໘. ກກຸຘສຸຕ຺ຕວຓ຺ຓນາ

໙໙. ‘‘ນນ຺ທາມີ’’ຕິ ວຸຕ຺ເຕ ນນ຺ທີ ນາມ ປພ຺ພຊິຕສ຺ສ ມລນ຺ຕິ ໂຈເທຕຸກາໂມ ເທວປຸຕ຺ໂຕ ‘‘ນນ຺ທສີ’’ຕິ ປຸຈ຺ຉິ. ອຖສ຺ສ ຠຄວາ ຕໍ ປຏິກ຺ຂິປນ຺ໂຕ ‘‘ກິໍ ລທ຺ຘາ’’ຕິ? ອາຫ. ເຕນ ‘‘ຕຍາ ມມ ອຘິປ຺ເປຕນນ຺ທິຍາ ອິຘ ປຈ຺ຈໂຍ ເອວ ນຕ຺ຖິ, ກຸໂຕ ສາ ນນ຺ທີ’’ຕິ ທສ຺ເສຕິ. ເຕນາຫ ‘‘ຕຸຏ຺ຐິ ນາມາ’’ຕິອາທິ. ອຖ ເທວປຸຕ຺ໂຕ ນນ຺ທິຍາ ອສຕິ ໂສເກນ ຠວິຕພ຺ພໍ, ໂສໂກ ຈ ປພ຺ພຊິຕສ຺ສ ມລນ຺ຕິ ໂຈເທນ຺ໂຕ ອາຫ ‘‘ເຕນ ຫິ, ສມຓ, ໂສຈສີ’’ຕິ. ຠຄວາ ຕມ຺ປິ ປຏິກ຺ຂິປນ຺ໂຕ ‘‘ກິໍ ຊີຍິຕ຺ຖາ’’ຕິອາທິມາຫ. ກິໍ ມໍ ຊິນາຕີຕິ ອຕ຺ໂຖ?

ຍທິ ເຕ ນນ຺ທິໂສກາ ນ ສນ຺ຕິ ຫາສວຕ຺ຖຸໂນ ລາຠສ຺ສ ຊານິຍາ ຈ ອຠາວໂຕ, ເອກວິຫາຣິໂນ ປນ ອຣຕິຍາ ຠວິຕພ຺ພນ຺ຕິ ອາຫ – ‘‘ກຈ຺ຈິ ຕໍ ເອກມາສີນໍ, ອຣຕີ ນາຠິກີຣຕີ’’ຕິ. ຕສ຺ມິມ຺ປິ ຠຄວຕາ ປຏິກ຺ຂິຕ຺ເຕ ອຖ ເນສມ຺ປິ ນນ຺ທິໂສກາຣຕີນໍ ອຠາເວ ກາຣຓໍ ປຸຈ຺ຉນ຺ໂຕ ‘‘ກຖໍ ຕ຺ວ’’ນ຺ຕິ ຄາຖມາຫ? ອຖສ຺ສ ຠຄວາ ຕໍ ກາຣຓໍ ປເວເທນ຺ໂຕ ‘‘ອຆຊາຕສ຺ສາ’’ຕິ ຄາຖມາຫ. ຕຕ຺ຖ ອຆຊາຕສ຺ສາຕິ ອເຆ ຊາຕສ຺ສ. ເຕນາຫ ‘‘ວຏ຺ຏທຸກ຺ເຂ ຐິຕສ຺ສາ’’ຕິ. ຊາຕຕຓ຺ຫສ຺ສ ອປ຺ປຫີນຕຓ຺ຫສ຺ສ ວຏ຺ຏທຸກ຺ຂໍ ອາຄຕເມວ ກາຣຓສ຺ສ ອປ຺ປຫີນຕ຺ຕາ. ຕສ຺ເສວ ຫິ ກາຣຓສ຺ສ ອປ຺ປຫີນຕໍ ທສ຺ເສນ຺ໂຕ ‘‘ທຸກ຺ຂີ ສຸຂໍ ປຕ຺ຖຍຕີຕິ ຫິ ວຸຕ຺ຕ’’ນ຺ຕິ ອາຫ. ທຸກ຺ຂປ຺ປວຕ຺ຕິຍາ ສາປິ ຕຓ຺ຫາປ຺ປວຕ຺ຕິ ເຕນ ທສ຺ສິຕາ. ອິຕີຕິອາທິນາ ວຸຕ຺ຕເມວຕ຺ຖໍ ນິຄມນວເສນ ທສ຺ເສຕິ.

ກກຸຘສຸຕ຺ຕວຓ຺ຓນາ ນິຏ຺ຐິຕາ.