໖. ສາຣິປຸຕ຺ຕສຸຕ຺ຕວຓ຺ຓນາ

໒໑໔. ວາກ຺ກຣຓຈາຕຸຣິຍໂຕ ວຈນຄຸຓເຫຕູນໍ ປູຣິຍາ ປູເຣ ຠວາຕິ ໂປຣີ, ຕາຍ ໂປຣິຍາ. ເຕນາຫ ‘‘ອກ຺ຂຣາທິປຣິປຸຓ຺ຓາຍາ’’ຕິ. ອວິພທ຺ຘາຍາຕິ ປິຕ຺ຕາທີຫິ ນ ວິພທ຺ຘາຍ ອນຸປທ຺ທຸຕາຍ. ເຕນາຫ ‘‘ອປລິພຸທ຺ຘາຍາ’’ຕິອາທິ. ນິທ຺ໂທສາຍາຕິ ອຕ຺ຖໂຕ ພ຺ຍຎ຺ຊນໂຕ ວິຄຕໂທສາຍ. ອກ຺ຂລິຕປທພ຺ຍຎ຺ຊນາຍາຕິ ອຄລິຕປທພ຺ຍຎ຺ຊນາຍ, ອຕ຺ຖສ຺ສ ວິຎ຺ຎາປນິຍາຕິ ທິຏ຺ຐຘມ຺ມິກາທິອຕ຺ຖສ຺ສ ໂພຘເນ ປຣິຍຕ຺ຕາຍ. ຠິກ຺ຂຸນນ຺ຕິ ຄາຖາສຸຂຕ຺ຖໍ ຣສ຺ສໍ ກຕ຺ວາ ວຸຕ຺ຕໍ.

‘‘ສໍຂິຕ຺ເຕນປິ ເທເສຕິ, ວິຕ຺ຖາເຣນປິ ຠາສຕີ’’ຕິ ນຍິທໍ ປຐມໍ ອຸທ຺ທິສິຕ຺ວາ ຕສ຺ສ ອຕ຺ຖສ຺ສ ກິຕ຺ຕນວເສນ ປວຕ຺ຕິຕໍ ວຈນໍ ສນ຺ຘາຍ ວຸຕ຺ຕໍ. ສາ ຫິ ວິຕ຺ຖາຣເທສນາ ເອວ ໂຫຕິ. ຍາ ປນ ເທສນາ ກທາຈິ ຘມ຺ມປຏິຄ຺ຄາຫການໍ ອຊ຺ຌາສຍວເສນ ສໍຂິຕ຺ເຕເນວ ທສ຺ເສຕ຺ວາ ນິກ຺ຂິປຕິ, ຍາ ຈ ກທາຈິ ວິຕ຺ຖາເຣນ, ຕທຸຠຍໍ ສນ຺ຘາຍ ວຸຕ຺ຕໍ. ເຕນາຫ ‘‘ຈຕ຺ຕາຣິມານີ’’ຕິອາທິ. ສຠາວມຘຸໂຣ ປຈ຺ຈຍວເສນ ມຘຸຣຕໂຣ ໂຫຕີຕິ ທສ຺ເສຕຸໍ ‘‘ຍຖາ’’ຕິອາທິ ວຸຕ຺ຕໍ. ວິວິຘາກາຣໍ ກຕ຺ວາ ຘມ຺ມໍ ກເຖຕຸໍ ປຏິຠາຕີຕິ ປຏິຠານໍ, ເທສນາປກາຣຎາຓໍ. ເຕນາຫ ‘‘ສມຸທ຺ທໂຕ’’ຕິອາທິ. ໂອທຫນ຺ຕີຕິ ອວຊານນວເສນ ຄເມນ຺ຕິ.

ສາຣິປຸຕ຺ຕສຸຕ຺ຕວຓ຺ຓນາ ນິຏ຺ຐິຕາ.