໓. ທຸກ຺ຂສຸຕ຺ຕວຓ຺ຓນາ

໔໓. ສມຸທຍນໍ ສມຸທໂຍ, ສມຸເທຕິ ເອຕມ຺ຫາຕິ ສມຸທໂຍ, ເອວໍ ອຸຠິນ຺ນໍ ສມຸທຍານມຕ຺ຖໂຕປິ ເຠໂທ ເວທິຕພ຺ໂພ. ປຈ຺ຈຍາວ ປຈ຺ຈຍສມຸທໂຍ. ອາຣທ຺ຘວິປສ຺ສໂກ ‘‘ອິມຎ຺ຈ ອິມຎ຺ຈ ປຈ຺ຈຍສາມຄ຺ຄິໍ ປຏິຈ຺ຈ ອິເມ ຘມ຺ມາ ຂເຓ ຂເຓ ອຸປ຺ປຊ຺ຊນ຺ຕີ’’ຕິ ປສ຺ສນ຺ໂຕ ‘‘ປຈ຺ຈຍສມຸທຍໍ ປສ຺ສນ຺ໂຕປິ ຠິກ຺ຂຸ ຂຓິກສມຸທຍໍ ປສ຺ສຕີ’’ຕິ ວຸຕ຺ໂຕ ປຈ຺ຈຍທສ຺ສນມຸເຂນ ນິພ຺ພຕ຺ຕິກ຺ຂຓສ຺ສ ທສ຺ສນໂຕ. ໂສ ປນ ຂເຓ ຂເຓ ສງ຺ຂາຣານໍ ນິພ຺ພຕ຺ຕິໍ ປສ຺ສິຕຸໍ ອາຣທ຺ໂຘ ‘‘ອິເມຫິ ນາມ ປຈ຺ຈເຍຫິ ນິພ຺ພຕ຺ຕຕີ’’ຕິ ປສ຺ສຕິ. ‘‘ໂສ ຂຓິກສມຸທຍໍ ປສ຺ສນ຺ໂຕ ປຈ຺ຈຍໍ ປສ຺ສຕີ’’ຕິ ວທນ຺ຕິ. ຍສ຺ມາ ປນ ປຈ຺ຈຍໂຕ ສງ຺ຂາຣານໍ ອຸທຍໍ ປສ຺ສນ຺ໂຕ ຂຓໂຕ ເຕສໍ ອຸທຍທສ຺ສນໍ ໂຫຕິ, ຂຓໂຕ ເອເຕສໍ ອຸທຍໍ ປສ຺ສໂຕ ປເຄວ ປຈ຺ຈຍານໍ ສຸຄ຺ຄຫິຕຕ຺ຕາ ປຈ຺ຈຍໂຕ ທສ຺ສນໍ ສຸເຂນ ອິຊ຺ຌຕິ, ຕສ຺ມາ ວຸຕ຺ຕໍ ‘‘ປຈ຺ຈຍສມຸທຍໍ ປສ຺ສນ຺ໂຕປີ’’ຕິອາທິ. ອຕ຺ຖງ຺ຄມທສ຺ສເນປິ ເອເສວ ນໂຍ. ອຈ຺ຈນ຺ຕຕ຺ຖງ຺ຄໂມຕິ ອປ຺ປວຕ຺ຕິ ນິໂຣໂຘ ນິພ຺ພານນ຺ຕິ. ເຠທຕ຺ຖງ຺ຄໂມຕິ ຂຓິກນິໂຣໂຘ. ຕທຸຠຍໍ ປຸພ຺ພຠາເຄ ອຸຄ຺ຄຫປຣິປຸຈ຺ຉາທິວເສນ ປສ຺ສນ຺ໂຕ ອຎ຺ຎຕຣສ຺ສ ທສ຺ສເນ ອິຕຣທສ຺ສນມ຺ປິ ສິທ຺ຘເມວ ໂຫຕິ, ປຸພ຺ພຠາເຄ ຈ ອາຣມ຺ມຓວເສນ ຂຍໂຕ ວຍສມ຺ມສນາທິກາເລ ເຠທຕ຺ຖງ຺ຄມໍ ປສ຺ສນ຺ໂຕ ອຕິເຣກວເສນ ອນຸສ຺ສວາທິໂຕ ອຈ຺ຈນ຺ຕໍ ອຕ຺ຖງ຺ຄມໍ ປສ຺ສຕິ. ມຄ຺ຄກ຺ຂເຓ ປນາຣມ຺ມຓໂຕ ອຈ຺ຈນ຺ຕອຕ຺ຖງ຺ຄມໍ ປສ຺ສຕິ, ອສມ຺ໂມຫໂຕ ອິຕຣມ຺ປິ ປສ຺ສຕິ. ຕໍ ສນ຺ຘາຍາຫ ‘‘ອຈ຺ຈນ຺ຕຕ຺ຖງ຺ຄມໍ ປສ຺ສນ຺ໂຕປີ’’ຕິອາທິ. ສມຸທຍຕ຺ຖງ຺ຄມໍ ນິພ຺ພຕ຺ຕິເຠທນ຺ຕິ ສມຸທຍສງ຺ຂາຕໍ ນິພ຺ພຕ຺ຕິໍ ອຕ຺ຖງ຺ຄມສງ຺ຂາຕໍ ເຠທຎ຺ຈ. ນິສ຺ສຍວເສນາຕິ ຈກ຺ຂຸສ຺ສ ສນ຺ນິສ຺ສຍວເສນ ປຈ຺ຈຍໍ ກຕ຺ວາ. ອາຣມ຺ມຓວເສນາຕິ ຣູເປ ອາຣມ຺ມຓໍ ກຕ຺ວາ. ຍໍ ປເນຕ຺ຖ ວຕ຺ຕພ຺ພໍ, ຕໍ ມຘຸປິຓ຺ຑິກສຸຕ຺ຕຏີກາຍໍ ວຸຕ຺ຕນເຍນ ເວທິຕພ຺ພໍ. ຕິຓ຺ຓໍ ສງ຺ຄຕິ ຜສ຺ໂສຕິ ‘‘ຈກ຺ຂຸ ຣູປານິ ວິຎ຺ຎາຓ’’ນ຺ຕິ ອິເມສໍ ຕິຓ຺ຓໍ ສງ຺ຄຕິ ສມາຄເມ ນິພ຺ພຕ຺ຕິ ຜສ຺ໂສຕິ ວຸຕ຺ໂຕຕິ ອາຫ ‘‘ຕິຓ຺ຓໍ ສງ຺ຄຕິຍາ ຜສ຺ໂສ’’ຕິ. ຕິຓ຺ຓນ຺ຕິ ຈ ປາກຏປຈ຺ຈຍວເສນ ວຸຕ຺ຕໍ, ຕທຎ຺ເຎປິ ປນ ມນສິກາຣາທໂຍ ຜສ຺ສປຈ຺ຈຍາ ໂຫນ຺ຕິເຍວ. ເອວນ຺ຕິ ຕຓ຺ຫາທີນໍ ອເສສວິຣາຄນິໂຣຘກ຺ກເມນ. ຠິນ຺ນໍ ໂຫຕີຕິ ອນຸປ຺ປາທນິໂຣເຘນ ນິຣຸທ຺ຘໍ ໂຫຕິ. ເຕນາຫ ‘‘ອປ຺ປຏິສນ຺ຘິຍ’’ນ຺ຕິ.

ທຸກ຺ຂສຸຕ຺ຕວຓ຺ຓນາ ນິຏ຺ຐິຕາ.