໕. ສຓມານສຸຕ຺ຕວຓ຺ຓນາ

໑໕. ຐິເຕ ມຊ຺ຌນ຺ຫິເກຕິ ປຸພ຺ພທ຺ຘໍ ນິກ຺ຂມິຕ຺ວາ ອປຣທ຺ຘໍ ອປ຺ປຕ຺ວາ ຐິຕມຊ຺ຌນ຺ເຫ. ສນ຺ນິສີເວສູຕິ ປຣິສ຺ສມວິໂນທນຕ຺ຖໍ ສພ຺ພໂສ ສນ຺ນິສີທນ຺ເຕສຸ. ທ-ກາຣສ຺ສ ຫິ ວ-ກາຣໍ ກຕ຺ວາ ນິທ຺ເທໂສ. ເຕນາຫ ‘‘ສນ຺ນິສິນ຺ເນສຸ ວິສ຺ສມມາເນສູ’’ຕິ. ສພ຺ພສຕ຺ຕານນ຺ຕິ ສພ຺ເພສຎ຺ຈ ອາຫາຣູປຊີວິຕສຕ຺ຕານໍ ຆມ຺ມຕາປເນ ສນ຺ຕຕ຺ຕກາຍານໍ ອິຣິຍາປຖທຸພ຺ພລ຺ຍກາໂລຕິ ຐານາທິອິຣິຍາປຖສ຺ສ ອສມຕ຺ຖກາໂລ. ສຓຕິ ວິຍາຕິ ສທ຺ທໍ ກໂຣຕິ ວິຍ, ຍຖາ ຕໍ ອຎ຺ຎມ຺ປິ ມຫາວນໍ ວກ຺ຂມານນເຍນ. ເຕນາຫ ‘‘ຕປ຺ປຏິຠາຄໍ ນາເມຕ’’ນ຺ຕິ ຉິທ຺ທເວຓຸປພ຺ພານນ຺ຕິ ຣນ຺ຘຊາຕກີຈກມຫາເວຬຸປພ຺ພານໍ. ທຸຕິຍກໍ ສຫາຍໍ ອລຠນ຺ຕີ ອນຠິຣຕິປຣິຕສ຺ສນາຍ ເອວມາຫ. ອນປ຺ປກໍ ສຸຂນ຺ຕິ ວິປຸລໍ ອຸຬາຣໍ ວິເວກສຸຂໍ.

ເອກວິຫາຣຕາຍ ສຸຎ຺ຎາຄາຣໍ ປວິຏ຺ຐສ຺ສ. ເຕນ ກາຍວິເວກໍ ທສ຺ເສຕິ. ອນິຈ຺ຈານຸປສ຺ສນາທີຫິ ນິຈ຺ຈສຎ຺ຎາທິປ຺ປຫາເນນ ສນ຺ຕຈິຕ຺ຕສ຺ສ. ເຕນ ຈິຕ຺ຕວິເວກໍ ທສ຺ເສຕິ. ສໍສາເຣ ຠຍໍ ອິກ຺ຂນໂຕ ຠິກ຺ຂຸໂນ ອຸຠຍວິເວກສມ຺ປນ຺ນສ຺ສ, ຕໂຕ ເອວ ອຸຕ຺ຕຣິໍ ມນຸສ຺ສຘມ຺ມໂຕ ຣຕິໍ ລາຠິໂນ. ອມານຸສີ ຣຕີຕິ ຠາວນາຣຕິ. ປຸຣໂຕຕິ ປຸຣິມຠາເຄ. ປຈ຺ຉໂຕຕິ ປຈ຺ຉິມຠາເຄ. ອປໂຣຕິ ອຎ຺ໂຎ. ປຸຣໂຕຕິ ວາ ອນາຄເຕ, ອນາຄຕໍ ອາຣພ຺ຠາຕິ ອຕ຺ໂຖ. ປຈ຺ຉໂຕຕິ ອຕີເຕ ອຕີຕໍ ອາຣພ຺ຠ ປຏິປຕ຺ຕິຍາ ວິພາຘນໂຕ. ປໂຣຕິ ໂກໂຘ ຈິຕ຺ຕປຏິທຸສ຺ສນຕາຍ. ນ ປໂຣຕິ ອປໂຣ, ໂລໂຠ, ໂສ ເຈ ນ ວິຊ຺ຊຕິ. ເອເຕນ ອນາຄຕປ຺ປຊປ຺ປນາຍ ອຕີຕານຸໂສຈນາຍ ຈ ອຠາວໍ ທສ຺ເສຕິ. ອຕີວ ຜາສຸ ຠວຕີຕິ ນີວຣຓເຊຏ຺ຐກສ຺ສ ກາມຈ຺ຉນ຺ທສ຺ສ ວິຄເມນ ວິກ຺ຂມ຺ຠິຕນີວຣຓສ຺ສ ຌານສ຺ສ ວເສນ ອຕິວິຍ ຜາສຸວິຫາໂຣ ໂຫຕິ. ເອກສ຺ສ ວສໂຕ ວເນຕິ ຕຓ຺ຫາທຸຕິຍິກາຠາເວນ ເອກສ຺ສ ອຣຎ຺ເຎ ວິເວກວາສໍ ວສໂຕ. ເສສໍ ຕາທິສເມວາຕິ ເສສເມຕ຺ຖ ຍໍ ວຕ຺ຕພ຺ພໍ, ຕໍ ປຐມຄາຖາຍໍ ວຸຕ຺ຕສທິສເມວ.

ສຓມານສຸຕ຺ຕວຓ຺ຓນາ ນິຏ຺ຐິຕາ.