໗. ທຸກ຺ກຣສຸຕ຺ຕວຓ຺ຓນາ

໑໗. ທຸກ຺ຂໍ ຕິຕິກ຺ຂນ຺ຕິ ທຸຕ຺ຕິຕິກ຺ຂໍ. ຕຎ຺ຈ ທຸກ຺ຂມໍ ທຸສ຺ສຫນໍ ອາຣມ຺ຠວເສນ ທຸກ຺ກຣໍ, ອນຸຍຸຎ຺ຊນວເສນ ທຸຕ຺ຕິຕິກ຺ຂນ຺ຕິ. ອພ຺ຍຕ຺ເຕນາຕິ ສາມຎ຺ຎສ຺ສ ອຸປກາຣານຸປກາເຣ ຘມ຺ເມ ຊານນສມຕ຺ຖາຍ ເວຍ຺ຍຕ຺ຕິຍສງ຺ຂາຕາຍ ປຎ຺ຎາຍ ອຠາວໂຕ ນ ພ຺ຍຕ຺ເຕນ. ເຕນາຫ ‘‘ພາເລນາ’’ຕິ. ຍສ຺ມິໍ ຘມ຺ເມ ສຕິ ສມໂຓຕິ ວຸຈ຺ຈຕິ, ຕໍ ສາມຎ຺ຎນ຺ຕິ ອາຫ ‘‘ສມຓຘມ຺ໂມ’’ຕິ. ອິມິນາຕິ ‘‘ທຸກ຺ກຣໍ ທຸຕ຺ຕິຕິກ຺ຂຎ຺ຈ, ອພ຺ຍຕ຺ເຕນ ຈ ສາມຎ຺ຎ’’ນ຺ຕິ ອິມິນາ ຄາຖທ຺ເຘນ ອິທໍ ທສ຺ເສຕີຕິ ອິທໍ ອິທານິ ວຸຈ຺ຈມານໍ ອຕ຺ຖຊາຕໍ ທສ຺ເສຕິ. ອຠິທນ຺ຕນ຺ຕິ ອຠິຠວນທນ຺ຕໍ, ອຸປຣິທນ຺ຕນ຺ຕິ ອຕ຺ໂຖ. ໂສ ຫິ ອິຕຣໍ ມຸສລໍ ວິຍ ອຸທຸກ຺ຂລໍ ວິເສສໂຕ ກສ຺ສຈິ ຂາທນກາເລ ອຠິຠຸຍ຺ຍ ວຕ຺ຕຕິ. ອາຘາຍາຕິ ນິປ຺ປີຬນວເສເນວ ຐເປຕ຺ວາ. ຕາລຸໍ ອາຫຈ຺ຈາຕິ ຕາລຸປເທສມາຫນິຕ຺ວາ ວິຍ. ເຈຕສາຕິ ກຸສລຈິຕ຺ເຕນ. ຈິຕ຺ຕນ຺ຕິ ອກຸສລຈິຕ຺ຕໍ. ອຠິນິຄ຺ຄຓ຺ຫິຕ຺ວາຕິ ຍຖາ ອຕິສມຸທາຈາໂຣ ນ ໂຫຕິ, ເອວໍ ວິພາຘນວເສນ ນິຄ຺ຄເຫຕ຺ວາ. ອາປາຓໂກຏິກນ຺ຕິ ປາຓໂກຏິປຣິໂຍສານໍ, ປຣິຊີວນ຺ຕິ ອຕ຺ໂຖ. ສມ຺ພາເຘຕີຕິ ສມ຺ພາໂຘ, ອນ຺ຕຣາຍິໂກ. ພຫູ ປຣິສ຺ສຍາຕິ ອໂຍນິໂສ ກາມວິຕກ຺ກາທິວເສນ.

ປຊ຺ຊຕິ ຈິຕ຺ຕເມຕ຺ຖາຕິ ປທໍ, ອາຣມ຺ມຓໍ. ອິຣິຍາປຖໍ ເອວ ປທໍ ອິຣິຍາປຖປທໍ.

ຄີວາ ຈຕ຺ຕາໂຣ ປາທາຕິ ຄີວປຎ຺ຈມານິ. ສໂມທຫນ຺ຕິ ວາ ສໂມຘານເຫຕູຕິ ອຍເມຕ຺ຖ ອຕ຺ໂຖຕິ ອາຫ – ‘‘ສໂມທຫິຕ຺ວາ ວາ’’ຕິ, ສມ຺ມາ ໂອຘາຍ ອນ຺ໂຕ ປເວເສຕ຺ວາຕິ ອຕ຺ໂຖ. ສເກ ອາຣມ຺ມຓກປາເລຕິ ໂຄຈຣຊ຺ຌຕ຺ຕໍ ວທຕິ. ສໂມທຫນ຺ຕິ ສໂມທຫນ຺ໂຕ. ອນິສ຺ສິໂຕຕິ ເຕຠູມກຘມ຺ເມສຸ ກຎ຺ຈິປິ ຘມ຺ມໍ ຕຓ຺ຫາທິຏ຺ຐາຠິນິເວສວເສນ ອນິສ຺ສິໂຕ. ອວິຫິໍສມາໂນ ວິຫິໍສານິມິຕ຺ຕານໍ ປຊຫເນນ. ອຸລ຺ລຸມ຺ປນສຠາວສຓ຺ຐິເຕນາຕິ ສີລພ຺ຍສນໂຕ ອຸທ຺ຘຣຓຣູເປ ສຓ຺ຐິເຕນ, ກຣຸຓາຍຸຕ຺ເຕນາຕິ ອຕ຺ໂຖ. ເຕນາຫ ‘‘ກາຣຸຎ຺ຎຕໍ ປຏິຈ຺ຈາ’’ຕິ.

ທຸກ຺ກຣສຸຕ຺ຕວຓ຺ຓນາ ນິຏ຺ຐິຕາ.