໖. ນິທ຺ທາຕນ຺ທີສຸຕ຺ຕວຓ຺ຓນາ

໑໖. ປຈ຺ຉິເມ ມາເສ ປຈ຺ຉາຠຕ຺ຕໍ ປິຓ຺ຑປາຕປ຺ປຏິກ຺ກນ຺ໂຕ ຈຕຸຄ຺ຄຸຓໍ ສງ຺ຆາຏິໍ ປຎ຺ຎເປຕ຺ວາ ທກ຺ຂິເຓນ ປສ຺ເສນ ສໂຕ ສມ຺ປຊາໂນຕິ ເອຕ຺ຕກໍ ປາຐໍ ສງ຺ຂິປິຕ຺ວາ ‘‘ນິທ຺ທໍ ໂອກ຺ກມິຕາ’’ຕິ ວຸຕ຺ຕໍ. ກິຣິຍາມຍຈິຕ຺ເຕຫິ ອໂວມິສ຺ໂສ ຠວງ຺ຄໂສໂຕ ອພ຺ຍາກຕນິທ຺ທາ. ສາ ຫິ ຂີຓາສວານໍ ອຸປ຺ປຊ຺ຊນາຣຫາ, ຕສ຺ສາ ປຸພ຺ພຠາຄາປຣຠາເຄສຸ…ເປ… ອຸປ຺ປນ຺ນໍ ຖິນມິທ຺ຘໍ ອິຘາຘິປ຺ເປຕາ ນິທ຺ທາ, ສາ ອຂີຓາສວານໍ ເຍຠຸຍ຺ເຍນ ອນິຍຕກາລາ, ຕພ຺ພິຘຸຣນິຍຕສພ຺ຠາວໍ ທສ຺ເສນ຺ໂຕ ‘‘ອຕິຈ຺ຉາຕ…ເປ… ອາຄນ຺ຕຸກໍ ອາລສິຍ’’ນ຺ຕິ ອາຫ. ກາຍາລສິຍປຈ຺ຈຍາ ວີຣິຍສ຺ສ ປຏິປກ຺ຂຠູຕາ ຈຕ຺ຕາໂຣ ອກຸສລກ຺ຂນ຺ຘາ ຕນ຺ທີ ນາມ. ຕນ຺ທີຕິ ສຠາວນິທ຺ເທໂສ. ຕນ຺ທິຍນາຕິ ອາກາຣນິໍທ຺ເທໂສ. ຕນ຺ທີມນຕາຕິ ຕນ຺ທີຠູຕຈິຕ຺ຕຕາ. ອາລສ຺ຍນ຺ຕິ ອລສຠາວາຫຣຓໍ. ອາລສ຺ຍາຍິຕຕ຺ຕນ຺ຕິ ອລສຠາວປ຺ປຕ຺ຕິ. ກາຍວິຊມ຺ຠນາຕິ ກາຍສ຺ສ ວິນາມນາ. ອກຸສລປກ຺ຂາ ອຸກ຺ກຓ຺ຐິຕຕາຕິ ອກຸສລປກ຺ຂິຍາ ອນຠິຣຕິ. ຠຕ຺ຕກິລມໂຖຕິ ຍຖາວຸຕ຺ຕສ຺ສ ຠຕ຺ຕວຕ຺ຖຸກສ຺ສ ອາຫາຣສ຺ສ ວເສນ ສຣີເຣ ອຸປ຺ປຊ຺ຊນກເຂໂທ. ອຸປກ຺ກິລິຏ຺ໂຐຕິ ປຎ຺ຎາຍ ທຸພ຺ພລີກຣເຓນ ອຸປກ຺ກິລິຏ຺ຐຈິຕ຺ໂຕ. ຈິຕ຺ຕສ຺ສ ອສມາຫິຕຕ຺ຕາ ນິວາຣິຕປາຕຸຠາໂວ. ອຣິຍມຄ຺ຄສ຺ສ ໂຊຕນໍ ນາມ ອຸປ຺ປຊ຺ຊນເມວາຕິ ອາຫ ‘‘ນ ໂຊຕຕິ, ນ ປາຕຸຠວຕີຕິ ອຕ຺ໂຖ’’ຕິ. ນ ຫິ ອຣິຍມຄ຺ໂຄ ໂຊຕິອໂຊຕິນາໂມ ປວຕ຺ຕຕິ.

ມຄ຺ຄສຫຊາຕວີຣິເຍນາຕິ ໂລກິຍໂລກຸຕ຺ຕຣມຄ຺ຄສຫຊາຕວີຣິເຍນ. ມິສ຺ສກມຄ຺ໂຄ ຫິ ອິຘ ອຘິປ຺ເປໂຕ. ນີຫຣິຕ຺ວາຕິ ນີຫຣຓເຫຕຸ. ເຫຕຸອຕ຺ໂຖ ຫິ ອຍໍ ຕ຺ວາ-ສທ຺ໂທ ‘‘ປຎ຺ຎາຍ ຈສ຺ສ ທິສ຺ວາ’’ຕິອາທີສຸ (ມ. ນິ. ໑.໒໗໑) ວິຍ. ເຕນ ‘‘ມຄ຺ໂຄ ວິສຸຊ຺ຌຕີ’’ຕິ ວຈນໍ ສມຕ຺ຖິຕໍ ໂຫຕິ. ‘‘ອຣິຍມຄ຺ຄໍ ວິສຸຊ຺ຌຕີ’’ຕິ ເກຈິ ປຐນ຺ຕິ.

ນິທ຺ທາຕນ຺ທີສຸຕ຺ຕວຓ຺ຓນາ ນິຏ຺ຐິຕາ.