໕. ຠີຕາສຸຕ຺ຕວຓ຺ຓນາ

໗໕. ກິໍ ສູຘ ຠີຕາຕິ ເອຕ຺ຖ ສຸ-ອິຘາຕິ ນິປາຕມຕ຺ຕນ຺ຕິ ອາຫ ‘‘ກິໍ ຠີຕາ’’ຕິ? ມຄ຺ໂຄ ຈ ເນກາຍຕນປ຺ປວຸຕ຺ໂຕຕິ ອເນກກາຣຓໍ ນານາວິຘາຘິຄໂມກາສໍ ກຕ຺ວາ ປວຸຕ຺ໂຕ ກຖິໂຕ. ເຕນາຫ ‘‘ອຏ຺ຐຕິໍສາຣມ຺ມຓວເສນາ’’ຕິອາທິ. ເອວໍ ສນ຺ເຕຕິ ເອວໍ ສພ຺ພສາຘາຣຓາເນກາຍຕເນຫິ ນິພ຺ພານຄາມິມຄ຺ຄສ຺ສ ຕຸມ຺ເຫຫິ ປເວທິຕຕ຺ຕາ ລພ຺ຠມາເນ ເຂເມ ມຄ຺ເຄ ກິໍ ຠີຕາຍໍ ຊນຕາ ອຸປ຺ປຖຠູຕາ ວິປຣີຕທິຏ຺ຐິໂຕ ຄຓ຺ຫີຕິ ອຕ຺ໂຖ? ເອວໍ ເທວຕາ ຍຖິຈ຺ຉາຍ ປຸຣິມທ຺ເຘນ ອຕ຺ຕນາ ຍຖາຈິນ຺ຕິຕມຕ຺ຖໍ ສຕ຺ຖຸ ປເວທິຕາ, ປຈ຺ຉິມທ຺ເຘນ ອຕ຺ຕໂນ ສໍສຍໍ ປຸຈ຺ຉຕິ. ພຫຸປຎ຺ຎາຕິ ປຸຖຸປຎ຺ຎ. ອຸສ຺ສນ຺ນປຎ຺ຎາຕິ ອຘິກປຎ຺ຎາ. ຐເປຕ຺ວາຕິ ສໍຍເມຕ຺ວາ. ສໍວິຠາຄີຕິ ອາຫາຣປຣິໂຠເຄ ສມ຺ມເທວ ວິຠຊນສີໂລ. ເຕນາຫ ‘‘ອຈ຺ຉຣາຍາ’’ຕິອາທິ. ວຸຕ຺ຕຕ຺ຖເມວ ເຫຏ຺ຐາ.

ມເນນາຕິ ມໂນຄຫເຓນ. ປຸພ຺ພສຸທ຺ຘິອງ຺ຄນ຺ຕິ ປຸພ຺ພຠາຄສຸທ຺ຘິຠູຕໍ ອງ຺ຄໍ. ຈຕູສູຕິ ວຸຕ຺ຕອງ຺ຄປຣິຍາປນ຺ນໍ. ຍຎ຺ຎອຸປກ຺ຂໂຣຕິ ທານສ຺ສ ສາຘນໍ. ເອເຕສຸ ຘມ຺ເມສູຕິ ເອເຕສຸ ສທ຺ຘາທິຄຸເຓສຸ. ຍຖາ ຫິ ສທ຺ໂຘ ປຈ຺ຈຍໍ ປຈ຺ຈຸປຏ຺ຐເປຕ຺ວາ ວຕ຺ຖຸປຣິຈ຺ຈາຄສ຺ສ ວິເສສປຈ຺ຈໂຍ ກມ຺ມຜລສ຺ສ ປຣໂລກສ຺ສ ຈ ປຈ຺ຈກ຺ຂໂຕ ວິຍ ປຕ຺ຕິຍາຍນໂຕ, ເອວໍ ມຸທຸຫທໂຍ. ມຸທຸຫທໂຍ ຫິ ອນຸທຍໍ ປຕ຺ວາ ຍໍ ກິຎ຺ຈິ ອຕ຺ຕໂນ ສນ຺ຕກໍ ປເຣສໍ ເທຕິ. ໂຍ ຈ ສໍວິຠາຄສີໂລ, ໂສ ອປ຺ປກສ຺ມິມ຺ປິ ອຕ຺ຕໂນ ສນ຺ຕເກ ປເຣຫິ ສາຘາຣຓໂຠຄີ ໂຫຕິ. ວທຎ຺ຎູ ວທານິຍຕາຍ ຍາຄິໂນວ ຍຸຕ຺ຕໍ ຍຸຕ຺ຕກາລໍ ຎຕ຺ວາ ອຕ຺ຖິການໍ ມໂນຣຖໍ ປູເຣຕີຕິ ວຸຕ຺ຕໍ ‘‘ອິຕິ…ເປ… ຈຕູສູຕິ ອາຫາ’’ຕິ.

ວາຈນ຺ຕິອາທີນິ ຕີຓິ ອງ຺ຄານິ ຕິວິຘສີລສມ຺ປຕ຺ຕິທີປນໂຕ. ສມ຺ປນ຺ນສີໂລ ຫິ ປຣໂລກໍ ນ ຠາເສຍ຺ຍ. ສທ຺ໂຘ ເອກໍ ອງ຺ຄໍ ປໂຍຄາສຍສຸທ຺ຘິທີປນໂຕ. ສຸທ຺ຘາສຍສ຺ສ ສມ຺ມາປໂຍເຄ ຐິຕສ຺ສ ກຖໍ ປຣໂລກໂຕ ຠຍນ຺ຕິ. ທຸກວເສນ ຈຕຸຣງ຺ຄໂຍຊນາ ທຸກນໂຍ. ເອເຕສຸ ຈຕູສຸ ຘມ຺ເມສຸ ຐິໂຕຕິ ເອເຕສຸ ຍຖາວຸຕ຺ຕທຸກສງ຺ຄເຫສຸ ຈຕູສຸ ຄຸເຓສຸ ປຕິຏ຺ຐິໂຕ.

ຠີຕາສຸຕ຺ຕວຓ຺ຓນາ ນິຏ຺ຐິຕາ.