໔໒. ສິກ຺ຂາປທທຓ຺ຑກມ຺ມວຕ຺ຖຸກຖາ

໑໐໖. ນາສນວຕ຺ຖູຕິ ລິງ຺ຄນາສນາຍ ອຘິຏ຺ຐານໍ, ກາຣຓນ຺ຕິ ວຸຕ຺ຕໍ ໂຫຕິ. ປຈ຺ຉິມານໍ ປຎ຺ຈນ຺ນນ຺ຕິ ໂຍຊນາ. ທຓ຺ຑກມ຺ມວຕ຺ຖູຕິ ທຓ຺ຑກມ຺ມສ຺ສ ກາຣຓໍ.

໑໐໗. ອປ຺ປຕິສ຺ສາຕິ ເອຕ຺ຖ ຠິກ຺ຂູນໍ ວຈນສ຺ສ ປຏິມຸຂໍ ອາທເຣນ ອສວນໍ ຠິກ຺ຂູ ເຊຏ຺ຐກຏ຺ຐາເນ ນ ຐເປນ຺ຕິ ນາມາຕິ ທສ຺ເສນ຺ໂຕ ອາຫ ‘‘ຠິກ຺ຂູ ເຊຏ຺ຐກຏ຺ຐາເນ’’ຕິອາທິ. ‘‘ສມານຊີວິກາ’’ຕິ ອິມິນາ ອສຠາຄວຸຕ຺ຕິກາຕິ ເອຕ຺ຖ ສຠາຄສທ຺ໂທ ສມານສທ຺ທປຣິຍາໂຍ, ວຸຕ຺ຕິສທ຺ໂທ ຊີວິກປຣິຍາໂຍຕິ ທສ຺ເສຕິ. ປຣິສກ຺ກຕີຕິ ເອຕ຺ຖ ສກ຺ກ ຄຕິຍນ຺ຕິຘາຕຸປາເຐສຸ (ສທ຺ທນີຕິຘາຕຸມາລາຍໍ ໑໖ ຬກາຣນ຺ຕຘາຕຸ) ວຸຕ຺ຕຕ຺ຕາ ປຣິປຸພ຺ໂພ ສກ຺ກສທ຺ໂທ ຄຕ຺ຍຕ຺ໂຖຕິ ອາຫ ‘‘ປຣກ຺ກມຕີ’’ຕິ. ກິນ຺ຕີຕິ ກິເມວ. ອິຕິສທ຺ໂທ ເຫຕ຺ຖ ເອວສທ຺ທຕ຺ໂຖ, ເກນ ເອວ ອຸປາເຍນາຕິ ຫິ ອຕ຺ໂຖ. ອກ຺ໂກສຕິ ເຈວາຕິ ຊາຕິອາທີຫິ ອກ຺ໂກສຕິ ເຈວ. ເຠເທຕີຕິ ເຠທາເປຕິ. ອາວຣຓໍ ກາຕຸນ຺ຕິ ເອຕ຺ຖ ອາວຣຓສທ຺ໂທ ນິວາຣຓສທ຺ທເວວຈໂນຕິ ອາຫ ‘‘ນິວາຣຓໍ ກາຕຸ’’ນ຺ຕິ. ຍຕ຺ຖາຕິ ຍສ຺ມິໍ ປຣິເວເຓ, ເສນາສເນ ວາ. ວສ຺ສຄ຺ເຄນາຕິ ວສ຺ສຄຓນາຍ. (ຕສ຺ສາຕິ ປຣິເວຓເສນາສນສ຺ສ. ອຸປຈາເຣຕິ ອາສນ຺ເນ). ມຸຂທ຺ວາຣິກນ຺ຕິ ມຸຂສງ຺ຂາເຕນ ທ຺ວາເຣນ ອຊ຺ໂຌຫຣິຕພ຺ພໍ. ‘‘ວທໂຕປີ’’ຕິ ອິມິນາ ວຈີປໂຍເຄນ ທຸກ຺ກຏາປຕ຺ຕິໍ ທສ຺ເສຕິ, ‘‘ນິກ຺ຂິປໂຕປີ’’ຕິ ອິມິນາ ກາຍປໂຍເຄນ. ອນາຈາຣສ຺ສາຕິ ທຓ຺ຑກມ຺ເມ ອນາຈາຣສ຺ສ. ເອຕ຺ຕເກ ນາມ ທຓ຺ຑກມ຺ເມຕິ ເອຕ຺ຕເກ ນາມ ອຸທກາຫຣາປນາທິສງ຺ຂາເຕ ທຓ຺ຑກມ຺ເມ. ອິທນ຺ຕິ ຍາຄຸຠຕ຺ຕາທິໍ. ລຈ຺ຉສີຕິ ລຠິສ຺ສສິ. ‘‘ເອຕ຺ຕເກ ນາມ ທຓ຺ຑກມ຺ເມ’’ຕິ ວຸຕ຺ຕວຈນສ຺ສ ຍຸຕ຺ຕິໍ ທສ຺ເສນ຺ໂຕ ອາຫ ‘‘ຠຄວຕາ ຫີ’’ຕິອາທິ. ທຓ຺ຑກມ຺ມນ຺ຕິ ທຓ຺ເຑນ຺ຕິ ທເມນ຺ຕິ ເອເຕນາຕິ ທຓ຺ໂຑ, ໂສເຍວ ກຕ຺ຕພ຺ພຕ຺ຕາ ກມ຺ມນ຺ຕິ ທຓ຺ຑກມ຺ມໍ ອາວຣຓາທິ. ອປຣາຘານຸຣູປນ຺ຕິ ວີຕິກ຺ກມສ຺ສ ອປຣາຘສ຺ສ ອນຸຣູປໍ. ຕມ຺ປີຕິ ອຸທກທາຣຸວາລິກາທິອາຫຣາປຓມ຺ປິ. ຕຎ຺ຈ ໂຂຕິ ຕຎ຺ຈ ກຣຓໍ. ໂອຣມິສ຺ສຕີຕິ ກາເຍນ ໂອຣມິສ຺ສຕິ. ວິຣມິສ຺ສຕີຕິ ວາຈາຍ ວິຣມິສ຺ສຕິ. ອຸຓ຺ຫປາສາເຓ ວາຕິອາທີສຸ ວາສທ຺ເທນ ອຎ຺ຎານິປິ ອຕ຺ຕຕາປນປຣິຕາປນາທີນິ ກມ຺ມານິ ສງ຺ຄຓ຺ຫາຕິ.