໔. ອານນ຺ທສຸຕ຺ຕວຓ຺ຓນາ

໒໑໒. ຣາໂຄຕິ ເອຕ຺ຖ ອາຍສ຺ມໂຕ ວງ຺ຄີສສ຺ສ ຣາຄສ຺ສ ອຸປ຺ປຕ຺ຕິຍາ ກາຣຓໍ ວິຠາເວຕຸໍ ‘‘ອາຍສ຺ມາ ອານນ຺ໂທ’’ຕິອາທິ ວຸຕ຺ຕໍ. ຕນ຺ຕິ ອານນ຺ທຕ຺ເຖຣໍ. ອາຣມ຺ມຓໍ ປຣິຄ຺ຄເຫຕຸນ຺ຕິ ກາຍເວທນາທິເຠທໍ ອາຣມ຺ມຓໍ ສຕິໂຄຈຣໍ. ອສຸຠທຸກ຺ຂາທິໂຕ, ຣູປາທິເອເກກເມວ ວາ ຉຬາຣມ຺ມຓໍ ອນິຈ຺ຈທຸກ຺ຂາທິໂຕ ປຣິຄ຺ຄຓ຺ຫິຕຸໍ ປຣິຈ຺ຉິຊ຺ຊ ຊານິຕຸໍ. ອິຕ຺ຖິຣູປາຣມ຺ມເຓຕິ ອິຕ຺ຖິສນ຺ຕາເນ ຣູປສຠາເວ ອາຣມ຺ມເຓ.

ນິພ຺ພາປນນ຺ຕິ ນິພ຺ພາປຍຕິ ເອເຕນາຕິ ນິພ຺ພາປນໍ. ວິປລ຺ລາເສນາຕິ ອສຸເຠ ‘‘ສຸຠ’’ນ຺ຕິ ວິປລ຺ລາສຠາວເຫຕຸ. ຣາຄຏ຺ຐານິຍນ຺ຕິ ຣາຄຸປ຺ປຕ຺ຕິເຫຕຸ. ອິຏ຺ຐາຣມ຺ມຓນ຺ຕິ ສຸຠາຣມ຺ມຓໍ. ເອຕ຺ຖ ຈ ອິຏ຺ຐາຣມ຺ມຓສີເສນ ຕຕ຺ຖ ອິຏ຺ຐາກາຣຄ຺ຄຫຓໍ ວທຕິ. ຕຎ຺ຫິ ວຊ຺ຊນີຍໍ. ປຣໂຕຕິ ອວສວຕ຺ຕນຕ຺ເຖນ ອຎ຺ຎໂຕ. ສງ຺ຂາຣາ ຫິ ‘‘ມາ ຠິຊ຺ຊນ຺ຕູ’’ຕິ ອິຈ຺ຉິຕາປິ ຠິຊ຺ຊນ຺ເຕວ, ຕສ຺ມາ ເຕ ອວສວຕ຺ຕິຕ຺ຕາ ປໂຣ ນາມ, ສາ ຈ ເນສໍ ປຣຕາ ອນິຈ຺ຈທສ຺ສເນນ ປາກຏາ ໂຫຕີຕິ ວຸຕ຺ຕໍ ‘‘ປຣໂຕ ປສ຺ສາຕິ ອນິຈ຺ຈໂຕ ປສ຺ສາ’’ຕິ. ກາມໍ ວິປສ຺ສນາ ສງ຺ຂາຣນິມິຕ຺ຕໍ ນ ປຣິຈ຺ຈຊຕິ ສງ຺ຂາເຣ ອາຣພ຺ຠ ວຕ຺ຕນໂຕ, ເຍສໍ ປນ ນິມິຕ຺ຕານໍ ອຄ຺ຄຫເຓນ ອນິມິຕ຺ຕາຕິ ຄຫິຕຸໍ ອຣຫຕິ, ຕໍ ທສ຺ເສຕຸໍ ‘‘ນິຈ຺ຈາທີນໍ ນິມິຕ຺ຕານ’’ນ຺ຕິອາທິ ວຸຕ຺ຕໍ. ສລກ຺ຂຓ-ສາມຎ຺ຎລກ຺ຂຓ-ທສ຺ສນວເສນ ມານສ຺ສ ທສ຺ສນາຠິສມໂຍ, ວິປສ຺ສນາຍ ປຫານາຠິສມໂຍ. ‘‘ມຄ຺ເຄນາ’’ຕິ ວທນ຺ຕິ, ມຄ຺ເຄເນວ ປນ ອສມ຺ໂມຫໂຕ ປຣິຎ຺ຎາປຏິເວຘວເສນ ທສ຺ສນາຠິສມໂຍ, ປຫານປຏິເວຘວເສນ ປຫານາຠິສມໂຍ. ຣາຄາທິສນ຺ຕຕາຍາຕິ ຣາຄາທີນໍ ສມຸຈ຺ເຉທວເສນ ປຏິປ຺ປສ຺ສທ຺ຘິວເສນ ວູປສເມຕພ຺ພໂຕ ສນ຺ຕຠາເວນ.

ອານນ຺ທສຸຕ຺ຕວຓ຺ຓນາ ນິຏ຺ຐິຕາ.