໑໑. ສຈ຺ຈວິຠງ຺ຄສຸຕ຺ຕວຓ຺ຓນາ

໓໗໑. ອາຈິກ຺ຂນາຕິ – ‘‘ອິທໍ ທຸກ຺ຂໍ ອຣິຍສຈ຺ຈໍ, ອຍໍ ທຸກ຺ຂນິໂຣຘຄາມິນີ ປຏິປທາ ອຣິຍສຈ຺ຈ’’ນ຺ຕິ ອາທິໂຕ ກຖນໍ. ເທສນາຕິ ຕສ຺ເສວ ອຕ຺ຖສ຺ສ ອຕິສຊ຺ຊນໍ ປໂພຘນໍ. ປຎ຺ຎາປນາຕິ ປກາເຣຫິ ຎາປນາ, ສາ ປນ ຍສ຺ມາ ອິຕ຺ຖມິທນ຺ຕິ ເວເນຍ຺ຍານໍ ປຈ຺ຈກ຺ຂໂຕ ທສ຺ສນາ, ເຕສໍ ວາ ສນ຺ຕາເນ ປຕິຏ຺ຐາປນາ ໂຫຕິ, ຕສ຺ມາ ອາຫ – ‘‘ທຸກ຺ຂສຈ຺ຈາທີນໍ ຐປນາ’’ຕິ. ປຏ຺ຐປນາຕິ ປຕິຏ຺ຐາປນາ. ຍສ຺ມາ ປຏ຺ຐປິຍມານສຠາວາ ເທສນາ ຠາຊນໍ ອຸປຄຈ຺ຉນ຺ຕີ ວິຍ ໂຫຕິ, ຕສ຺ມາ ວຸຕ຺ຕໍ – ‘‘ປຎ຺ຎາປນາ’’ຕິ, ຊານາປນາຕິ ອຕ຺ໂຖ. ວິວຏກຣຓາຕິ ເທສິຍມານສ຺ສ ອຕ຺ຖສ຺ສ ວິວຏຠາວກຣຓໍ. ວິຠາຄກິຣິຍາຕິ ຍຖາວຸຕ຺ຕສ຺ສ ອຕ຺ຖວິຠາຄສ຺ສ ວິຕ຺ຖາຣກຣຓໍ. ປາກຏຠາວກຣຓນ຺ຕິ ອຄມ຺ຠີຣຠາວາປາທນໍ. ອປໂຣ ນໂຍ – ຈຕຸສຈ຺ຈສຎ຺ຎິຕສ຺ສ ອຕ຺ຖສ຺ສ ປຈ຺ເຈກໍ ສຣູປໂຕ ທສ຺ສນວເສນ ອິທນ຺ຕິ ອາທິໂຕ ສິກ຺ຂາປນໍ ກຖນໍ ອາຈິກ຺ຂນາ, ເອວໍ ປຣສນ຺ຕາເນ ປໂພຘນວເສນ ປວຕ຺ຕາປນາ ເທສນາ, ເອວໍ ວິເນຍ຺ຍານໍ ຈິຕ຺ຕປຣິໂຕສຊນເນນ ເຕສໍ ພຸທ຺ຘິປຣິປາຈນໍ ‘‘ປຎ຺ຎາປນາ’’ຕິ ວຸຈ຺ຈຕິ. ເອວໍ ປຎ຺ຎາເປນ຺ຕີ ຈ ສາ ເທສິຍມານໍ ອຕ຺ຖໍ ເວເນຍ຺ຍສນ຺ຕາເນ ປກາຣໂຕ ຐເປຕິ ປຕິຏ຺ຐເປຕີຕິ ‘‘ປຏ຺ຐປນາ’’ຕິ ວຸຈ຺ຈຕິ. ປກາຣໂຕ ຐເປນ຺ຕີ ປນ ສໍຂິຕ຺ຕສ຺ສ ວິຕ຺ຖາຣໂຕ ປຏິວຸຕ຺ຕສ຺ສ ປຸນາຠິຘານໂຕ ‘‘ວິວຣຓາ’’ຕິ, ຕສ຺ເສວຕ຺ຖສ຺ສ ວິຠາຄກຣຓໂຕ ‘‘ວິຠຊນາ’’ຕິ, ວຸຕ຺ຕສ຺ສ ວິຕ຺ຖາເຣນາຠິຘານໂຕ ວິຠຕ຺ຕສ຺ສ ເຫຕຸທາຫຣຓທສ຺ສນໂຕ, ‘‘ອຸຕ຺ຕານີກມ຺ມ’’ນ຺ຕິ ວຸຈ຺ຈຕິ. ເຕນາຫ – ‘‘ປາກຏຠາວກຣຓ’’ນ຺ຕິ, ເຫຕູປມາວເສນຕ຺ຖສ຺ສ ປາກຏຠາວກຣຓໂຕຕິ ອຕ຺ໂຖ.

ອນຸຄ຺ຄາຫກາຕິ ອນຸຄ຺ຄຓ຺ຫນກາມາ. ສ຺ວາຍມນຸຄ຺ຄໂຫ ສງ຺ຄຫວຕ຺ຖຸວເສນ ປາກໂຏ ໂຫຕີຕິ ອາຫ ‘‘ອາມິສສງ຺ຄເຫນາ’’ຕິອາທິ. ຊເນຕາ ຊເນຕ຺ຕີຕິ ອາຫ ‘‘ຊນິກາ ມາຕາ’’ຕິ. ວຸທ຺ຘິໍ ປຣິສໍ ອາປາເທຕີຕິ ອາປາເທຕາ. ເຕນາຫ ‘‘ໂປເສຕາ’’ຕິ. ອິທານິ ທ຺ວິນ຺ນໍ ມຫາເຖຣານໍ ຍຖາກ຺ກມໍ ສພ຺ຣຫ຺ມຈາຣີນໍ ຠຄວຕາ ວຸຕ຺ເຕຫິ ຊນິກໂປສິກມາຕຸຏ຺ຐານິເຍຫິ ສງ຺ຄາຫກຕໍ ວິຕ຺ຖາຣໂຕ ທສ຺ເສຕຸໍ, ‘‘ຊນິກມາຕາ ຫີ’’ຕິອາທິ ວຸຕ຺ຕໍ. ປຣໂຕໂຆເສນ ວິນາປິ ອຸປຣິມຄ຺ຄາຘິຄໂມ ໂຫຕີຕິ ‘‘ປຈ຺ຈຕ຺ຕປຸຣິສກາເຣນາ’’ຕິ ວຸຕ຺ຕໍ. ປຐມມຄ຺ໂຄ ເອວ ຫິ ສາວການໍ ເອກນ຺ຕໂຕ ໂຆສາເປກ຺ໂຂຕິ. ປຕ຺ເຕສຸປີຕິ ປິ-ສທ຺ເທນ ປເຄວ ອປ຺ປຕ຺ເຕສູຕິ ທສ຺ເສຕິ. ຠວສ຺ສ ອປ຺ປມຕ຺ຕກຕາ ນາມ ອິຕ຺ຕຣກາລຕາຍາຕິ ອາຫ ‘‘ອຈ຺ຉຣາສງ຺ຆາຕມຕ຺ຕມ຺ປີ’’ຕິ. ຊເນຕາຕິ ຊນໂກ, ເຖໂຣ ປນ ອຣິຍາຍ ຊນຍິຕາ. ອາປາເທຕາຕິ ວຑ຺ເຒຕາ ປຣິພ຺ຣູເຫຕາ. ປຸຣິມສ຺ມິໍ ສຈ຺ຈທ຺ວເຍ ສມ຺ມສນຄ຺ຄຫຓໍ ໂລກິຍຕ຺ຕາ ຕສ຺ສ, ອິຕຣສ຺ມິໍ ຕສ຺ສ ອຄ຺ຄຫຓໍ ໂລກຸຕ຺ຕຣຕ຺ຕາ.

ກາເມຫິ ນິກ຺ຂນ຺ໂຕ ສງ຺ກປ຺ໂປ ເນກ຺ຂມ຺ມສງ຺ກປ຺ໂປ. ສ຺ວາຍມສ຺ສ ຕໂຕ ນິກ຺ຂມນຕ຺ໂຖ ເຕສໍ ປຏິປກ຺ຂຠາວໂຕ ເຕຫິ ວິສໍສຄ຺ຄໂຕ ວິຣຊ຺ຊນໂຕ ສມຸຈ຺ຉິນ຺ທນໂຕ ສພ຺ພໂສ ວິວິຕ຺ຕຠາວໂຕ ຈ ໂຫຕີຕິ ທສ຺ເສຕຸໍ, ‘‘ກາມປຈ຺ຈນີກຏ຺ເຐນາ’’ຕິອາທິ ວຸຕ຺ຕໍ. ຕຕ຺ຖ ກາມປທຆາຕນ຺ຕິ ຍຖາ ກາໂມ ປທໍ ປຕິຏ຺ຐໍ ນ ລຠຕິ, ເອວໍ ຫນນໍ, ກາມສມຸຈ຺ເຉທນ຺ຕິ ອຕ຺ໂຖ. ກາເມຫິ ສພ຺ພໂສ ວິວິຕ຺ຕຕ຺ຕາ ກາມວິວິຕ຺ໂຕ, ອຣິຍມຄ຺ໂຄ, ຕສ຺ສ ອນ຺ໂຕ, ອຣິຍຜລໍ, ຕສ຺ມິໍ ກາມວິວິຕ຺ຕນ຺ເຕ. ເອເສວ ນໂຍຕິ ອິມິນາ ‘‘ພ຺ຍາປາທປຈ຺ຈນີກຏ຺ເຐນາ’’ຕິອາທິໂຍຊນໍ ອຕິທິສຕິ. ສພ຺ເພ ເຈເຕ ເນກ຺ຂມ຺ມສງ຺ກປ຺ປາທໂຍ ນານາຈິຕ຺ເຕສຸ ລພ຺ຠນ຺ຕີຕິ ໂຍຊນາ. ຍທິ ເອກຈິຕ຺ເຕ ລພ຺ຠນ຺ຕິ, ກຖໍ ຕິວິຘມິຈ຺ຉາສງ຺ກປ຺ປານໍ ສມຸຄ຺ຆາໂຕຕິ ອາຫ ‘‘ຕຕ຺ຣ ຫີ’’ຕິອາທິ. ນ ນານາ ລພ຺ຠຕີຕິ ອິມິນາ ຕິວິຘກິຈ຺ຈກາຣິຕໍ ສມ຺ມາສງ຺ກປ຺ປສ຺ສ ທສ຺ເສຕິ. ກິຈ຺ຈວເສນ ຫິ ຕສ຺ສ ນາມສ຺ສ ລາໂຠ. ສມ຺ມາວາຈາທີນມ຺ປິ ມຄ຺ຄກ຺ຂເຓ ເອກຈິຕ຺ເຕ ລພ຺ຠມານານມ຺ປິ ຈຕຸກິຈ຺ຈກາຣິຕາຍ ຈຕຸພ຺ພິຘນາມາທິຕາ ເວທິຕພ຺ພາ. ເສສໍ ສຸວິຎ຺ເຎຍ຺ຍເມວ.

ສຈ຺ຈວິຠງ຺ຄສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.