໒໕. ອຎ຺ຎຕິຕ຺ຖິຍປຸພ຺ພວຕ຺ຖຸກຖາ

໘໖. ໂຍ ປນາຕິ ໂຍ ປນ ອຎ຺ຎຕິຕ຺ຖິຍປຸພ຺ໂພ. ອຎ຺ໂຎປີຕິ ປສູຣໂຕ ອປໂຣປິ. ອິຘາຕິ ອິມສ຺ມິໍ ສາສເນ. ຕສ຺ມິນ຺ຕິ ອຎ຺ຎຕິຕ຺ຖິຍປຸພ຺ເພ. ຕຕ຺ຖາຕິ ‘‘ໂຍ ໂສ ຠິກ຺ຂເວ ອຎ຺ໂຎປີ’’ຕິອາທິວຈເນ. ອຍນ຺ຕິ ປຣິວາໂສ. ນຄ຺ຄປຣິພ຺ພາຊກສ຺ເສວາຕິ ວຕ຺ວາ ຕສ຺ສ ເຠທໍ ທສ຺ເສຕຸໍ ວຸຕ຺ຕໍ ‘‘ອາຊີວກສ຺ສ ວາ ອເຈລກສ຺ສ ວາ’’ຕິ. ຕຕ຺ຖ ອາຊີວໂກ ອຸປຣິ ເອກເມວ ວຕ຺ຖໍ ອຸປກຈ຺ຉເກ ປເວເສຕ຺ວາ ປຣິທຫຕິ, ເຫຏ຺ຐາ ນຄ຺ໂຄ. ອເຈລໂກ ປນ ສພ຺ເພນ ສພ຺ພໍ ນຄ຺ໂຄເຍວ. ໂສປີຕິ =໐໓ ນຄ຺ຄປຣິພ຺ພາຊໂກປິ. ວາລກມ຺ພລາທີນນ຺ຕິ ວາເລນ ກຕໍ ກມ຺ພລໍ, ອາທິສທ຺ເທນ ເກສກມ຺ພລາທໂຍ ສງ຺ຄຓ຺ຫາຕິ. ອສ຺ສາຕິ ປຣິພ຺ພາຊກສ຺ສ. ອຎ຺ຎສ຺ສາຕິ ນຄ຺ຄປຣິພ຺ພາຊກໂຕ ອປຣສ຺ສ. ປຓ຺ຑຣງ຺ຄາທິກສ຺ສາຕິ ປຓ຺ຑຣໍ ເສຕວຕ຺ຖໍ ອງ຺ເຄ ສຣີເຣ ເອຕສ຺ສຕ຺ຖີຕິ ປຓ຺ຑຣງ຺ໂຄ, ອາທິສທ຺ເທນ ນີລງ຺ຄາທໂຍ ສງ຺ຄຓ຺ຫາຕິ.

ເອວນ຺ຕິ ອິມິນາ ເກສມສ຺ສຸໂອໂຣປນາທິນາ. ປພ຺ພາເຊນ຺ເຕຫິ ຠິກ຺ຂູຫີຕິ ສມ຺ພນ຺ໂຘ. ຕສ຺ມິນ຺ຕິ ອຎ຺ຎຕິຕ຺ຖິຍປຸພ຺ເພ, ນິສິນ຺ເນເຍວາຕິ ໂຍຊນາ. ອນາທເຣ ເຈຕໍ ຠຸມ຺ມວຈນໍ. ຕສ຺ສາຕິ ອຎ຺ຎຕິຕ຺ຖິຍປຸພ຺ພສ຺ສ. ນຍິເມຕິ ນ ອິເມ, ຠິກ຺ຂູຕິ ສມ຺ພນ຺ໂຘ. ຕນ຺ຕິ ອຎ຺ຎຕິຕ຺ຖິຍປຸພ຺ພໍ.

໘໗. ‘‘ເອວໍ ໂຂ…ເປ… ອນາຣາຘໂກ’’ຕິ ອຍໍ ກຖາ ມາຕິກາຕິ ໂຍຊນາ. ອສ຺ສາຕິ ອຎ຺ຎຕິຕ຺ຖິຍປຸພ຺ພສ຺ສ. ຕສ຺ເສວາຕິ ຕສ຺ສາເຍວ ມາຕິກາຍ. ຕຕ຺ຖາຕິ ວິຠງ຺ເຄ. ອຕິກາເລນາຕິ ເອຕ຺ຖ ຠຕ຺ຕກິຈ຺ຈໍ ກຕ຺ວາ ວຕ຺ຕກຣຓເວລາເຍວ ອຕິກາໂລ ນາມາຕິ ທສ຺ເສນ຺ໂຕ ອາຫ ‘‘ວຕ຺ຕກຣຓເວລາຍເມວາ’’ຕິ. ອິມິນາ ຠຸມ຺ມຕ຺ເຖ ກຣຓວຈນນ຺ຕິປິ ທສ຺ເສຕິ. ຕຕ຺ເຖວາຕິ ກຸລຆເຣສຸເຍວ. ອຎ຺ຎທຕ຺ຖູຕິ ເອກໍເສນ, ‘‘ກໂຣນ຺ໂຕ’’ຕິ ອິມິນາ ປາຐເສສໍ ທສ຺ເສຕິ. ເອວມ຺ປິ ກໂຣນ຺ໂຕ ອຎ຺ຎຕິຕ຺ຖິຍປຸພ຺ໂພຕິ ໂຍຊນາ. ‘‘ສມ຺ປາທໂກ’’ຕິ ອິມິນາ ອນາຣາຘໂກຕິ ເອຕ຺ຖ ອາຣາຘສທ຺ທສ຺ສ ສາຘນຕ຺ຖໍ ທສ຺ເສຕິ, ໂຕສນຕ຺ຖາທໂຍ ນິວຕ຺ເຕຕິ.

ອຊ຺ຌາຈາຣຕ຺ຖິກາ ວິສນ຺ຕິ ປວິສນ຺ຕິ ເອຕ຺ຖາຕິ ເວສິຍາ, ໂສຠຓຣູປສງ຺ຂາຕໍ ເວສໍ ຘາເຣຕີຕິ ວາ ເວສິຍາ. ເຕນ ວຸຕ຺ຕໍ ‘‘ສຸລຠຊ຺ຌາຈາຣາ’’ຕິອາທິ. ອາມິໂສເຍວ ກິຎ຺ຊກ຺ໂຂ ອປ຺ປມຕ຺ຕກຏ຺ເຐນາຕິ ອາມິສກິຎ຺ຊກ຺ໂຂ, ວິເສສນປຣປໂທ. ອຖ ວາ ອາມິໂສ ຈ ຕໂຕ ອຎ຺ໂຎ ກິຎ຺ຊກ຺ໂຂ ຈ ອາມິສກິຎ຺ຊກ຺ຂໍ, ຕສ຺ສ ສມ຺ປທານໍ ອາມິສກິຎ຺ຊກ຺ຂສມ຺ປທານໍ. ກິຎ຺ຊກ຺ຂສທ຺ໂທ ເກສຣສ຺ເສວ ມຸຂ຺ຍໂຕ ວາຈໂກ, ອປ຺ປມຕ຺ຕກສ຺ສ ປນ ຣູຬ຺ຫີວເສນ. ວິຘວາຕິ ເອຕ຺ຖ ຘວສທ຺ໂທ ປຕິໂນເຍວ ວາຈໂກ, ນ ຣຸກ຺ຂວິເສສສ຺ສາຕິ ທສ຺ເສນ຺ໂຕ ອາຫ ‘‘ມຕປຕິກາ ວາ’’ຕິອາທິ. ອິເມຫິ ປເທຫິ ມຕວເສນ ວາ ປວຸຕ຺ຖວເສນ ວາ ວິຄໂຕ ຘໂວ ເອຕາສໍ, ຘເວນ ວາ ວິຄຕາຕິ ວິຘວາຕິ ວຈນຕ຺ຖໍ ທສ຺ເສຕິ. ຕາຕິ ວິຘວາ. ໂຍພ຺ພນປຕ຺ຕຕ຺ຕາ ວາ ໂຍພ຺ພນາຕີຕຕ຺ຕາ ວາ ຖຸລ຺ລາ ມຫນ຺ຕາ ກຸມາຣິກາຕິ ຖຸລ຺ລກຸມາຣິກາຕິ ທສ຺ເສນ຺ໂຕ ອາຫ ‘‘ໂຍພ຺ພນປຕ຺ຕາ’’ຕິອາທິ. ປຓ຺ຑກາຕິ ເອຕ຺ຖ ອາສິຕ຺ຕປຓ຺ຑກາທີສຸ ປຎ຺ຈສຸ ປຓ຺ຑເກສຸ ນປຸໍສກປຓ຺ຑໂກວາຘິປ຺ເປໂຕຕິ ອາຫ ‘‘ນປຸໍສກາ’’ຕິ. ສມານປພ຺ພຊ຺ຊາຕິ ຠິກ຺ຂູຫິ ສມານປພ຺ພຊ຺ຊາ. ຕໂຕຕິ ວິສ຺ສາສໂຕ.

ຕຕ຺ຖາຕິ ເວສິຍາທີສຸ. ຕາສນ຺ຕິ ເວສິຍານໍ. ໂສຕິ ອຎ຺ຎຕິຕ຺ຖິຍປຸພ຺ໂພ. ສພ຺ພຕ຺ຖາຕິ ສພ຺ເພສຸ =໐໔ ວິຘວາທີສຸ. ຄນ຺ຕພ຺ພຕໍ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ຕຖາຕິ ຍຖາ ຄນ຺ຕພ຺ພຕ຺ຕໍ ວຸຕ຺ຕໍ, ຕຖາ.

ອຸຈ຺ຈາວຈານີຕິ ເອຕ຺ຖ ອຸທ຺ຘໍ ຈຍຕິ ວຑ຺ຒຕີຕິ ອຸຈ຺ຈໍ, ຈຍໂຕ ອວຄໂຕ ວິໂຍໂຄຕິ ອວຈໍ. ອຸຈ຺ຈຎ຺ຈ ອວຈຎ຺ຈ ອຸຈ຺ຈາວຈານີຕິ ວຈນຕ຺ເຖນ ມຫນ຺ຕຂຸທ຺ທກຕ຺ໂຖຕິ ອາຫ ‘‘ມຫນ຺ຕຂຸທ຺ທການີ’’ຕິ. ‘‘ກມ຺ມານີ’’ຕິ ອິມິນາ ‘‘ກຣຓີຍານີ’’ຕິປທສ຺ສ ສຣູປໍ ທສ຺ເສຕິ. ຕໍທສ຺ສເນນ ຈ ກຕ຺ຕພ຺ພານີຕິ ກຣຓີຍານີຕິ ວຈນຕ຺ໂຖ ກາຕພ຺ໂພ. ຕຕ຺ຖາຕິ ມຫນ຺ຕຂຸທ຺ທເກສຸ ກມ຺ເມສຸ. ຕຕ຺ຖ ນ ທກ຺ໂຂຕິ ເອຕ຺ຖ ຕສທ຺ທສ຺ສ ວິສຍໍ ທສ຺ເສຕຸໍ ວຸຕ຺ຕໍ ‘‘ເຕສຸ ເຕສຸ ນວກມ຺ເມສູ’’ຕິ. ‘‘ອຸຏ຺ຐານວີຣິຍສມ຺ປນ຺ໂນ’’ຕິ ອິມິນາ ນຕ຺ຖິ ອລໂສ ໂກສຊ຺ຊໍ ເອຕສ຺ສາຕິ ອນລໂສຕິ ວຈນຕ຺ຖໍ ທສ຺ເສຕິ. ຕຕ຺ຣາຕິ ເອຕ຺ຖ ຕ຺ຣປຈ຺ຈໂຍ ສຕ຺ຕມ຺ຍຕ຺ເຖ ວິຈ຺ຉາໂຊຕໂກຕິ ອາຫ ‘‘ເຕສຸ ເຕສູ’’ຕິ. ‘‘ຐານຸປ຺ປຕ຺ຕິກາຍ ວີມໍສາຍາ’’ຕິ ວຸຕ຺ຕວຈນສ຺ສຕ຺ຖໍ ທສ຺ເສນ຺ໂຕ ອາຫ ‘‘ອິທເມວ’’ນ຺ຕິອາທິ. ‘‘ຕສ຺ມິໍເຍວ ຂເຓ ອຸປ຺ປນ຺ນປຎ຺ຎາຍາ’’ຕິ ອິມິນາ ‘‘ຐານຸປ຺ປຕ຺ຕິກາຍາ’’ຕິ ເອຕ຺ຖ ຐານສທ຺ໂທ ຕງ຺ຂຓຕ຺ໂຖຕິ ທສ຺ເສຕິ. ອລໍ ກາຕຸນ຺ຕິ ເອຕ຺ຖ ອລໍສທ຺ໂທ ຠູສນວາຣຓປຣິຍຕ຺ຕສງ຺ຂາເຕສຸ ຕີສຸ ອຕ຺ເຖສຸ ປຣິຍຕ຺ຕຕ຺ໂຖຕິ ອາຫ ‘‘ກາຕຸໍ ສມຕ຺ໂຖ’’ຕິ.

ຕິພ຺ພຈ຺ຉນ຺ໂທຕິ ຕິຂິຓຉນ຺ໂທ. ‘‘ພລວຈ຺ຉນ຺ໂທ’’ຕິ ອິມິນາ ອຘິປ຺ປາຍຕ຺ຖໍ ທສ຺ເສຕິ. ໂລກິຍສມາຘິຠາວນາຍາຕິ ໂລກິຍາຍ ອຏ຺ຐສມາປຕ຺ຕິສງ຺ຂາຕາຍ ສມາຘິຠາວນາຍ.

ອິຘາຄໂຕຕິ ອິມສ຺ມິໍ ສາສເນ ອາຄໂຕ. ຕິຕ຺ຖາຍຕນສາມິກສ຺ສາຕິ ຕຣນ຺ຕິ ອຸປ຺ລວນ຺ຕິ ສຕ຺ຕາ ອຸມ຺ມຸຊ຺ຊນິມຸຊ຺ຊໍ ກໂຣນ຺ຕິ ເອຕ຺ຖາຕິ ຕິຕ຺ຖໍ, ທ຺ວາສຏ຺ຐິ ທິຏ຺ຐິໂຍ. ຕເມວ ອາຍຕນໍ ທິຏ຺ຐິຄຕິການນ຺ຕິ ຕິຕ຺ຖາຍຕນໍ. ອຖ ວາ ຕິຕ຺ຖເມເຕສມຕ຺ຖີຕິ ຕິຕ຺ຖິໂນ, ເຕສມາຍຕນໍ ຕິຕ຺ຖາຍຕນໍ, ຕສ຺ສ ສາມິໂກ ຕິຕ຺ຖາຍຕນສາມິໂກ, ຕສ຺ສ. ຕສ຺ສ ທິຏ຺ຐິຍາຕິ ເອຕ຺ຖ ທິຏ຺ຐິສທ຺ໂທ ລທ຺ຘິປຣິຍາໂຍຕິ ອາຫ ‘‘ຕສ຺ສ ສນ຺ຕກາຍ ລທ຺ຘິຍາ’’ຕິ. ກສ຺ມາ ສາ ລທ຺ຘິ ‘‘ຂນ຺ຕີ’’ຕິ ຈ ‘‘ຣຸຈີ’’ຕິ ຈ ‘‘ອາທາໂຍ’’ຕິ ຈ ວຸຈ຺ຈຕີຕິ ອາຫ ‘‘ອິທານີ’’ຕິອາທິ. ສາເຍວ ລທ຺ຘິ ຂມຕິ ເຈວ ຣຸຈ຺ຈຕິ ຈ ຄຫິຕາ ຈາຕິ ໂຍຊນາ. ຕສ຺ສ ຕິຕ຺ຖກຣສ຺ສາຕິ ກຕ຺ວຕ຺ເຖ ສາມິວຈນໍ. ຕສ຺ສາຕິ ຕິຕ຺ຖາຍຕນສາມິກສ຺ສ. ຠຎ຺ຎມານາຍາຕິ ຠຓິຍມານາຍ. ອນຠິຣທ຺ໂຘຕິ ເອຕ຺ຖ ອນຠິຣາຘິໂຕ ອປຣິໂຕສິຕຈິຕ຺ໂຕຕິ ອຕ຺ຖໍ ທສ຺ເສນ຺ໂຕ ອາຫ ‘‘ອປຣິປຸຓ຺ຓສງ຺ກປ຺ໂປ, ໂນ ປຄ຺ຄຫິຕຈິຕ຺ໂຕ’’ຕິ. ຍທິທນ຺ຕິ ຍໍ ອິທໍ ‘‘ອນຕ຺ຕມນຕ຺ຕ’’ນ຺ຕິ ວາ ‘‘ອຕ຺ຕມນຕ຺ຕ’’ນ຺ຕິ ວາ ສມ຺ພນ຺ໂຘ. ອິມິນາ ‘‘ອິທ’’ນ຺ຕິປທສ຺ສ ອນິຍມໍ ທສ຺ເສຕິ. ອິເມຕິ ຠິກ຺ຂູ. ຍຎ຺ຈ ອນຕ຺ຕມນຕ຺ຕນ຺ຕິ ໂຍຊນາ. ຕສ຺ເສວາຕິ ອຎ຺ຎຕິຕ຺ຖິຍປຸພ຺ພສ຺ສ ເອວ ອນຕ຺ຕມນຕ຺ຕນ຺ຕິ ສມ຺ພນ຺ໂຘ. ອິທນ຺ຕິ ທ຺ເວ ອຕ຺ຕມນຕ຺ຕານິ, ທ຺ເວ ອນຕ຺ຕມນຕ຺ຕານີຕິ ຈຕຸພ຺ພິຘໍ ອິທໍ ຘມ຺ມຊາຕໍ. ສງ຺ຆາຏນີຍນ຺ຕິ ສງ຺ຆຏິຕພ຺ພໍ, ສນ຺ນິຈຍໍ ກາຕພ຺ພນ຺ຕິ ອຕ຺ໂຖ. ‘‘ອນາຣາຘເກ’’ຕິອາທິນາ ອນາຣາຘນີຍສ຺ມິນ຺ຕິ =໐໕ ເອຕ຺ຖ ນ ອາຣາເຘຕິ ວຕ຺ຕໍ ອເນນ ກມ຺ເມນາຕິ ອນາຣາຘນີຍນ຺ຕິ ວຈນຕ຺ຖໍ ທສ຺ເສຕິ. ອິທນ຺ຕິ ຈຕຸພ຺ພິຘໍ. ລິງ຺ຄນ຺ຕິ ກາຣຓໍ. ລກ຺ຂຓນ຺ຕິ ຈິຫນໍ. ອິໂຕຕິ ອຏ຺ຐງ຺ຄໂຕ ນີຫເຏນາຕິ ສມ຺ພນ຺ໂຘ. ວຸຕ຺ຕວິປລ຺ລາເສນາຕິ ກຓ຺ຫປກ຺ເຂ ວຸຕ຺ຕວິປຣີເຕນ.

ສຸກ຺ກປກ຺ເຂ ອຏ຺ຐງ຺ຄານິ ສໂມຘາເນຕ຺ວາ ທສ຺ເສນ຺ໂຕ ອາຫ ‘‘ນາຕິກາເລນ ຄາມປເວສນໍ ນາຕິທິວາ ປຏິກ຺ກມນ’’ນ຺ຕິອາທິ. ກຓ຺ຫປກ຺ເຂປິ ອິມິນາ ນເຍນ ອຏ຺ຐງ຺ຄານິ ສໂມຘາເນຕພ຺ພານິ. ‘‘ປຣິໂຕສໂກ’’ຕິ ອິມິນາ ອາຣາຘກສທ຺ທສ຺ສ ໂຕສນຕ຺ຖໍ ທສ຺ເສຕິ. ເຫຏ຺ຐາ ປນ ‘‘ສມ຺ປາທໂກ’’ຕິ ວຸຕ຺ຕຕ຺ຕາ ສາຘນຕ຺ຖໍ ທສ຺ເສຕີຕິ ທຏ຺ຐພ຺ພໍ.

ອຸປສມ຺ປທມາຬເກປີຕິ ອຸປສມ຺ປາທຏ຺ຐາເນ ເອກກູຏຍຸຕ຺ເຕ ອເນກໂກເຓ ປຕິສ຺ສຍວິເສເສປິ. ໂສ ຫິ ເອກກູຏໍ ກຕ຺ວາ ອເນເກຫິ ໂກເຓຫິ ມລີຍຕິ ວິຠູສີຍຕີຕິ ມາໂຬຕິ ວຸຈ຺ຈຕິ. ‘‘ຈຕ຺ຕາໂຣ ມາເສ ປຣິວສິຕພ຺ພ’’ນ຺ຕິວຈນໍ ອສທິສູປມາຍ ປາກຏໍ ກໂຣນ຺ໂຕ ‘‘ຍຖາ ປນາ’’ຕິອາທິມາຫ. ຫີຕິ ສຈ຺ຈໍ. ອສ຺ສາຕິ ອຎ຺ຎຕິຕ຺ຖິຍປຸພ຺ພສ຺ສ. ປຣິວສນ຺ໂຕ ອຎ຺ຎຕິຕ຺ຖິຍປຸພ຺ໂພຕິ ສມ຺ພນ຺ໂຘ. ອນ຺ຕຣາຕິ ຈຕຸມາສສ຺ສ ອພ຺ຠນ຺ຕເຣ. ກຸປ຺ປນສຠາໂວຕິ ນສ຺ສນສຠາໂວ. ປຣິຄ຺ຄຓ຺ຫາຕີຕິ ປຣິຈ຺ຉິນ຺ທິຕ຺ວາ ຄຓ຺ຫາຕິ. ນາມຣູປໍ ວວຕ຺ຖເປຕີຕິ ‘‘ອິທໍ ນາມໍ, ອິທໍ ຣູປ’’ນ຺ຕິ ວວຕ຺ຖເປຕິ. ລກ຺ຂຓນ຺ຕິ ນມນຣຸປ຺ປນລກ຺ຂຓໍ, ອນິຈ຺ຈາທິລກ຺ຂຓໍ ວາ. ໂສຕາປຕ຺ຕິມຄ຺ຄສ຺ສ ທິຏ຺ຐິວິຈິກິຈ຺ຉາປຫານໍ ສນ຺ຘາຍ ວຸຕ຺ຕໍ ‘‘ສມູຫຕານິ…ເປ… ສລ຺ລ’’ນ຺ຕິ. ອພ຺ພຸຬ຺ຫນ຺ຕິ ອາວຫິຍິຕ຺ຖາຕິ ອພ຺ພຸຬ຺ຫໍ, ອຸທ຺ຘໍ ວຫິຍິຕ຺ຖາຕິ ອຕ຺ໂຖ. ອາຕ຺ຍູປສຄ຺ໂຄ ຫິ ອຸທ຺ຘງ຺ຄມຕ຺ໂຖ. ຕໍທິວສເມວາຕິ ຕສ຺ມິໍ ໂສຕາປຕ຺ຕິມຄ຺ຄສ຺ສ ປຏິລຠນທິວເສເຍວ. ຠຸມ຺ມຕ຺ເຖ ເຈຕໍ ອຸປໂຍຄວຈນໍ. ຕທເຫວາຕິ ຕສ຺ມິໍ ໂສຕາປນ຺ນຠວນອຫນິ ເອວ.

ຕສ຺ສາຕິ ອຎ຺ຎຕິຕ຺ຖິຍປຸພ຺ພສ຺ສ. ປາຬິຍໍ ປຕ຺ຕສ຺ສ ອນາຄຕຕ຺ຕາ ວຸຕ຺ຕໍ ‘‘ປຕ຺ຕມ຺ປິ ຕເຖວາ’’ຕິ. ຍຖາ ອຸປຊ຺ຌາຍມູລກໍ ຈີວຣໍ ປຣິເຍສິຕພ຺ພໍ, ປຕ຺ຕມ຺ປິ ຕເຖວາຕິ ອຕ຺ໂຖ. ອິທນ຺ຕິ ປຕ຺ຕຈີວຣໍ. ອິມສ຺ສາຕິ ອຎ຺ຎຕິຕ຺ຖິຍປຸພ຺ພສ຺ສ. ອຎ຺ເຎຕິ ອຸປຊ຺ຌາຍໂຕ ອປເຣ. ເຕຫິປີຕິ ອຎ຺ເຎຫິປິ. ວິໂລມາຕິ ປຏິໂລມາ. ອາຍຕ຺ຕນ຺ຕິ ອຘີນໍ. ອາຍຕ຺ຕຊີວິກຕ຺ຕາຕິ ອຎ຺ຎຕິຕ຺ຖິຍປຸພ຺ພສ຺ສ ອຸປຊ຺ຌາເຍນ ອາຍຕ຺ຕຊີວິກຕ຺ຕາ. ຕສ຺ສາຕິ ອຸປຊ຺ຌາຍສ຺ສ. ວຈນກໂຣຕິ ວຈນໍ ກໂຣ. ວາກ຺ເຍປິ ສມາເສປິ ວຈນສທ຺ທສ຺ສ ‘‘ຕສ຺ສາ’’ຕິ ປທເມວ ອເປກ຺ຂຕ຺ຕາ ‘‘ວຈນກໂຣ’’ຕິ ສມາໂສ ໂຫຕິ. ເອເສວ ນໂຍ ‘‘ອຸປຊ຺ຌາເຍນ ອາຍຕ຺ຕຊີວກຕ຺ຕາ’’ຕິ ເອຕ຺ຖາປິ. ເຕນາຕິ ວຈນກຣເຫຕຸນາ.

ອຄ຺ຄິປຣິຈຣຓກາຕິ =໐໖ ອຄ຺ຄິປູຊກາ. ອິມິນາ ອຄ຺ຄິໍ ປຣິຈຣນ຺ຕີຕິ ອຄ຺ຄິກາຕິ ວຈນຕ຺ຖໍ ທສ຺ເສຕິ. ຕາປສາຕິ ຊຏາຘຣາ. ເຕ ຫິ ຍສ຺ມາ ຊຏາ ຈ ຕໂປ ຈ ເອເຕສມຕ຺ຖິ, ຕສ຺ມາ ‘‘ຊຏິລາ’’ຕິ ຈ ‘‘ຕາປສາ’’ຕິ ຈ ວຸຈ຺ຈນ຺ຕິ. ເອເຕຕິ ຊຏິລກາ. ‘‘ກິຣິຍໍ ນ ປຏິພາຫນ຺ຕີ’’ຕິ ວຸຕ຺ຕວຈນສ຺ສ ອຕ຺ຖໍ ທສ຺ເສນ຺ໂຕ ອາຫ ‘‘ອຕ຺ຖິ ກມ຺ມໍ, ອຕ຺ຖິ ກມ຺ມວິປາໂກ’’ຕິ. ເອຕເທວ ປພ຺ພຊ຺ຊນ຺ຕິ ເອຕໍ ເອວ ຕາປສປພ຺ພຊ຺ຊໍ. ເອເຕສນ຺ຕິ ຊຏິລານໍ. ສາສເນຕິ ພຸທ຺ຘສ຺ສ ສາສເນ. ເຕສນ຺ຕິ ຎາຕີນໍ, ອິມໍ ປຣິຫາຣນ຺ຕິ ສມ຺ພນ຺ໂຘ. ເຕຕິ ຎາຕໂຍ. ຫີຕິ ສຈ຺ຈໍ, ຍສ຺ມາ ວາ. ຎາຕິເສຏ຺ຐສ຺ສາຕິ ຎາຕິເຍວ ເສຏ຺ໂຐ, ຎາຕີນໍ ວາຕິ ຎາຕິເສຏ຺ໂຐ, ຕສ຺ສ, ພຸທ຺ຘສ຺ສາຕິ ສມ຺ພນ຺ໂຘ.