໒. ອຣຕິສຸຕ຺ຕວຓ຺ຓນາ

໒໑໐. ວິຫາຣຄຣຸໂກ ກິເຣສ ເຖໂຣຕິ ເອເຕນ ເຖໂຣ ອຕ຺ຕໂນ ສທ຺ຘິວິຫາຣິກໍ ວງ຺ຄີສໍ ໂອວທິຕຸໍ ອນວສໂຣ. ເຕນ ອນ຺ຕຣນ຺ຕຣາ ຕສ຺ສ ຈິຕ຺ຕໍ ຣາໂຄ ອນຸທ຺ຘໍເສຕີຕິ ທສ຺ເສຕິ. ສາສເນ ອຣຕິນ຺ຕິ ສີລປຣິປູຣເຓ ສມຖວິປສ຺ສນາຠາວນາຍ ຈ ອນຠິຣຕິໍ. ກາມຄຸເຓສຸ ຈ ຣຕິນ຺ຕິ ປຎ຺ຈສຸ ກາມໂກຏ຺ຐາເສສຸ ອສ຺ສາທໍ. ປາປວິຕກ຺ກນ຺ຕິ ກາມສງ຺ກປ຺ປໍ. ສພ຺ພາກາເຣນາຕິ ສພ຺ເພ ຕທງ຺ຄວິກ຺ຂມ຺ຠນສມຸຈ຺ຉິນ຺ທນາກາເຣນ. ຍຖາ ມຫນ຺ຕໍ ອຣຎ຺ຎໍ ວນຖນ຺ຕິ, ເອວໍ ມຫນ຺ຕໍ ກິເລສວນໍ ‘‘ວນຖ’’ນ຺ຕິ ວຸຕ຺ຕໍ.

ປຖວິຎ຺ຈ ເວຫາສນ຺ຕິ ຠຸມ຺ມຕ຺ເຖ ປຈ຺ຈຕ຺ຕວຈນໍ, ຕສ຺ມາ ປຖວິຍໍ ອາກາເສ ຈາຕິ ອຕ຺ໂຖ. ເຕນາຫ ‘‘ປຖວິຏ຺ຐິຕ’’ນ຺ຕິອາທິ. ຊຄຕີຕິ ຈ ປຖວິຍາ ເວວຈນໍ. ເຕນາຫ ‘‘ອນ຺ໂຕປຖວິຍ’’ນ຺ຕິ. ປຣິຊີຣຕີຕິ ສພ຺ພ຺ພໂສ ຊຣໍ ປາປຸຓາຕິ. ສມາຄນ຺ຕ຺ວາຕິ ຎາເຓນ ສມາຄນ຺ຕ຺ວາຕິ ອຕ຺ໂຖ. ເຕນາຫ ‘‘ມຸຕຕ຺ຕາຕິ ວິຎ຺ຎາຕຕ຺ຕຠາວາ’’ຕິ.

ປຏິຆປເທນ ຄນ຺ຘຣສາ ຄຫິຕາ ຆານຊິວ຺ຫານໍ ປຏິຫນນວເສນ ປວຕ຺ຕນໂຕ. ມຸຕປເທນ ໂຜຏ຺ຐພ຺ພາຣມ຺ມຓໍ ຄຫິຕໍ ມຸຕ຺ວາ ຄເຫຕພ຺ພໂຕ. ນ ລິປ຺ປຕີຕິ ນ ມກ຺ຂີຍຕິ.

ສຏ຺ຐິ-ສທ຺ໂທ ຉ-ສທ຺ເທນ ສມານຕ຺ໂຖຕິ ‘‘ສຏ຺ຐິນິສ຺ສິຕາ’’ຕິ ປທສ຺ສ ‘‘ຉອາຣມ຺ມຓນິສ຺ສິຕາ’’ຕິ ອຕ຺ໂຖ ວຸຕ຺ໂຕ. ປຸຖູ ອຘມ຺ມວິຕກ຺ກາຕິ ຣູປວິຕກ຺ກາທິວເສນ ພຫູ ນານາວິຕກ຺ກາ ມິຈ຺ຉາສງ຺ກປ຺ປາ. ຊນຕາຍ ນິວິຏ຺ຐາຕິ ມຫາຊເນ ປຕິຏ຺ຐິຕາ. ເຕສໍ ວເສນາຕິ ເຕສມ຺ປິ ມິຈ຺ຉາວິຕກ຺ການໍ ວເສນ. ນ ກຕ຺ຖຈິ ອາຣມ຺ມເຓ. ກິເລສວຄ຺ຄຄໂຕຕິ ກິເລສສງ຺ຄຓິກໍ ອຸປຄໂຕ ນ ຠເວຍ຺ຍ, ກິເລສວິຕກ຺ກາ ນ ອຸປ຺ປາເທຕພ຺ພາຕິ ອຕ຺ໂຖ. ທຸຏ຺ຐຸລ຺ລວຈນໍ ກາມປຏິສໍຍຸຕ຺ຕກຖາ.

ທພ຺ພຊາຕິໂກຕິ ທພ຺ພຣູໂປ. ເນປກ຺ເກນາຕິ ໂກສລ຺ເລນ. ນິພ຺ພານໍ ປຏິຈ຺ຈາຕິ ອສງ຺ຂຕຘາຕຸໍ ອາຣມ຺ມຓວເສນ ປຏິຈ຺ຈ. ປຣິນິພ຺ພານກາລນ຺ຕິ ອນຸປາທິເສສນິພ຺ພານກາລໍ.

ອຣຕິສຸຕ຺ຕວຓ຺ຓນາ ນິຏ຺ຐິຕາ.