໑. ລສຸຓວຄ຺ໂຄ

໑. ປຐມສິກ຺ຂາປທ-ອຕ຺ຖໂຍຊນາ

ຕິໍສການນ຺ຕຣໍ ຕິໍສການໍ ອນນ຺ຕເຣ ກາເລ ຉສຏ຺ຐິສຕສງ຺ຄຫາ ຉອຸຕ຺ຕຣສຏ຺ຐິອຘິກສເຕຫິ ສິກ຺ຂາປເທຫິ ສງ຺ຄຫິຕາ ເຍ ຘມ຺ມາ ສງ຺ຄີຕິກາເຣຫິ ສງ຺ຄີຕາ, ທານິ ອິມສ຺ມິໍ ກາເລ ເຕສມ຺ປິ ຘມ຺ມານໍ ອຍໍ ວຓ຺ຓນາ ໂຫຕີຕິ ໂຍຊນາ.

໗໙໓. ຕຕ຺ຖາຕິ ເຕສຸ ຉສຏ຺ຐິສຕສງ຺ຄເຫສຸ ສິກ຺ຂາປເທສຸ, ປຐມສິກ຺ຂາປເທຕິ ສມ຺ພນ຺ໂຘ. ‘‘ທ຺ເວ ຕໂຍ’’ຕິ ເອຕ຺ຖ ວາສທ຺ໂທ ລຸຕ຺ຕນິທ຺ທິຏ຺ໂຐຕິ ອາຫ ‘‘ທ຺ເວ ວາ ຕໂຍ ວາ’’ຕິ. ໂຜຏລເກຕິ ກນ຺ເທ, ມິຎ຺ເຊ ວາ. ເອຕນ຺ຕິ ‘‘ຄຓ຺ຑິເກ’’ຕິ ເອຕໍ ນາມໍ. ‘‘ປມາຓ’’ນ຺ຕິອິມິນາ ມຕ຺ຕສທ຺ໂທ ປມາຓຕ຺ໂຖວ, ນ ອປ຺ປຕ຺ໂຖ, ນາປິ ອວຘາຣຓຕ຺ໂຖຕິ ທສ຺ເສຕິ. ລສຸຓນ຺ຕິ ເສຕວຓ຺ຓມູລໍ ມຫາກນ຺ທໍ. ມຫາກນ຺ໂທ ຫິ ພ຺ຍຎ຺ຊນສມ຺ປາກາທີສຸ ອາມຄນ຺ຘານໍ ອຠິຠວນຕ຺ຕາ ລສີຍຕິ ກນ຺ຕີຍຕີຕິ ລສຸຓນ຺ຕິ ວຸຈ຺ຈຕິ.

ສຸວຓ຺ຓຫໍສໂຍນິນ຺ຕິ ສຸວຓ຺ຓມເຍນ ປຕ຺ເຕນ ຍຸຕ຺ຕໍ ຫໍສໂຍນິໍ. ຊາຕິສ຺ສໂຣຕິ ຊາຕິໍ ຠວໍ ສຣຕິ ຊານາຕີຕິ ຊາຕິສ຺ສໂຣ. ອຖາຕິ ຊາຕິສ຺ສຣສ຺ສ ນິປ຺ຜນ຺ນຕ຺ຕາ. ນິປ຺ຜນ຺ນຕ຺ໂຖ ຫິ ອຖສທ຺ໂທ. ປຸພ຺ພສິເນເຫນາຕິ ປຸພ຺ເພ ມນຸສ຺ສຠເວ ຠາວິເຕນ ສິເນເຫນ. ຕາສນ຺ຕິ ປຊາປຕິຍາ ຈ ຕິສ຺ສນ຺ນໍ ຘີຕຣານຎ຺ຈ. ຕໍ ປນາຕິ ປຕ຺ຕໍ ປນ.

໗໙໕. ມຄເຘສູຕິ ມຄຘຣຏ຺ເຐ ຐິເຕສຸ ຊນປເທສຸ. ຫີຕິ ສຈ຺ຈໍ, ຍສ຺ມາ ວາ. ອິຘາຕິ ‘‘ລສຸຓໍ ຂາເທຍ຺ຍາ’’ຕິປເທ. ຕມ຺ປີຕິ ມາຄຘກມ຺ປິ. ຄຓ຺ຑິກລສຸຓເມວາຕິ ຄຓ຺ໂຑ ໂຜໂຏ ເອຕສ຺ສຕ຺ຖີຕິ ຄຓ຺ຑິກໍ. ຄຓ຺ຑສທ຺ໂທ ຫິ ໂຜຏປຣິຍາໂຍ, ພຫຸຕ຺ເຖ ອິກປຈ຺ຈໂຍ. ພຫຸຄຓ຺ຑິກລສຸຓນ຺ຕິ ຫິ ວຸຕ຺ຕໍ ໂຫຕິ. ຄຓ຺ຑສທ຺ໂທ ຫິ ໂຜເຏ ຈ ກໂປເລ ຈາຕິ ທ຺ວີສຸ ອຕ຺ເຖສຸ ວຕ຺ຕຕິ, ອິຘ ປນ ໂຜເຏ ວຕ຺ຕຕີຕິ ທຏ຺ຐພ຺ພໍ. ໂປຕ຺ຖເກສຸ ປນ ໂອຏ຺ຐເຊນ ຈຕຸຕ຺ຖກ຺ຂເຣນ ປາໂຐ ອຕ຺ຖິ, ໂສ ວີມໍສິຕ຺ວາ ຄເຫຕພ຺ໂພ. ພຫູສຸ ຫິ ປຸພ຺ພໂປຕ຺ຖເກສຸ ກຓ຺ຐໂຊ ຕຕິຍກ຺ຂໂຣ ຈ ໂອຏ຺ຐໂຊ ຈຕຸຕ຺ຖກ຺ຂໂຣ ຈາຕິ ທ຺ເວ ອກ຺ຂຣາ ອຎ຺ຎມຎ຺ຎໍ ປຣິວຕ຺ຕິຕ຺ວາ ຕິຏ຺ຐນ຺ຕິ. ນ ເອກທ຺ວິຕິມິຎ຺ຊກນ຺ຕິ ເອກມິຎ຺ໂຊ ປລຓ຺ຑຸໂກ ນ ໂຫຕິ, ທ຺ວິມິຎ຺ໂຊ ຠຎ຺ຊນໂກ ນ ໂຫຕິ, ຕິມິຎ຺ໂຊ ຫຣິຕໂກ ນ ໂຫຕີຕິ ອຕ຺ໂຖ. ກຸຣຸນ຺ທິຍໍ ປນ ວຸຕ຺ຕນ຺ຕິ ສມ຺ພນ຺ໂຘ. ສງ຺ຂາທິຕ຺ວາຕິ ທນ຺ເຕຫິ ຈຸຓ຺ຓວິຈຸຓ຺ຓໍ ກຕ຺ວາ.

໗໙໗. ປລຓ຺ຑຸໂກຕິ ສຸກນ຺ທໂກ ເອໂກ ລສຸຓວິເສໂສ. ຠຎ຺ຊນກາທີນິ ໂລກສງ຺ເກໂຕປເທສໂຕ ທຏ຺ຐພ຺ພານິ. ຫີຕິ ສຈ຺ຈໍ. ຕສ຺ສາຕິ ຈາປລສຸຓສ຺ສ. ສຠາເວເນວາຕິ ສູປສມ຺ປາກາທິໍ ວິນາ ອຕ຺ຕໂນ ສຠາວໂຕ ເອວ. ຕນ຺ຕິ ມາຄຘກໍ, ປກ຺ຂິປິຕຸນ຺ຕິ ສມ຺ພນ຺ໂຘ. ຫີຕິ ສຈ຺ຈໍ. ຍຕ຺ຖ ກຕ຺ຖຈີຕິ ເຍສຸ ເກສຸຈີຕິ. ປຐມໍ.

໒. ທຸຕິຍສິກ຺ຂາປທໍ

໗໙໙. ທຸຕິເຍ ສໍທສ຺ສນໍ ພາຘຕິ ນິເສເຘຕິ ອສ຺ມິໍ ຐາເນຕິ ສມ຺ພາຘນ຺ຕິ ວຈນຕ຺ເຖນ ປຏິຈ຺ຉນ຺ໂນກາໂສ ສມ຺ພາໂຘ ນາມາຕິ ທສ຺ເສນ຺ໂຕ ອາຫ ‘‘ປຏິຈ຺ຉນ຺ໂນກາເສ’’ຕິ. ອຸໂຠ ອຸປກຈ຺ຉກາຕິ ທ຺ເວ ພາຫຸມູລາ. ເຕ ຫິ ອຸປຣິ ຍໍກິຎ຺ຈິ ວຕ຺ຖຸໍ ກຈຕິ ພນ຺ຘຕິ ເອຕ຺ຖາຕິ ອຸປກຈ຺ຉກາຕິ ວຸຈ຺ຈນ຺ຕິ. ມຸຕ຺ຕກຣຓນ຺ຕິ ປສ຺ສາວມຄ຺ໂຄ. ໂສ ຫິ ມຸຕ຺ຕໍ ກໂຣຕິ ອເນນາຕິ ມຸຕ຺ຕກຣຓນ຺ຕິ ວຸຈ຺ຈຕິ. ໂລໂມ ກຕ຺ຕີຍຕິ ຉິນ຺ທີຍຕິ ອິມາຍາຕິ ກຕ຺ຕຣິ, ຕາຍ ວາ, ສຸຏ຺ຐຸ ທຬ຺ຫໍ ໂລມໍ ຑໍສຕີຕິ ສຓ຺ຑາໂສ, ໂສເຍວ ສຓ຺ຑາສໂກ, ເຕນ ວາ, ຂຸຣຕິ ໂລມໍ ຉິນ຺ທຕີຕິ ຂຸໂຣ, ເຕນ ວາ ສໍຫຣາເປນ຺ຕິຍາຕິ ສມ຺ພນ຺ໂຘ. ສໍຫຣາເປນ຺ຕິຍາຕິ ອປເນນ຺ຕິຍາຕິ. ທຸຕິຍໍ.

໓. ຕຕິຍສິກ຺ຂາປທໍ

໘໐໓. ຕຕິເຍ ມຸຕ຺ຕກຣຓຕລຆາຕເນຕິ ມຸຕ຺ຕກຣຓສ຺ສ ຕລໍ ຫນນໍ ປຫຣຓໍ ມຸຕ຺ຕກຣຓຕລຆາຕນໍ, ຕສ຺ມິໍ ມຸຕ຺ຕກຣຓຕລຆາຕເນ ນິມິຕ຺ຕຠູເຕ. ຕາວ ມຫນ຺ຕນ຺ຕິ ອຕິວິຍ ມຫນ຺ຕໍ. ເກສເຣນາປີຕິ ກິຎ຺ຊກ຺ເຂນາປິ. ໂສ ຫິ ເກ ຊເລ ສຣຕິ ປວຕ຺ຕຕີຕິ ເກສໂຣຕິ ວຸຈ຺ຈຕິ.

໘໐໕. ຄຓ຺ຑໍ ວາຕິ ປີຬກໍ ວາ. ວຓໍ ວາຕິ ອຣຸໍ ວາຕິ. ຕຕິຍໍ.

໔. ຈຕຸຕ຺ຖສິກ຺ຂາປທໍ

໘໐໖. ຈຕຸຕ຺ເຖ ຣຎ຺ໂຎ ໂອໂຣຘາ ຣາໂຊໂຣຘາ, ປຸຣາເຓ ຣາໂຊໂຣຘາ ປຸຣາຓຣາໂຊໂຣຘາຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ປຸຣາເຓ’’ຕິອາທິ. ‘‘ຄິຫິຠາເວ’’ຕິ ອິມິນາ ປຸຣາເຓຕິ ເອຕ຺ຖ ຓປຈ຺ຈຍສ຺ສ ສຣູປໍ ທສ຺ເສຕິ. ຈິຣາຈິຣນ຺ຕິ ນິປາຕປຏິຣູປກໍ. ເຕນ ວຸຕ຺ຕໍ ‘‘ຈິເຣນ ຈິເຣນາ’’ຕິ. ‘‘ສກ຺ໂກຖາ’’ຕິ ອິມິນາ ກຖໍ ຕຸມ຺ເຫ ຣາຄຈິຕ຺ຕໍ ປຏິຫນິຕ຺ວາ ອຕ຺ຕານໍ ຘາເຣຖ ຘາເຣຕຸໍ ສກ຺ໂກຖາຕິ ອຕ຺ຖໍ ທສ຺ເສຕິ. ອນາໂຣຈິເຕປີຕິ ຠູຕໂຕ ອນາໂຣຈິເຕປິ.

໘໐໗. ຊຕຸນາຕິ ລາຂາຍ. ປຏ຺ຐທຓ຺ຑເກຕິ ປຏຸຠາເວນ ຐາຕິ ປວຕ຺ຕຕີຕິ ປຏ຺ໂຐ, ໂສເຍວ ທຓ຺ໂຑ ປຏ຺ຐທຓ຺ໂຑ, ຕສ຺ສ ປເວສນໍ ປຏ຺ຐທຓ຺ຑກໍ, ຕສ຺ມິໍ ນິມິຕ຺ຕຠູເຕ. ເອຕນ຺ຕິ ‘‘ຊຕຸມຏ຺ຐເກ’’ຕິ ເອຕໍ ວຈນນ຺ຕິ. ຈຕຸຕ຺ຖໍ.

໕. ປຎ຺ຈມສິກ຺ຂາປທໍ

໘໑໐. ປຎ຺ຈເມ ‘‘ອຕິຄມ຺ຠີຣ’’ນ຺ຕິປທໍ ກິຣິຍາວິເສສນນ຺ຕິ ອາຫ ‘‘ອຕິອນ຺ໂຕ ປເວເສຕ຺ວາ’’ຕິ. ‘‘ອຸທເກນ ໂຘວນໍ ກຸຣຸມານາ’’ຕິ ອິມິນາ ‘‘ອຸທກສຸທ຺ຘິກ’’ນ຺ຕິປທສ຺ສ ອຸທເກນ ສຸທ຺ຘິຍາ ກຣຓນ຺ຕິ ອຕ຺ຖໍ ທສ຺ເສຕິ.

໘໑໒. ທ຺ວງ຺ຄຸລປພ຺ພປຣມນ຺ຕິ ເອຕ຺ຖ ທ຺ເວ ອງ຺ຄຸລານິ ຈ ທ຺ເວ ປພ຺ພານິ ຈ ທ຺ວງ຺ຄຸລປພ຺ພໍ, ອຸຕ຺ຕຣປເທ ປຸພ຺ພປທໂລໂປ. ທ຺ວງ຺ຄຸລປພ຺ພໍ ປຣມໍ ປມາຓໍ ເອຕສ຺ສ ອຸທກສຸທ຺ຘິກສ຺ສາຕິ ທ຺ວງ຺ຄຸລປພ຺ພປຣມໍ. ວິຕ຺ຖາຣໂຕ ທ຺ວງ຺ຄຸລປຣມໍ, ຄມ຺ຠີຣໂຕ ທ຺ວິປພ຺ພປຣມນ຺ຕິ ວຸຕ຺ຕໍ ໂຫຕິ. ເຕນາຫ ‘‘ວິຕ຺ຖາຣໂຕ’’ຕິອາທິ. ອງ຺ຄຸລໍ ປເວເສນ຺ຕິຍາຕິ ສມ຺ພນ຺ໂຘ. ຫີຕິ ສຈ຺ຈໍ. ‘‘ຈຕຸນ຺ນໍ ວາ’’ຕິ ອິທໍ ອຸກ຺ກຏ຺ຐວເສນ ວຸຕ຺ຕໍ, ຕິຓ຺ຓມ຺ປິ ປພ຺ພໍ ນ ວຏ຺ຏຕິ, ຈຕຸນ຺ນໍ ປນ ປເຄວາຕິ ອຕ຺ໂຖຕິ. ປຎ຺ຈມໍ.

໖. ຉຏ຺ຐສິກ຺ຂາປທໍ

໘໑໕. ຉຏ຺ເຐ ຠຕ຺ຕສ຺ສ ວິສ຺ສຊ຺ຊນໍ ຠຕ຺ຕວິສ຺ສຄ຺ໂຄຕິ ວຸຕ຺ເຕ ຠຕ຺ຕກິຈ຺ຈນ຺ຕິ ທສ຺ເສນ຺ໂຕ ອາຫ ‘‘ຠຕ຺ຕກິຈ຺ຈ’’ນ຺ຕິ. ປານີຍສທ຺ເທນ ປານີຍຖາລກໍ ຄເຫຕພ຺ພໍ, ວິຘູປນສທ຺ເທນ ພີຊນີ ຄເຫຕພ຺ພາ, ອຸປສທ຺ໂທ ສມີປຕ຺ໂຖຕິ ສພ຺ພໍ ທສ຺ເສນ຺ໂຕ ອາຫ ‘‘ເອເກນ ຫຕ຺ເຖນາ’’ຕິອາທິ. ‘‘ອຈ຺ຈາວທຕີ’’ຕິປທສ຺ສ ອຕິກ຺ກມິຕ຺ວາ ວທນາກາຣໍ ທສ຺ເສຕິ ‘‘ປຸພ຺ເພປີ’’ຕິອາທິນາ.

໘໑໗. ‘‘ສຸທ຺ຘອຸທກໍ ວາ ໂຫຕູ’’ຕິອາທິນາ ‘‘ປານີເຍນາ’’ຕິ ວຈນໍ ອຸປລກ຺ຂຓໍ ນາມາຕິ ທສ຺ເສຕິ. ທຘິມຕ຺ຖູຕິ ທຘິມຓ຺ຑໍ ທຘິໂນ ສາໂຣ, ທຘິມ຺ຫິ ປສນ຺ໂນທກນ຺ຕິ ວຸຕ຺ຕໍ ໂຫຕິ. ຣໂສຕິ ມຈ຺ຉຣໂສ ມໍສຣໂສ. ‘‘ອນ຺ຕມໂສ ຈີວຣກຓ຺ໂຓປີ’’ຕິ ອິມິນາ ‘‘ວິຘູປເນນາ’’ຕິ ວຈນໍ ນິທສ຺ສນໍ ນາມາຕິ ທສ຺ເສຕິ.

໘໑໙. ເທຕີຕິ ສຍໍ ເທຕິ. ທາເປຕີຕິ ອຎ຺ເຎນ ທາເປຕິ. ອຸຠຍມ຺ປີຕິ ປານີຍວິຘູປນທ຺ວຍມ຺ປີຕິ. ຉຏ຺ຐໍ.

໗. ສຕ຺ຕມສິກ຺ຂາປທໍ

໘໒໒. ສຕ຺ຕເມ ‘‘ປໂຍຄທຸກ຺ກຏໍ ນາມາ’’ຕິ ອິມິນາ ເຫຏ຺ຐາ ວຸຕ຺ເຕສຸ ອຏ຺ຐສຸ ທຸກ຺ກເຏສຸ ປຸພ຺ພປໂຍຄທຸກ຺ກຏໍ ທສ຺ເສຕິ. ນ ເກວລໍ ປຸພ຺ພປໂຍຄທຸກ຺ກຏໍ ເອຕ຺ຕກເມວ, ອຖ ໂຂ ອຎ຺ຎມ຺ປິ ພຫຸ ໂຫຕີຕິ ທສ຺ເສນ຺ໂຕ ອາຫ ‘‘ຕສ຺ມາ’’ຕິອາທິ. ສງ຺ຆຏ຺ຏເນສຸປີຕິ ວິໂລຬເນສຸປິ. ທນ຺ເຕຫິ ສງ຺ຂາທຕີຕິ ທນ຺ເຕຫິ ຈຸຓ຺ຓວິຈຸຓ຺ຓໍ ກໂຣຕິ. ເອຕ຺ຖາຕິ ອິມສ຺ມິໍ ສິກ຺ຂາປເທ, ອຎ຺ຎາຍ ຠິກ຺ຂຸນິຍາ ກາຣາເປຕ຺ວາຕິ ສມ຺ພນ຺ໂຘ. ‘‘ອຎ຺ຎາຍາ’’ຕິປທໍ ‘‘ວິຎ຺ຎາເປຕ຺ວາ’’ຕິ ປເທ ກາຣິຕກມ຺ມໍ. ມາຕຣມ຺ປີຕິ ເອຕ຺ຖ ປິສທ຺ໂທ ອຎ຺ຎໍ ວິຎ຺ຎາເປຕ຺ວາ ຠຸຎ຺ຊນ຺ຕິຍາ ປເຄວາຕິ ທສ຺ເສຕິ. ຕາຍ ວາຕິ ວິຎ຺ຎາປິຕຠິກ຺ຂຸນິຍາ ວາ. ຕນ຺ຕິ ອາມກຘຎ຺ຎໍ. ຕນ຺ຕິ ມຫາປຈ຺ຈຣິຍໍ ວຸຕ຺ຕວຈນໍ. ປຸພ຺ພາປຣວິຣຸທ຺ຘນ຺ຕິ ປຸພ຺ພາປຣໂຕ ວິຣຸທ຺ຘໍ. ‘‘ອຎ຺ຎາຍ…ເປ… ທຸກ຺ກຏເມວາ’’ຕິ ປຸພ຺ພວຈເນ ທຸກ຺ກຏເມວ ວຸຕ຺ຕໍ, ປຸນ ‘‘ອຎ຺ຎາຍ…ເປ… ທຸກ຺ກຏ’’ນ຺ຕິ ຈ ປຈ຺ຉິມວຈເນ ປາຈິຕ຺ຕິຍຎ຺ຈ ທຸກ຺ກຏຎ຺ຈ ວຸຕ຺ຕໍ, ຕສ຺ມາ ປຸພ຺ພາປຣວິຣຸທ຺ຘນ຺ຕິ ວຸຕ຺ຕໍ ໂຫຕິ. ຫີຕິ ສຈ຺ຈໍ, ຍສ຺ມາ ວາ.

໘໒໓. ລພ຺ຠມານໍ ອາມກຘຎ຺ຎນ຺ຕິ ສມ຺ພນ຺ໂຘ. ອຎ຺ຎໍ ວາ ຍໍກິຎ຺ຈີຕິ ມຸຄ຺ຄມາສາທີຫິ ວາ ລາພຸກຸມ຺ຠຓ຺ຑາທີຫິ ວາ ອຎ຺ຎໍ ຍໍກິຎ຺ຈິ ຕິລາທິໍ ວາຕິ. ສຕ຺ຕມໍ.

໘. ອຏ຺ຐມສິກ຺ຂາປທໍ

໘໒໔. ອຏ຺ຐເມ ນິພ຺ພິຏ຺ຐຣາຊຠໂຏຕິ ເອຕ຺ຖ ອຸຕ຺ຕຣປທສ຺ສ ຉຏ຺ຐີສມາສຎ຺ຈ ປຸພ຺ພປເທນ ພາຫິຣຕ຺ຖສມາສຎ຺ຈ ທສ຺ເສນ຺ໂຕ ອາຫ ‘‘ນິພ຺ພິຏ຺ໂຐ’’ຕິອາທິ. ຕຕ຺ຖ ‘‘ຣຎ຺ໂຎ ຠຕີ’’ຕິ ອິມິນາ ຣຎ຺ໂຎ ຠໂຏ ຣາຊຠໂຏຕິ ຉຏ຺ຐີສມາສໍ ທສ຺ເສຕິ, ‘‘ເອເຕນາ’’ຕິ ອິມິນາ ພາຫິຣຕ຺ຖສມາສໍ. ນິພ຺ພິຏ຺ໂຐຕິ ນິວິຏ຺ໂຐ ປຕິຏ຺ຐາປິໂຕຕິ ອຕ຺ໂຖ. ເກຓີຕິ ຣຎ຺ໂຎ ທາຕພ຺ພສ຺ສ ອາຍສ຺ເສຕມຘິວຈນໍ. ເອເຕນາຕິ ພ຺ຣາຫ຺ມເຓນ. ຕໂຕຕິ ຐານນ຺ຕຣໂຕ. ຠຏສງ຺ຂາຕາຍ ເກຓິຍາ ປຖຕ຺ຕາ ກາຣຓຕ຺ຕາ ຐານນ຺ຕຣໍ ຠຏປຖນ຺ຕິ ອາຫ ‘‘ຕໍເຍວ ຐານນ຺ຕຣ’’ນ຺ຕິ.

໘໒໖. ຈຕ຺ຕາຣິປິ ວຕ຺ຖູນີຕິ ອຸຈ຺ຈາຣາທີນິ. ປາເຏກ຺ກນ຺ຕິ ປຏິວິສຸໍ ເອເກກເມວ. ອຸຈ຺ຈາຣໍ ວາຕິອາທີສຸ ວາສທ຺ເທນ ທນ຺ຕກຏ຺ຐາທໂຍປິ ຄເຫຕພ຺ພາຕິ ອາຫ ‘‘ທນ຺ຕກຏ຺ຐ…ເປ… ປາຈິຕ຺ຕິຍເມວາ’’ຕິ. ສພ຺ພຕ຺ຖາຕິ ສພ຺ເພສຸ ອຸຈ຺ຈາຣາທີສູຕິ. ອຏ຺ຐມໍ.

໙. ນວມສິກ຺ຂາປທໍ

໘໓໐. ນວເມ ໂຣປິມຫຣິຕຏ຺ຐາເນຕິ ໂຣປິມຏ຺ຐາເນ ຈ ຫຣິຕຏ຺ຐາເນ ຈ. ໂຣປິຍຕິ ອສ຺ມິນ຺ຕິ ໂຣປິຍໍ, ຕໍເຍວ ໂຣປິມໍ ຍກາຣສ຺ສ ມກາຣໍ ກຕ຺ວາ. ເອຕານີຕິ ອຸຈ຺ຈາຣາທີນິ. ສພ຺ເພສນ຺ຕິ ຠິກ຺ຂຸຠິກ຺ຂຸນີນໍ. ຍຕ຺ຖ ປນາຕິ ຍສ຺ມິໍ ເຂຕ຺ເຕຕິ. ນວມໍ.

໑໐. ທສມສິກ຺ຂາປທໍ

໘໓໕. ທສເມ ໂສຓ຺ຑາ ວາຕິ ສຸຣາໂສຓ຺ຑາ ວາ. ໂມໂຣຕິ ມຍູໂຣ. ສຸໂວຕິ ສຸໂກ. ມກ຺ກໂຏຕິ ວານໂຣ. ອາທິສທ຺ເທນ ສປ຺ປາທໂຍ ສງ຺ຄຓ຺ຫາຕິ, ມກ຺ກຏາທໂຍປິ ນຈ຺ຈນ຺ຕູຕິ ສມ຺ພນ຺ໂຘ. ອສໍຍຕຠິກ຺ຂູນນ຺ຕິ ວາຈສິກກມ຺ເມ ອສໍຍຕານໍ ຠິກ຺ຂູນໍ, ຘມ຺ມຠາຓກຄີຕໍ ວາ ໂຫຕູຕິ ໂຍຊນາ. ຕນ຺ຕິຍາ ຄຸເຓນ ພທ຺ຘາ ຕນ຺ຕິພທ຺ຘາ. ‘‘ຠິ’’ນ຺ຕິສງ຺ຂາໂຕ ຣາສທ຺ໂທ ເອຕິສ຺ສາຕິ ເຠຣິ. ກຸເຏນ ກຕາ ເຠຣິ ກຸຏເຠຣິ, ຕາຍ ວາທິຕໍ ກຸຏເຠຣິວາທິຕໍ, ຕໍ ວາ. ອຸທກເຠຣີຕິ ອຸທເກນ ປກ຺ຂິຕ຺ຕາ ເຠຣິ, ຕາຍ ວາທິຕມ຺ປິ ໂຫຕູຕິ ສມ຺ພນ຺ໂຘ.

໘໓໖. ເຕສໍເຍວາຕິ ເຍສໍ ນຈ຺ຈໍ ປສ຺ສຕິ, ເຕສໍເຍວ. ຍທິ ປນ ນຈ຺ຈຄີຕວາທິເຕ ວິສຸໍ ວິສຸໍ ປສ຺ສຕິ ສຸຓາຕິ, ປາເຏກ຺ກາ ອາປຕ຺ຕິໂຍຕິ ທສ຺ເສນ຺ໂຕ ອາຫ ‘‘ສເຈ ປນາ’’ຕິອາທິ. ອຎ຺ຎໂຕຕິ ອຎ຺ຎໂຕ ເທສໂຕ, ປສ຺ສຕີຕິ ສມ຺ພນ຺ໂຘ. ‘‘ໂອໂລເກຕ຺ວາ’’ຕິ ປເທ ອເປກ຺ຂິເຕ ອຸປໂຍຄຕ຺ເຖ ໂຕປຈ຺ຈໂຍ ໂຫຕິ. ອຎ຺ຎໍ ໂອໂລເກຕ຺ວາຕິ ຫິ ອຕ຺ໂຖ. ອຎ຺ຎໂຕ ວາເທນ຺ເຕ ປສ຺ສຕີຕິ ໂຍຊນາ. ຠິກ຺ຂຸນີ ນ ລຠຕີຕິ ສມ຺ພນ຺ໂຘ. ອຎ຺ເຎ ວຕ຺ຕຸມ຺ປີຕິ ສມ຺ພນ຺ໂຘ. ອຸປຫາຣນ຺ຕິ ປູຊໍ. ອຸປຏ຺ຐານນ຺ຕິ ປາຣິຈຣິຍໍ. ສພ຺ພຕ຺ຖາຕິ ສພ຺ເພສຸ ສຍໍ ນຈ຺ຈາທີສຸ.

໘໓໗. ອນ຺ຕຣາຣາເມ ວາຕິ ອາຣາມສ຺ສ ອນ຺ຕເຣ ວາ. ພຫິອາຣາເມ ວາຕິ ອາຣາມສ຺ສ ພຫິ ວາ. ອຎ຺ເຎນ ວາຕິ ສລາກຠຕ຺ຕາທີຫິ ອຎ຺ເຎນ ວາ. ຕາທິເສນາຕິ ຍາທິໂສ ໂຈຣາທິອຸປທ຺ທໂວ, ຕາທິເສນາຕິ. ທສມໍ.

ລສຸຓວຄ຺ໂຄ ປຐໂມ.