໗. ສຸພ຺ຣຫ຺ມສຸຕ຺ຕວຓ຺ຓນາ

໙໘. ສຸພ຺ຣຫ຺ມາຕິ ຕສ຺ສ ເທວປຸຕ຺ຕສ຺ສ ນາມໍ. ຕສ຺ສ ສຕ຺ຖຸ ສນ຺ຕິກູປສງ຺ກມນສ຺ສ ກາຣຓໍ ທສ຺ເສນ຺ໂຕ ‘‘ໂສ ກິຣາ’’ຕິອາທິມາຫ. ຕເທວ ໂສກໍ ຕສ຺ສ ເທວປຸຕ຺ຕສ຺ສ ອຏ຺ຐຸປ຺ປຕ຺ຕິ. ອຈ຺ຉຣາສງ຺ຆປຣິວຸໂຕຕິ ສຫສ຺ສມຕ຺ເຕນ ອຈ຺ຉຣາສງ຺ເຆນ ປຣິວຸໂຕ. ນນ຺ທນກີຬິກນ຺ຕິ ນນ຺ທນວນກີຬິກໍ. ຫຕ຺ຖໍ ອາຄຈ຺ຉຕີຕິ ຫຕ຺ຖຄຍ຺ຫຸປໂຄ ໂຫຕິ. ຄນ຺ເຖນ຺ຕີຕິ ເອຕ຺ຖ ມາລາເວຐນມ຺ປິ ຂິຑ຺ຑາປສຸຕຕາຍາຕິ ທຏ຺ຐພ຺ພໍ. ອຎ຺ຎຖາ ປຸປ຺ຜານິເຍວ ຕາຍ ຕາຍ ຈິຕ຺ຕສ຺ສ ວເສນ ມາລາຠາເວນ ຫຕ຺ຖໍ ອຸປຄຈ຺ຉນ຺ຕີຕິ. ອຸປຈ຺ເຉທກກມ຺ມວເສນາຕິ ຕສ຺ມິໍ ເທວໂລເກ ອາຍຸເສເສ ສຕິ ເອວ ຕສ຺ສ ປນ ອຸປຆາຕກສ຺ສ ລທ຺ໂຘກາສສ຺ສ ປາປກມ຺ມສ຺ສ ວເສນ. ‘‘ປຫາໂຣ’’ຕິ ທິວສສ຺ສ ຕຕິໂຍ ຠາໂຄ ວຸຈ຺ຈຕິ, ຕສ຺ມາ ເອກປ຺ປຫາເຣເນວາຕິ ເອກເວລາຍເມວາຕິ ອຕ຺ໂຖ.

ປິຍວຕ຺ຖຸກໂສເກນາຕິ ປິຍວຕ຺ຖຸນິມິຕ຺ຕເກນ ໂສເກນ. ຣຸປ຺ປມາໂນຕິ ປີຬິຍມາໂນ. ສຕ຺ຕເມ ທິວເສຕິ ມນຸສ຺ສຄຓນາຍ ສຕ຺ຕເມ ທິວເສ. ຕຕ຺ເຖວາຕິ ຕສ຺ມິໍເຍວ ນິຣເຍ ນິພ຺ພຕ຺ຕິຕພ຺ພໍ ອິມິນາ ຕາຫິ ຈ ສເຫວ ປຸພ຺ເພ ຕສ຺ສ ປາປກມ຺ມສ຺ສ ກຕຕ຺ຕາ. ຣຸປ຺ປີຕິ ຈິຕ຺ຕສນ຺ຕາສໍ ອາປຊ຺ຊິ. ນິທ຺ຘມິຕຸນ຺ຕິ ນີຫຣິຕຸໍ ອປເນຕຸໍ. ສຕ຺ຖຸ ສນ຺ຕິກໍ ຄນ຺ຕ຺ວາຕິ ຕາຫິ ປຎ຺ຈສຕາຫິ ອຈ຺ຉຣາຫິ ສທ຺ຘິໍ ຠຄວໂຕ ສນ຺ຕິກໍ ຄນ຺ຕ຺ວາ.

ອິທນ຺ຕິ ອຕ຺ຕໂນ ຈິຕ຺ຕໍ ທສ຺ເສຕິ ອາສນ຺ນປຈ຺ຈກ຺ຂຠາວໂຕ. ນິຈ຺ຈນ຺ຕິ ສທາ. ສ຺ວາຍໍ ນິຈ຺ຈຕ຺ໂຖ ອຘິປ຺ປາຍວເສນ ຄເຫຕພ຺ໂພຕິ ຕຕ຺ຖ ປຫາຕພ຺ພໍ ຄເຫຕພ຺ພຎ຺ຈ ທສ຺ເສນ຺ໂຕ ‘‘ເທວໂລເກ’’ຕິອາທິມາຫ. ນ ຄເຫຕພ຺ໂພ ເຫຕຸປວຕ຺ຕິໂຕ ປຸພ຺ເພ ຕສ຺ສ ອຸຕ຺ຣາສສ຺ສ ອຠາວໂຕ. ເຕສູຕິ ທຸກ຺ເຂສຸ. ຕານິ ຫິ ເຫຕຸປຈ຺ຈເຍຫິ ກຕ຺ຕພ຺ພໂຕ ຄາຖາຍໍ ‘‘ກິຈ຺ເຉສູ’’ຕິ ວຸຕ຺ຕານິ. ກິຈ຺ເຉສູຕິ ວາ ກິຈ຺ຉນິມິຕ຺ຕໍ. ຍາສຎ຺ຫິ ປໂຍຄວິປຕ຺ຕີນໍ ວເສນສ຺ສ ຕານິ ທຸກ຺ຂານິ ອຸປ຺ປຊ຺ເຊຍ຺ຍຸໍ, ຕໍນິມິຕ຺ຕນ຺ຕິ ອຕ຺ໂຖ. ຕາ ຫິ ອສ຺ສ ປໂຍຄວິປຕ຺ຕິໂຍ ຄຕິວິປຕ຺ຕິໂຍ ສຕ຺ຖຸ ສນ຺ຕິກໍ ອຸປຄມເນນ ຫາເຍຍ຺ຍຸໍ. ນິພ຺ພຕ຺ຕານໍ ທິຏ຺ຐານີຕິ ນິພ຺ພຕ຺ຕານໍ ວເສນ ທິຏ຺ຐານິ ທຸກ຺ຂານິ. ເຕສຸ ຈ ທຸກ຺ເຂສຸ. ສພ຺ພຕ຺ຖ ນິມິຕ຺ຕຕ຺ເຖ ຠຸມ຺ມໍ. ຑຍ຺ຫມາໂນ ວິຍ ຈິຕ຺ຕສນ຺ຕາເປນ.

ຈຕ຺ຕາຣິປິ ສຈ຺ຈານິ ພຸຊ຺ຌຕິ ປຏິວິຊ຺ຌຕີຕິ ໂພຘິ, ສຕິອາທິຘມ຺ມສາມຄ຺ຄີ, ຕສ຺ມາ ໂພຊ຺ຌາ ໂພຘິໂຕ. ສາ ປນ ໂພຘິ ຠາວນາກາເຣເນວ ປວຕ຺ຕຕິ, ອຎ຺ຎຕ຺ຣສທ຺ທໂຍເຄນ ຈ ‘‘ໂພຊ຺ຌາ’’ຕິ ນິສ຺ສກ຺ກວຈນນ຺ຕິ ຕທຕ຺ຖໍ ທສ຺ເສນ຺ໂຕ ມຸຎ຺ຈິຕ຺ວາປທໍ ອເປກ຺ຂິຕ຺ວາ ‘‘ໂພຊ຺ຌງ຺ຄຠາວນ’’ນ຺ຕິ ອາຫ. ຕໂປຄຸຓນ຺ຕິ ຘຸຕຘມ຺ມມາຫ. ໂສ ຫິ ຕຓ຺ຫາໂລລຸປ຺ປສ຺ສ ຕປນໂຕ ຕໂປ, ສຍໍ ຄຸຓສຠາວຕ຺ຕາ ຄຸຓສນ຺ນິສ຺ສຍໂຕ ຈ ຄຸຓນ຺ຕິ. ເຕນາຫ ‘‘ຘຸຕງ຺ຄສງ຺ຂາຕໍ ຕໂປຄຸຓ’’ນ຺ຕິ. ສພ຺ເພ ສງ຺ຂາຣຄຕາ ນິສ຺ສຊ຺ຊີຍນ຺ຕິ ເອຕ຺ຖາຕິ ສພ຺ພນິສ຺ສຄ຺ໂຄ, ອສງ຺ຂຕຘາຕູຕິ ອາຫ ‘‘ສພ຺ພນິສ຺ສຄ຺ຄາຕິ ນິພ຺ພານໂຕ’’ຕິ.

ອິນ຺ທ຺ຣິຍສໍວໂຣວ ປຐມໍ ເວທິຕພ຺ໂພ ປຏິປຕ຺ຕິກ຺ກມວເສນ ຕສ຺ເສວ ປຐມຕ຺ຕາ. ຕໍ ປນ ປຏິປຕ຺ຕິກ຺ກມໍ ທສ຺ເສຕຸໍ ‘‘ອິນ຺ທ຺ຣິຍສໍວເຣ ຫີ’’ຕິອາທິມາຫ. ນິປ຺ປຣິຍາຍໂຕ ມຄ຺ຄປຣິຍາປນ຺ນາ ເອວ ໂພຊ຺ຌງ຺ຄາຕິ ອາຫ ‘‘ສຫວິປສ຺ສນາຍ ໂພຊ຺ຌງ຺ເຄ’’ຕິ. ຕສ຺ສາຕິ ຕຖາຠາເວນ ຕສ຺ສ ໂຍຄິໂນ. ຍສ຺ມາ ເທວປຸຕ຺ຕສ຺ສ ສຕ຺ຖາ ຕໍ ຄາຖໍ ວຕ຺ວາ ອຸປຣິ ຈ ສຈ຺ຈານິ ປກາເສສິ, ຕສ຺ມາ ວຸຕ຺ຕໍ ‘‘ຠຄວາ ຈຕຸສຈ຺ຈວເສນ ເທສນໍ ວິນິວຕ຺ເຕສີ’’ຕິ. ເທວປຸຕ຺ໂຕ ໂສຕາປຕ຺ຕິຜເລ ປຕິຏ຺ຐຫີຕິ ກາມໍ ຕສ຺ເສວ ວິເສສາຘິຄໂມ ອິຘາຄໂຕ, ປຎ຺ຈສຕມຕ຺ຕາຫິ ປນ ອຈ຺ຉຣາຫິ ສທ຺ຘິໍ ໂສຕາປຕ຺ຕິຜເລ ປຕິຏ຺ຐຫີຕິ ເວທິຕພ຺ພໍ. ເຕນາຫ ມຫາສຕິປຏ຺ຐານສຸຕ຺ຕວຓ຺ຓນາຍໍ (ທີ. ນິ. ອຏ຺ຐ. ໒.໓໗໓; ມ. ນິ. ອຏ຺ຐ. ໑.໑໐໖) ‘‘ໂສ ເທສນາປຣິໂຍສາເນ ປຎ຺ຈຫິ ອຈ຺ຉຣາສເຕຫິ ສທ຺ຘິໍ ໂສຕາປຕ຺ຕິຜເລ ປຕິຏ຺ຐາຍ ຕໍ ສມ຺ປຕ຺ຕິໍ ຖາວຣໍ ກຕ຺ວາ ເທວໂລກເມວ ອຄມາສີ’’ຕິ.

ສຸພ຺ຣຫ຺ມສຸຕ຺ຕວຓ຺ຓນາ ນິຏ຺ຐິຕາ.