໒. ທຸຕິຍວຄ຺ໂຄ

໑. ປາສາຓສຸຕ຺ຕວຓ຺ຓນາ

໑໔໗. ປວິຊ຺ຌີຕິ ປພ຺ພຕໍ ສພ຺ພໂຕ ປວຕ຺ເຕນ຺ໂຕ ຕໂຕ ຕໂຕ ນິສ຺ສຊ຺ຊິ. ສກລນ຺ຕິ ສພ຺ພຠາຄວນ຺ຕໍ, ນິສ຺ເສສນ຺ຕິ ອຕ຺ໂຖ.

ປາສາຓສຸຕ຺ຕວຓ຺ຓນາ ນິຏ຺ຐິຕາ.

໒. ກິໍນຸສີຫສຸຕ຺ຕວຓ຺ຓນາ

໑໔໘. ວິຈກ຺ຂຸກມ຺ມາຍາຕິ ວິຈກ຺ຂຸຠາວກາມຕາຍ. ຍຖາ ສາ ຠຄວໂຕ ເທສິຍມານໍ ຘມ຺ມໍ ອຕ຺ຕໂນ ປຎ຺ຎາຈກ຺ຂຸນາ ນ ປສ຺ສິຕຸໍ ສກ຺ໂກຕິ, ເອວໍ ກາຕຸໍ ກາມຕາຍ. ເຕນາຫ ‘‘ປຣິສາຍາ’’ຕິອາທິ. ວິນາເສຕຸໍ ນ ສກ຺ໂກຕິ ເຠຣວາຣມ຺ມເຓ ຠາຍນສ຺ເສວ ອຠາວໂຕ. ທສພລປ຺ປຕ຺ຕາຕິ ທສຫິ ພເລຫິ ສມນ຺ນາຄຕາ.

ກິໍນຸສີຫສຸຕ຺ຕວຓ຺ຓນາ ນິຏ຺ຐິຕາ.

໓. ສກລິກສຸຕ຺ຕວຓ຺ຓນາ

໑໔໙. ມນ຺ທຠາເວນາຕິ ຊຬຠາເວນ ໂມມູຫຠາເວນາຕິ ມຫາມູຬ຺ຫຕາຍ. ກພ຺ພກຣເຓນ ມຕ຺ໂຕຕິ ກພ຺ພກິຣິຍາປສຸຕຕາທິວເສນ ມຕ຺ໂຕ ກພ຺ພໍ ກຕ຺ວາ. ກິມິທໍ ໂສປ຺ປເສວາຕິ ອິທໍ ຕວ ໂສປ຺ປໍ ກິມຕ຺ຖໍ, ປຸຣິເສນ ນາມ ປຸຣິສຕ຺ຕກເຣນ ຠວິຕພ຺ພໍ, ນ ໂສປ຺ປຕິເຍວ. ອຕ຺ຖໍ ສມາຄນ຺ຕ຺ວາຕິ ປຣມຕ຺ຖໍ ນິພ຺ພານໍ ສມ຺ມາ ອາຄນ຺ຕ຺ວາ ອຘິຄນ຺ຕ຺ວາ. ອສງ຺ຄ…ເປ… ນຕ຺ຖິ ສພ຺ພໂສ ສິທ຺ຘຕ຺ຖຠາວໂຕ. ຊຄ຺ຄນ຺ໂຕຕິ ຊາຄຣນ຺ໂຕ ປຸຣິໂສ ວິຍ, ນ ຠາຍາມິ ຠຍເຫຕູນໍ ອຠາວາ. ນານຸຕປນ຺ຕິ ສພ຺ພຕ຺ຖ ສພ຺ພທາປິ ວິສ຺ສຏ຺ຐຠາວໂຕ, ມາມນ຺ຕິ ມມໍ. ຄາຖາສຸຂຕ຺ຖຎ຺ຫິ ທີຆໍ ກຕ຺ວາ ວຸຕ຺ຕໍ. ຐິຕຕ຺ຕາຕິ ອຸທ຺ເທສປຣິປຸຈ຺ຉາຍ ປຣິຈ຺ຉິຊ຺ຊຕ຺ຕາ. ຫານິນ຺ຕິ ກສ຺ສຈິ ຊານິໍ.

ສກລິກສຸຕ຺ຕວຓ຺ຓນາ ນິຏ຺ຐິຕາ.

໔. ປຕິຣູປສຸຕ຺ຕວຓ຺ຓນາ

໑໕໐. ອນຸຣຸຊ຺ຌຕິ ເອເຕນາຕິ ອນຸໂຣໂຘ, ຣາໂຄ. ວິຣຸຊ຺ຌຕິ ເອເຕນາຕິ ວິໂຣໂຘ, ປຏິໂຆ. ເຕສຸ ອນຸໂຣຘວິໂຣເຘສຸ ຕນ຺ນິມິຕ຺ຕໍ ສຊ຺ຊຕິ ນາມ ສງ຺ຄໍ ກໂຣຕິ ນາມ, ອນຸໂຣຘວິໂຣຘຸປ຺ປາທນເມວ ເຈຕ຺ຖ ສຊ຺ຊນໍ. ຍທຎ຺ຎມນຸສາສຕີຕິ ຍໍ ອຎ຺ເຎສໍ ອນຸສາສນໍ, ຕໍ ເຕສໍ ຫິເຕສນໍ ອນຸກມ຺ປນໍ, ຕສ຺ມາ ອນຸກມ຺ປເກ ຫິເຕສເກ ສມ຺ມາສມ຺ພຸທ຺ເຘ ອນຸໂຣຘວິໂຣເຘ ອາໂຣເປຕ຺ວາ ວິກມ຺ປນຕ຺ຖໍ ມິຈ຺ຉາ ວທສີຕິ.

ປຕິຣູປສຸຕ຺ຕວຓ຺ຓນາ ນິຏ຺ຐິຕາ.

໕. ມານສສຸຕ຺ຕວຓ຺ຓນາ

໑໕໑. ອາກາເສ ຈຣນ຺ເຕຕິ ປຎ຺ຈາຠິຎ຺ເຎ ສນ຺ຘາຍ ວທຕິ. ອນ຺ຕລິກ຺ເຂ ຈຣນ຺ເຕປິ ກິຈ຺ຈສາຘນໂຕ ອນ຺ຕລິກ຺ຂຈໂຣ. ມນສິ ຊາໂຕຕິ ມານໂສ. ຕໍ ປນ ມນສນ຺ຕານສມ຺ປຍຸຕ຺ຕຕາຍາຕິ ອາຫ ‘‘ມນສມ຺ປຍຸຕ຺ໂຕ’’ຕິ.

ມານສສຸຕ຺ຕວຓ຺ຓນາ ນິຏ຺ຐິຕາ.

໖. ປຕ຺ຕສຸຕ຺ຕວຓ຺ຓນາ

໑໕໒. ປຎ຺ຈນ຺ນໍ ອຸປາທານກ຺ຂນ຺ຘານໍ ລກ຺ຂຓາທີນິ ເຈວ ສມຸທຍຎ຺ຈ ອສ຺ສາທາທີນວນິສ຺ສຣຓານິ ຈ ຄເຫຕ຺ວາ ສມ຺ມາ ເຕສໍ ລກ຺ຂຓາທີນໍ ຄຫຓໍ ໂຫຕີຕິ ອາຫ ‘‘ປຎ຺ຈ ອຸປາທານກ຺ຂນ຺ເຘ ອາທິຍິຕ຺ວາ’’ຕິ. ຣຸປ຺ປນເວທິຍນສຎ຺ຊານນອຠິສງ຺ຂຣຓວິຊານນານິ ຂນ຺ຘານໍ ສຠາວລກ຺ຂຓານິ. ອາທິ-ສທ຺ເທນ ຣສປຈ຺ຈຸປຏ຺ຐານປທຏ຺ຐານານິ ເຈວ ສມຸທຍາທີນິ ຈ ສງ຺ຄຓ຺ຫາຕິ. ທສ຺ເສຕີຕິ ປຈ຺ຈກ຺ຂໂຕ ທສ຺ເສຕິ, ຫຕ຺ຖາມລກໍ ວິຍ ປາກເຏ ວິຠູເຕ ກຕ຺ວາ ວິຠາເວຕິ. ຄຓ຺ຫາເປຕີຕິ ເຕ ຘມ຺ເມ ມນສາ ອນຸເປກ຺ຂິເຕ ທິຏ຺ຐິຍາ ສຸປ຺ປຏິວິທ຺ເຘ ກໂຣນ຺ໂຕ ອຸຄ຺ຄຓ຺ຫາເປຕິ. ສມາທານມ຺ຫີຕິ ຕຕ຺ຖ ອຕ຺ຖສ຺ສ ສມ຺ມເທວ ອາທິຍເນ ຂນ຺ຘານຎ຺ຈ ສມ຺ມສນວເສນ ອຎ຺ຎຘມ຺ມວເສນ ສມາທິຍເນ. ປຏິວິທ຺ຘຄຸເຓນາຕິ ຕາຍ ເທສນາຍ, ຕໍ ນິສ຺ສາຍ ປຈ຺ຈຕ຺ຕປຸຣິສກາເຣນ ຈ ເຕສໍ ປຏິວິທ຺ຘຄຸເຓນ. ໂຊຕາເປຕີຕິ ເຕສໍ ຈິຕ຺ຕສນ຺ຕານໍ ອສ຺ສທ຺ຘິຍາທິກິເລສມລວິຘມເນນ ປຠສ຺ສຣໍ ກໂຣຕິ. ອຏ຺ຐິໍ ກຕ຺ວາຕິ ຕາຍ ເທສນາຍ ປາເປຕພ຺ພໍ ອຕ຺ຖໍ ປໂຍຊນໍ ທຬ຺ຫໍ ກຕ຺ວາ. ເຕນາຫ ‘‘ອຍໍ ໂນ’’ຕິອາທິ. ກມ຺ມກາຣກຈິຕ຺ຕໍ ນາມ ໂອຕຣຓຈິຕ຺ຕໍ. ‘‘ໂຍນິໂສມນສິກາຣປຸພ຺ພກໍ ວິປສ຺ສນາຈິຕ຺ຕ’’ນ຺ຕິ ເກຈິ. ໂອຫິຕໂສຕາຕິ ອນຎ຺ຎວິຫິຕຕາຍ ຘມ຺ມສ຺ສວນາຍ ອປ຺ປິຕໂສຕາ, ຕໂຕ ເອວ ຕທຕ຺ຖໍ ຐປິຕໂສຕາ.

ເອເຕ ຣູປາທໂຍ ຂນ຺ເຘ ຍຎ຺ຈ ສງ຺ຂຕໍ ສມິທ຺ຘປຈ຺ຈເຍຫິ ກຕໍ, ຕຎ຺ຈ ‘‘ເອໂສ ອຫໍ ນ ໂຫມິ, ເອຕໍ ມຍ຺ຫໍ ນ ໂຫຕີ’’ຕິ ປສ຺ສນ຺ໂຕຕິ ໂຍຊນາ. ເຂໂມ ອຕ຺ຕາຕິ ເຂມຕ຺ຕາ, ຕໍ ເຂມຕ຺ຕໍ. ເຕນາຫ ‘‘ເຂມິຠູຕໍ ອຕ຺ຕຠາວ’’ນ຺ຕິ. ປຣິເຍສມານາ ມາຣເສນາ.

ປຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໗. ຉຜສ຺ສາຍຕນສຸຕ຺ຕວຓ຺ຓນາ

໑໕໓. ສຎ຺ຊາຍຕິ ເອຕສ຺ມາຕິ ສຎ຺ຊາຕິ, ໂສ ເອວ ສມ຺ປຍຸຕ຺ຕຘມ຺ໂມ ສໂມສຣຕິ ເອຕ຺ຖາຕິ ສໂມສຣຓໍ, ໂສ ເອວ ອຕ຺ໂຖ, ເຕນ ສຎ຺ຊາຕິສໂມສຣຓຏ຺ເຐນ. ຠຍເຠຣວໍ ສທ຺ທນ຺ຕິ ຠາຍຕິ ເອຕສ຺ມາຕິ ຠຍໍ, ຕເທວ ຍສ຺ສ ກສ຺ສຈິ ເຠຣວາວຫຕ຺ຕາ ເຠຣວໍ, ເທວາທິສທ຺ທນ຺ຕິ ອຕ຺ໂຖ. ວິຄຕວລາຫເກ ເທເວ ອຸປ຺ປາຕວເສນ ອຸປ຺ປຊ຺ຊນກສທ຺ໂທ ເທວທຸນ຺ທຸຠິ. ອສນິປາຕາທິສທ຺ໂທ ອສນິປາຕສທ຺ໂທ. ອຸນ຺ທ຺ຣີຍຕີຕິ ວິປຣິວຕ຺ຕຕິ. ໂລໂກ ອຘິມຸຈ຺ຉິໂຕຕິ ອຕິຖທ຺ຘກາໂຍ ວິຍ ມຸຈ຺ຉໍ ອາປນ຺ໂນ. ມາຣສ຺ສາຕິ ກິເລສມາຣສ຺ສ. ຐານຠູຕນ຺ຕິ ປວຕ຺ຕິຏ຺ຐານຠູຕໍ.

ຉຜສ຺ສາຍຕນສຸຕ຺ຕວຓ຺ຓນາ ນິຏ຺ຐິຕາ.

໘. ປິຓ຺ຑສຸຕ຺ຕວຓ຺ຓນາ

໑໕໔. ຕຕ຺ຖ ຕຕ຺ຖາຕິ ຕສ຺ມິໍ ຕສ຺ມິໍ ຎາຕິມິຕ຺ຕກຸເລ. ປາຫຸນການີຕິ ປຫິຕພ຺ພປຓ຺ຓາກາຣານິ. ອາຄນ຺ຕຸກປຓ຺ຓາກາຣານີຕິ ອາຄນ຺ຕຸການໍ ອຸປຄຕານໍ ທາຕພ຺ພປຓ຺ຓາກາຣານິ. ສຍໍຈຣທິວເສຕິ ກຸມາຣການຎ຺ຈ ກຸມາຣິການຎ຺ຈ ສຍໍ ອຕ຺ຕນາ ຈຣິຕພ຺ພຉຓທິວເສ. ອິທານິ ຕມຕ຺ຖໍ ວິຕ຺ຖາຣໂຕ ທສ຺ເສນ຺ໂຕ ‘‘ສມວຍຊາຕິໂຄຕ຺ຕາ’’ຕິອາທິມາຫ. ສມວຍສມຊາຕິກສມໂຄຕ຺ຕາຕິ ປຈ຺ເຈກໍ ສມ-ສທ຺ໂທ ໂຍເຊຕພ຺ໂພ. ໂຄຕ຺ຕສມຕາ ຈ ອາວາຫວິວາຫໂຍຄ຺ຍຕາວເສນ ທຏ຺ຐພ຺ພາ, ນ ເອກໂຄຕ຺ຕຕາວເສນ. ຕໂຕ ຕໂຕ ຄາມໂຕ. ອຎ຺ຎສ຺ມິໍ ທາຕພ຺ເພ ອສຕິ. ຉຓວເສນ ປຫິຓິຕຸໍ ສມ຺ປາທິຕໍ ປູວໍ ຉຓປູວໍ. ຕາສໍ ສມ຺ປຕ຺ຕິຍາຕິ ຕາສໍ ທານໍ ຘມ຺ມສ຺ສວນຎ຺ຈາຕິ ຕສ຺ສາ ທຸວິຘາຍປິ ສມ຺ປຕ຺ຕິຍາ.

ຎາຓໍ ນາມ ອາວຊ຺ຊນປຸພ຺ພກໍ, ຕສ຺ມາ ອຊານນສ຺ສ ‘‘ອນາວຊ຺ຊນຕາຍາ’’ຕິ ກາຣຓໍ ວຕ຺ວາ ເສສກາຣຓໍ ວທນ຺ໂຕ ‘‘ພຸທ຺ຘານ’’ນ຺ຕິອາທິມາຫ. ອຸປຈາຣເຠທນ຺ຕິ ພຸທ຺ຘໍ ທິສ຺ວາ ມນຸສ຺ເສຫິ ກາຕພ຺ພອຸປຈາຣສ຺ສ ຠິນ຺ທນໍ. ຠິນ຺ທິຕຸນ຺ຕິ ວິຘມິຕຸໍ.

ຠຄວາ ປນາຕິ ປນສທ຺ໂທ ວິເສສຕ຺ຖໂຊຕໂກ. ເຕນ ນ ເກວລໍ ຠຄວາ ອຸປ຺ປຓ຺ຑນໍ ປຣິຫຣນ຺ໂຕ ຕໍ ຄາມໍ ນ ປຸນ ປາວິສິ, ອຖ ໂຂ ມາຣໍ ອນຸກມ຺ປນ຺ໂຕຕິ ອິທໍ ວິເສສໍ ໂຊເຕຕິ.

ຊເນສີຕິ ອປຸຎ຺ຎໍ ຊເນສິ, ຊເນນ຺ໂຕ ຈ ຍຖາ ຕໂຕ ອາຍຕິໍ ຖິຣຕຣໍ ມຫນ຺ຕໍ ທຸກ຺ຂໍ ນິປ຺ຜຊ຺ຊິສ຺ສຕິ, ເອວໍ ນິປ຺ຜາເທສິ. ອາສຊ຺ຊນນ຺ຕິ ເອຕ຺ຖ ນນ຺ຕິ ນິປາຕມຕ຺ຕໍ. ກິຎ຺ຈຕິ ມທ຺ທຕິ ອຠິຠວຕີຕິ ກິຎ຺ຈນນ຺ຕິ ອາຫ ‘‘ມທ຺ທິຕຸໍ ສມຕ຺ຖ’’ນ຺ຕິ.

ປິຓ຺ຑສຸຕ຺ຕວຓ຺ຓນາ ນິຏ຺ຐິຕາ.

໙. ກສ຺ສກສຸຕ຺ຕວຓ຺ຓນາ

໑໕໕. ນິພ຺ພານໍ ອປທິສິຕ຺ວາຕິ ນິພ຺ພານໍ ນິສ຺ສາຍ ນິພ຺ພານຄຸເຓ ອາຣພ຺ຠາຕິ ອຕ຺ໂຖ. ຫຏຫຏເກໂສຕິ ອິໂຕ ຈິໂຕ ຈ ວິກິຓ຺ຓຕ຺ຕາ ອາກຸລາກຸລເກໂສ. ຈກ຺ຂຸສມ຺ຜສ຺ສວິຎ຺ຎາຓາຍຕນນ຺ຕິ ເອຕ຺ຖ ຍຖາ ຈກ຺ຂຸຄ຺ຄຫເຓນ ຜສ຺ໂສ ວິເສສິໂຕ, ເຕນ ເອວ ວິຎ຺ຎາຓາຍຕນໍ. ຕຖາ ສຕິ ຈກ຺ຂຸວິຎ຺ຎາຓສ຺ສ ຈ ຄຫຓໍ ອາປຊ຺ເຊຍ຺ຍາຕິ. ນນຸ ເຈຕ຺ຖ ຈກ຺ຂຸຄ຺ຄຫເຓນ ວິເສສິຕຕ຺ຕາ ຈກ຺ຂຸທ຺ວາຣິການໍ ສພ຺ເພສໍ ວິຎ຺ຎາຓານໍ ຄຫຓນ຺ຕິ? ສຈ຺ຈເມຕໍ, ຕຎ຺ຈ ໂຂ ປຐເມນ ຈກ຺ຂຸຄ຺ຄຫເຓນາຕິ ນາຍໍ ໂທໂສ. ຠວງ຺ຄຈິຕ຺ຕນ຺ຕິ ອາວຊ຺ຊນາຍ ອນນ຺ຕຣປຈ຺ຈຍຠູຕເມວ ອຘິປ຺ເປຕນ຺ຕິ ນິຍເມຕ຺ວາ ທສ຺ເສຕຸໍ ‘‘ສາວຊ຺ຊນກ’’ນ຺ຕິ ວຸຕ຺ຕໍ, ຕສ຺ມາ ຕທາຣມ຺ມຓມ຺ປີຕິ ຊວນຈິຕ຺ເຕນ ສຫ ຕທາຣມ຺ມຓຈິຕ຺ຕມ຺ປິ. ‘‘ວິຎ຺ຎາຓາຍຕນ’’ນ຺ຕິ ຈ ວຸຕ຺ເຕ ນິມ຺ມລເມວ.

‘‘ຈກ຺ຂູ’’ຕິ ອວິເສສໂຕ ວຸຕ຺ຕຕ຺ຕາ ປນ ມາຣສ຺ສ ອຍມ຺ປິ ອຕ຺ໂຖ ອາປນ຺ໂນຕິ ທສ຺ເສຕຸໍ ‘‘ຍໍ ໂລເກ’’ຕິອາທິ ວຸຕ຺ຕໍ. ອຸປກ຺ກວິປກ຺ກນ຺ຕິ ຈກ຺ຂຸປາກໂຣເຄນ ອຸປຣິ ເຫຏ຺ຐາ ຈ ສພ຺ພໂສ ປກ຺ກໍ ກຸຖິຕໍ. ເອເສວ ນໂຍຕິ ອິມິນາ ຍໍ ໂລເກ ກຸຏ຺ຐກິລາສຄຓ຺ຑກຈ຺ຉຸອາທີຫິ ອຸປທ຺ທຸຕໍ ວຓປີຬກາທິວເສນ ປຄ຺ຆຣນ຺ຕໍ ອສຸຈິໍ ອນ຺ຕມໂສ ປຣມເຊຄຸຈ຺ຉຣູປມ຺ປິ, ສພ຺ພໍ ຕໍ ຕເວວ ໂຫຕູຕິ ເອວມາທິໍ ອປທິສຕິ.

ຍໍ ຠຓ຺ຑກນ຺ຕິ ຫິຣຎ຺ຎສຸວຓ຺ຓາທິເຂຕ຺ຕວຕ຺ຖາທິອຸປກຣຓໍ ຄຫຏ຺ຐາ, ປພ຺ພຊິຕາ ຈ ຍໍ ປຕ຺ຕຈີວຣາທິໍ ‘‘ມມ ອິທ’’ນ຺ຕິ ອຠິນິວິສນ຺ຕາວ ວທນ຺ຕິ, ເອເຕສຸ ປຣິຄ຺ຄຫຕ຺ເຖສຸ ຈ ເຕສໍ ປຣິຄ຺ຄາຫກປຸຄ຺ຄເລສຸ ຈ ເຕ ຈິຕ຺ຕໍ ຍທິ ອຕ຺ຖິ, ຕານິ ອາຣພ຺ຠ ຕວ ຈິຕ຺ຕໍ ຍທິ ຠວຕິ, ເອວໍ ຕ຺ວໍ ຕຕ຺ຖ ພທ຺ໂຘ ເອວ ໂຫສີຕິ ອຕ຺ໂຖ. ເຕນາຫ ‘‘ນ ເມ ສມຓ ໂມກ຺ຂສີ’’ຕິ.

ຍໍ ຠຓ຺ຑກໍ ວທນ຺ຕີຕິ ຍຖາວຸຕ຺ຕໍ ອຸປກຣຓໍ ໂລເກ ພຫຸຊນາ ‘‘ມມ ອິທ’’ນ຺ຕິ ວທນ຺ຕິ. ນ ຕໍ ມຍ຺ຫນ຺ຕິ ຕໍ ມຍ຺ຫໍ ນ ໂຫຕິ, ນ ຕຕ຺ຖ ມມ ຕຓ຺ຫາວເສນ ມມນ຺ຕິ ນຕ຺ຖິ. ນ ເຕ ອຫນ຺ຕິ ເຍ ປຸຄ຺ຄລາ ເອຕ຺ຖ ພທ຺ຘາ, ເຕປິ ອຫໍ ນ ໂຫມິ, ຕຕ຺ຖ ເມ ທິຏ຺ຐິພທ຺ໂຘ ນຕ຺ຖິ. ນ ເມ ມຄ຺ຄມ຺ປິ ທກ຺ຂສີຕິ ເອວໍ ສພ຺ພໂສ ພທ຺ຘາຠາເວນ ມຸຕ຺ຕສ຺ສ ເມ ຄຕມຄ຺ຄມ຺ປິ ມາຣ ຕ຺ວໍ ນ ທກ຺ຂສິ ນ ປສ຺ສິສ຺ສສິ, ເຍ ຠວາທໂຍ ຕຸຍ຺ຫໍ ວິສຍາ, ເຕສຸ ຠວໂຍນິຄຕິອາທີສຸ ມຍ຺ຫໍ ຄຕມຄ຺ຄໍ ນ ປສ຺ສິສ຺ສສິ ຠວນິສ຺ສຏ຺ຐຕ຺ຕາຕິ.

ກສ຺ສກສຸຕ຺ຕວຓ຺ຓນາ ນິຏ຺ຐິຕາ.

໑໐. ຣຊ຺ຊສຸຕ຺ຕວຓ຺ຓນາ

໑໕໖. ອຫນນ຺ຕິ ກຣເຓ ປຈ຺ຈຕ຺ຕວຈນນ຺ຕິ ອາຫ ‘‘ອຫນນ຺ເຕນາ’’ຕິ, ປຈ຺ຈຕ຺ເຕ ເອວ ວາ ປຈ຺ຈຕ຺ຕວຈນໍ, ‘‘ອຫນນ຺ໂຕ ຫຸຕ຺ວາ’’ຕິ ວຈນເສເສນ ຠວິຕພ຺ພນ຺ຕິ ອຘິປ຺ປາໂຍ. ເສສປເທສຸປິ ເອເສວ ນໂຍ. ອຊິນນ຺ຕິ ອນ຺ໂຕຄຘເຫຕຸອຕ຺ຖໍ ວທຕີຕິ ອາຫ ‘‘ປຣສ຺ສ ຘນຊານິໍ ອກໂຣນ຺ເຕນາ’’ຕິ. ອກາຣາເປນ຺ເຕນາຕິ ປຣສ຺ສ ຘນຊານິໍ ອກາເຣນ຺ເຕນ. ອໂສຈນ຺ເຕນາຕິ ໂຠຄພ຺ຍສນາທິວເສນ ປຣໍ ອໂສຈນ຺ເຕນ. ກສ຺ມາ ຠຄວາ ເອວໍ ຈິນ຺ເຕສີຕິ ຕຕ຺ຖ ກາຣຓມາຫ ‘‘ອິຕີ’’ຕິອາທິນາ. ຣຊ຺ເຊ ວິຊິເຕ ທຓ຺ຑກຣປີຬິເຕຕິ ຘນທຓ຺ຑາທິທຓ຺ເຑນ ເຈວ ພລິນາ ຈ ພາຘິເຕ.

ອິຊ຺ຌນກໂກຏ຺ຐາສາຕິ ເຈໂຕວສິຠາວາທິກສ຺ສ ສາຘນກໂກຏ຺ຐາສາ. ວຑ຺ຒິຕາຕິ ຠາວນາປາຣິປູຣິວເສນ ອນຸພ຺ຣູຫິຕາ. ປຸນປ຺ປຸນໍ ກຕາຕິ ຠາວນາຍ ພຫຸລີກຣເຓນ ອປຣາປຣໍ ປວຕ຺ຕິຕາ. ຍຸຕ຺ຕຍານນ຺ຕິ ຍຖາ ຍຸຕ຺ຕານໍ ອາຊຎ຺ຎຣຖານໍ ສາຣຖິນາ ອຘິຏ຺ຐິຕໍ ຍຖາຣຸຈິ ປວຕ຺ຕຕິ, ເອວໍ ຍຖາຣຸຈິປວຕ຺ຕິຕໍ ຄມິຕາ. ປຕິຏ຺ຐຏ຺ເຐນາຕິ ອຘິຏ຺ຐານຏ຺ເຐນ. ວຕ຺ຖຸກຕາຕິ ສພ຺ພໂສ ອຸປກ຺ກິເລສໂສຘເນນ ອິທ຺ຘິວິສຍຕາຍ ປຕິຏ຺ຐານຠາວໂຕ ສຸວິໂສຘິຕປຣິສ຺ສຍວຕ຺ຖຸ ວິຍ ກຕາ. ອວິຊຫິຕາຕິ ປຏິປກ຺ຂທູຣີຠາວໂຕ ສຸຠາວິຕຠາເວນ ຕໍຕໍອຘິຏ຺ຐານໂຍຄ຺ຍຕາຍ ນ ຊຫາປິຕາ. ນິຈ຺ຈານຸພທ຺ຘາຕິ ຕໂຕ ເອວ ນິຈ຺ຈໍ ອນຸພທ຺ຘາ ວິຍ ກຕາ. ສຸປຣິຈິຕາຕິ ສຸຏ຺ຐຸ ສພ຺ພຠາເຄນ ຠາວນານຸປຈຍໍ ຄມິຕາ. ອວິຣາຘິຕເວຘິຫຕ຺ໂຖ ວິຍາຕິ ອວິຣຊ຺ຌນຠາເວນ ວິຣຊ຺ຌນຫຕ຺ໂຖ ວິຍ. ສຸຏ຺ຐຸ ສມາຣທ຺ຘາຕິ ຠາວນາອຸປ຺ປຕ຺ຕິຍາ ສມ຺ມເທວ ສມ຺ປາທິຕາ. ຈິນ຺ເຕຍ຺ຍາຕິ ອຕ຺ຖຸທ຺ຘາຣວເສນ ຈິນ຺ເຕຍ຺ຍ.

ປພ຺ພຕສ຺ສາຕິ ປພ຺ພໂຕ ອສ຺ສ. ປພ຺ພໂຕ ອສ຺ສາຕິ ປພ຺ພໂຕ ຠເວຍ຺ຍ ກີທິສສ຺ສາຕິ ອາຫ ‘‘ສຸວຓ຺ຓສ຺ສາ’’ຕິອາທິ. ຊາຕຣູປສ຺ສາຕິ ອາຕປຣູປສມ຺ປນ຺ນສ຺ສ. ທ຺ວິກ຺ຂຕ຺ຕຸມ຺ປິ ຕາວ ມຫນ຺ໂຕຕິ ຍຕ຺ຕໂກ ໂສ ປພ຺ພໂຕ ໂຫຕິ, ທ຺ວິກ຺ຂຕ຺ຕຸໍ ຕຕ຺ຕໂກ. ເອກສ຺ສາຕິ ເອກສ຺ສປິ ປຸຄ຺ຄລສ຺ສ ນາລໍ ນ ປຣິຍຕ຺ໂຕ ຕຓ຺ຫາຍ ທຸປ຺ປູຣຓຠາວາ. ເອວໍ ຊານນ຺ໂຕຕິ ເອວໍ ຕຓ຺ຫາຍ ທຸປ຺ປູຣຓຠາວາທີນວຕໍ ຊານນ຺ໂຕ. ສມໍ ຈເຣຍ຺ຍາຕິ ປຣວຕ຺ຖຸປຣາມາສາທິໍ ວິຫາຍ ກາຍາທີຫິ ສມເມວ ປຏິປຊ຺ເຊຍ຺ຍ.

ທຸກ຺ຂໍ ຕຓ຺ຫານິທານໍ, ຕຓ຺ຫາ ກາມຄຸຓນິທານາ, ຕສ຺ມາ ທຸກ຺ຂສ຺ສ ຕຓ຺ຫາປຈ຺ຈຍກາມຄຸຓນິທານຕ຺ຕໍ ວຸຕ຺ຕໍ. ຕນ຺ຕິ ທຸກ຺ຂໍ. ຍໂຕນິທານໍ ໂຫຕີຕິ ຍໍນິທານໍ ຍໍກາຣຓໍ ຕໍ ປວຕ຺ຕຕິ. ເອວໍ ໂຍ ອທກ຺ຂີຕິ ໂຍ ປຣິຎ຺ຎາຕວຕ຺ຖຸໂກ ເອວໍ ທຸກ຺ຂໍ ຕສ຺ສ ນິທານຠູເຕ ກາມຄຸເຓ ຈ ຕຖໂຕ ປຎ຺ຎາຈກ຺ຂຸນາ ປສ຺ສິ. ເກນ ກາຣເຓນ ນເມຍ຺ຍ? ຕໍ ກາຣຓໍ ນຕ຺ຖີຕິ ອຕ຺ໂຖ. ກາມຄຸຓອຸປຘິນ຺ຕິ ກາມຄຸຓສງ຺ຂາຕໍ ອຸປຘິໍ. ສຊ຺ຊຕິ ເອຕ຺ຖາຕິ ສງ຺ໂຄ ເອໂສ, ລຄ຺ຄນເມຕນ຺ຕິ ເອວໍ ວິທິຕ຺ວາ. ຕເມວ ກາມາຠິຠູໂຕ ນປ຺ປຏິເສເວຍ຺ຍ ນ ລຄ຺ເຄຍ຺ຍາຕິ ເອວໍ ວິນຍາຍ ວູປສມາຍ ສິກ຺ເຂຍ຺ຍາຕິ.

ຣຊ຺ຊສຸຕ຺ຕວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.