໓. ພ຺ຣຫ຺ມເທວສຸຕ຺ຕວຓ຺ຓນາ

໑໗໔. ເອກໂກຕິ ວິເວກຏ຺ຐິຕຕາຍ ນິສ຺ສໂຏ. ຄຓສງ຺ຄຓິກາຠາໂວ ຕສ຺ສາເນນ ທີປິໂຕ, ກິເລສສງ຺ຄຓິກາຠາໂວ ປນ ‘‘ອປ຺ປມຕ຺ໂຕ’’ຕິອາທີຫິ ປກາສິໂຕ. ເປສິຕຕ຺ໂຕຕິ ນິພ຺ພານໍ ປຕິ ເປສິຕຈິຕ຺ໂຕ. ສມ຺ມເທວາຕິ ຎາເຍເນວ. ໂສ ປນ ຍທິ ອາຄມນໂຕ ປຏ຺ຐາຍ ລພ຺ຠຕິ, ວຕ຺ຕພ຺ພເມວ ນຕ຺ຖິ, ອຖ ປຏິປທາຣມ຺ຠໂຕ ປຏ຺ຐາຍ ລພ຺ຠຕິ, ເອວມ຺ປິ ວຏ຺ຏເຕວາຕິ ທສ຺ເສຕຸໍ ‘‘ຍຖາ ວາ ຕຖາ ວາ’’ຕິອາທິ ວຸຕ຺ຕໍ. ອຄ຺ຄມຄ຺ຄາຘິຄເມນ ອສມ຺ໂມຫປຏິເວຘສ຺ສ ສິຂາປ຺ປຕ຺ຕຕ຺ຕາ ມຄ຺ຄຘມ຺ເມສຸ ວິຍ ຜລຘມ຺ເມສຸປິ ສາຕິສໂຍ ອສມ຺ໂມໂຫຕິ ‘‘ສຍໍ ອຠິຎ຺ຎາ’’ຕິ ວຸຕ຺ຕນ຺ຕິ ອາຫ ‘‘ສາມໍ ຊານິຕ຺ວາ’’ຕິ. ຍຖາ ຊານນາ ປນສ຺ສ ສຈ຺ຉິກຣຓໍ ອຕ຺ຕປຈ຺ຈກ຺ຂກິຣິຍາຕິ ‘‘ສຈ຺ຉິກຕ຺ວາ’’ຕິ ວຸຕ຺ຕນ຺ຕິ ອາຫ ‘‘ປຈ຺ຈກ຺ຂໍ ກຕ຺ວາ’’ຕິ. ຕຖາ ສຈ຺ຉິກິຣິຍາ ຈສ຺ສ ວິປສ຺ສນາປຏິລາໂຠຕິ ‘‘ອຸປສມ຺ປຊ຺ຊາ’’ຕິ ວຸຕ຺ຕນ຺ຕິ ອາຫ ‘‘ປຏິລຠິຕ຺ວາ’’ຕິ. ເອເຕນາຕິ ‘‘ຂີຓາ ຊາຕີ’’ຕິອາທິວຈເນນ.

ຊາຕິ ຂີຓາຕິ ເອຕ຺ຖ ຊາຕິສີເສນ ຕພ຺ພິກາຣວນ຺ໂຕ ຂນ຺ຘາ ວຸຕ຺ຕາ. ປຸພ຺ເພວ ຂີຓຕ຺ຕາຕິ ມຄ຺ຄາຘິຄມນໂຕ ປເຄວ ອຕີຕຠາເວເນວ ຂີຓຕ຺ຕາ. ຕຕ຺ຖ ອນາຄເຕສຸ. ວາຍາມາຠາວໂຕຕິ ອວິຊ຺ຊມານຕ຺ຕາ. ອນາຄຕຠາວສາມຎ຺ຎໍ ຄເຫຕ຺ວາ ເລເສນ ວຸຕ຺ຕໍ. ນ ປຈ຺ຈຸປ຺ປນ຺ນາ ວິຊ຺ຊມານຕ຺ຕາຕິ ສໍກິລິຏ຺ຐາ ຈ ມຄ຺ຄຠາວນາຕິ ສິຍາຕິ ວຈນເສໂສ. ຍຖາ ອຊາຕຜລຕຣຸຓຣຸກ຺ຂມູເລ ຉິນ຺ເນ ອາຍຕິອຸປ຺ປຊ຺ຊນາຣຫານິ ຜລານິ ເຉທນປຈ຺ຈຍາ ອນຸປ຺ປຊ຺ຊມານານິ ນຏ຺ຐານິ ນາມ ໂຫນ຺ຕິ, ເອວເມວ ຠາວນາຍ ອສຕິ ອຸປ຺ປຊ຺ຊນາຣຫາ ກິເລສາ ຕປ຺ປຈ຺ຈຍາ ຊາຕິ ຈ ມຄ຺ຄຠາວນາຍ ສຕິ ນ ອຸປ຺ປຊ຺ຊມານາ ປຫີນາຕິ ວຸຈ຺ຈນ຺ຕີຕິ ອິມມຕ຺ຖໍ ທສ຺ເສຕິ ‘‘ມຄ຺ຄສ຺ສ ປນາ’’ຕິອາທິນາ. ອນຸປ຺ປາທຘມ຺ມຕໍ ອາປຊ຺ຊເນນ ຎາເຓນ ຂີຓຣາຄວເສນ.

ໂສຬສກິຈ຺ຈຠາວາຍາຕິ ໂສຬສກິຈ຺ຈຕາຍ, ໂສຬສວິຘສ຺ສ ວາ ກິຈ຺ຈສ຺ສ ຠາວາຍ ອຸປ຺ປາທນາຍ. ປາຬິຍໍ ສປທານນ຺ຕິ ສປທານຈາໂຣ ວຸຕ຺ໂຕ ຠາວນປຸໍສກນິທ຺ເທເສນາຕິ ອາຫ ‘‘ສປທານຈາຣ’’ນ຺ຕິ. ອນຸກ຺ກມ຺ມາຕິ ອນຕິກ຺ກມິຕ຺ວາ. ອາຫຸຕິປິຓ຺ຑນ຺ຕິ ຊຸຫິຕພ຺ພປິຓ຺ຑໍ, ຊຸຫນວເສນ ອຄ຺ຄິມ຺ຫິ ປກ຺ຂິປິຕພ຺ພປາຍາສປິຓ຺ຑນ຺ຕິ ອຘິປ຺ປາໂຍ. ຠູຕພລິກມ຺ມນ຺ຕິ ຕຖາ ປກ຺ຂິປິຕ຺ວາ ພລິກມ຺ມກຣຓໍ. ຫຣິຕຸປລິຕ຺ຕນ຺ຕິ ອລ຺ລໂຄມເຍນ ກຕປຣິຠຓ຺ຑໍ. ວນມາລປຣິກ຺ຂິຕ຺ຕນ຺ຕິ ມໂນຫຣາຫິ ວນປຸປ຺ຜມາລາຫິ ປຣິກ຺ຂິຕ຺ຕໍ. ຘູມກຏຈ຺ຉູຕິ ຘູມປານໍ. ສີລຄນ຺ຘນ຺ຕິ ສີລໍ ປຏິຈ຺ຈ ອຸປ຺ປນ຺ນກິຕ຺ຕິຄນ຺ຘໍ. ຆາຍມານສ຺ສາຕິ ອຸປຄຕໍ ຄຓ຺ຫນ຺ຕສ຺ສ.

ອິມມ຺ຫາ ຐານາຕິ ອິມສ຺ມາ ມນຸສ຺ສານໍ ວສນຏ຺ຐານາ, ມຫາປຖວິຕລໂຕຕິ ອຘິປ຺ປາໂຍ. ສພ຺ພເຫຏ຺ຐິໂມຕິ ພ຺ຣຫ຺ມປາຣິສຊ຺ຊານໍ ວາສພ຺ຣຫ຺ມໂລກມາຫ. ພ຺ຣຫ຺ມປໂຖ ນາມ ຈຕ຺ຕາຣິ ກຸສລຊ຺ຌານານິ ພ຺ຣຫ຺ມໂລກມຄ຺ຄຠາວໂຕ. ຊີວິຕປໂຖ ນາມ ຊີວິຕປວຕ຺ຕິອຸປາຍຠາວໂຕ. ‘‘ຠຸຎ຺ຊຕຸ ຠວໍ ມຫາພ຺ຣຫ຺ມາ’’ຕິ ວຈນໍ ສນ຺ຘາຍາຫ ‘‘ກິໍ ຊປ຺ປສີ’’ຕິອາທິ. ຕິຓພີຊານີຕິ ສາລິຕຓ຺ຑຸລາທີນິ. ໂຄຍູສນ຺ຕິ ຂີຣໍ ຊິຄຸຈ຺ຉນ຺ໂຕ ວທຕິ. ອຍມ຺ປິ ອຕ຺ໂຖ ‘‘ເນຕາທິໂສ ພ຺ຣຫ຺ມຠກ຺ໂຂ’’ຕິ ວທນ຺ເຕນ ທີປິໂຕຕິ.

ອຕິເທວປຕ຺ໂຕປິ ປຎ຺ຈຂນ຺ຘູປຘີນໍ ອຕ຺ຖິຕາຍ ກິເລສູປຘິອາທີນໍເຍວ ວິຣຫິຕຠາໂວ ຄຫິໂຕ. ອຎ຺ຎຕ຺ຣ ຫິ ຠາວປຈ຺ຈຍໍ ຕທຕ຺ໂຖ ວິຎ຺ຎາຍຕີຕິ ອາຫ ‘‘ອຕິເທວຠາວໍ ປຕ຺ໂຕ’’ຕິ. ຍສ຺ມາ ພ຺ຣຫ຺ມາໂນປິ ເທວຄຕິປຣິຍາປນ຺ນຕ຺ຕາ ເທວາ ເອວ, ຕສ຺ມາ ວຸຕ຺ຕໍ ‘‘ອຕິພ຺ຣຫ຺ມຠາວໍ ປຕ຺ໂຕ’’ຕິ.

ອຕ຺ຕານໍ ຠາເວຕ຺ວາຕິ ສີລາທີຫິ ຄຸເຓຫິ ອຕ຺ຕານໍ ວຑ຺ເຒຕ຺ວາ ປຣິພ຺ຣູຫິຕ຺ວາ ຐິໂຕ.

ປຸຖຸຊ຺ຊນາ ຕສາ ຕຓ຺ຫາມານທິຏ຺ຐິປຣິຕ຺ຕາສວເສນ ຕາສນໂຕ. ຂີຓາສວາ ຖາວຣາ ນາມ ສພ຺ພໂສ ຄຕີສຸ ສຎ຺ຈຣຓາຠາວໂຕ. ຕຖາ ຫິ ຈຕຸນ຺ນໍ ສຈ຺ຈານໍ ສພ຺ພໂສ ອທິຏ຺ຐຕ຺ຕາ ຠວທາຍຊ຺ຊສ຺ສ ຕຓ຺ຫາທາສພ຺ຍສ຺ສ ຠາວໂຕ ເອກຈ຺ຈາສຸ ຄຕີສຸ ສຎ຺ຈຣຓສຠາວໂຕ ເສກ຺ຂາ ຖາວຣາ ນ ໂຫນ຺ຕິ. ຠຊມານາຕິ ຠຊາປິຍມານາ. ຖາວຣປກ຺ຂເມວ ຠຊນ຺ຕິ ສພ຺ພເສຏ຺ຐປກ຺ຂໍ ເອກນ຺ຕປສຏ຺ຐໍ ຠຊມານຠາວໍ ອຸປາທາຍ.

ປຫີນກິເລໂສ ຂີຓາສໂວ ວິເສໂນ. ສຸຂໍ ອາຍຕິ ສຸຂາຍຕິ, ຕສ຺ສ ກາຣກໍ ສຸຂາຍຕິກໍ.

ພ຺ຣຫ຺ມເທວສຸຕ຺ຕວຓ຺ຓນາ ນິຏ຺ຐິຕາ.