໕໔. ອຸຠໂຕພ຺ຍຎ຺ຊນກວຕ຺ຖຸກຖາ

໑໑໖. ອຸຠໂຕພ຺ຍຎ຺ຊນໂກຕິ ເອຕ຺ຖ ພາຫິຣຕ຺ຖສມາສໍ ທສ຺ເສນ຺ໂຕ ອາຫ ‘‘ອິຕ຺ຖິນິມິຕ຺ຕຸປ຺ປາທນກມ຺ມໂຕ ຈາ’’ຕິອາທິ. ຕຕ຺ຖ ‘‘ອິຕ຺ຖິ…ເປ… ກມ຺ມໂຕ ຈາ’’ຕິ ອິມິນາ ອຸຠຍສຣູປໍ ທສ຺ເສຕິ. ອຸຠໂຕ ກມ຺ມໂຕ ປວຕ຺ຕນ຺ຕິ ປາຐເສໂສ ໂຍເຊຕພ຺ໂພ. ພ຺ຍຎ຺ຊນນ຺ຕິ ນິມິຕ຺ຕໍ. ອສ຺ສາຕິ ຊນສ຺ສ. ກໂຣຕິປິ ກາເຣຕິປີຕິ ເອຕ຺ຖ ກຣຘາຕຸຍາ ສຸທ຺ຘກມ຺ມກາຣິຕກມ຺ມານິ ທສ຺ເສນ຺ໂຕ ອາຫ ‘‘ປຸຣິສນິມິຕ຺ເຕນາ’’ຕິອາທິ. ຕຕ຺ຖ ‘‘ວີຕິກ຺ກມ’’ນ຺ຕິ ອິມິນາ ສຸທ຺ຘກມ຺ມໍ ທສ຺ເສຕິ, ‘‘ປຣ’’ນ຺ຕິ ອິມິນາ ກາຣິຕກມ຺ມໍ ທສ຺ເສຕິ. ສມາທເປຕ຺ວາຕິ ອຸຍ຺ໂຍເຊຕ຺ວາ. ຕສ຺ສ ທຸວິຘຠາວໍ ທສ຺ເສນ຺ໂຕ ອາຫ ‘‘ທຸວິໂຘ’’ຕິອາທິ. ຕຕ຺ຖ ອິຕ຺ຖິຠາເວນ ລກ຺ຂິໂຕ ອຸຠໂຕພ຺ຍຎ຺ຊນໂກ ອິຕ຺ຖິອຸຠໂຕພ຺ຍຎ຺ຊນໂກ. ເອສ ນໂຍ ອິຕຣຕ຺ຖາປິ.

ຕຕ຺ຖາຕິ ທຸວິເຘສຸ ອຸຠໂຕພ຺ຍຎ຺ຊນເກສຸ. ອິຕ຺ຖິນິມິຕ຺ຕນ຺ຕິ ອິຕ຺ຖິຍາ ອງ຺ຄຊາຕໍ. ເອເສວ ນໂຍ ‘‘ປຸຣິສນິມິຕ຺ຕ’’ນ຺ຕິ ເອຕ຺ຖາປິ. ປາກຏໍ ປຏິຈ຺ຉນ຺ນນ຺ຕິ ສຠາວໂຕ ປາກຏໍ ປຏິຈ຺ຉນ຺ນໍ. ປຸນ ປຏິຈ຺ຉນ຺ນໍ ປາກຏນ຺ຕິ ຣາຄວເສນ ປຏິຈ຺ຉນ຺ນໍ ປາກຏໍ. ປຣໍ ຄຓ຺ຫາເປຕີຕິ ປຣເມວ ຄຓ຺ຫາເປຕີຕິ ອຕ຺ໂຖ. ອິທນ຺ຕິ ກາຣຓໍ. ເອເຕສນ຺ຕິ ທ຺ວິນ຺ນໍ ອຸຠໂຕພ຺ຍຎ຺ຊນການໍ. ກຸຣຸນ຺ທິຍໍ ປນ ວຸຕ຺ຕໍ, ກິໍ ວຸຕ຺ຕນ຺ຕິ ໂຍຊນາ. ຕຕ຺ຖາຕິ ອຸຠໂຕພ຺ຍຎ຺ຊນເກ. ວິຈາຣຓກ຺ກໂມຕິ ວີມໍສນານຸກ຺ກໂມ. ‘‘ຕຕ຺ຖ ວິຈາຣກ຺ກໂມ’’ຕິປິ ປາໂຐ. ວິຈາຣຓກ຺ກໂມ ຘມ຺ມສງ຺ຄຫຏ຺ຐກຖາຍ ເວທິຕພ຺ໂພ, ອິຘ ປນ ກິໍ ເວທິຕພ຺ພນ຺ຕິ ອາຫ ‘‘ອິທມິຘ ເວທິຕພ຺ພ’’ນ຺ຕິ. ຕຕ຺ຖ ອິທນ຺ຕິ ນປພ຺ພຊ຺ຊູປສມ຺ປທກາຣຓໍ. ອິຘາຕິ ອິມິສ຺ສໍ ວິນຍຏ຺ຐກຖາຍໍ.