໓. ວິຕ຺ຕສຸຕ຺ຕວຓ຺ຓນາ

໗໓. ສທ຺ຘາຍາຕິ ສທ຺ຘາເຫຕຸ. ກຸລສມ຺ປທາຕິ ຂຕ຺ຕິຍາທິສມ຺ປຕ຺ຕິໂຍ. ສພ຺ພໂລກິຍໂລກຸຕ຺ຕຣວິຕ຺ຕປຏິລາຠເຫຕຸໂຕ ສທ຺ຘາວິຕ຺ຕເມວ. ເຫຏ຺ຐາ ຕິຓ຺ຓໍ ທ຺ວາຣານໍ ວເສນ ອຸປ຺ປນ຺ນກສ຺ສ ສພ຺ພສ຺ສປິ ອນວຊ຺ຊຘມ຺ມສ຺ສ ສງ຺ຄຓ຺ຫນໂຕ ‘‘ຘມ຺ໂມຕິ ທສກຸສລກມ຺ມປໂຖ’’ຕິ ວຸຕ຺ຕໍ. ອສໍກິລິຏ຺ຐສຸຂນ຺ຕິ. ນິຣາມິສໍ ສຸຂໍ. ຕເມວ ສາມິສໍ ອຸປນິຘາຍ ສມ຺ຠາເວນ຺ໂຕ ອາຫ ‘‘ອສໍກິລິຏ຺ຐ’’ນ຺ຕິ. ອເສຈນກຠາເວນ ອຠິຣຸຈິຊນນໂຕ ປິຍາກິຈ຺ຉກຣຓໂຕ ພຫຸໍ ສຸຈິຣມ຺ປິ ກາລໍ ອາເສວນ຺ຕສ຺ສ ອໂທສາວຫໂຕ ສຈ຺ຈເມວ ມຘຸຣຕຣໍ. ນ ຫິ ຕໍ ປິວິຕພ຺ພໂຕ ສາທິຕພ຺ພໂຕ ອນຸຠວິຕພ຺ພໂຕ ຣໂສຕິ ວຕ຺ຕພ຺ພຕໍ ອຣຫຕິ. ອິທານິ ຕສ຺ສ ກິຈ຺ຈສມ຺ປຕ຺ຕິອຕ຺ເຖຫິປິ ມຫາຣຫຕໍ ທສ຺ເສຕຸໍ ‘‘ສຈ຺ຈສ຺ມິໍ ຫີ’’ຕິອາທິ ວຸຕ຺ຕໍ. ຕຕ຺ຖ ນທີນິວຕ຺ຕນໍ ມຫາກປ຺ປິນວຕ຺ຖຸອາທີຫິ (ຘ. ປ. ອຏ຺ຐ. ໑.ມຫາກປ຺ປິນຕ຺ເຖຣວຕ຺ຖຸ; ອ. ນິ. ອຏ຺ຐ. ໑.໑.໒໓໑; ເຖຣຄາ. ອຏ຺ຐ. ໒.ມຫາກປ຺ປິນຕ຺ເຖຣຄາຖາວຓ຺ຓນາ) ທີເປຕພ຺ພໍ, ອິຕຣານິ ກຓ຺ຫທີປາຍນຊາຕກ- (ຊາ. ໑.໑໐.໖໒ ອາທໂຍ) ສຸຕໂສມ- (ຊາ. ໒.໒໑.໓໗໑ ອາທໂຍ) ມຈ຺ຉຊາຕເກຫິ (ຊາ. ໑.໑.໓໔, ໗໕; ໑.໒.໑໓໑ ອາທໂຍ) ທີເປຕພ຺ພານິ. ນິມ຺ມທ຺ເທນ຺ຕິ ອຠິຠວນ຺ຕິ. ມຘຸຣຕຣນ຺ຕິ ສຸນ຺ທຣຕຣໍ ເສຏ຺ເຐສູຕິ ອຕ຺ໂຖ. ປຎ຺ຎາຊີວີຕິ ປຎ຺ຎາຍ ຊີວນສີໂລຕິ ປຎ຺ຎາຊີວີ, ປຎ຺ຎາປຸພ຺ພງ຺ຄມຈຣິໂຍຕິ ອຕ຺ໂຖ. ປຎ຺ຎາຊີວີຕິ ຈ ປຎ຺ຎາວເສນ ອິຣິຍຕິ ວຕ຺ຕຕິ ຊີວິຕໍ ປວຕ຺ເຕຕີຕິ ອຕ຺ໂຖຕິ ທສ຺ເສນ຺ໂຕ ‘‘ໂຍ ປຎ຺ຎາຊີວີ’’ຕິອາທິມາຫ. ‘‘ຊີວຕ’’ນ຺ຕິ ເກຈິ ປຐນ຺ຕິ, ຊີວນ຺ຕານໍ ປຎ຺ຎາຊີວິໍ ເສຏ຺ຐມາຫູຕິ ອຕ຺ໂຖ.

ວິຕ຺ຕສຸຕ຺ຕວຓ຺ຓນາ ນິຏ຺ຐິຕາ.