ ໂສຕາປນ຺ນສ຺ສ, ຍໍ ປຣິມາຓໍ, ຕໂຕ ອຸທ຺ຘຎ຺ຈ ອຸປປາຕໍ ອຕ຺ຖີຕິ ອຘິປ຺ປາໂຍ. ມຫາ ອຕ຺ໂຖ ຄຸໂຓ ມຫຕ຺ໂຖ, ໂສ ເອຕສ຺ສ ອຕ຺ຖີຕິ ມຫຕ຺ຖິໂຍ ກ-ກາຣສ຺ສ ຍ-ກາຣໍ ກຕ຺ວາ. ເຕນາຫ ‘‘ມຫໂຕ ອຕ຺ຖສ຺ສ ນິປ຺ຜາທໂກ’’ຕິ.

ນຂສິຂາສຸຕ຺ຕວຓ຺ຓນາ ນິຏ຺ຐິຕາ.

໒. ໂປກ຺ຂຣຓີສຸຕ຺ຕວຓ຺ຓນາ

໗໕. ອຸພ຺ເພເຘນາຕິ ອວເວເຘນ ອໂຘທິສຕາຍ. ເຕນາຫ ‘‘ຄມ຺ຠີຣຕາຍາ’’ຕິ.

ໂປກ຺ຂຣຓີສຸຕ຺ຕວຓ຺ຓນາ ນິຏ຺ຐິຕາ.

໓. ສໍເຠຊ຺ຊອຸທກສຸຕ຺ຕາທິວຓ຺ຓນາ

໗໖-໗໗. ສມ຺ຠິຊ຺ຊຏ຺ຐາເນຕິ ສມ຺ຠິຊ຺ຊສໂມຘານຄຕຏ຺ຐາເນ. ສເມນ຺ຕິ ສເມຕາ ໂຫນ຺ຕິ. ເຕນາຫ ‘‘ສມາຄຈ຺ຉນ຺ຕີ’’ຕິ. ປາຬິຍໍ ວິຠຕ຺ຕິໂລເປນ ນິທ຺ເທໂສຕິ ຕມຕ຺ຖໍ ທສ຺ເສນ຺ໂຕ ‘‘ຕີຓິ ວາ’’ຕິ ອາຫ. ສມ຺ຠິຊ຺ຊຕິ ມິສ຺ສີຠາວໍ ຄຈ຺ຉຕິ ເອຕ຺ຖາຕິ ສມ຺ເຠຊ຺ຊໍ, ມິສ຺ສິຕຏ຺ຐານໍ. ຕຕ຺ຖ ອຸທກໍ ສມ຺ເຠຊ຺ຊອຸທກໍ. ເຕນາຫ ‘‘ສມ຺ຠິນ຺ນຏ຺ຐາເນ ອຸທກ’’ນ຺ຕິ.

ສໍເຠຊ຺ຊອຸທກສຸຕ຺ຕາທິວຓ຺ຓນາ ນິຏ຺ຐິຕາ.

໔. ປຖວີສຸຕ຺ຕາທິວຓ຺ຓນາ

໗໘-໘໔. ຈກ຺ກວາຬພ຺ຠນ຺ຕຣາຍາຕິ ຈກ຺ກວາຬປພ຺ພຕສ຺ສ ອນ຺ໂຕຄຘາຍ.

ຉຏ຺ຐາທີສຸ ວຸຕ຺ຕນເຍເນວາຕິ ອິຘ ຉຏ຺ຐສຸຕ຺ຕາທີສຸ ປຐມສຸຕ຺ຕາທີສຸ ວຸຕ຺ຕນເຍເນວາຕິ ອຕ຺ໂຖ ເວທິຕພ຺ໂພ ວິເສສາຠາວໂຕ.

ປຣິໂຍສາເນຕິ ອິມສ຺ສ ອຠິສມຍສໍຍຸຕ຺ຕສ຺ສ ໂອສານຏ຺ຐາເນ. ອຎ຺ຎຕິຕ຺ຖິຍສມຓພ຺ຣາຫ຺ມຓປຣິພ຺ພາຊການນ຺ຕິ ອຎ຺ຎຕິຕ຺ຖິຍານໍ. ຄຸຓາຘິຄໂມຕິ ຌານາຠິຎ຺ຎາສຫິໂຕ ຄຸຓາຘິຄໂມ. ສຕຠາຄມ຺ປິ…ເປ… ນ ອຸປຄຈ຺ຉຕິ ສຈ຺ຈປຏິເວຘສ຺ສ ມຫານຸຠາວຕ຺ຕາ. ເຕນາຫ ຠຄວາ ປຈ຺ຈກ຺ຂສພ຺ພຘມ຺ໂມ ‘‘ເອວໍ ມຫາຘິຄໂມ, ຠິກ຺ຂເວ, ທິຏ຺ຐິສມ຺ປນ຺ໂນ ປຸຄ຺ຄໂລ ເອວໍ ມຫາຠິຎ຺ໂຎ’’ຕິ.

ປຖວີສຸຕ຺ຕາທິວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ອຠິສມຍສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.