໘. ອານາປານສ຺ສຕິສຸຕ຺ຕວຓ຺ຓນາ

໑໔໔. ປຸພ຺ເພນາຕິ ນິສ຺ສກ຺ເກ ກຣຓວຈນໍ. ‘‘ອປຣໍ ວິເສສ’’ນ຺ຕິ ວຸຕ຺ຕຕ຺ຕາ ວິເສສວິສໂຍ ຈ ປຸພ຺ພສທ຺ໂທຕິ ອາຫ – ‘‘ສີລປຣິປູຣຓາທິໂຕ ປຸພ຺ພວິເສສໂຕ’’ຕິ.

໑໔໕. ອາຣທ຺ໂຘ ຍຖານຸສິຏ຺ຐໍ ປຏິປຕ຺ຕິຍາ ອາຣາຘິໂຕ. ຍທຕ຺ຖາຍ ສາສເນ ປພ຺ພຊ຺ຊາ, ວິເສສາປຕ຺ຕິ ຈ, ຕເທເວຕ຺ຖ ອປ຺ປຕ຺ຕນ຺ຕິ ອຘິປ຺ເປຕໍ, ຕໍ ຌານວິປສ຺ສນານິມິຕ຺ຕນ຺ຕິ ອາຫ – ‘‘ອປ຺ປຕ຺ຕສ຺ສ ອຣຫຕ຺ຕສ຺ສາ’’ຕິ. ໂກມຸທີຕິ ກຸມຸທວຕີ. ຕທາ ກິຣ ກຸມຸທານິ ສຸປຸປ຺ຜິຕານິ ໂຫນ຺ຕິ. ເຕນາຫ – ‘‘ກຸມຸທານໍ ອຕ຺ຖິຕາຍ ໂກມຸທີ’’ຕິ. ກຸມຸທານໍ ສມູໂຫ, ກຸມຸທານິ ເອວ ວາ ໂກມຸທາ, ເຕ ເອຕ຺ຖ ອຕ຺ຖີຕິ ໂກມຸທີຕິ. ປວາຣຓສງ຺ຄຫນ຺ຕິ ມຫາປວາຣຓໍ ອກຕ຺ວາ ອາຄມນີຍສງ຺ຄຫຓໍ.

ອາຣທ຺ຘວິປສ຺ສກສ຺ສາຕິ ອາຣຠິຕວິປສ຺ສນສ຺ສ, ວິປສ຺ສນໍ ວຑ຺ເຒຕ຺ວາ ອຸສ຺ສຸກ຺ກາເປຕ຺ວາ ວິປສ຺ສິສ຺ສ. ຠິກ຺ຂູ ອິຘ ໂອສຣິສ຺ສນ຺ຕິ ວຸຕ຺ຖວສ຺ສາ ປວາຣິຕປວາຣຓາ ‘‘ຠຄວນ຺ຕໍ ວນ຺ທິສ຺ສາມ, ກມ຺ມຏ຺ຐານໍ ໂສເຘສ຺ສາມ, ຍຖາລທ຺ຘໍ ວິເສສຎ຺ຈ ປເວທິສ຺ສາມາ’’ຕິ ອຊ຺ຌາສເຍນ. ອິເມ ຠິກ຺ຂູຕິ ອິເມ ຕຣຸຓສມຖວິປສ຺ສນາ ຠິກ຺ຂູ. ວິເສສໍ ນິພ຺ພຕ຺ເຕຕຸໍ ນ ສກ຺ຂິສ຺ສນ຺ຕິ ເສນາສນສປ຺ປາຍາທິອລາເຠນ. ອປລິພຸທ຺ຘນ຺ຕິ ອຎ຺ເຎຫິ ອນຸປທ຺ທຸຕໍ. ເສນາສນໍ ຄເຫຕຸໍ ນ ລຠນ຺ຕິ ອນ຺ໂຕວສ຺ສຠາວໂຕ. ເອກສ຺ສ ທິນ຺ໂນປິ ສພ຺ເພສໍ ທິນ຺ໂນເຍວ ໂຫຕິ, ຕສ຺ມາ ສຸຕສຸຕຏ຺ຐາເນເຍວ ເອກມາສໍ ວສິຕ຺ວາ ໂອສຣິໍສຸ.

໑໔໖. ອລນ຺ຕິ ຍຸຕ຺ຕໍ, ໂອປາຍິກນ຺ຕິ ອຕ຺ໂຖ, ‘‘ອລເມວ ນິພ຺ພິນ຺ທິຕຸ’’ນ຺ຕິອາທີສຸ (ທີ. ນິ. ໒.໒໗໒; ສໍ. ນິ. ໒.໑໒໔, ໑໒໘, ໑໓໔, ໑໔໓) ວິຍ. ປຸຏພທ຺ຘໍ ປຣິຫຣິຕ຺ວາ ອສິຕໍ ປຸໂຏສໍ ອ-ກາຣສ຺ສ ໂອ-ກາຣໍ ກຕ຺ວາ. ເຕນາຫ ‘‘ປາເຖຍ຺ຍ’’ນ຺ຕິ.

໑໔໗. ວິປສ຺ສນາ ກຖິຕາຕິ ອນິຈ຺ຈສຎ຺ຎາມຸເຂເນວ ວິປສ຺ສນາຠາວນາ ກຖິຕາ. ນ ຫິ ເກວລາຍ ອນິຈ຺ຈານຸປສ຺ສນາຍ ວິປສ຺ສນາກິຈ຺ຈໍ ສມິຊ຺ຌຕິ. ພຫູ ຠິກ຺ຂູ ເຕ ຈ ວິຕ຺ຖາຣຣຸຈິກາຕິ ອຘິປ຺ປາໂຍ. ເຕນາຫ ‘‘ຕສ຺ມາ’’ຕິອາທິ.

໑໔໙. ສພ຺ພຕ຺ຖາຕິ ສພ຺ພວາເຣສຸ. ‘‘ຕສ຺ມາ ຕິຫ, ຠິກ຺ຂເວ, ເວທນານຸປສ຺ສີ’’ຕິອາທີສຸປິ ປີຕິປຏິສໍເວທິຕາທິວເສເນວ ເວທນານຸປສ຺ສນາຍ ວຸຕ຺ຕຕ຺ຕາ, ‘‘ສຸຂເວທນໍ ສນ຺ຘາເຍຕໍ ວຸຕ຺ຕ’’ນ຺ຕິ ອາຫ. ສຕິປຏ຺ຐານຠາວນາມນສິກາຣຕາຍ ວຸຕ຺ຕໍ – ‘‘ສາຘຸກໍ ມນສິກາຣ’’ນ຺ຕິ. ສຎ຺ຎານາເມນ ປຎ຺ຎາ ວຸຕ຺ຕາ ເຕສໍ ປໂຍຄຕ຺ຕາ. ມນສິກາຣນາເມນ ເວທນາ ວຸຕ຺ຕາ, ຠາວນາຍ ປຣິຈິຕຕ຺ຕາ ອາຣມ຺ມຓສ຺ສ ມນສິກາຣນ຺ຕິ ກຕ຺ວາ. ວິຕກ຺ກວິຈາເຣ ຐເປຕ຺ວາຕິ ວຸຕ຺ຕໍ ວຈີສງ຺ຂາຣຕ຺ຕາ ເຕສໍ.

ເອວໍ ສນ຺ເຕປີຕິ ຍທິປິ ມນສິກາຣປຣິຍາປນ຺ນຕາຍ ‘‘ມນສິກາໂຣ’’ຕິ ວຸຕ຺ຕໍ, ເອວໍ ສນ຺ເຕ ເວທນານຸປສ຺ສນາຠາໂວ ນ ຍຸຊ຺ຊຕິ, ອສ຺ສາສປສ຺ສາສາ ຫິສ຺ສ ອາຣມ຺ມຓໍ. ວຕ຺ຖຸນ຺ຕິ ສຸຂາທີນໍ ເວທນານໍ ປວຕ຺ຕິຏ຺ຐານຠູຕໍ ວຕ຺ຖຸໍ ອາຣມ຺ມຓໍ ກຕ຺ວາ ເວທນາວ ເວທິຍຕິ, ເວທນາຍ ເອກນ຺ຕຠາວທສ຺ສເນນ ຕສ຺ສ ເວທນານຸປສ຺ສນາຠາໂວ ຍຸຊ຺ຊຕິ ເອວາຕິ ອິມມຕ຺ຖໍ ທສ຺ເສຕິ. ເອຕສ຺ສ ອນຸໂຍຄສ຺ສ.

ທ຺ວີຫາກາເຣຫີຕິ ເຍ ສນ຺ຘາຍ ວຸຕ຺ຕໍ, ເຕ ທສ຺ເສນ຺ໂຕ ‘‘ອາຣມ຺ມຓໂຕ ອສມ຺ໂມຫໂຕ ຈາ’’ຕິ ອາຫ. ສປ຺ປີຕິເກ ທ຺ເວ ຌາເນຕິ ປີຕິສຫຄຕານິ ປຐມທຸຕິຍຊ຺ຌານານິ ປຏິປາຏິຍາ ສມາປຊ຺ຊຕິ. ສມາປຕ຺ຕິກ຺ຂເຓຕິ ສມາປຊ຺ຊນກ຺ຂເຓ. ຌານປຏິລາເຠນາຕິ ຌາເນນ ສມງ຺ຄີຠາເວນ. ອາຣມ຺ມຓໂຕ ອາຣມ຺ມຓມຸເຂນ ຕທາຣມ຺ມຓຌານປຣິຍາປນ຺ນາ ປີຕິ ປຏິສໍວິທິຕາ ໂຫຕິ ອາຣມ຺ມຓສ຺ສ ປຏິສໍວິທິຕຕ຺ຕາ. ຍຖາ ນາມ ສປ຺ປປຣິເຍສນໍ ຈຣນ຺ເຕນ ຕສ຺ສ ອາສເຍ ປຏິສໍວິທິເຕ ໂສປິ ປຏິສໍວິທິໂຕວ ໂຫຕິ ມນ຺ຕາຄທພເລນ ຕສ຺ສ ຄຫຓສ຺ສ ສຸກຣຕ຺ຕາ; ເອວໍ ປີຕິຍາ ອາສຍຠູເຕ ອາຣມ຺ມເຓ ປຏິສໍວິທິເຕ ສາ ປີຕິ ປຏິສໍວິທິຕາ ເອວ ໂຫຕິ ສລກ຺ຂຓໂຕ ສາມຎ຺ຎລກ຺ຂຓໂຕ ຈ ຕສ຺ສາ ຄຫຓສ຺ສ ສຸກຣຕ຺ຕາ. ວິປສ຺ສນາກ຺ຂເຓຕິ ວິປສ຺ສນາປຎ຺ຎາປຸພ຺ພງ຺ຄມາຍ ມຄ຺ຄປຎ຺ຎາຍ ວິເສສໂຕ ທສ຺ສນກ຺ຂເຓ. ລກ຺ຂຓປຏິເວຘາຕິ ປີຕິຍາ ສລກ຺ຂຓສ຺ສ ສາມຎ຺ຎລກ຺ຂຓສ຺ສ ຈ ປຏິວິຊ຺ຌເນນ. ຍຎ຺ຫິ ປີຕິຍາ ວິເສສໂຕ ສາມຎ຺ຎໂຕ ຈ ລກ຺ຂຓໍ, ຕສ຺ມິໍ ວິທິເຕ ສາ ຍາຖາວໂຕ ວິທິຕາ ໂຫຕິ. ເຕນາຫ – ‘‘ອສມ຺ໂມຫໂຕ ປີຕິ ປຏິສໍວິທິຕາ ໂຫຕີ’’ຕິ.

ອິທານິ ຕມຕ຺ຖໍ ປາຬິຍາ ວິຠາເວຕຸໍ, ‘‘ວຸຕ຺ຕມ຺ປິ ເຈຕ’’ນ຺ຕິອາທິ ວຸຕ຺ຕໍ. ຕຕ຺ຖ ທີຆໍ ອສ຺ສາສວເສນາຕິ ທີຆສ຺ສ ອສ຺ສາສສ຺ສ ອາຣມ຺ມຓຠູຕສ຺ສ ວເສນ. ຈິຕ຺ຕສ຺ສ ເອກຄ຺ຄຕໍ ອວິກ຺ເຂປໍ ປຊານໂຕຕິ ຌານປຣິຍາປນ຺ນໍ ອວິກ຺ເຂໂປຕິ ລທ຺ຘນາມໍ ຈິຕ຺ຕສ຺ເສກຄ຺ຄຕໍ ຕໍສມ຺ປຍຸຕ຺ຕາຍ ປຎ຺ຎາຍ ປຊານໂຕ. ຍເຖວ ຫິ ອາຣມ຺ມຓມຸເຂນ ປີຕິ ປຏິສໍວິທິຕາ ໂຫຕິ, ເອວໍ ຕໍສມ຺ປຍຸຕ຺ຕຘມ຺ມາປິ ອາຣມ຺ມຓມຸເຂນ ປຏິສໍວິທິຕາ ເອວ ໂຫນ຺ຕິ. ສຕິ ອຸປຏ຺ຐິຕາ ໂຫຕີຕິ ທີຆໍ ອສ຺ສາສວເສນ ຌານສມ຺ປຍຸຕ຺ຕາ ສຕິ ຕສ຺ມິໍ ອາຣມ຺ມເຓ ອຸປຏ຺ຐິເຕ ອາຣມ຺ມຓມຸເຂນ ຌາເນປິ ອຸປຏ຺ຐິຕາ ເອວ ນາມ ໂຫຕິ. ຕາຍ ສຕິຍາຕິ ເອວໍ ອຸປຏ຺ຐິຕາຍ ຕາຍ ສຕິຍາ ຍຖາວຸຕ຺ເຕນ ເຕນ ຎາເຓນ ສຸປ຺ປຏິວິທິຕຕ຺ຕາ ອາຣມ຺ມຓສ຺ສ ຕສ຺ສ ວເສນ ຕທາຣມ຺ມຓາ ສາ ປີຕິ ປຏິສໍວິທິຕາ ໂຫຕິ. ອວເສສປທານິປີຕິ ‘‘ທີຆໍ ປສ຺ສາສວເສນາ’’ຕິອາທິປທານິປິ.

ເອວໍ ປຏິສມ຺ຠິທາມຄ຺ເຄ ວຸຕ຺ຕມຕ຺ຖໍ ອິມສ຺ມິໍ ສຸຕ຺ເຕ ໂຍເຊຕ຺ວາ ທສ຺ເສຕຸໍ, ‘‘ອິຕີ’’ຕິອາທິ ວຸຕ຺ຕໍ. ອິມິນາປິ ໂຍຄິນາ ມນສິກາເຣນ ປຏິລຠິຕພ຺ພໂຕ ປຏິລາໂຠຕິ ວຸຕ຺ຕໍ – ‘‘ຌານສມ຺ປຍຸຕ຺ເຕ ເວທນາສງ຺ຂາຕມນສິກາຣປຏິລາເຠນາ’’ຕິ.

ອສ຺ສາສປສ຺ສາສນິມິຕ຺ຕນ຺ຕິ ອສ຺ສາສປສ຺ສາເສ ນິສ຺ສາຍ ປຏິລທ຺ຘປຏິຠາຄນິມິຕ຺ຕໍ ອາຣມ຺ມຓໍ ກິຎ຺ຈາປິ ກໂຣຕິ; ສຕິຎ຺ຈ ສມ຺ປຊຎ຺ຎຎ຺ຈ ອຸປຏ຺ຐເປຕ຺ວາ ປວຕ຺ຕນໂຕ ອາຣມ຺ມຓມຸເຂນ ຕທາຣມ຺ມຓສ຺ສ ປຏິສໍວິທິຕຕ຺ຕາ ຈິຕ຺ເຕ ຈິຕ຺ຕານຸປສ຺ສີເຍວ ນາເມສ ໂຫຕິ. ເອວໍ ຈິຕ຺ຕານຸປສ຺ສນາປິ ສຕິສມ຺ປຊຎ຺ຎພເລເນວ ໂຫຕີຕິ ອາຫ ‘‘ນ ຫີ’’ຕິອາທິ. ປຊຫຕິ ເອເຕນ, ສຍໍ ວາ ປຊຫຕີຕິ ປຫານໍ, ຎາຓໍ. ໂທມນສ຺ສວເສນ ພ຺ຍາປາທນີວຣຓໍ ທສ຺ສິຕໍ ຕເທກຏ຺ຐຠາວໂຕ. ຕສ຺ສາຕິ ນີວຣຓປພ຺ພສ຺ສ. ປຫານກຣຎາຓນ຺ຕິ ປຊຫນຎາຓໍ. ວິປສ຺ສນາປຣມ຺ປຣນ຺ຕິ ປຏິປາຏິຍາ ວິປສ຺ສນມາຫ. ສມຖປຏິປນ຺ນນ຺ຕິ ມຊ຺ຌິມສມຖນິມິຕ຺ຕໍ ປຏິປນ຺ນຈິຕ຺ຕໍ ອຊ຺ຌຸເປກ຺ຂຕິ. ເອກໂຕ ອຸປຏ຺ຐານນ຺ຕິ ປຏິປກ຺ຂວິຄເມນ ເອກຠາເວນ ອຸປຏ຺ຐານໍ. ສຫຊາຕານໍ ອຊ຺ຌຸເປກ຺ຂນາ ໂຫຕີຕິ ປຄ຺ຄຫນິຄ຺ຄຫສມ຺ປຫໍສເນສຸ ພ຺ຍາປາຣສ຺ສ ອນາປຊ຺ຊິຕຕ຺ຕາ ອາຣມ຺ມຓານໍ ອຊ຺ຌຸເປກ຺ຂນາ, ‘‘ຍທຕ຺ຖິ ຍໍ ຠູຕໍ ຕໍ ປຊຫຕິ ອຸເປກ຺ຂໍ ປຏິລຠຕີ’’ຕິ, ເອວໍ ວຸຕ຺ຕອຊ຺ຌຸເປກ຺ຂນາ ປວຕ຺ຕາຕິ ປຏິປນ຺ນາ. ເກວລໍ ນີວຣຓາທິຘມ຺ເມຕິ ນີວຣຓາທິຘມ຺ເມ ເອວ ປຫີເນ ທິສ຺ວາ, ອຖ ໂຂ ເຕສໍ ປຊຫນຎາຓມ຺ປິ ຍາຖາວໂຕ ປຎ຺ຎາຍ ທິສ຺ວາ ອຊ຺ຌຸເປກ຺ຂິຕາ ໂຫຕິ. ວຸຕ຺ຕຎ຺ເຫຕໍ ຠຄວຕາ ‘‘ຘມ຺ມາປິ ໂຂ, ຠິກ຺ຂເວ, ປຫາຕພ຺ພາ, ປເຄວ ອຘມ຺ມາ’’ຕິ (ມ. ນິ. ໑.໒໔໐).

໑໕໐. ອນິຈ຺ຈາທິວເສນ ປວິຈິນຕີຕິ ອນິຈ຺ຈາທິປ຺ປກາເຣຫິ ວິຈິນຕິ ປສ຺ສຕິ. ນິຣາມິສາຕິ ກິເລສາມິສຣຫິຕາ. ກາຍິກເຈຕສິກທຣຖປຏິປ຺ປສ຺ສທ຺ຘິຍາຕິ ກາຍຈິຕ຺ຕານໍ ສາຘຸຠາວູປຄມເນນ ວິກ຺ຂມ຺ຠິຕຕ຺ຕາ. ສຫຊາຕຘມ຺ມານໍ ເອກສຠາເວນ ປວຕ຺ຕິຍາ ສຫຊາຕອຊ຺ຌຸເປກ຺ຂນາຍ ອຊ຺ຌຸເປກ຺ຂິຕາ ໂຫຕິ.

ຕສ຺ມິໍ ກາເຍ ປວຕ຺ຕາ ກາຍາຣມ຺ມຓາ ສຕິ, ປຸພ຺ພຠາຄິໂຍ ສຕິສມ຺ໂພຊ຺ຌງ຺ໂຄ. ເອສ ນໂຍ ເສເສສຸປິ. ໂສມນສ຺ສສຫຄຕຈິຕ຺ຕຸປ຺ປາທວເສນ ເຈຕໍ ໂອກ຺ກມນໍ ໂອລິຍນໍ ໂກສຊ຺ຊໍ, ຕໂຕ ອຕິວຕ຺ຕນໍ ອຕິຘາວນໍ ອຸທ຺ຘຈ຺ຈໍ, ຕທຸຠຍວິຘຸຣາ ໂພຊ຺ຌງ຺ຄຸເປກ຺ຂາຠູຕາ ອໂນສກ຺ກນອນຕິວຕ຺ຕນສງ຺ຂາຕາ ມຊ຺ຌຕ຺ຕາກາຣຕາ. ອິທານິ ຍເຖວ ຫີຕິອາທິນາ ຕເມວ ມຊ຺ຌຕ຺ຕາກາຣໍ ອຸປມາຍ ວິຠາເວຕິ. ຕຸທນໍ ວາ ປໂຕເທນ. ອາກຑ຺ຒນໍ ວາ ຣສ຺ມິນາ. ນຕ຺ຖິ ນ ກາຕພ຺ພໍ ອຕ຺ຖິ. ເອກຈິຕ຺ຕກ຺ຂຓິກາຕິ ເອເກກສ຺ມິໍ ຈິຕ຺ເຕ ວິປສ຺ສນາວເສນ ສຫ ອຸປ຺ປຊ຺ຊນກາ. ນານາຣສລກ຺ຂຓາຕິ ນານາກິຈ຺ຈາ ເຈວ ນານາສຠາວາ ຈ.

໑໕໒. ວຸຕ຺ຕຕ຺ຖາເນວ ສພ຺ພາສວສຸຕ຺ຕວຓ຺ຓນາຍໍ (ມ. ນິ. ອຏ຺ຐ. ໒໗) ອານາປານາຣມ຺ມຓາ ອປຣາປຣໍ ປວຕ຺ຕສຕິໂຍ ອາຣມ຺ມຓສີເສນ ຕທາຣມ຺ມຓາ ຘມ຺ມາ ຄຫິຕາ, ຕາ ປເນກສນ຺ຕາເນ ໂລກິຍຈິຕ຺ຕສມ຺ປຍຸຕ຺ຕາຕິ ໂລກິຍາ, ຕາ ວຑ຺ຒມານາ ໂລກິຍໍ ຈຕຸພ຺ພິຘມ຺ປິ ສຕິປຏ຺ຐານໍ ປຣິປູເຣນ຺ຕິ. ວິຊ຺ຊາວິມຸຕ຺ຕິຜລນິພ຺ພານນ຺ຕິ ວິມຸຕ຺ຕີນໍ ຜລຠູຕໍ ເຕຫິເຍວ ເວທິຕພ຺ພໍ ກິເລສນິພ຺ພານໍ, ອມຕມຫານິພ຺ພານເມວ ວິຊ຺ຊາວິມຸຕ຺ຕີນໍ ອຘິຄເມນ ອຘິຄນ຺ຕພ຺ພຕາຍ ຕຖາ ວຸຕ຺ຕໍ. ປຣິປູຣຓຎ຺ຈສ຺ສ ອາຣມ຺ມຓໍ ກຕ຺ວາ ອມຕສ຺ສານຸຠວນເມວ. ອິຘ ສຸຕ຺ເຕ ໂລກິຍາປິ ໂພຊ຺ຌງ຺ຄາ ກຖິຕາ ໂລກຸຕ຺ຕຣາປີຕິ ເອຕ຺ຕກໍ ຄເຫຕ຺ວາ, ‘‘ອິຕິ ໂລກິຍສ຺ສ ອາຄຕຏ຺ຐາເນ ໂລກິຍໍ ກຖິຕ’’ນ຺ຕິ ຈ ອຕ຺ຖວຓ຺ຓນາວເສນ ອຏ຺ຐກຖາຍໍ ກຖິຕໍ. ເຖໂຣຕິ ມຫາຘມ຺ມຣກ຺ຂິຕຕ຺ເຖໂຣ. ອຎ຺ຎຕ຺ຖ ເອວໍ ໂຫຕີຕິ ອຎ຺ຎສ຺ມິໍ ໂລກິຍໂລກຸຕ຺ຕຣຘມ຺ມານໍ ຕຕ຺ຖ ຕຕ຺ຖ ໂວມິສ຺ສກນເຍນ ອາຄຕສຸຕ຺ເຕ ເອວໍ ໂລກິຍໍ ອາຄຕໍ, ອິຘ ໂລກຸຕ຺ຕຣໍ ອາຄຕນ຺ຕິ ກເຖຕພ຺ພໍ ໂຫຕິ. ໂລກຸຕ຺ຕຣໍ ອຸປຣິ ອາຄຕນ຺ຕິ ວິຊ຺ຊາວິມຸຕ຺ຕິໍ ປຣິປູເຣນ຺ຕີຕິ ເອວໍ ໂລກຸຕ຺ຕຣໍ ອຸປຣິ ເທສນາຍໍ ອາຄຕໍ; ຕສ຺ມາ ໂລກິຍາ ເອວ ໂພຊ຺ຌງ຺ຄາ ວິຊ຺ຊາວິມຸຕ຺ຕິ ປຣິປູຣິກາ ກເຖຕພ຺ພາ ໂລກຸຕ຺ຕຣານໍ ໂພຊ຺ຌງ຺ຄານໍ ວິຊ຺ຊາຄຫເຓນ ຄຫິຕຕ຺ຕາ, ຕສ຺ມາ ເຖເຣນ ວຸຕ຺ໂຕເຍເວຕ຺ຖ ອຕ຺ໂຖ ຄເຫຕພ຺ໂພ. ເສສໍ ວຸຕ຺ຕນຍຕ຺ຕາ ສຸວິຎ຺ເຎຍ຺ຍເມວ.

ອານາປານສ຺ສຕິສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.