໘. ປໂຣສຫສ຺ສສຸຕ຺ຕວຓ຺ຓນາ

໒໑໖. ສຫສ຺ສໂຕ ປຣໍ ອຑ຺ຒເຕຍ຺ຍຠິກ຺ຂຸສຕໍ ຕທາ ຠຄວນ຺ຕໍ ປຍິຣຸປາສຕີຕິ ອາຫ ‘‘ປໂຣສຫສ຺ສນ຺ຕິ ອຕິເຣກສຫສ຺ສ’’ນ຺ຕິ. ນິພ຺ພາເນ ກຸໂຕຈິ ຠຍໍ ນຕ຺ຖີຕິ ກຸໂຕຈິປິ ກາຣຓໂຕ ນິພ຺ພາເນ ຠຍໍ ນຕ຺ຖິ ອສງ຺ຂຕຠາເວນ ສພ຺ພໂສ ເຂມຕ຺ຕາ. ເຕນາຫ ຠຄວາ – ‘‘ເຂມຎ຺ຈ ໂວ, ຠິກ຺ຂເວ, ຘມ຺ມໍ ເທເສສ຺ສາມິ ເຂມຄາມິນິຎ຺ຈ ປຏິປທ’’ນ຺ຕິອາທິ (ສໍ. ນິ. ໔.໓໗໙-໔໐໘). ນ ກຸໂຕຈິ ຠຍໍ ເອຕສ຺ມິໍ ອຘິຄເຕຕິ ອກຸໂຕຠຍໍ, ນິພ຺ພານໍ. ເຕນາຫ ‘‘ນິພ຺ພານປ຺ປຕ຺ຕສ຺ສາ’’ຕິອາທິ. ວິປສ຺ສິໂຕ ປຏ຺ຐາຍາຕິ ອມ຺ຫາກໍ ຠຄວໂຕ ນາມວເສນ ອິສີນໍ ສຕ຺ຕມຠາວທສ຺ສນຕ຺ຖໍ ວຸຕ຺ຕໍ. ເຕ ຫິ ຕຕ຺ຖ ຕຕ຺ຖ ສຸຕ຺ເຕ ພຫຸໂສ ກິຕ຺ຕິຕາ. ອິສີນນ຺ຕິ ວາ ປຈ຺ເຈກພຸທ຺ຘສາວກພາຫິຣກອິສີນໍ ສຕ຺ຕໂມ ອຸຕ຺ຕໂຣ ເສຏ຺ໂຐຕິ ອຕ຺ໂຖ.

ອຏ຺ຐຸປ຺ປຕ຺ຕິວເສນາຕິ ກາຣຓສມຸຏ຺ຐານວເສນ. ຕທສ຺ສ ອຏ຺ຐຸປ຺ປຕ຺ຕິໍ ວິຠາເວຕຸໍ ‘‘ສງ຺ຆມຊ຺ເຌ’’ຕິອາທິ ວຸຕ຺ຕໍ. ປຏິຠານສມ຺ປນ຺ນວາຈາຍ ອຎ຺ເຎ ອີສຕິ ອຠິຠວຕີຕິ ວງ຺ຄີໂສ. ເຕນາຫ ‘‘ປຏິຠານສມ຺ປຕ຺ຕິ’’ນ຺ຕິອາທິ.

ກິເລສຸມ຺ມຸຊ຺ຊນສຕານີຕິ ຣາຄາທິກິເລສານໍ ຣຊ຺ຊນທຸສ຺ສນາທິນເຍຫິ ສວິສເຍ ອໂຍນິໂສ ອຸຏ຺ຐານານິ. ຍທິ ອເນການິ ສຕານິ, ອຖ ກສ຺ມາ ‘‘ອຸມ຺ມຄ຺ຄປຖ’’ນ຺ຕິ? ວຸຕ຺ຕນ຺ຕິ ອາຫ ‘‘ວຏ຺ຏປຖຕ຺ຕາ ປນ ປຖ’’ນ຺ຕິ. ຣາຄໂທສໂມຫມານທິຏ຺ຐິວເສນ ຣາຄຂິລາທີນິ ປຎ຺ຈຂິລານິ. ວິຠຊນ຺ຕນ຺ຕິ ວິຠຊນວເສນ ກເຖນ຺ຕໍ. ວິຠຊິຕ຺ວາຕິ ຎາເຓນ ວິເວເຈຕ຺ວາ.

ອມເຕ ອກ຺ຂາເຕຕິ ອມຕາວເຫ ຘມ຺ເມ ເທສິເຕ. ຘມ຺ມສ຺ສ ປສ຺ສິຕາໂຣ ສຈ຺ຈສມ຺ປຏິເວເຘນ. ອສໍຫີຣາ ທິຏ຺ຐິວາເຕຫິ.

ອຕິວິຊ຺ຌິຕ຺ວາຕິ ປຏິວິຊ຺ຌິຕ຺ວາ. ອຕິກ຺ກມຠູຕນ຺ຕິ ອຕິກ຺ກມນຏ຺ເຐນ ຠູຕໍ. ທສທ຺ຘານນ຺ຕິ ທສນ຺ນໍ ອຸປຑ຺ຒານໍ. ເຕນາຫ ‘‘ປຎ຺ຈນ຺ນ’’ນ຺ຕິ. ຊານນ຺ເຕນາຕິ ຘມ຺ມສ຺ສ ສຸທຸລ຺ລຠຕໍ ຊານນ຺ເຕນ.

ປໂຣສຫສ຺ສສຸຕ຺ຕວຓ຺ຓນາ ນິຏ຺ຐິຕາ.