໑໐. ໂກກາລິກສຸຕ຺ຕວຓ຺ຓນາ

໑໘໑. ທ຺ເວ ໂກກາລິກນາມກາ ຠິກ຺ຂູ, ຕໂຕ ອິຘ ອຘິປ຺ເປຕໍ ນິທ຺ຘາເຣຕ຺ວາ ທສ຺ເສຕຸໍ – ‘‘ໂກ ອຍໍ ໂກກາລິໂກ’’ຕິ? ປຸຈ຺ຉາ. ສຸຕ຺ຕສ຺ສ ອຏ຺ຐຸປ຺ປຕ຺ຕິໍ ທສ຺ເສຕຸໍ – ‘‘ກສ຺ມາ ຈ ອຸປສງ຺ກມີ’’ຕິ? ປຸຈ຺ຉາ. ອຍໍ ກິຣາຕິອາທິ ຍຖາກ຺ກມໍ ຕາສໍ ວິສ຺ສຊ຺ຊນໍ. ວິເວກວາສໍ ວສິຕຸກາມຕ຺ຕາ ອປ຺ປິຈ຺ຉຕາຍ ຈ ມາ ກສ຺ສຈິ…ເປ… ວສິໍສຸ.

ປກ຺ກມິສ຺ສນ຺ຕີຕິ ອາຆາຕໍ ອຸປ຺ປາເທສິ ອຕ຺ຕໂນ ອິຈ຺ຉາວິຆາຕນໂຕ. ເຖຣາ ຠິກ຺ຂຸສງ຺ຆສ຺ສ ນິຍ຺ຍາທຍິໍສຸ ປຍຸຕ຺ຕວາຈາຍ ອກຕຕ຺ຕາ ເຖເຣຫິ ຈ ອທີປິຕຕ຺ຕາ. ປຸພ຺ເພປິ…ເປ… ມຎ຺ເຎຕິ ອິມິນາ ເຖຣານໍ ໂກຫຎ຺ເຎ ຐິຕຠາວໍ ອາສງ຺ກຕິ ອວເຓ ວຓໍ ປສ຺ສນ຺ໂຕ ວິຍ, ສຸທ຺ເຘ ອາທາສຕເລ ເລຂໍ ອຸຏ຺ຐາເປນ຺ໂຕ ວິຍ ຈ.

ອປຣຊ຺ຌິຕ຺ວາຕິ ຠຄວໂຕ ສມ຺ມຸຂາ ‘‘ປາປຠິກ຺ຂູ ຊາຕາ’’ຕິ ວຕ຺ວາ. ອາຫ ‘‘ສທ຺ຘາຍ ອາກໂຣ ປສາທາວໂຫ’’ຕິ. ປວຕ຺ຕສທ຺ຘາຍິໂກ ວາຕິ ອຕ຺ໂຖຕິ ອາຫ ‘‘ສທ຺ຘາຕພ຺ພວຈໂນ’’ຕິ.

ປີຬກາ ນາມ ພາຫິຣໂຕ ປຏ຺ຐາຍ ອຏ຺ຐິໍ ຠິນ຺ທຕິ, ອິມາ ປນ ປຐມໍເຍວ ອຏ຺ຐິໍ ຠິນ຺ທິຕ຺ວາ ອຸຄ຺ຄຕາ. ຕຣຸຓເພລຸວມຕ຺ຕິໂຍຕິ ຕຣຸຓພິລ຺ລຜລມຕ຺ຕິໂຍ. ວິສຄິລິໂຕຕິ ຂິຕ຺ຕປຫຣໂຓ. ຕຎ຺ຈ ພຬິສໍ ວິສສມຎ຺ຎາ ໂລເກ. ‘‘ອາຣກ຺ຂເທວຕານໍ ສຸຕ຺ວາ’’ຕິ ປທໍ ອາເນຕ຺ວາ ສມ຺ພນ຺ໂຘ.

ມຄຘຣຏ຺ເຐ ສໍໂວຫາຣໂຕ ມາຄຘໂກ ປຕ຺ໂຕ, ເຕນ. ຕິລສກຏໍ ຕິລວາຫາເອຕິ ວຸຕ຺ໂຕ. ປຈ຺ຈິຕພ຺ພຏ຺ຐານສ຺ສາຕິ ນິຣຍທຸກ຺ເຂນ ປຈ຺ຈິຕພ຺ພປເທສສ຺ສ. ເອຕໍ ‘‘ອພ຺ພຸໂທ’’ຕິ ນາມໍ.

ວສ຺ສຄຓນາຕິ ເອກໂຕ ປຏ຺ຐາຍ ທສຄຸຓິຕໍ ອພ຺ພຸທອາຍຸມ຺ຫິ, ຕໂຕ ປຣໍ ວີສຕິຄຸຓໍ ນິຣພ຺ພຸທາທີສຸ ວສ຺ສຄຓນາ ເວທິຕພ຺ພາ. ສພ຺ພຕ຺ຖາຕິ ອພພາທີສຸ ປທຸມປຣິໂຍສາເນສຸ ສພ຺ເພສຸ ນິຣເຍສຸ. ເອເສວ ນໂຍຕິ ເຫຏ຺ຐິມໂຕ ອຸປຣິມສ຺ສ ອຸປຣິມສ຺ສ ວີສຕິຄຸຓຕໍ ອຕິທິສຕິ.

ໂກກາລິກສຸຕ຺ຕວຓ຺ຓນາ ນິຏ຺ຐິຕາ.

ປຐມວຄ຺ຄວຓ຺ຓນາ ນິຏ຺ຐິຕາ.