໒. ນນ຺ທຕິສຸຕ຺ຕວຓ຺ຓນາ

໑໒. ນນ຺ທຕີຕິ ເອຕ຺ຖ ນນ຺ທນໍ ສປ຺ປີຕິກກາມຕຓ຺ຫາກິຈ຺ຈນ຺ຕິ ອາຫ – ‘‘ຕຸສ຺ສຕີ’’ຕິ, ຕສ຺ມາ ກາມປຣິໂຕເສນ ຫຏ຺ຐຕຸຏ຺ໂຐ ໂຫຕີຕິ ອຕ຺ໂຖ. ປຸຕ຺ຕິມາຕິ ປຸຕ຺ຕວາ. ປຫູເຕ ຈາຍໍ ມາ-ສທ຺ໂທຕິ ອາຫ ‘‘ພຫຸປຸຕ຺ໂຕ’’ຕິ. ພຫຸປຸຕ຺ຕຕາຄຫເຓນ ອິທໍ ປໂຍຊນນ຺ຕິ ທສ຺ເສນ຺ໂຕ ‘‘ຕສ຺ສ ຫີ’’ຕິອາທິມາຫ. ປູເຣນ຺ຕີຕິ ປທໍ ອເປກ຺ຂິຕ຺ວາ ຘຎ຺ຎສ຺ສາຕິ ສາມິວຈນໍ. ອິຕິ ອາຫາຕິ ອິມມຕ຺ຖໍ ສນ຺ຘາຍາຫ, ເອວໍອຘິປ຺ປາໂຍ ຫຸຕ຺ວາຕິ ອຕ຺ໂຖ. ໂຄສາມິໂກຕິ ໂຄມາ. ອິຘາປິ ປຫູເຕ ມາ-ສທ຺ໂທ. ໂຄຣສສມ຺ປຕ຺ຕິນ຺ຕິ ໂຄຣເສຫິ ນິປ຺ຜຊ຺ຊນສມ຺ປຕ຺ຕິໍ. ອຸປຘີຕິ ປຈ຺ຈຕ຺ຕພຫຸວຈນໍ. ຫີຕິ ເຫຕຸອຕ຺ເຖ ນິປາໂຕ. ນນ຺ທຍນ຺ຕິ ປີຕິໂສມນສ຺ສໍ ຊນຍນ຺ຕີຕິ ນນ຺ທນາ. ກາມໍ ທຸກ຺ຂສ຺ສ ອຘິຏ຺ຐານຠາວໂຕ ນິປ຺ປຣິຍາຍໂຕ ກາມາ ‘‘ອຸປຘີ’’ຕິ ວຕ຺ຕພ຺ພຕໍ ອຣຫນ຺ຕິ, ຕສ຺ສາ ປນ ເທວຕາຍ ອຘິປ຺ປາຍວເສນາຫ ‘‘ສຸຂສ຺ສ ອຘິຏ຺ຐານຠາວໂຕ’’ຕິ. ກິເລສວຕ຺ຖຸເຫຕຸກຕ຺ຕາ ເສສປທທ຺ວຍສ຺ສ ກິຎ຺ຈາປິ ສພ຺ພໍ ສໍສາຣທຸກ຺ຂໍ ກິເລສເຫຕຸກໍ, ວິເສສໂຕ ປນ ປາປຘມ຺ມາ ອປາຍູປປຕ຺ຕິໍ ນິພ຺ພຕ຺ເຕນ຺ຕີຕິ ອາຫ – ‘‘ກິເລສາປິ ອປາຍທຸກ຺ຂສ຺ສ ອຘິຏ຺ຐານຠາວໂຕ’’ຕິ. ອຸປສໍຫຣມານາຕິ ອຸປເນນ຺ຕາ ອຸປ຺ປາເທນ຺ຕາ. ມນຸສ຺ສຊາຕິໂກປິ ທຸລ຺ລຠຆາສຈ຺ຉາທນຕາຍ ທຸກ຺ຂພຫຸໂລ ເປໂຕ ວິຍາຕິ ມນຸສ຺ສເປໂຕ. ມນຸສ຺ສຊາຕິໂກປິ ວຸຕ຺ຕຣູໂປ ອນຕ຺ຖປາຕິໂຕ ປເຣຫິ ຫິໍສິໂຕ ສມາໂນ ເນຣຍິໂກ ວິຍາຕິ ມນຸສ຺ສເນຣຍິໂກ.

ຜເລນ ຣຸກ຺ຂໂຕ ຜລໍ ປາເຕນ຺ໂຕ ວິຍ. ຕເຖວ ນວຫາກາເຣຫີຕິ ຍຖາ ຕີສຸ ກາເລສຸ ນາສມຣຓເຠທນວເສນ ປຸຕ຺ຕິມາ ປຸຕ຺ຕນິມິຕ຺ຕໍ, ຕເຖວ ໂຄມາ ໂຄນິມິຕ຺ຕໍ ໂສຈຕິ ນວປ຺ປກາເຣຫິ. ປຎ຺ຈ ກາມຄຸໂຓປຘີປິ ນຣໍ ໂສເຈນ຺ຕີຕິ ໂຍຊນາ. ຕສ຺ສາຕິ ໂຍ ອຸຕ຺ຕຣິ ອນຸຄິຊ຺ຌຕິ ຕສ຺ສ. ກາມຍານສ຺ສາຕິ ຊາຕກາມຈ຺ຉນ຺ທສ຺ສ. ຊນ຺ຕຸໂນຕິ ສຕ຺ຕສ຺ສ. ປຣິຫາຍນ຺ຕິ ເຈ ວິນສ຺ສນ຺ຕິ ເຈ. ສລ຺ລວິທ຺ໂຘວາຕິ ສລ຺ເລນ ວິທ຺ໂຘ ວິຍ. ຣຸປ຺ປຕີຕິ ວິກາຣໍ ອາປຊ຺ຊຕິ, ໂສຈຕີຕິ ອຕ຺ໂຖ. ນຣສ຺ສ ໂສຈນາ ໂສກຆຏ຺ຏນປຈ຺ຈໂຍ. ອຸປຘໂຍ ນຕ຺ຖີຕິ ກາມໍ ກິເລສາຠິສງ຺ຂາຣູປຘໂຍ ຕາວ ຂີຓາສວສ຺ສ ນຕ຺ເຖວ ມຄ຺ຄາຘິຄເມນ ນິໂຣຘິຕຕ຺ຕາ, ຂນ຺ຘູປຘໂຍ ປນ ກຖນ຺ຕິ? ເຕປິ ຕສ຺ສ ສອຸປາທິເສສກາເລປິ ອຏ຺ຐຸປ຺ປຕ຺ຕິເຫຕຸຠູຕາ ນ ສນ຺ເຕວ, ອຍຎ຺ຈ ອນຸປາທິເສສກາເລ. ເຕນາຫ ‘‘ໂສ ນິຣຸປຘິ ມຫາຂີຓາສໂວ’’ຕິ.

ນນ຺ທຕິສຸຕ຺ຕວຓ຺ຓນາ ນິຏ຺ຐິຕາ.