໙. ໂກຓ຺ຑຎ຺ຎສຸຕ຺ຕວຓ຺ຓນາ

໒໑໗. ເອວໍຄຫິຕນາໂມຕິ ‘‘ອຎ຺ຎາສິ ວຕ, ໂຠ, ໂກຓ຺ຑຎ຺ໂຎ’’ຕິ ສຕ຺ຖຸ ວຈນໍ ນິສ຺ສາຍ ຠິກ຺ຂູຫິ ອຎ຺ເຎຫິ ໂກຓ຺ຑຎ຺ຎນາມເກຫິ ວິເສສນຕ຺ຖໍ ເອວໍຄຫິຕນາໂມ. ທ຺ວາທສນ຺ນໍ ສໍວຈ຺ຉຣານໍ ວເສນ ຈິຣສ຺ສໍ. ຉທ຺ທນ຺ຕຠວເນຕິ ຉທ຺ທນ຺ຕນາຄຣາຊຠວນຏ຺ຐາເນ. ປຎ຺ຎວາ ມຫາສາວໂກ ຣຕ຺ຕຎ຺ຎຸຕາຍ. ‘‘ທສສຫສ຺ສຈກ຺ກວາເຬ ເທວມນຸສ຺ສານນ຺ຕິ ທສສຫສ຺ສຈກ຺ກວາເຬ ເທວານໍ, ອິມສ຺ມິໍ ຈກ຺ກວາເຬ ເທວມນຸສ຺ສານຎ຺ຈາຕິ ເອວໍ ທສສຫສ຺ສຈກ຺ກວາເຬ ເທວມນຸສ຺ສານ’’ນ຺ຕິ ວທນ຺ຕິ. ອຄ຺ຄນ຺ຕິອາທິໂຕ. ຕຕ຺ຖາຕິ ມນ຺ທາກິນິຕີເຣ.

ວສ຺ສຄ຺ເຄນາຕິ ວສ຺ສປຏິປາຏິຍາ. ຕນ຺ຕິ ອຎ຺ຎາສິໂກຓ຺ຑຎ຺ຎຕ຺ເຖຣໍ. ມຫາພ຺ຣຫ຺ມານໍ ວິຍ ໂລກິຍມນຸສ຺ສາ ຫຣາຍນ຺ຕິ. ປາໂມກ຺ຂຠູໂຕ ອາຍສ຺ມາ ເຖໂຣ ອນ຺ຕຣນ຺ຕຣາ ຕຕ຺ຖ ຕຕ຺ຖ ຊນປເທ ວສິຕ຺ວາ ຕທນຸກ຺ກເມນ ມນ຺ທາກິນິຕີຣໍ ອຸປຄໂຕ, ຕສ຺ມາ ວຸຕ຺ຕໍ – ‘‘ອິຈ຺ຉາມຫໍ, ຠນ຺ເຕ, ຊນປເທ ວສິຕຸ’’ນ຺ຕິ.

ອານຸຠາວສມ຺ປນ຺ນາ ທິພ຺ພາຍຸກາ ເຕ ຫຕ຺ຖິນາຄາຕິ ວຸຕ຺ຕໍ ‘‘ປຸພ຺ເພ ປຈ຺ເຈກພຸທ຺ຘານໍ ປາຣິຈຣິຍາຍ ກຕປຣິຈຍາ’’ຕິ. ເຖຣສ຺ສ ສຎ຺ຈຣຓຏ຺ຐາເນ ອາວຣຓສາຂາ ຫຣິຕ຺ວາ ອປເນຕ຺ວາ. ມຸໂຂທກຎ຺ເຈວ ທນ຺ຕກຏ຺ຐຎ຺ຈ ຐເປຕີຕິ ສຬລເທວທາຣຸກຏ຺ຐາທີນິ ອຎ຺ຎມຎ຺ຎໍ ຆໍສິຕ຺ວາ ອຄ຺ຄິໍ ນິພ຺ພຕ຺ເຕຕ຺ວາ ຊາເລຕ຺ວາ ຕຕ຺ຖ ປາສາຓຂຓ຺ຑານິ ຕາເປຕ຺ວາ ຕານິ ທຓ຺ຑເກຫິ ວຏ຺ເຏຕ຺ວາ ຕຬາກາສຸ ອຸທກໂສຓ຺ຑີສຸ ຂິປິຕ຺ວາ ອຸທກສ຺ສ ຕຕ຺ຕຠາວໍ ຎຕ຺ວາ ນາຄລຕາທນ຺ຕກຏ຺ຐໍ ອຸປເນນ຺ໂຕ ມຸໂຂທກຎ຺ຈ ຐເປຕິ. ວຕ຺ຕໍ ກໂຣຕີຕິ ອນ຺ໂຕກຸຏິຍາ ພຫິ ຈ ປມຸເຂປິ ອງ຺ຄເຓປິ ສາຂາຠງ຺ເຄຫິ ສມ຺ມຊ຺ຊນ຺ໂຕ ວກ຺ຂມານນເຍນ ອາຫາຣໍ ອຸປເນນ຺ໂຕ ວຕ຺ຕໍ ກໂຣຕິ.

ປຕິຏ຺ຐປ຺ປມາເຓຕິ ກຏິປ຺ປມາເຓ, ອຍເມວ ວາ ປາໂຐ ຕາວ ມຫນ຺ຕເມວາຕິ ຍາວ ມຫນ຺ຕໍ ເສຕປທຸມວນໍ, ຕາວ ມຫນ຺ຕເມວ. ເອເສວ ນໂຍ ຣຕ຺ຕກຸມຸທວນາທີສຸ. ຂາທນ຺ຕາ ມນຸສ຺ສາ. ປກ຺ກປໂຍຆນິກາ ວິຍາຕິ ສຸປກ຺ກປໂຍຆນໍ ວິຍ. ຆນຠາເວນ ປນ ປກ຺ຂິຕ຺ຕຂຸທ຺ທມຘຸ ວິຍ ໂຫຕິ. ເຕນາຫ ‘‘ເອຕໍ ໂປກ຺ຂຣມຘຸ ນາມາ’’ຕິ. ມຸຬາລນ຺ຕິ ເສຕປທຸມານໍ ມູລໍ. ຠິສນ຺ຕິ ເຕສໍເຍວ ກນ຺ທໍ. ເອກສ຺ມິໍ ປພ຺ເພຕິ ເອເກກສ຺ມິໍ ປພ຺ພນ຺ຕເຣ. ປາທຆຏກນ຺ຕິ ໂທຓສ຺ສ ຈຕຸຠາໂຄ ສຓ຺ຐານໂຕ ຂຸທ຺ທໂກ, ຕສ຺ມາ ປາທຆຏກປ຺ປມາຓນ຺ຕິ ຕຸມ຺ພມຕ຺ຕໍ. ໂສຓ຺ຑິອາວາເຏຕິ ຂຸທ຺ທກໂສຓ຺ຑິໂຍ ເຈວ ຂຸທ຺ທກອາວາເຏ ຈ.

ເອຕໍ ໂຠຊນນ຺ຕິ ຍຖາວຸຕ຺ຕໍ ນິຣຸທກປາຍສໂຠຊນໍ. ເກຈິ ສຎ຺ຊານນ຺ຕິ ເຍ ເຖຣາ ວຸຑ຺ຒຕຣາ. ເກຈິ ນ ສຎ຺ຊານນ຺ຕິ ເຍ ນວາ ອຈິຣປພ຺ພຊິຕາ.

ພຸທ຺ຘານຸພຸທ຺ໂຘຕິ ພຸທ຺ຘສ຺ສ ອນຸພຸທ຺ໂຘ. ພາຬ຺ຫວີຣິໂຍຕິ ຈຕຸນ຺ນໍ ສມ຺ມປ຺ປຘານານໍ ວເສນ ຈິຣນິຈິຕວີຣິໂຍ. ຕິຓ຺ຓໍ ວິເວການນ຺ຕິ ກາຍຈິຕ຺ຕອຸປຘິວິເວການໍ ລາຠີຕິ ໂຍຊນາ. ຈຕສ຺ໂສ ວທຕິ ວງ຺ຄີສຕ຺ເຖໂຣ ສຍໍປຏິຠານໍ, ນ ເສສາຠິຎ຺ຎານໍ ອຠາວໂຕຕິ ອາຫ ‘‘ອິຕຣາ’’ຕິອາທິ. ປຣິສາ ສນ຺ນິສີທິ ນິສ຺ສທ຺ທຠາເວນ ຕຸຓ຺ຫີ ອໂຫສີຕິ ອຕ຺ໂຖ. ອນຸຊານາເປສີຕິ ປຐມໍ ອຕ຺ຕນາ ຎາຕໍ ອຸປຏ຺ຐິຕໍ ອຕ຺ຕໂນ ປຣິນິພ຺ພານກາລໍ ອນຸ ປຈ຺ຉາ ສຕ຺ຖາຣໍ ຊານາເປສີຕິ ເອວໍ ເອຕ຺ຖ ອຕ຺ໂຖ ທຏ຺ຐພ຺ໂພ.

ຕນ຺ຕິ ອາສາຬ຺ຫິປຸຓ຺ຓມາຍ ອິສິປຕເນ ຍໍ ທສ຺ສນໍ, ຍໍ ວາ ທຸກ຺ກຣຈຣິຍາຍໍ ຕຸມ຺ຫາກໍ ອຸປຏ຺ຐານໍ ອາທິໂຕ ທສ຺ສນໍ, ຕໍ, ຠນ຺ເຕ, ປຐມທສ຺ສນໍ. ໂອນຕວິນຕາຕິ ເຫຏ຺ຐາ ອຸປຣິ ຈ ໂອນຕາ ວິນຕາ. ກມ຺ເປຕ຺ວາຕິ ໂຖກໍ ຈາເລຕ຺ວາ ທສ຺ສນຕ຺ຖໍ ເອກນິນ຺ນາໂທ ເຕສໍ ຫຕ຺ຖິນາຄານຎ຺ເຈວ ນາຄຍກ຺ຂກຸມ຺ຠຓ຺ຑານໍ ເທວຕານຎ຺ຈ ສທ຺ເທນ. ພ຺ຣຫ຺ມາໂນ ເທວານໍ ອທໍສູຕິ ສມ຺ພນ຺ໂຘ.

ສຊ຺ຌາຍມກໍສຸ ປສາທນີເຍສຸ ປສາທວເສນ ສນ຺ນິປຕິຕປຣິສາຍ ປສາທຊນນຕ຺ຖໍ ຠຄວຕິ ນິກ຺ຂມິຕ຺ວາຕິ ຠຄວຕິ ຄນ຺ຘກຸຏິໂຕ ນິກ຺ຂມິຕ຺ວາ. ຘຣຕິເຍວາຕິ ອທຸຏ຺ຐຕໍ ປຕ຺ວາ ຕິຏ຺ຐເຕວ.

ໂກຓ຺ຑຎ຺ຎສຸຕ຺ຕວຓ຺ຓນາ ນິຏ຺ຐິຕາ.