໔. ວຸຏ຺ຐິສຸຕ຺ຕວຓ຺ຓນາ

໗໔. ອຸປ຺ປຕນ຺ຕານນ຺ຕິ ປຖວິໍ ຠິນ຺ທິຕ຺ວາ ອຸຏ຺ຐຫນ຺ຕານໍ. ‘‘ເສຏ຺ຐ’’ນ຺ຕິ ວຸຈ຺ຈມານຕ຺ຕາ ‘‘ສຕ຺ຕວິຘ’’ນ຺ຕິ ວຸຕ຺ຕໍ, ອິຕເຣສໍ ວາ ຕທນຸໂລມໂຕ. ເຂໂມ ໂຫຕິ ທຸພ຺ຠິກ຺ຂຸປທ຺ທວາຠາວໂຕ. ເຕນາຫ ‘‘ສຸຠິກ຺ໂຂ’’ຕິ. ນິປຕນ຺ຕານນ຺ຕິ ອໂຘມຸຂໍ ປວຕ຺ຕນ຺ຕານໍ. ປວຊມານານນ຺ຕິ ວຊນສີລານໍ. ເຕ ປນ ຍສ຺ມາ ຊງ຺ຄມາ ນາມ ໂຫນ຺ຕິ, ນ ຣຸກ຺ຂາທໂຍ ວິຍ ຖາວຣາ, ຕສ຺ມາ ອາຫ ‘‘ຊງ຺ຄມານ’’ນ຺ຕິ. ຄາໂວຕິ ເຘນຸໂຍ. ເຕນ ມຫິໍສາທິການມ຺ປິ ສງ຺ຄໂຫ ທຏ຺ຐພ຺ໂພ. ວທນ຺ຕານນ຺ຕິ ອຸປ຺ປນ຺ນໍ ອຕ຺ຖໍ ວທນ຺ຕານໍ.

ອຕ຺ຕໂນ ຂນ຺ຕິຍາຕິ ອຕ຺ຕໂນ ຂນ຺ຕິຍາ ຣຸຈິຍາ ຄຫິຕຠາເວນ. ອິຕຣາ ເທວຕາ ຕສ຺ສາ ວິສ຺ສຊ຺ຊເນ ອປຣິຕຸສ຺ສມານາ ອາຫ. ຍາວ ປຘໍສີຕິ ຄຸຓຘໍສີ ສຕ຺ຖຸເທສນາຍ ລທ຺ຘພ຺ພຄຸຓນາສນໂຕ. ປຄພ຺ພາຕິ ປາຄພ຺ພິເຍນ ສມນ຺ນາຄຕາ, ຍຖາ ວຈີປາຄພ຺ພິເຍນ ອຂຣາ, ຕຖາ ວາຈາຍ ຠວິຕພ຺ພໍ. ມຸຂຣາຕິ ມຸຂຂຣາ. ທສພລໍ ປຸຈ຺ຉິ ສຓ຺ຫໍ ສຸຂຸມໍ ຣຕນຕ຺ຕຍສໍຫິຕໍ ອຕ຺ຖໍ ໂສຕຸກາມາ. ອສ຺ສາ ເທວຕາຍ ວິສ຺ສຊ຺ເຊນ຺ໂຕ ອຊ຺ຌາສຍານຸຣູປໍ. ອຸປ຺ປຕມານາຕິ ອຸປ຺ປຕນ຺ຕີ ສມຸຄ຺ຆາເຏຕິ ໂອຘິໂສ. ວຏ຺ຏມູລກມຫາອວິຊ຺ຊາຕິ ຕສ຺ສາ ອາທີນວທສ຺ສນຕ຺ຖໍ ຠູຕກຖນວິເສສນໍ. ໂອສີທນ຺ຕານນ຺ຕິ ປຏິປກ຺ຂວເສນ ອໂຘ ສີທນ຺ຕານໍ, ອຸສ຺ສາທຍມານານນ຺ຕິ ອຕ຺ໂຖ. ປຸຎ຺ຎກ຺ເຂຕ຺ຕຠູໂຕຕິ ອິທໍ ‘‘ປທສາ ຈຣມານານ’’ນ຺ຕິ ປທສ຺ສ ອຕ຺ຖວິວຣຓວເສນ ຠູຕກຖນວິເສສນໍ. ຍາທິໂສ ປຸຕ຺ໂຕ ວາ ໂຫຕູຕິ ອິທໍ ປຸຣິມປເທ ເທວຕາຍ ປຸຕ຺ຕຄຫຓສ຺ສ ກຕຕ຺ຕາ ວຸຕ຺ຕໍ.

ວຸຏ຺ຐິສຸຕ຺ຕວຓ຺ຓນາ ນິຏ຺ຐິຕາ.