໖. ຠູມິຊສຸຕ຺ຕວຓ຺ຓນາ

໒໒໓. ອາສຎ຺ເຈປິ ກຣິຕ຺ວາຕິ, ‘‘ອິມິນາຫໍ ພ຺ຣຫ຺ມຈຣິເຍນ ເທໂວ ວາ ຠເວຍ຺ຍໍ ເທວຎ຺ຎຕໂຣ ວາ, ທຸກ຺ຂໂຕ ວາ ມຸຈ຺ເຈຍ຺ຍ’’ນ຺ຕິ ປຕ຺ຖນໍ ກຕ຺ວາ ເຈປິ ຈຣນ຺ຕິ, ອຠພ຺ພາ ຜລສ຺ສ ອຘິຄມາຍ ຕຓ຺ຫາຍ ພ຺ຣຫ຺ມຈຣິຍສ຺ສ ວິທູສິຕຕ຺ຕາຕິ ອຘິປ຺ປາໂຍ. ອນາສຎ຺ເຈປິ ກຣິຕ຺ວາຕິ ວຸຕ຺ຕນເຍນ ປຕ຺ຖນໍ ອກຕ຺ວາ. ອຠພ຺ພາ ຜລສ຺ສ ອຘິຄມາຍ ອນິຍມິຕຠາວໂຕ. ປຓິຘານວເສນ ຫິ ປຸຎ຺ຎຜລໍ ນິຍຕໍ ນາມ ໂຫຕິ, ຕທຠາວໂຕ ກຕໍ ປຸຎ຺ຎໍ ນ ລຠຕີຕິ ອຘິປ຺ປາໂຍ. ຕຕິຍປກ຺ເຂ ອຸຠຍຏ຺ຐາເນຫິ ວຸຕ຺ຕໍ, ຈຕຸຕ຺ຖປກ຺ໂຂ ສມ຺ມາວຕາໂຣ ອິຕິ ຈຕຸໂກຏິໂກ ປຎ຺ໂຫ ຊາລວເສນ ອາຫໂຏ, ຕຕ຺ຖ ອາສາ ນາມ ປຕ຺ຖນາ, ມິຈ຺ຉາຄາຫສ຺ມິໍ ສຕິ ນ ວິປຈ຺ຈຕິ, ສມ຺ມາຄາຫສ຺ມິໍ ສຕິ ວິປຈ຺ຈຕິ, ອຸຠຍຖາປິ ອຸຠຍາເປກ຺ຂານາມ, ໂຍ ມິຈ຺ຉຕ຺ຕຘມ຺ເມ ປຸຣກ຺ຂຕ຺ວາ ພ຺ຣຫ຺ມຈຣິຍໍ ຈຣຕິ, ຕສ຺ສ ຍຖາຘິປ຺ປາຍຜລໍ ສມິຊ຺ຌຕີຕິ ນ ວຕ຺ຕພ຺ພໍ ອໂຍນິໂສ ພ຺ຣຫ຺ມຈຣິຍສ຺ສ ຈິຓ຺ຓຕ຺ຕາ; ໂຍ ປນ ສມ຺ມຕ຺ຕໍ ປຸຣກ຺ຂຕ຺ວາ ພ຺ຣຫ຺ມຈຣິຍໍ ຈຣຕິ, ຕສ຺ສ ຍຖາຘິປ຺ປາຍໍ ພ຺ຣຫ຺ມຈຣິຍຜລໍ ນ ສມິຊ຺ຌຕີຕິ ນ ວຕ຺ຕພ຺ພໍ ໂຍນິໂສ ພ຺ຣຫ຺ມຈຣິຍສ຺ສ ຈິຓ຺ຓຕ຺ຕາ. ເຕນ ວຸຕ຺ຕໍ – ‘‘ອາສຎ຺ເຈປິ ກຣິຕ຺ວາ ອໂຍນິໂສ ພ຺ຣຫ຺ມຈຣິຍໍ ຈຣນ຺ຕີ’’ຕິອາທິ. ເສສໍ ສຸວິຎ຺ເຎຍ຺ຍເມວ.

ຠູມິຊສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.