໓. ນິສ຺ສຄ຺ຄິຍກຓ຺ຑໍ

໑. ປຐມນິສ຺ສຄ຺ຄິຍປາຈິຕ຺ຕິຍສິກ຺ຂາປທ-ອຕ຺ຖໂຍຊນາ

ຕິໍສ ນິສ຺ສຄ຺ຄິຍາ ເຍ ຘມ຺ມາ ຠິກ຺ຂຸນີນໍ ຠຄວຕາ ປກາສິຕາ, ເຕສໍ ຘມ຺ມານໍ ທານິ ອິມສ຺ມິໍ ກາເລ ອຍໍ ສໍວຓ຺ຓນາກ຺ກໂມ ຠວຕີຕິ ໂຍຊນາ.

໗໓໓. ປຐເມ ອາມຕ຺ຕິກາປຓນ຺ຕິ ເອຕ຺ຖ ອາມຕ຺ຕສທ຺ໂທ ຠາຊນປຣິຍາໂຍຕິ ອາຫ ‘‘ຠາຊນານີ’’ຕິ. ຠາຊນານິ ຫິ ອມນ຺ຕິ ປຣິຠຸຎ຺ຊິຕພ຺ພຠາວໍ ຄຈ຺ຉນ຺ຕີຕິ ‘‘ອມຕ຺ຕານີ’’ຕິ ວຸຈ຺ຈນ຺ຕິ. ອມຕ຺ຕານິ ວິກ຺ກິຓນ຺ຕີຕິ ‘‘ອາມຕ຺ຕິກາ’’ຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ຕານີ’’ຕິອາທິ. ເຕສນ຺ຕິ ອາມຕ຺ຕິການໍ. ຕໍ ວາຕິ ອາມຕ຺ຕິກາປຓໍ ວາ.

໗໓໔. ‘‘ສນ຺ນິຘິ’’ນ຺ຕິ ອິມິນາ ສໍນິປຸພ຺ໂພ ຈິສທ຺ໂທ ອຸຈິນນຕ຺ໂຖຕິ ທສ຺ເສຕິ. ຫິສທ຺ໂທ ວິເສສໂຊຕໂກ. ຕຕ຺ຖາຕິ ມຫາວິຠງ຺ເຄ. ອິຘາຕິ ຠິກ຺ຂຸນິວິຠງ຺ເຄ.

ອິທມ຺ປີຕິ ອິທໍ ສິກ຺ຂາປທມ຺ປິ. ປິສທ຺ໂທ ມຫາວິຠງ຺ຄສິກ຺ຂາປທໍ ອເປກ຺ຂຕີຕິ. ປຐມໍ.

໒. ທຸຕິຍນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໓໘. ທຸຕິເຍ ອຫຕໂຈຬານມ຺ປິ ເສທມລາທິກິລິນ຺ເນ ວິຣູປຕ຺ຕາ ‘‘ຊິຓ຺ຓໂຈຬາ’’ຕິ ວຸຕ຺ຕໍ. ‘‘ອປິ ອຍ຺ຍາຫີ’’ຕິອິມິນາ ‘‘ອປ ອຍ຺ຍາຫີ’’ຕິປທວິຠາຄໍ ນິວຕ຺ເຕຕິ.

໗໔໐. ສພ຺ພມ຺ປິ ເອຕໍ ຈີວຣນ຺ຕິ ໂຍຊນາ. ເອວໍ ປຏິລທ຺ຘນ຺ຕິ ເອວໍ ນິສ຺ສຊ຺ຊິຕ຺ວາ ລທ຺ຘໍ. ຍຖາທາເນເຍວາຕິ ຍຖາ ທາຍເກຫິ ທິນ຺ນໍ, ຕສ຺ມິໍ ທາເນເຍວ ອຸປເນຕພ຺ພໍ, ອກາລຈີວເຣເຍວ ປກ຺ຂິປິຕພ຺ພນ຺ຕິ ອຕ຺ໂຖຕິ. ທຸຕິຍໍ.

໓. ຕຕິຍນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໔໓. ຕຕິເຍ ຫນ຺ທສທ຺ໂທ ວວສ຺ສຄ຺ຄຕ຺ເຖ ນິປາໂຕຕິ ອາຫ ‘‘ຫນ຺ທາຕິ ຄຓ຺ຫາ’’ຕິ. ພຫູນິ ນິສ຺ສຄ຺ຄິຍານີຕິ ສມ຺ພນ຺ໂຘ. ສໍຫຣິຕ຺ວາຕິ ວິສຸໍ ວິສຸໍ ສງ຺ຆຣິຕ຺ວາຕິ. ຕຕິຍໍ.

໔. ຈຕຸຕ຺ຖນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໔໘. ຈຕຸຕ຺ເຖ ກິຓາຕິ ອເນນາຕິ ກຍນ຺ຕິ ວຈນຕ຺ເຖນ ມູລໍ ກຍໍ ນາມາຕິ ອາຫ ‘‘ມູເລນາ’’ຕິ. ສາຕິ ຖຸລ຺ລນນ຺ທາ, ອາຫ ກິຣາຕິ ສມ຺ພນ຺ໂຘ. ຎາຘາຕຸຍາ ອວໂພຘນຕ຺ຖໂຕ ອຎ຺ຎມ຺ປິ ຎາຘາຕຸຍາ ຍາຈນຕ຺ຖໍ ທສ຺ເສນ຺ໂຕ ອາຫ ‘‘ຍາຈິຕ຺ວາ ວາ’’ຕິ.

໗໕໒. ຍນ຺ຕິ ສພ຺ພິເຕລາທິ. ຕຎ຺ເຎວາຕິ ສພ຺ພິເຕລາທິເມວ. ຍມກນ຺ຕິ ສພ຺ພິໍ ສຫ ເຕເລນ ຍຸຄຬໍ ກຕ຺ວາ. ເວຊ຺ເຊນາຕິ ຠິສກ຺ເກນ. ໂສ ຫິ ອາຍຸພ຺ເພທສງ຺ຂາຕໍ ວິຊ຺ຊໍ ຊານາຕີຕິ ເວຊ຺ໂຊຕິ ຈ ໂຣຄຎ຺ຈ ຕສ຺ສ ນິທານຎ຺ຈ ເຠສຊ຺ຊຎ຺ຈ ວິທຕິ ຊານາຕີຕິປິ ເວຊ຺ໂຊຕິ ຈ ວຸຈ຺ຈຕິ. ຕໂຕຕິ ເວຊ຺ເຊນ ວຸຕ຺ຕກາຣຓາ. ກຫາປຓສ຺ສາຕິ ກຫາປເຓນ, ອາຠຕນ຺ຕິ ສມ຺ພນ຺ໂຘຕິ. ຈຕຸຕ຺ຖໍ.

໕. ປຎ຺ຈມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໕໓. ປຎ຺ຈເມ ສາຕິ ສິກ຺ຂມານາ. ອຍນ຺ຕິ ສິກ຺ຂມານາ. ອທ຺ຘາຕິ ເອກໍເສນ. ‘‘ເຈຕາເປຕ຺ວາ’’ຕິ ເອຕ຺ຖ ຈິຕິສທ຺ໂທ ຊານນຕ຺ໂຖຕິ ອາຫ ‘‘ຊານາເປຕ຺ວາ’’ຕິ. ປຎ຺ຈມໍ.

໖. ຉຏ຺ຐນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໕໘. ຉຏ຺ເຐ ຉນ຺ທໍ ອຸປ຺ປາເທຕ຺ວາ ຄຫິຕໍ ຉນ຺ທກນ຺ຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ຉນ຺ທກ’’ນ຺ຕິອາທິ. ຘມ຺ມກິຈ຺ຈນ຺ຕິ ປຸຎ຺ຎກຣຓີຍໍ. ຘມ຺ມສທ຺ໂທ ເຫຕ຺ຖ ປຸຎ຺ຎວາຈໂກ. ຍນ຺ຕິ ວຕ຺ຖຸໍ. ປເຣສນ຺ຕິ ອຕ຺ຕນາ ອຎ຺ເຎສໍ. ‘‘ເອຕ’’ນ຺ຕິ ‘‘ຉນ຺ທກ’’ນ຺ຕິ ເອຕໍ ນາມໍ. ‘‘ອຎ຺ຎສ຺ສຕ຺ຖາຍ ທິນ຺ເນນາ’’ຕິອິມິນາ ອຎ຺ຎສ຺ສ ອຕ຺ໂຖ ອຎ຺ຎທຕ຺ໂຖ, ທກາໂຣ ປທສນ຺ຘິກໂຣ, ຕທຕ຺ຖາຍ ທິນ຺ໂນ ອຎ຺ຎທຕ຺ຖິໂກຕິ ວຈນຕ຺ຖໍ ທສ຺ເສຕິ. ‘‘ອຎ຺ຎໍ ອຸທ຺ທິສິຕ຺ວາ ທິນ຺ເນນາ’’ຕິອິມິນາ ອຎ຺ຎໍ ອຸທ຺ທິສິຕ຺ວາ ທິນ຺ນໍ ອຎ຺ຎຸທ຺ທິສິກນ຺ຕິ ວຈນຕ຺ຖໍ ທສ຺ເສຕິ. ‘‘ສງ຺ຆສ຺ສ ປຣິຈ຺ຈຕ຺ເຕນາ’’ຕິ ອິມິນາ ສງ຺ຆສ຺ສ ປຣິຈ຺ຈຕ຺ໂຕ ສງ຺ຆິໂກຕິ ວຈນຕ຺ຖໍ ທສ຺ເສຕິ.

໗໖໒. ຍທຕ຺ຖາຍາຕິ ເຍສໍ ຈີວຣາທີນໍ ອຕ຺ຖາຍ. ຍສທ຺ເທນ ສມາສຠາວໂຕ ປຸພ຺ເພ ນິຄ຺ຄຫິຕາຄໂມ ໂຫຕິ. ຕນ຺ຕິ ຈີວຣາທິກໍ. ຕຸມ຺ເຫຫີຕິ ທາຍເກ ສນ຺ຘາຍ ວຸຕ຺ຕໍ. ອຸປທ຺ທເວສູຕິ ທຸພ຺ຠິກ຺ຂາທິອຸປສຄ຺ເຄສຸ. ຍໍ ວາ ຕໍ ວາຕິ ຈີວຣໍ ວາ ອຎ຺ເຎ ວາ ປິຓ຺ຑປາຕາທິເກຕິ ຍໍ ວາ ຕໍ ວາຕິ. ຉຏ຺ຐໍ.

໗. ສຕ຺ຕມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໖໔. ສຕ຺ຕເມ ສຎ຺ຎາຈິເກນາຕິ ເອຕ຺ຖ ສໍສທ຺ທສ຺ສ ສຍມຕ຺ເຖ ປວຕ຺ຕິຠາວໍ ທສ຺ເສຕຸໍ ວຸຕ຺ຕໍ ‘‘ສຍໍ ຍາຈິຕເກນາ’’ຕິ. ເອຕເທວາຕິ ‘‘ສຎ຺ຎາຈິເກນາ’’ຕິ ປທເມວ. ເອຕ຺ຖາຕິ ອິມສ຺ມິໍ ສິກ຺ຂາປເທຕິ. ສຕ຺ຕມໍ.

໘. ອຏ຺ຐມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໖໙. ອຏ຺ຐເມ ຄຓສ຺ສາຕິ ຠິກ຺ຂຸນິຄຓສ຺ສ. ອິມິນາ ‘‘ມຫາຊນິເກນາ’’ຕິ ເອຕ຺ຖ ຠິກ຺ຂຸນິຄໂຓວ ມຫາຊໂນຕິ ອຘິປ຺ເປໂຕຕິ ທີເປຕີຕິ. ອຏ຺ຐມໍ.

໙. ນວມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໗໔. ນວເມ ອິໂຕຕິ ອິມສ຺ມາ ອຏ຺ຐມສິກ຺ຂາປທໂຕ. ອຘິກຕຣນ຺ຕິ ອຕິເຣກຕຣນ຺ຕິ. ນວມໍ.

໑໐. ທສມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໗໘. ທສເມ ‘‘ວິນສ຺ສຕີ’’ຕິອິມິນາ ‘‘ອຸນ຺ທ຺ຣິຍຕີ’’ຕິ ເອຕ຺ຖ ອຸທິຘາຕຸຍາ ນສ຺ສນຕ຺ຖໍ ທສ຺ເສຕິ ຘາຕູນມເນກຕ຺ຖຕ຺ຕາ. ປຣິປຕຕີຕິ ປຣິຄລິຕ຺ວາ ປຕຕິ. ອິມິນາ ນສ຺ສນາກາຣໍ ທສ຺ເສຕິ. ເອຕ຺ຕກເມວາຕິ ເອຕໍ ປຣິມາຓໍ ທ຺ວິປທເມວາຕິ. ທສມໍ.

໑໑. ເອກາທສມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໘໔. ເອກາທສເມ ຄຣຸປາວຸຣຓໍ ນາມ ສີຕກາເລ ປາວຸຣຓວຕ຺ຖນ຺ຕິ ທສ຺ເສນ຺ໂຕ ອາຫ ‘‘ສີຕກາເລ ປາວຸຣຓ’’ນ຺ຕິ. ສີຕກາເລ ຫິ ມນຸສ຺ສາ ຖູລປາວຸຣຓໍ ປາຣຸປນ຺ຕິ. ‘‘ຈຕຸກ຺ກໍສປຣມ’’ນ຺ຕິ ເອຕ຺ຖ ກໍສສທ຺ໂທ ຠຸຎ຺ຊນປຕ຺ເຕ ຈ ສຸວຓ຺ຓາທິໂລຫວິເສເສ ຈ ຈຕຸກຫາປເຓ ຈາຕິ ຕີສຸ ອຕ຺ເຖສຸ ທິສ຺ສຕິ, ອິຘ ປນ ຈຕຸກຫາປເຓ ວຕ຺ຕຕີຕິ ທສ຺ເສນ຺ໂຕ ອາຫ ‘‘ກໍໂສ ນາມ ຈຕຸກ຺ກຫາປຓິໂກ ໂຫຕີ’’ຕິ. ຈຕຸກ຺ກໍສສງ຺ຂາຕໍ ປຣມໍ ອິມສ຺ສາຕິ ຈຕຸກ຺ກໍສປຣມໍ, ໂສຬສກຫາປຓຄ຺ຆນກໍ ປາວຸຣຓນ຺ຕິ ອຕ຺ໂຖຕິ. ເອກາທສມໍ.

໑໒. ທ຺ວາທສມນິສ຺ສຄ຺ຄິຍປາຈິຕ຺ຕິຍສິກ຺ຂາປທໍ

໗໘໙. ທ຺ວາທສເມ ລຫຸປາວຸຣຓໍ ນາມ ອຸຓ຺ຫກາເລ ປາວຸຣຓວຕ຺ຖນ຺ຕິ ທສ຺ເສນ຺ໂຕ ອາຫ ‘‘ອຸຓ຺ຫກາເລ ປາວຸຣຓ’’ນ຺ຕິ. ອຸຓ຺ຫກາເລ ຫິ ມນຸສ຺ສາ ສຸຂຸມປາວຸຣຓໍ ປາຣຸປນ຺ຕີຕິ. ທ຺ວາທສມໍ.

ນິສ຺ສຄ຺ຄິຍານໍ ຕິໍສຠາວໍ ທສ຺ເສນ຺ໂຕ ອາຫ ‘‘ມຫາວິຠງ຺ເຄ’’ຕິອາທິ. ຈີວຣວຄ຺ຄໂຕ ອປເນຕ຺ວາຕິ ສມ຺ພນ຺ໂຘ. ອຎ຺ຎທຕ຺ຖິການີຕິ ອຎ຺ຎທຕ຺ຖິກປເທນ ວຸຕ຺ຕານິ ສິກ຺ຂາປທານິ. ອິຕີຕິ ເອວໍ. ເອກໂຕປຎ຺ຎຕ຺ຕານີຕິ ເອກສ຺ເສວ ປຎ຺ຎຕ຺ຕານິ, ອຸຠໂຕປຎ຺ຎຕ຺ຕານີຕິ ອຸຠເຍສໍ ປຎ຺ຎຕ຺ຕານິ. ເອຕ຺ຖາຕິ ‘‘ອຸທ຺ທິຏ຺ຐາ ໂຂ’’ຕິອາທິວຈເນຕິ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ຠິກ຺ຂຸນິວິຠງ຺ເຄ

ຕິໍສກວຓ຺ຓນາຍ ໂຍຊນາ ສມຕ຺ຕາ.