໘. ສນ຺ນິຘິກາຣກສິກ຺ຂາປທໍ

໒໕໒. ອຏ຺ຐເມ ອພ຺ຠນ຺ຕເຣ ຊາໂຕ ອພ຺ຠນ຺ຕໂຣ. ມຫາເຖໂຣຕິ ມຫນ຺ເຕຫິ ຖິຣຄຸເຓຫິ ຍຸຕ຺ໂຕ. ອິມິນາ ‘‘ເພລຏ຺ໂຐ’’ຕິ ສຎ຺ຎານາມສ຺ສ ສຎ຺ຎິນາມິໍ ທສ຺ເສຕິ. ປຘານຆເຣຕິ ສມຖວິປສ຺ສນານໍ ປທຫນຏ຺ຐານຆຣສງ຺ຂາເຕ ເອກສ຺ມິໍ ອາວາເສ. ສຸກ຺ຂກຸຣນ຺ຕິ ເອຕ຺ຖ ໂສສນກຸຣຕ຺ຕາ ນ ສຸກ຺ຂກຸຣໍ ໂຫຕິ, ເກວລໍ ປນ ອສູປພ຺ຍຎ຺ຊນຕ຺ຕາຕິ ອາຫ ‘‘ອສູປພ຺ຍຎ຺ຊນໍ ໂອທນ’’ນ຺ຕິ. ໂສສນກຸຣມ຺ປິ ຍຸຕ຺ຕເມວ. ວກ຺ຂຕິ ຫິ ‘‘ຕໍ ປິຓ຺ຑປາຕໍ ອຸທເກນ ເຕເມຕ຺ວາ’’ຕິ. ‘‘ໂອທນ’’ນ຺ຕິອິມິນາ ກຸຣສທ຺ທສ຺ສ ໂອທນປຣິຍາຍຕໍ ທສ຺ເສຕິ. ໂອທນຎ຺ຫິ ກໂຣຕິ ອາຍຸວຓ຺ຓາທໂຍຕິ ‘‘ກຸຣ’’ນ຺ຕິ ວຸຈ຺ຈຕິ. ໂສຕິ ເພລຏ຺ຐສີໂສ. ຕຎ຺ຈ ໂຂຕິ ຕຎ຺ຈ ສຸກ຺ຂກຸຣໍ ອາຫຣຕີຕິ ສມ຺ພນ຺ໂຘ. ປຈ຺ຈຍຄິທ຺ຘຕາຍາຕິ ປິຓ຺ຑປາຕປຈ຺ຈເຍ ລຸທ຺ຘຕາຍ. ເຖໂຣ ຠຸຎ຺ຊຕີຕິ ສມ຺ພນ຺ໂຘ. ມນຸສ຺ສານໍ ເອກາຫາຣສ຺ສ ສຕ຺ຕາຫມຕ຺ຕຏ຺ຐິຕຕ຺ຕາ ‘‘ສຕ຺ຕາຫ’’ນ຺ຕິ ວຸຕ຺ຕໍ. ຕໂຕຕິ ຠຸຎ຺ຊນໂຕ ປຣນ຺ຕິ ສມ຺ພນ຺ໂຘ. ຈຕ຺ຕາຣິປີຕິ ເອຕ຺ຖ ປິສທ຺ເທນ ອຘິການິປິ ສຕ຺ຕາຫານິ ຄເຫຕພ຺ພານິ.

໒໕໓. ອິຕີຕິ ອິທໍ ຕຍໍ. ‘‘ສນ຺ນິຘິ ກາໂຣ ອສ຺ສາ’’ຕິ ສມາໂສ ວິເສສນປຣນິປາຕວເສນ ຄເຫຕພ຺ໂພ. ‘‘ສນ຺ນິຘິກິຣິຍນ຺ຕິ ອຕ຺ໂຖ’’ຕິ ອິມິນາ ກຣີຍຕີຕິ ກາໂຣຕິ ກມ຺ມຕ຺ຖໍ ທສ຺ເສຕິ. ເອກຣຕ຺ຕນ຺ຕິ ອນ຺ຕິມປຣິຈ຺ເຉທວເສນ ວຸຕ຺ຕໍ ຕທຘິການມ຺ປິ ອຘິປ຺ເປຕຕ຺ຕາ. ອສ຺ສາຕິ ‘‘ສນ຺ນິຘິກາຣກ’’ນ຺ຕິ ປທສ຺ສ.

ສນ຺ນິຘິກາຣກສ຺ສ ສຕ຺ຕາຫກາລິກສ຺ສ ນິສ຺ສຄ຺ຄິຍປາຈິຕ຺ຕິຍາປຕ຺ຕິຍາ ປຈ຺ຈຍຕ຺ຕາ ສນ຺ນິຘິກາຣກໍ ຍາມກາລິກໍ ຂາທນີຍໂຠຊນີຍໍ ອສມານມ຺ປິ ສຸທ຺ຘປາຈິຕ຺ຕິຍາປຕ຺ຕິຍາ ປຈ຺ຈໂຍ ໂຫຕີຕິ ອາຫ ‘‘ຍາມກາລິກໍ ວາ’’ຕິ. ປຏິຄ຺ຄຫເຓຕິ ປຏິຄ຺ຄຫເຓ ຈ ຄຫເຓ ຈ. ອຊ຺ໂຌຫຣິຕຸກາມຕາຍ ຫິ ປຏິຄ຺ຄຫເຓ ຈ ປຏິຄ຺ຄເຫຕ຺ວາ ຄຫເຓ ຈາຕິ ວຸຕ຺ຕໍ ໂຫຕິ. ຍໍ ປຕ຺ຕໍ ອງ຺ຄຸລິຍາ ຆໍສນ຺ຕສ຺ສ ເລຂາ ປຎ຺ຎາຍຕິ, ໂສ ປຕ຺ໂຕ ທຸທ຺ໂຘໂຕ ໂຫຕິ ສເຈຕິ ໂຍຊນາ ອຸຕ຺ຕຣວາກ຺ເຍ ຍໍສທ຺ທໍ ທິສ຺ວາ ປຸພ຺ພວາກ຺ເຍ ຕໍສທ຺ທສ຺ສ ຄມນີຍຕ຺ຕາ. ຄຓ຺ຐິກປຕ຺ຕສ຺ສາຕິ ພນ຺ຘນປຕ຺ຕສ຺ສ. ໂສຕິ ສ຺ເນໂຫ. ປຄ຺ຆຣຕິ ສນ຺ທິສ຺ສຕີຕິ ສມ຺ພນ຺ໂຘ. ຕາທິເສຕິ ທຸທ຺ໂຘເຕ, ຄຓ຺ຐິເກ ວາ. ຕຕ຺ຖາຕິ ໂຘວິຕປຕ຺ເຕ ອາສິຎ຺ຈິຕ຺ວາຕິ ສມ຺ພນ຺ໂຘ. ຫີຕິ ສຈ຺ຈໍ. ອພ຺ໂພຫາຣິກາຕິ ນ ໂວຫຣິຕພ຺ພາ, ໂວຫຣິຕຸໍ ນ ຍຸຕ຺ຕາຕິ ອຕ຺ໂຖ. ຍນ຺ຕິ ຂາທນີຍໂຠຊນີຍໍ ປຣິຈ຺ຈຊນ຺ຕີຕິ ສມ຺ພນ຺ໂຘ. ຫີຕິ ສຈ຺ຈໍ, ຍສ຺ມາ ວາ. ຕໂຕຕິ ອປຣິຈ຺ຈຕ຺ຕຂາທນີຍໂຠຊນີຍໂຕ ນີຫຣິຕ຺ວາຕິ ສມ຺ພນ຺ໂຘ.

ອກປ຺ປິຍມໍເສສູຕິ ນິທ຺ຘາຣຓສມຸທາໂຍ. ສຕິ ປຈ຺ຈເຍຕິ ປິປາສສງ຺ຂາເຕ ປຈ຺ຈເຍ ສຕິ. ອນຕິຣິຕ຺ຕກຕນ຺ຕິ ອຕິຣິຕ຺ເຕນ ອກຕໍ ສນ຺ນິຘິກາຣກໍ ຂາທນີຍໂຠຊນີຍນ຺ຕິ ໂຍຊນາ. ເອກເມວ ປາຈິຕ຺ຕິຍນ຺ຕິ ສມ຺ພນ຺ໂຘ. ວິກປ຺ປທ຺ວເຍຕິ ສາມິສນິຣາມິສສງ຺ຂາເຕ ວິກປ຺ປທ຺ວເຍ. ສພ຺ພວິກປ຺ເປສູຕິ ວິກາລສນ຺ນິຘິອກປ຺ປິຍມໍສຍາມກາລິກປຈ຺ຈຍສງ຺ຂາເຕສຸ ສພ຺ເພສຸ ວິກປ຺ເປສຸ.

໒໕໕. ອາມິສສໍສຏ຺ຐນ຺ຕິ ອາມິເສນ ສໍສຏ຺ຐໍ ສຕ຺ຕາຫກາລິກໍ ຍາວຊີວິກໍ.

໒໕໖. ຈຕຸພ຺ພິຘກາລິກສ຺ສ ສຣູປຎ຺ຈ ວຈນຕ຺ຖຎ຺ຈ ທສ຺ເສນ຺ໂຕ ອາຫ ‘‘ວິກາລໂຠຊນສິກ຺ຂາປເທ’’ຕິອາທິ. ຕຕ຺ຖ ນິທ຺ທິຏ຺ຐໍ ຂາທນີຍໂຠຊນີຍ’’ນ຺ຕິອິມິນາ ຍາວກາລິກສ຺ສ ສຣູປໍ ທສ຺ເສຕິ. ‘‘ຍາວ…ເປ… ກາລິກ’’ນ຺ຕິອິມິນາ ວຈນຕ຺ຖໍ ທສ຺ເສຕິ. ‘‘ສທ຺ຘິໍ…ເປ… ປານ’’ນ຺ຕິອິມິນາ ຍາມກາລິກສ຺ສ ສຣູປໍ ທສ຺ເສຕິ. ‘‘ຍາວ…ເປ… ກາລິກ’’ນ຺ຕິອິມິນາ ວຈນຕ຺ຖໍ ທສ຺ເສຕິ. ‘‘ສພ຺ພິອາທິ ປຎ຺ຈວິຘໍ ເຠສຊ຺ຊ’’ນ຺ຕິອິມິນາ ສຕ຺ຕາຫກາລິກສ຺ສ ສຣູປໍ ທສ຺ເສຕິ. ‘‘ສຕ຺ຕາຫໍ…ເປ… ກາລິກ’’ນ຺ຕິອິມິນາ ວຈນຕ຺ຖໍ ທສ຺ເສຕິ. ‘‘ຐເປຕ຺ວາ…ເປ… ສພ຺ພມ຺ປີ’’ຕິອິມິນາ ຍາວຊີວິກສ຺ສ ສຣູປໍ ທສ຺ເສຕິ. ‘‘ຍາວ…ເປ… ຊີວິກ’’ນ຺ຕິອິມິນາ ວຈນຕ຺ຖໍ ທສ຺ເສຕິ. ສພ຺ພວຈນຕ຺ໂຖ ລຫຸກມຕ຺ຕເມວ, ຄຣຸໂກ ປເນວໍ ເວທິຕພ຺ໂພ – ຍາວ ຍຕ຺ຕໂກ ມຊ຺ຌນ຺ຫິໂກ ກາໂລ ຍາວກາໂລ, ໂສ ອສ຺ສຕ຺ຖີ, ຕໍ ວາ ກາລໍ ຠຸຎ຺ຊິຕພ຺ພນ຺ຕິ ຍາວກາລິກໍ. ຍາໂມ ກາໂລ ຍາມກາໂລ, ໂສ ອສ຺ສຕ຺ຖິ, ຕໍ ວາ ກາລໍ ປຣິຠຸຎ຺ຊີຕພ຺ພນ຺ຕິ ຍາມກາລິກໍ. ສຕ຺ຕາໂຫ ກາໂລ ສຕ຺ຕາຫກາໂລ, ໂສ ອສ຺ສຕ຺ຖິ, ຕໍ ວາ ກາລໍ ນິທຫິຕ຺ວາ ປຣິຠຸຎ຺ຊິຕພ຺ພນ຺ຕິ ສຕ຺ຕາຫກາລິກໍ. ຍາວ ຍຕ຺ຕໂກ ຊີໂວ ຍາວຊີໂວ, ໂສ ອສ຺ສຕ຺ຖິ, ຍາວຊີວໍ ວາ ປຣິຫຣິຕ຺ວາ ປຣິຠຸຎ຺ຊິຕພ຺ພນ຺ຕິ ຍາວຊີວິກນ຺ຕິ.

ຕຕ຺ຖາຕິ ຈຕຸພ຺ພິເຘສຸ ກາລິເກສຸ. ສຕກ຺ຂຕ຺ຕຸນ຺ຕິ ອເນກວາຣໍ. ຍາວ ກາໂລ ນາຕິກ຺ກມຕິ, ຕາວ ຠຸຎ຺ຊນ຺ຕສ຺ສາຕິ ໂຍຊນາ. ອໂຫຣຕ຺ຕໍ ຠຸຎ຺ຊນ຺ຕສ຺ສາຕິ ສມ຺ພນ຺ໂຘຕິ. ອຏ຺ຐມໍ.