໗. ອນຸຣຸທ຺ຘສຸຕ຺ຕວຓ຺ຓນາ

໒໓໐. ອຸປສງ຺ກມິຕ຺ວາ ເອວມາຫໍສູຕິ ວຸຕ຺ຕໍ ອຸປສງ຺ກມນກາຣຓໍ ທສ຺ເສນ຺ໂຕ, ‘‘ຕສ຺ສ ອຸປາສກສ຺ສ ອຜາສຸກກາໂລ ອໂຫສີ’’ຕິ ອາຫ. ອວິຣາຘິຕນ຺ຕິ ອວິຣຊ຺ຌນກໍ. ຍທິ ວາ ເຕ ຘມ຺ມາ ນານຕ຺ຖາ, ຍທິ ວາ ເອກຕ຺ຖາ, ຍໍ ຕຕ຺ຖ ອວິຣຊ຺ຌນກໍ, ຕໍ ຕໍເຍວ ປຏິຠາຕູຕິ ໂຍຊນາ. ຌານເມວາຕິ ອປ຺ປມາຓຊ຺ຌານເມວ, ‘‘ເຈໂຕວິມຸຕ຺ຕີ’’ຕິ ປນ ວຸຕ຺ຕຕ຺ຕາ ຈິຕ຺ເຕກຄ຺ຄຕາເຍວ ເອວໍ ວຸຈ຺ຈຕີຕິ ອຸປາສກສ຺ສ ອຘິປ຺ປາໂຍ.

໒໓໑. ຍາວຕາ ມຊ຺ຌນ຺ຫິເກ ກາເລ ຉາຍາ ຜຣຕິ, ນິວາເຕ ປຓ຺ຓານິ ປຕນ຺ຕິ, ເອຕ຺ຕາວຕາ ‘‘ຣຸກ຺ຂມູລ’’ນ຺ຕິ ວຸຈ຺ຈຕີຕິ ເອວໍ ວຸຕ຺ຕໍ ເອກຣຸກ຺ຂມູລປ຺ປມາຓຏ຺ຐານໍ. ກສິຓນິມິຕ຺ເຕນ ໂອຕ຺ຖຣິຕ຺ວາຕິ ກສິຓາຣມ຺ມຓໍ ຌານໍ ສມາປຊ຺ຊນ຺ໂຕ ຕສ຺ມິໍ ກສິຓ…ເປ… ວິຫຣຕີຕິ ວຸຕ຺ໂຕ. ອາໂຠໂຄ ນຕ຺ຖິ ຌານກ຺ຂເຓ. ກາມໍ ສມາປຕ຺ຕິກ຺ຂເຓ ອາໂຠໂຄ ນຕ຺ຖິ ຕໂຕ ປນ ປຸພ຺ເພ ວາ ສິຍາ ໂສ ອາໂຠໂຄ, ຕມ຺ປິ ສນ຺ຘາຍ ມຫຄ຺ຄຕນ຺ຕິ ເກຈິ. ອິທານິ ຕາສໍ ເຈໂຕວິມຸຕ຺ຕີນໍ ສຕິປິ ເກນຈິ ວິເສເສນ ອເຠເທ ວິສຍາທິໂຕ ລພ຺ຠມານເຠທໍ ທສ຺ເສຕຸໍ, ‘‘ເອຕ຺ຖາ’’ຕິອາທິ ວຸຕ຺ຕໍ. ນິມິຕ຺ຕໍ ນ ວຑ຺ຒຕິ ວຑ຺ເຒຕພ຺ພສ຺ສ ນິມິຕ຺ຕສ຺ເສວ ອຠາວໂຕ. ປຖວີກສິຓາທີນໍ ວິຍ ອາກາສຠາວນາຍ ອຸຄ຺ຆາຏນໍ ນ ຊາຍຕິ. ຕານິ ຌານານີຕິ ພ຺ຣຫ຺ມວິຫາຣຊ຺ຌານານິ. ຈຸທ຺ທສວິເຘນ ປຣິທມນາຠາວໂຕ ອຠິຎ຺ຎານໍ ປາທການິ ນ ໂຫນ຺ຕິ. ນິມິຕ຺ຕຸຄ຺ຆາຏສ຺ເສວ ອຠາວໂຕ ອຣູປຊ຺ຌານານໍ ອນຘິຏ຺ຐານຕາຍ ນິໂຣຘສ຺ສ ປາທການິ ນ ໂຫນ຺ຕີຕິ. ກມ຺ມວຏ຺ຏຠາເວນ ກິເລສວຏ຺ຏວິປາກວຏ຺ຏານໍ ຕິຓ຺ຓໍ ວຏ຺ຏານໍ ປຈ຺ຈຍຠາໂວ ວຏ຺ຏປາທກຕາ. ອຸປປຊ຺ຊນວເສເນວ ຕໍ ຕໍ ຠວໍ ໂອກ຺ກມຕິ ເອເຕຫີຕິ ຠໂວກ຺ກມນານິ. ທຸຕິຍນຍສ຺ສ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ. ອຸຄ຺ຆາຏນສ຺ສ ລພ຺ຠນໂຕ ອຣູປຊ຺ຌາໂນປຣິ ສມຕິກ຺ກໂມ ໂຫຕີຕິ ອຍເມວ ວິເສໂສ. ເອວນ຺ຕິ ຍຖາວຸຕ຺ເຕນ ນິມິຕ຺ຕາວຑ຺ຒນນິມິຕ຺ຕວຑ຺ຒນາທິປ຺ປກາເຣນ. ນານຕ຺ຖາຕິ ນານາສຠາວາ. ເອວນ຺ຕິ ອປ຺ປມາຓມຫຄ຺ຄຕສທ຺ທວຈນີຍຕາຍ ນານາພ຺ຍຎ຺ຊນາ. ກາມຎ຺ເຈຕ຺ຖ ອປ຺ປມາຓສມາປຕ຺ຕິໂຕປິ ນີຫຣິຕ຺ວາ ວກ຺ຂມານຠວູປປຕ຺ຕິກາຣຓໍ ທສ຺ເສຕຸໍ ສກ຺ກາ, ອຏ຺ຐກຖາຍໍ ປນ ກສິຓຌານໂຕວ ນີຫຣິຕ຺ວາ ໂຍຊນາ ກຕາຕິ ຕຖາ ວຸຕ຺ຕໍ. ອຖ ວາ ມຫຄ຺ຄຕຄຫເຓເນຕ຺ຖ ອປ຺ປມາຓາຕິ ວຸຕ຺ຕພ຺ຣຫ຺ມວິຫາຣານມ຺ປິ ສງ຺ຄໂຫ ເວທິຕພ຺ໂພ ຕສ຺ສາ ສມຎ຺ຎາຍ ອຸຠເຍສມ຺ປິ ສາຘາຣຓຠາວໂຕ.

໒໓໒. ເອວໍ ວຸຕ຺ໂຕຕິ ອສຕິປິ ຕຖາຣູເປ ອາໂຠເຄ ‘‘ປຣິຕ຺ຕາຠາຕິ ຜຣິຕ຺ວາ ອຘິມຸຈ຺ຈິຕ຺ວາ ວິຫຣຕີ’’ຕິ ວຸຕ຺ໂຕ. ອປ຺ປມາຓໍ ກຕ຺ວາ ກສິຓໍ ວຑ຺ເຒນ຺ຕສ຺ສ ກສິຓວຑ຺ຒນວເສນ ພຫຸລີກາຣສມ຺ຠວໂຕ ສິຍາ ຌານສ຺ສ ພລວຕຣຕາ, ຕທຠາເວ ຈ ທຸພ຺ພລຕາ, ອາຈິຓ຺ຓວສິຕາຍ ປນ ປຈ຺ຈນີກຘມ຺ມານໍ ສມ຺ມາ ອປຣິໂສຘເນ ວຕ຺ຕພ຺ພເມວ ນຕ຺ຖີຕິ ປຎ຺ຈຫາກາເຣຫິ ຌານສ຺ສ ອປ຺ປຄຸຓຕໍ ທສ຺ເສນ຺ໂຕ, ‘‘ສຸປ຺ປມຕ຺ເຕ ວາ’’ຕິອາທິມາຫ. ຌານສ຺ສ ອປ຺ປານຸຠາວຕາຍ ເອວ ຕນ຺ນິມິຕ຺ຕາ ປຠາປິ ອປ຺ປຕຣາ ອປຣິສຸທ຺ຘາວ ໂຫຕີຕິ ອາຫ – ‘‘ວຓ຺ໂຓ…ເປ… ສໍກິລິຏ຺ໂຐ ຈາ’’ຕິ. ທຸຕິຍນໂຍ ວຸຕ຺ຕວິປຣິຍາເຍນ ເວທິຕພ຺ໂພ. ຕຕ຺ຖາປິ ກສິຓສ຺ສ ປຣິຕ຺ຕຠາເວນ ວຓ຺ຓສ຺ສ ປຣິຕ຺ຕຕາ, ປຣິຕ຺ຕາຣມ຺ມຓາຍ ອນຸຣູປຕາຍ ວາ ນິມິຕ຺ຕໍ ປຠາມຓ຺ຑລກມ຺ປິ ປຣິຕ຺ຕເມວ ສິຍາຕິ ອຘິປ຺ປາໂຍ. ວິປຸລປຣິກມ຺ມນ຺ຕິ ວິປຸລຠາເວນ ປຣິກມ຺ມໍ. ເສສໍ ຕຕິຍຈຕຸຕ຺ຖນເຍສຸ ວຕ຺ຕພ຺ພໍ ປຐມທຸຕິຍນເຍສຸ ວຸຕ຺ຕສທິສເມວ.

ວຓ຺ຓນານຕ຺ຕນ຺ຕິ ຍທິ ປີຕໍ ຍທິ ໂລຫິຕໍ ຍທິ ວາ ໂອທາຕນ຺ຕິ ສຣີຣວຓ຺ຓນານຕ຺ຕໍ. ອາຠານານຕ຺ຕນ຺ຕິ ປຣິຕ຺ຕວິປຸລຕາວເສນ ປຠາຍ ນານຕ຺ຕໍ. ອຈ຺ຈິນານຕ຺ຕນ຺ຕິ ເຕໂຊຘາຕຸສ຺ສ ທີຆາທິວເສນ ເວມຕ຺ຕຕາ. ອຠິນິວິສນ຺ຕີຕິ ອຠິຣຕິວເສນ ນິວິສນ຺ຕິ ນິສີທນ຺ຕິ ຕິຏ຺ຐນ຺ຕິ. ເຕນາຫ ‘‘ວສນ຺ຕີ’’ຕິ.

໒໓໔. ອາຠນ຺ຕິ ທິພ຺ພນ຺ຕີຕິ ອາຠາຕິ ອາຫ ‘‘ອາຠາສມ຺ປນ຺ນາ’’ຕິ. ຕທງ຺ເຄນາຕິ ວາ ຕສ຺ສາ ປຣິຕ຺ຕຕາຍ ອປ຺ປມາຓຕາຍ ຈ ອາຠາກາຣຓໍ, ຕໍ ປນ ອຕ຺ຖໂຕ ຠວູປປຕ຺ຕິກາຣຓເມວາຕິ ອາຫ – ‘‘ຕສ຺ສາ ຠວູປປຕ຺ຕິຍາ ອງ຺ເຄນາ’’ຕິ. ກາຍາລສິຍຠາໂວ ຕນ຺ທີອາທີນໍ ເຫຕຸຠູຕາ ກາຍສ຺ສ ວິຕ຺ຖາຍິຕຕາ.

໒໓໕. ປາຣມິໂຍຕິ ມຫາສາວກສໍວຕ຺ຕນິກາ ສາວກປາຣມິໂຍ ປູເຣນ຺ໂຕ. ພ຺ຣຫ຺ມໂລເກຕິ ພ຺ຣຫ຺ມຕ຺ຕຠາເວ, ພ຺ຣຫ຺ມໂລເກ ວາ ອຸປ຺ປຕ຺ຕິໍ ປຏິລຠິ, ວຸຕ຺ຕມ຺ປິ ເຈຕໍ ເຖຣຄາຖາສຸ. ອໂວກິຓ຺ຓນ຺ຕິ ອຎ຺ເຎຫິ ອສມ຺ມິສ຺ສນ຺ຕິ ອຕ຺ໂຖ. ປຸພ຺ເພ ສຎ຺ຈຣິຕນ຺ຕິ ອຕີຕຠເວສຸ ຊາຕິວເສນ ສຎ຺ຈຣຓໍ ມມ, ສຎ຺ຈຣິຕນ຺ຕິ ຕໍ ມມສ຺ສາຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວ.

ອນຸຣຸທ຺ຘສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.