໓. ນຕ຺ຖິປຸຕ຺ຕສມສຸຕ຺ຕວຓ຺ຓນາ

໑໓. ປຸຕ຺ຕເປມໍ ປຸຕ຺ຕຄ຺ຄຫເຓນ ຄຫິຕໍ ອຸຕ຺ຕຣປທໂລເປນາຕິ ອາຫ ‘‘ປຸຕ຺ຕເປມສມ’’ນ຺ຕິ. ໂຄສມິຕນ຺ຕິ ໂຄຫິ ສມໍ ກຕໍ. ເຕນາຫ ‘‘ໂຄຫິ ສມ’’ນ຺ຕິ. ສູຣິຍສ຺ສ ສມາຕິ ສູຣິຍສມາ. ອວຍວສມ຺ພນ຺ເຘ ເຈຕໍ ສາມິວຈນໍ. ອວຍໂວ ເຈຕ຺ຖ ອາຠາ ເອວາຕິ ວິຎ຺ຎາຍຕິ ‘‘ອນນ຺ຕຣໍ ອາຠາ’’ຕິ ວຸຈ຺ຈມານຕ຺ຕາຕິ ອາຫ ‘‘ສູຣິຍາຠາຍ ສມາ’’ຕິອາທິ. ມໂຫຆຠາເວນ ສຣນ຺ຕິ ສວນ຺ຕີຕິ ສຣາ, ມຫນ຺ຕາ ຊລາສຍາ. ສພ຺ເພ ເຕ ສມຸທ຺ທປຣມາ ໂອຣິມຊເນຫິ ອທິຏ຺ຐປຣຕີຣຕ຺ຕາ ຕສ຺ສ.

ນຕ຺ຖິ ອຕ຺ຕສມໍ ເປມນ຺ຕິ ຄາຖາຍ ປຐມຄາຖາຍໍ ວຸຕ຺ຕນເຍນ ອຕ຺ໂຖ ເວທິຕພ຺ໂພ. ອຕ຺ຕເປເມນ ສມໍ ເປມໍ ນາມ ນຕ຺ຖີຕິ ອຍມຕ຺ໂຖ. ອນຸທກກນ຺ຕາເຣ ຆມ຺ມສນ຺ຕາປໍ ອສຫນ຺ຕິຍາ ອງ຺ເກ ຐປິຕປຸຕ຺ຕກໍ ກນ຺ທນ຺ຕໍ ຠູມິຍໍ ນິປຊ຺ຊາເປຕ຺ວາ ຕສ຺ສ ອຸປຣິ ຐຕ຺ວາ ມຕອິຕ຺ຖິວຕ຺ຖຸນາ ທີເປຕພ຺ພໍ. ເຕນາຫ – ‘‘ມາຕາປິຕາທໂຍ ຫິ ຉຑ຺ເຑຕ຺ວາປິ ປຸຕ຺ຕຘີຕາທໂຍ’’ຕິ. ຕຖາ ຈາຫ –

‘‘ສພ຺ພາ ທິສາ ອນຸປຣິຄມ຺ມ ເຈຕສາ,

ເນວຊ຺ຌຄາ ປິຍຕຣມຕ຺ຕນາ ກ຺ວຈິ;

ເອວໍ ປິໂຍ ປຸຖຸ ອຕ຺ຕາ ປເຣສໍ,

ຕສ຺ມາ ນ ຫິໍເສ ປຣມຕ຺ຕກາໂມ’’ຕິ. (ສໍ. ນິ. ໑.໑໑໙; ອຸທາ. ໔໑; ເນຕ຺ຕິ. ໑໑໓);

ຘຎ຺ເຎນ ສມໍ ຘນໍ ນາມ ນຕ຺ຖິ, ຍສ຺ມາ ຕປ຺ປຏິພທ຺ຘາ ອາຫາຣູປຊີວີນໍ ສຕ຺ຕານໍ ຊີວິຕວຸຕ຺ຕິ. ຕຖາຣູເປ ກາເລຕິ ທຸພ຺ຠິກ຺ຂກາເລ. ເອກເທສໍເຍວ ໂອຠາສນ຺ຕີຕິ ເອກສ຺ມິໍ ຂເຓ ຈຕູສຸ ມຫາທີເປສຸ ໂອຠາສໍ ຜຣິຕຸໍ ອສມຕ຺ຖຕ຺ຕາ ສູຣິຍສ຺ສປິ, ປເຄວ ອິຕເຣສໍ. ໂພຘິສຕ຺ຕສ຺ສ ອຸທຍພ຺ພຍສ຺ສ ຎາຓານຸຠາເວນ ສກລຊາຕິເຂຕ຺ຕໍ ເອກາໂລກໍ ອໂຫສີຕິ ອາຫ ‘‘ປຎ຺ຎາ…ເປ… ສກ຺ໂກຕີ’’ຕິ. ຕມໍ ວິຘມຕີຕິ ປຸພ຺ເພນິວາສຎາຓາທໂຍ ປຎ຺ຎາ ຍຕ຺ຖ ປວຕ຺ຕນ຺ຕິ, ຕມນວເສສໍ ພ຺ຍາເປຕ຺ວາ ເອກປ຺ປຫາເຣນ ປວຕ຺ຕນໂຕ. ‘‘ວຸຏ຺ຐິຍາ ປນ ປວຕ຺ຕມານາຍ ຍາວ ອາຠສ຺ສຣຠວນາ’’ຕິ ປຈຸຣວເສນ ວຸຕ຺ຕໍ.

ນຕ຺ຖິປຸຕ຺ຕສມສຸຕ຺ຕວຓ຺ຓນາ ນິຏ຺ຐິຕາ.