໗. ປວາຣຓາສຸຕ຺ຕວຓ຺ຓນາ

໒໑໕. ຕສ຺ມິໍ ອຫູຕິ ຕສ຺ມິໍ ອຫນີຕິ ອາຫ ‘‘ຕສ຺ມິໍ ທິວເສ’’ຕິ. ອນສເນນາຕິ ສພ຺ພໂສ ອາຫາຣສ຺ສ ອຠຸຎ຺ຊເນນ. ສາສນິກສີເລນ ພາຫິຣກອນສເນນ ວາ ອຸເປຕາ ຫຸຕ຺ວາຕິ ໂຍຊນາ. ວາ-ສທ຺ເທນ ຂີຣປານມຘຸສາຍນາທີນິປິ ສງ຺ຄຓ຺ຫາຕິ. ປກາເຣຫິ ທິຏ຺ຐາທີຫິ ວາເຣຕິ ກາຍກມ຺ມາທິເກ ສຣາເປຕິ ຄາຣຍ຺ເຫ ກໂຣຕິ ເອຕາຍາຕິ ປວາຣຓາ, ປຏິປຕ຺ຕິວິໂສຘນາຍ ອຕ຺ຕໂນ ອຕ຺ຕໂນ ວຊ຺ຊໂສຘນາຍ ໂອກາສທານໍ. ຍສ຺ມາ ເຍຠຸຍ຺ເຍນ ວສ຺ສໍວຸຏ຺ເຐຫິ ກາຕພ຺ພາ ເອສາ ວິສຸທ຺ຘິເທສນາ, ຕສ຺ມາ ວຸຕ຺ຕໍ ‘‘ວສ຺ສໍວຸຏ຺ຐປວາຣຓາຍ. ວິສຸທ຺ຘິປວາຣຓາຕິປິ ເອຕິສ຺ສາວ ນາມ’’ນ຺ຕິ. ຕທາ ຕສ຺ສ ຠິກ຺ຂຸສງ຺ຆສ຺ສ ຕຸຓ຺ຫີຠາວສ຺ສ ອນວເສສຕາຍປິ ວຓ຺ຓໍ ທສ຺ເສຕຸໍ ປາຬິຍໍ ‘‘ຕຸຓ຺ຫີຠູຕ’’ນ຺ຕິ ວຸຕ຺ຕນ຺ຕິ ອາຫ ‘‘ຍໂຕ ຍໂຕ…ເປ…ນຕ຺ຖີ’’ຕິ. ຫຕ຺ຖສ຺ສ ກຸກ຺ກຸຈ຺ຈຕາ ອສໍຍໂມ ອສມ຺ປຊຎ຺ຎກິຣິຍາ ຫຕ຺ຖກຸກ຺ກຸຈ຺ຈໍ. ຕຖາ ປາທກຸກ຺ກຸຈ຺ຈໍ ເວທິຕພ຺ພໍ, ວາ-ສທ຺ໂທ ອວຸຕ຺ຕວິກປ຺ປຕ຺ໂຖ, ເຕນ ຕທຎ຺ເຎສມຠາໂວ ວິຠາວິໂຕຕິ ທຏ຺ຐພ຺ພໍ.

ປຎ຺ຈປສາເທຫີຕິ ປຎ຺ຈວຓ຺ເຓຫິ ປສາເທຫິ. ໂວສ຺ສຄ຺ຄຕ຺ໂຖ ຍຖາຣຸຈິ ກິຣິຍາຍ ໂວສ຺ສຊ຺ຊນໍ. ປຸຈ຺ຉນຕ຺ເຖຕິ ປຏິກ຺ເຂປມຸເຂເນວ ປຸຈ຺ຉນຕ຺ເຖ ນກາໂຣ, ເມ ກິຎ຺ຈິ ກິຣິຍໍ ວາ ວາຈສິກໍ ວາ ນ ຄຣຫຖ, ກິໍ ນຸ ຄຣຫຖ ກາຍວາຈາຫີຕິ ອຕ຺ໂຖ. ເກຈິ ‘‘ທ຺ວາຣາເນວາ’’ຕິ ທ຺ວາຣສີເສນ ທ຺ວາຣປ຺ປວຕ຺ຕຈຣິຍໍ ວທນ຺ຕິ. ວິສຸທ຺ຘິປວາຣຓາຍ ອຘິປ຺ເປຕຕ຺ຕາ ເຍນ ປວາຣິຕໍ, ເຕເນວ ວິສຸທ຺ຘີຕິ ຎາຍຕິ, ເຍນ ນ ປວາຣິຕໍ. ກິໍ ນຸ ຕໍ ອວິສຸທ຺ຘນ຺ຕິ ສິຍາ ກສ຺ສຈິ ປຸຖຸຊ຺ຊນສ຺ສ ອາສງ຺ກາ? ຕນ຺ນິວາຣຓຕ຺ຖມາຫ ‘‘ໂນ ອປຣິສຸທ຺ຘຕ຺ຕາ’’ຕິ. ມໂນທ຺ວາຣໍ ປຣິສຸທ຺ຘໍ ອສຸຈິກາຣກອຸປກ຺ກິເລສານໍ ທູຣີກຕຕ຺ຕາ. ອິທານິ ເອຕຣຫິ ພຸທ຺ຘກາເລ. ເອຕ຺ຖາຕິ ມໂນທ຺ວາຣປຣິສຸທ຺ຘິຍໍ.

ກາຍວຈີສມາຈາຣປຣິສຸທ຺ຘິຍາ ປເວທິຕາຍ ມໂນສມາຈາຣປຣິສຸທ຺ຘິ ອຕ຺ຖໂຕ ປເວທິຕາວ ໂຫຕີຕິ ‘‘ກາຍິກໍ ວາ ວາຈສິກໍ ວາ’’ອິຈ຺ເຈວາຫ. ຕຖາ ຫິ ວຸຕ຺ຕໍ ‘‘ກາຍິກໍ ວາ ວາຈສິກໍ ວາຕິ ອິທໍ ຈຕຸນ຺ນໍ ອຣກ຺ຂິຍຕໍ ສນ຺ຘາຍ ເຖໂຣ ອາຫາ’’ຕິ. ‘‘ຠິກ຺ຂເວ, ປວາເຣມິ ໂວ’’ຕິ ຠິກ຺ຂຸສງ຺ຆວິສຍຕ຺ຕາ ປວາຣຓາຍ ຕຕ຺ຖ ຠິກ຺ຂຸສງ຺ເຆນ ວຕ຺ຕພ຺ພໍ ປຏິວຈນໍ ເທນ຺ໂຕ ຘມ຺ມເສນາປຕິ ‘‘ຠິກ຺ຂຸສງ຺ຆສ຺ສ ຠາຣໍ ວຫນ຺ໂຕ’’ຕິ ວຸຕ຺ໂຕ. ເຕນາຫ ‘‘ນ ໂຂ ມຍໍ, ຠນ຺ເຕ’’ຕິອາທິ. ອຣກ຺ຂິຍານີຕິ ປຣານຸວາທໂຕ ນ ຠາຍິຕພ຺ພານິ ສຸປຣິສຸທ຺ຘຠາວໂຕ.

‘‘ອນຸປ຺ປນ຺ນສ຺ສາ’’ຕິ ອິທໍ ອຘິປ຺ປາຍິກວຈນນ຺ຕິ ຕທຘິປ຺ປາຍໍ ວິວຣນ຺ໂຕ ‘‘ກສ຺ສປສມ຺ມາສມ຺ພຸທ຺ຘໂຕ ປຏ຺ຐາຍາ’’ຕິອາທິມາຫ. ກສ຺ສປສມ຺ມາສມ຺ພຸທ຺ຘໂຕຕິ ວິຠຕ຺ເຕ ນິສ຺ສກ຺ກໍ, ຕສ຺ມາ ກສ຺ສປສມ຺ມາສມ຺ພຸທ຺ຘໂຕ ໂອຣນ຺ຕິ ອຕ຺ໂຖຕິ. ອຎ຺ເຎນາຕິ ອິໂຕ ຠຄວໂຕ ອຎ຺ເຎນ. ອນຸປ຺ປາທິຕປຸພ຺ພສ຺ສາຕິ ປຣສນ຺ຕາເນ ນ ອຸປ຺ປາທິຕປຸພ຺ພສ຺ສ. ສສນ຺ຕາເນ ປນ ປຈ຺ເຈກພຸທ຺ຘານໍ ວເສນ ນ ອຸປ຺ປາທິໂຕຕິ ນ ສກ຺ກາ ວຕ຺ຕຸໍ. ສມນຸອາຄຕາຕິ ສມ຺ມາ ອນຸ ອຸປຄຕາ. ຠຄວໂຕ ສີລາທໂຍ ຄຸຓາຕິ ພຸທ຺ຘຠູຕສ຺ສ ຄຸຓາ ອຘິປ຺ເປຕາຕິ ອາຫ ‘‘ອຣຫຕ຺ຕມຄ຺ຄເມວ ນິສ຺ສາຍ ອາຄຕາ’’ຕິ. ສພ຺ພຄຸຓາຕິ ທສພລຎາຓາທໂຍ ສພ຺ເພ ພຸທ຺ຘຄຸຓາ. ຠນ຺ເຕຕິ ເອຕ຺ຖ ອິຕິສທ຺ໂທ ອາທິອຕ຺ໂຖ. ເຕນ ‘‘ອິເມສໍ ປນ…ເປ… ວາຈສິກໍ ວາ’’ຕິ ຍາວາຍໍ ປາຬິປເທໂສ, ຕໍ ສພ຺ພໍ ຄຓ຺ຫາຕິ. ເຕນາຫ ‘‘ອິທໍ ເຖໂຣ…ເປ… ປວາເຣນ຺ໂຕ ອາຫາ’’ຕິ.

ຍໍ ອຕ຺ຕໂນ ປຸຎ຺ຎານຸຠາວສິທ຺ຘໍ ຈກ຺ກຣຕນໍ ນິປ຺ປຣິຍາຍໂຕ ເຕນ ປວຕ຺ຕິຕໍ ນາມ, ນ ອິຕຣນ຺ຕິ ປຐມນໂຍ ວຸຕ຺ໂຕ. ຍສ຺ມາ ປວຕ຺ຕິຕສ຺ເສວ ອນຸປວຕ຺ຕນໍ, ປຐມນໂຍ ຈ ຕໍສທິເສ ຕພ຺ໂພຫາຣວເສນ ວຸຕ຺ໂຕຕິ ຕໍ ອນາທິຍິຕ຺ວາ ທຸຕິຍນໂຍ ວຸຕ຺ໂຕ. ທສວິຘນ຺ຕິ ອນ຺ໂຕຊນສ຺ມິໍ, ພລກາເຍ ຣກ຺ຂາວຣຓຄຸຕ຺ຕິຍາ ສໍວິຘານໍ, ຂຕ຺ຕິເຍສຸ ອນຸຍຸຕ຺ເຕສຸ, ພ຺ຣາຫ຺ມຓຄຫປຕິເກສຸ, ເນຄມຊານປເທສຸ, ສມຓພ຺ຣາຫ຺ມເຓສຸ, ມິຄປກ຺ຂີສຸ ອຘມ຺ມຈາຣປຏິກ຺ເຂໂປ, ອຘນານໍ ຘນານຸປ຺ປທານໍ, ສມຓພ຺ຣາຫ຺ມເຓ ອຸປສງ຺ກມິຕ຺ວາ ປຎ຺ຫປຸຈ຺ຉນນ຺ຕິ ເອວໍ ທສວິຘໍ. ຕຕ຺ຖ ຄຫປຕິເກ ປກ຺ຂິຊາເຕ ຈ ວິສຸໍ ກຕ຺ວາ ຄຫຓວເສນ ທ຺ວາທສວິຘໍ. ຈກ຺ກວຕ຺ຕິວຕ຺ຕນ຺ຕິ ຈກ຺ກວຕ຺ຕິຠາວາວຫໍ ວຕ຺ຕໍ. ຍສ຺ມາ ຍາຖາວໂຕ ປວຕ຺ຕິຕໍ, ຕທນຸຣູປກໍ ປນ ຎາເຍນ ຍຸຕ຺ຕເກນ ປວຕ຺ຕິຕໍ ນາມ ໂຫຕີຕິ ອາຫ ‘‘ສມ຺ມາ ນເຍນ ເຫຕຸນາ ກາຣເຓນາ’’ຕິ. ອຸຠໂຕຠາຄວິມຸຕ຺ຕາຕິ ອຸຠຍຠາເຄຫິ ອຸຠຍຠາຄໂຕ ວິມຸຕ຺ຕາຕິ ອຍເມຕ຺ຖ ອຕ຺ໂຖຕິ ທສ຺ເສຕິ ‘‘ທ຺ວີຫິ ຠາເຄຫິ ວິມຸຕ຺ຕາ, ອຣູປາ…ເປ… ນາມກາຍໂຕ’’ຕິ ອິມິນາ. ເຕວິຊ຺ຊາທິຠາວນ຺ຕິ ເຕວິຊ຺ຊຉຬຠິຎ຺ຎຈຕຸປ຺ປຏິສມ຺ຠິທຠາວໍ. ປຎ຺ຎາວິມຸຕ຺ຕາ ຫິ ຕໍ ຕິວິຘໍ ອປ຺ປຕ຺ຕາ ເກວລໍ ປຎ຺ຎາຍ ເອວ ວິມຸຕ຺ຕາ.

ວິສຸທ຺ຘຕ຺ຖາຍາຕິ ວິສຸທ຺ຘິປວາຣຓຕ຺ຖາຍ. ສໍໂຍຊນຏ຺ເຐນ ສໍໂຍຊນສງ຺ຂາເຕ ເຈວ ພນ຺ຘນຏ຺ເຐນ ພນ຺ຘນສງ຺ຂາເຕ ຈ. ວິຊິຕສງ຺ຄາມນ຺ຕິ ຍຖາ ຣາຄາທໂຍ ປຸນ ນ ສີສໍ ອຸກ຺ຂິປນ຺ຕິ, ເອວໍ ອຣິຍມຄ຺ຄເສນາຍ ວເສນ ວິຊິຕສງ຺ຄາມໍ. ເຕນາຫ ‘‘ວິຊິຕຣາຄໂທສໂມຫສງ຺ຄາມ’’ນ຺ຕິ. ມາຣພລສ຺ສາຕິ ມາຣເສນາຍ, ມາຣສ຺ສ ວາ ສາມຕ຺ຖິຍສ຺ສ. ເວເນຍ຺ຍສຕ຺ຖນ຺ຕິ ວິເນຕພ຺ພຊນສມູຫໍ. ສກຏາທິສຕ຺ຖສຠາຄໂຕ ວິເນຍ຺ໂຍວ ສຕ຺ໂຖຕິ ຕໍ ເວເນຍ຺ຍສຕ຺ຖໍ. ສີລສາຣາທິອຠາວໂຕ ອນ຺ໂຕຕຸຈ຺ໂຉ.

ປວາຣຓາສຸຕ຺ຕວຓ຺ຓນາ ນິຏ຺ຐິຕາ.