໑. ນິກ຺ຂນ຺ຕສຸຕ຺ຕວຓ຺ຓນາ

໒໐໙. ອາຬວິຍນ຺ຕິ ອາຬວິນຄຣສມີເປ. ອຄ຺ຄເຈຕິເຍຕິ ໂຄຕມກເຈຕິຍາທີຫິ ອຸຕ຺ຕມເຈຕິເຍ. ຕໍ ກິຣ ຠູມິຣາມເຓຍ຺ຍກຠາເວນ ມນຸຎ຺ຎຕາຍ ປຘານຍຸຕ຺ຕຕາທິສມ຺ປຕ຺ຕິຍາ ຈ ອິຕຣເຈຕິເຍຫິ ເສຏ຺ຐສມ຺ມຕໍ. ກປ຺ປຕ຺ເຖເຣນາຕິ ‘‘ກປ຺ໂປ’’ຕິ ໂຄຕ຺ຕໂຕ ອາຄຕນາໂມ ເຖໂຣ, ສຫສ຺ສປຸຣາຓຊຏິລານໍ ອພ຺ຠນ຺ຕເຣ ອຍໍ ມຫາເຖໂຣ. ໂອຫີນໂກຕິ ເຖເຣສຸ ຄາມໍ ປິຓ຺ຑາຍ ປວິຏ຺ເຐສຸ ວິຫາເຣ ເອວ ອວຫີນໂກ ຐິໂຕ. ຕຕ຺ຖ ກາຣຓມາຫ ‘‘ວິຫາຣປາໂລ’’ຕິອາທິ. ສມລງ຺ກຣິຕ຺ວາຕິ ສມໍ ອລງ຺ກາເຣນ ອລງ຺ກຣິຕ຺ວາ. ກຸສລຈິຕ຺ຕໍ ວິທ຺ຘໍເສຕິ ປວຕ຺ຕິຕຸໍ ອປ຺ປທານວເສນ. ເອຕສ຺ມິນ຺ຕິ ເອຕສ຺ມິໍ ຣາເຄ ອຸປ຺ປນ຺ເນ. ‘‘ເອກສ຺ມິ’’ນ຺ຕິ ວາ ປາໂຐ, ເອກສ຺ມິໍ ວິສຠາຄວຕ຺ຖຸເກ ຣາເຄ ອຸປ຺ປນ຺ເນ. ຘມ຺ໂມ ວາຕິ ມມ ຈິຕ຺ເຕ ອຸປ຺ປຊ຺ຊນກໂຕ ອຎ຺ໂຎ ຘມ຺ໂມ ວາ. ເຍນ ກາຣເຓນ ປໂຣ ອນຠິຣຕິໍ ວິໂນເທຕ຺ວາ ອິທາເນວ ອຠິຣຕິໍ ອຸປ຺ປາເທຍ຺ຍ, ຕໍ ກາຣຓໍ ກຸໂຕ ລພ຺ຠາຕິ ໂຍຊນາ, ຕໍ ກາຣຓໍ ນຕ຺ຖີຕິ ອຕ຺ໂຖ, ຕສ຺ສ ອຠາວກາຣຓວຈນໍ.

ອນຄາຣິຍນ຺ຕິ ອຄາຣວິຣຫໂຕ ອນຄາຣໍ ປພ຺ພຊ຺ຊາ. ຕຕ຺ຖ ນິຍຸຕ຺ຕຕ຺ຕາ ອນຄາຣິຍໍ ກ-ກາຣສ຺ສ ຍ-ກາຣໍ ກຕ຺ວາ, ປພ຺ພຊິຕນ຺ຕິ ອຕ຺ໂຖ. ອາຘາວນ຺ຕີຕິ ຫທຍໍ ອຠິຠວິຕ຺ວາ ຘາວນ຺ຕິ. ອຸຄ຺ຄຕານນ຺ຕິ ອຸຬາຣານໍ ປຸຕ຺ຕາ. ເຕນາຫ ‘‘ມເຫສກ຺ຂາ ຣາຊຎ຺ຎຠູຕາ’’ຕິ. ອຸຕ຺ຕມປ຺ປມາຓນ຺ຕິ ສຫສ຺ສປລໍ ສມນ຺ຕາຕິ ສມນ຺ຕໂຕ. ປຣິກິເຣຍ຺ຍຸນ຺ຕິ ວິຊ຺ເຌຍ຺ຍຸໍ. ເອຕສ຺ມາ ສຫສ຺ສາຕິ ຍຖາວຸຕ຺ຕາ ຘນຸຄ຺ຄຫສຫສ຺ສໂຕ. ອຕິເຣກຕຣາ ອເນກສຫສ຺ສາ. ອິຕ຺ຖິໂຍ ໂອໂລກນສິຕລປິຕໂຣທິຕສເຣ ຂິປນ຺ຕິໂຍ. ເນວ ມໍ ພ຺ຍາຘຍິສ຺ສນ຺ຕິ ເນວ ມໍ ນິຊ຺ຌາຍິສ຺ສນ຺ຕິ. ‘‘ພ຺ຍາຘຍິສ຺ສຕີ’’ຕິ ປາໂຐຕິ ວຸຕ຺ຕໍ ‘‘ຈາເລຕຸໍ ນ ສກ຺ຂິສ຺ສຕີຕິ ອຕ຺ໂຖ’’ຕິ. ຘມ຺ເມ ສມ຺ຫີຕິ ສເກ ສນ຺ຕິເກ ປຕິຏ຺ຐິເຕ ສາສນຘມ຺ເມ. ເຕນາຫ ‘‘ອນຠິຣຕິໍວິໂນເທຕ຺ວາ’’ຕິອາທິ.

ມຄ຺ຄນ຺ຕິ ‘‘ມຄ຺ໂຄ’’ຕິ ວຕ຺ຕພ຺ເພ ລິງ຺ຄວິປລ຺ລາເສນ ວຸຕ຺ຕໍ. ເຕນາຫ ‘‘ໂສ ຫິ ນິພ຺ພານສ຺ສ ປຸພ຺ພຠາຄມຄ຺ຄ຺ໂຄ’’ຕິ.

ນິກ຺ຂນ຺ຕສຸຕ຺ຕວຓ຺ຓນາ ນິຏ຺ຐິຕາ.