໙. ຕຸຣູພ຺ຣຫ຺ມສຸຕ຺ຕວຓ຺ຓນາ

໑໘໐. ອາພາໂຘ ເອຕສ຺ສ ອຕ຺ຖີຕິ ອາພາຘິໂກ. ອນນ຺ຕຣສຸຕ຺ເຕຕິ ອນາຄຕານນ຺ຕເຣ ສຸຕ຺ເຕ. ວຣາໂກຕິ ອນຸຄ຺ຄຫວຈນເມວ, ນ ນິປ຺ປຣິຍາເຍນ ວຸຕ຺ຕວຈນໍ. ປິຍສີລາຕິ ອິມິນາ ເອຕສ຺ມິໍ ອຕ຺ເຖ ນິຣຸຕ຺ຕິນເຍນ ‘‘ເປສລາ’’ຕິ ປທສິທ຺ຘີຕິ ທສ຺ເສຕິ. ກພຣກ຺ຂີນີຕິ ພ຺ຍາຘິພເລນ ປຣິຠິນ຺ນວຓ຺ຓຕາຍ ກພຣຠູຕານິ ອກ຺ຂີນິ. ຍຕ຺ຕກນ຺ຕິ ຍໍ ຕ຺ວໍ ຠຄວໂຕ ວຈນໍ ອຎ຺ຎຖາ ກໂຣສິ, ຕຕ຺ຕກໍ ຕຍາ ອປຣທ຺ຘໍ, ຕສ຺ສ ປມາຓໍ ນຕ຺ຖີຕິ ອຕ຺ໂຖ. ຍສ຺ມາ ອນາຄາມິໂນ ນາມ ກາມຈ຺ຉນ຺ທພ຺ຍາປາທາ ປຫີນາ ໂຫນ຺ຕິ, ຕ຺ວຎ຺ຈ ທິຏ຺ໂຐ ກາມຈ຺ຉນ຺ທພ຺ຍາປາທວເສນ ອິຘາຄໂຕ, ຕສ຺ມາ ຍາວ ເຕ ອິທໍ ອປຣທ຺ຘນ຺ຕິ ອຍເມເວຕ຺ຖ ອຕ຺ໂຖ ທຏ຺ຐພ຺ໂພ.

ອທິຏ຺ຐິປ຺ປຕ຺ໂຕຕິ ອປ຺ປຕ຺ຕທິຏ຺ຐິນິມິຕ຺ໂຕ. ຄິລວິໂສ ວິຍ ວິສໍ ຄິລິຕ຺ວາ ຐິໂຕ ວິຍ. ກຸຐາຣິສທິສາ ມູລປຈ຺ຉິນ຺ທນຏ຺ເຐນ. ອຸຕ຺ຕມຕ຺ເຖຕິ ອຣຫຕ຺ເຕ. ຂີຓາສໂວຕິ ວທຕິ ສຸນກ຺ຂຕ຺ໂຕ ວິຍ ອເຈລໍ ໂກຣກ຺ຂຕ຺ຕິຍໍ. ໂຍ ອຄ຺ຄສາວໂກ ວິຍ ປສໍສິຕພ຺ໂພ ຂີຓາສໂວ, ຕໍ ‘‘ທຸສ຺ສີໂລ ອຍ’’ນ຺ຕິ ໂຍ ວາ ວທຕິ. ສມໂກວ ວິປາໂກຕິ ປສໍສິຍນິນ຺ທາ ວິຊ຺ຊມານຄຸຓປຣິຘໍສນວເສນ ປວຕ຺ຕາ ຍາວ ມຫາສາວຊ຺ຊຕາຍ ກຏຸກຕຣວິປາກາ, ຕາວ ນິນ຺ທິຍປສໍສາປິ ມຫາສາວຊ຺ຊຕາຍ ສມວິປາກາ ຕຕ຺ຖ ອວິຊ຺ຊມານຄຸຓສມາໂຣປເນນ ອຕ຺ຕໂນ ປເຣສໍ ມິຈ຺ຉາປຏິປຕ຺ຕິເຫຕຸຠາວໂຕ ປສໍສິເຍນ ຕສ຺ສ ສມຠາວກຣຓໂຕ ຈ. ໂລເກປິ ຫິ ອຍໍ ປຸເຣ ສມຓຄາຣຍ຺ໂຫ ໂຫຕິ, ປເຄວ ທຸປ຺ປຏິປນ຺ນທຸປ຺ປຏິປນ຺ໂນຕິ ສມໍ ກໂຣນ຺ຕີຕິ.

ສເກນາຕິ ອຕ຺ຕໂນ ສາປເຕຍ຺ເຍນ. ອຍໍ ອປ຺ປມຕ຺ຕໂກ ອປຣາໂຘ ທິຏ຺ຐຘມ຺ມິກຕ຺ຕາ ສປ຺ປຕິກາຣຕ຺ຕາ ຈ ຕສ຺ສ. ອຍໍ ມຫນ຺ຕຕໂຣ ກລິ ກຕູປຈິຕສ຺ສ ສມ຺ປຣາຍິກຕ຺ຕາ ອປ຺ປຕິກາຣຕ຺ຕາ ຈ.

‘‘ນິຣພ຺ພຸໂທ’’ຕິ ຄຓນາວິເສໂສ ເອໂກຕິ ອາຫ ‘‘ນິຣພ຺ພຸທຄຓນາຍາ’’ຕິ, ສຕສຫສ຺ສໍ ນິຣພ຺ພຸທານນ຺ຕິ ອຕ຺ໂຖ. ນິຣພ຺ພຸທປຣິຄຓນໍ ປນ ເຫຏ຺ຐາ ວຸຕ຺ຕເມວ. ຍມຣິຍຄຣຫີ ນິຣຍໍ ອຸເປຕີຕິ ເອຕ຺ຖ ຍຖາວຸຕ຺ຕໍ ອາຍຸປ຺ປມາຓໍ ປາກຕິເກນ ອຣິຍູປວາທິນາ ວຸຕ຺ຕນ຺ຕິ ເວທິຕພ຺ພໍ. ‘‘ອຄ຺ຄສາວການໍ ປນ ຄຸຓມຫນ຺ຕຕາຍ ຕໂຕປິ ອຕິວິຍ ມຫນ຺ຕຕຣາ ເອວາ’’ຕິ ວທນ຺ຕິ.

ຕຸຣູພ຺ຣຫ຺ມສຸຕ຺ຕວຓ຺ຓນາ ນິຏ຺ຐິຕາ.