໓. ກິນ຺ຕິສຸຕ຺ຕວຓ຺ຓນາ

໓໔. ຠໂວຕິ ປຣິຕ຺ໂຕ. ອຠໂວຕິ ມຫນ຺ໂຕ. ວຸທ຺ຘິອຕ຺ໂຖ ຫິ ອຍໍ ອ-ກາໂຣ, ‘‘ສໍວຣາສໍວໂຣ, ຜລາຜລ’’ນ຺ຕິອາທີສຸ ວິຍ, ຕສ຺ມາ ຠວາຠວເຫຕູຕິ ຂຸທ຺ທກສ຺ສ ມຫນ຺ຕສ຺ສ ວາ ຠວສ຺ສ ເຫຕຸ, ຕໍ ປຈ຺ຈາສີສມາໂນຕິ ອຕ຺ໂຖ. ເຕນາຫ – ‘‘ຕສ຺ມິໍ ຕສ຺ມິໍ ຠເວ ສຸຂໍ ເວທິສ຺ສາມີ’’ຕິອາທິ.

໓໕. ໂລກຸຕ຺ຕຣໂພຘິປກ຺ຂິຍຘມ຺ເມ ອຸທ຺ທິສ຺ສ ປຸຖຸຊ຺ຊນານໍ ວິວາໂທ ສມ຺ຠວຕີຕິ ອາຫ – ‘‘ໂລກິຍໂລກຸຕ຺ຕຣາວ ກຖິຕາ’’ຕິ. ໂລກິຍາປິ ຫິ ໂພຘິປກ຺ຂິຍຘມ຺ມາ ໂລກຸຕ຺ຕຣຘມ຺ມາຘິຄມສ຺ສ ອາສນ຺ນກາຣຓຕ຺ຕາ ວິເສສກາຣຓນ຺ຕິ ຍາວ ອຎ຺ເຎຫິ ໂລກິຍຘມ຺ເມຫິ ອຠິວິສິຏ຺ໂຐຕິ ກຕ຺ວາ, ‘‘ອິເມສຸ ສຕ຺ຕຕິໍສໂພຘິປກ຺ຂິຍຘມ຺ເມສູ’’ຕິ ອວິເສເສນ ວຸຕ຺ຕໍ. ອຕ຺ຖໂຕ ນານໍ ໂຫຕີຕິ ອຕ຺ຖໂຕ ເຠໂທ ໂຫຕິ ໂພຘິປກ຺ຂິຍຘມ຺ມານໍ ສມຘິຄຕຕ຺ຕາ. ນ ຫິ ກາຍາທໂຍ ຠາເວຕພ຺ພາ, ສຕິເຍວ ປນ ຠາເວຕພ຺ພາຕິ. ພ຺ຍຎ຺ຊນໂຕ ນານໍ ເຠທໍ. ອິມິນາປິ ກາຣເຓນາຕິ ອິມາຍປິ ຍຸຕ຺ຕິຍາ. ອິທານິ ຕໍ ຍຸຕ຺ຕິໍ ທສ຺ເສນ຺ໂຕ – ‘‘ອຕ຺ຖຎ຺ຈ ພ຺ຍຎ຺ຊນຎ຺ຈາ’’ຕິອາທິມາຫ. ຕຕ຺ຖ ສມາເນຕ຺ວາຕິ ສຸຕ຺ຕນ຺ຕຣໂຕ ສມາເນຕ຺ວາ, ສຸຕ຺ຕນ຺ຕຣປເທຫິ ຈ ສມາເນຕ຺ວາ. ອຎ຺ຎຖາຕິ ອຎ຺ຎໂຕ, ຠູຕໂຕ ອປຄຕໍ ກຕ຺ວາຕິ ອຕ຺ໂຖ. ມິຈ຺ຉາ ໂຣປິຕຠາໂວຕິ ອຍາຖາວໂຕ ຐປິຕຠາໂວ. ອຕ຺ຖຎ຺ຈ ພ຺ຍຎ຺ຊນຎ຺ຈ ວິຎ຺ຎາປນກາຣຓເມວາຕິ ອວິປຣີຕຕ຺ຖສ຺ສ ສທ຺ທສ຺ສ ຈ ພຸຊ຺ຌນເຫຕຸຕາຍ.

໓໗. ອິຘ ຘມ຺ມວິນຍຏ຺ຐາເນ ສຕິເຍວ ສຕິປຏ຺ຐານນ຺ຕິ ຄຫິຕາ, ອຕ຺ຖໂຕ ສເມຕິ ນາມ ຍາຖາວໂຕ ອຕ຺ຖສ຺ສ ຄຫິຕຕ຺ຕາ. ອສຠາວນິຣຸຕ຺ຕິຠາວໂຕ ພ຺ຍຎ຺ຊນໂຕ ນານຕ຺ຕນ຺ຕິ ຕໍ ລິງ຺ຄເຠເທນ ວຈນເຠເທນ ຈ ທສ຺ເສນ຺ໂຕ, ‘‘ສຕິປຏ຺ຐາໂນຕິ ວາ ສຕິປຏ຺ຐານາຕິ ວາ ມິຈ຺ຉາ ໂຣເປຖາ’’ຕິ ອາຫ. ອປ຺ປມຕ຺ຕກນ຺ຕິ ອຓຸມຕ຺ຕໍ ສລ຺ລຫຸກໍ, ນ ຄຣຸຕຣໍ ອຘນິຕໍ ກຕ຺ວາ ວຕ຺ຕພ຺ພມ຺ປິ ຘນິຕໍ ໂຆສວນ຺ຕໍ ກຕ຺ວາ ໂຣປິເຕ ວຸຕ຺ຕໂທສາຠາວໂຕຕິ ເຕນາຫ – ‘‘ນິພ຺ພຸຕິໍ ປຕ຺ຕຸໍ ສກ຺ກາ ໂຫຕີ’’ຕິ.

ພ຺ຍຎ຺ຊນສ຺ສ ມິຈ຺ຉາໂຣປນໍ ນ ວິເສສນ຺ຕຣາຍກຣໍ ໂຫຕີຕິ ຎາປນຕ຺ຖໍ, ຈຕຸສຸ ມຄ຺ເຄສຸ ປຎ຺ຫໍ ກເຖຕ຺ວາວ ປຣິນິພ຺ພຸໂຕ. ສຸຕ຺ຕນ຺ຕພ຺ຍຎ຺ຊນໍ ສນ຺ຘາເຍຕໍ ວຸຕ຺ຕໍ – ‘‘ອປ຺ປມຕ຺ຕກໍ ໂຂ ປນາ’’ຕິ.

໓໘. ອຖ ຈຕຸຕ຺ຖວາເຣ ວິວາໂທ ກສ຺ມາ ຊາໂຕ? ຍາວຕາ ເນສໍ ວຈນໍ ອຕ຺ຖໂຕ ເຈວ ສເມຕິ ພ຺ຍຎ຺ຊນໂຕ ຈາຕິ ອຘິປ຺ປາໂຍ. ສຎ຺ຎາຍ ວິວາໂທຕິ ກິຎ຺ຈາປິ ສເມຕິ ອຕ຺ຖໂຕ ເຈວ ພ຺ຍຎ຺ຊນໂຕ ຈ, ສຎ຺ຎາ ປນ ເນສໍ ອວິສຸທ຺ຘາ, ຕາຍ ສຎ຺ຎາຍ ວເສນ ວິວາໂທ ຊາໂຕຕິ ທສ຺ເສນ຺ໂຕ ‘‘ອຫ’’ນ຺ຕິອາທິມາຫ. ອຫໍ ສຕິປຏ຺ຐານນ຺ຕິ ວທາມິ, ອຍໍ ສຕິປຏ຺ຐາໂນຕິ ວທຕີຕິ ເອວໍ ເຕສໍ ຎາຓໍ ໂຫຕີຕິ ອິມມຕ຺ຖໍ, ‘‘ເອເສວ ນໂຍ’’ຕິ ອິມິນາ ອຕິທິສຕິ.

໓໙. ນ ໂຈທນຕ຺ຖາຍ ເວຄາຍິຕພ຺ພນ຺ຕິ ສີຆໍ ສີຆໍ ນ ໂຈທນາ ກາຕພ຺ພາຕິ ອຕ຺ໂຖ. ຕສ຺ມາຕິ ຍສ຺ມາ ເອກຈ຺ໂຈ ໂກຘນຠາເວນ ເອວໍ ປຏິປ຺ຜຣິ, ຕສ຺ມາ. ອນາທານທິຏ຺ຐີຕິ ອາທິຍິຕ຺ວາ ອນຠິນິວິສນໂຕ ອນາທານທິຏ຺ຐີ ອທຬ຺ຫຄ຺ຄາຫີ. ປກ຺ຂິປນ຺ໂຕ ວິຍາຕິ ຄິລິຕ຺ວາ ປກ຺ຂິປນ຺ໂຕ ວິຍ.

ອຸປຆາໂຕຕິ ຈິຕ຺ຕປ຺ປຆາໂຕ ຜຣສຸປຆາໂຕ ວິຍ. ວຓຆຏ຺ຏິຕສ຺ສ ວິຍາຕິ ວເຓ ຆຏ຺ຏິຕສ຺ສ ວິຍ ທຸກ຺ຂຸປ຺ປຕ຺ຕິ ຈິຕ຺ຕທຸກ຺ຂຸປ຺ປຕ຺ຕິ. ທ຺ເວ ວາເຣ ວຕ຺ວາປິ ວິສຊ຺ເຊຕີຕິ ສຸປ຺ປຏິນິສ຺ສຄ຺ຄີ ເອວໍ ປເຄວ ໂຈທິຕມຕ຺ເຕ ວິສ຺ສຊ຺ເຊຕິ ເຈຕິ ອຘິປ຺ປາໂຍ. ກຖນວເສນ ຈ ກາຍຈິຕ຺ຕກິລມໂຖ. ເອວຣູໂປຕິ ສຫສາ ອວິສ຺ສຊ຺ເຊນ຺ເຕນ ໂຈທກສ຺ສ ວິເຫສາວາໂທ ຫຸຕ຺ວາປິ ອກ຺ໂກຘນາທິສຠາໂວ.

ອຸເປກ຺ຂາຕິ ສເກນ ກມ຺ເມນ ປຎ຺ຎາຍິສ຺ສຕີຕິ ຕສ຺ມິໍ ປຸຄ຺ຄເລ ອຊ຺ຌຸເປກ຺ຂຓາ. ອຸເປກ຺ຂໍ ອຕິມຎ຺ຎຕິ ນາມ ຕສ຺ສ ອນາຈາຣສ຺ສ ອນຊ຺ຌຸເປກ຺ຂຓໂຕ.

໔໐. ວຈນສຎ຺ຈາໂຣຕິ ເປສຸຎ຺ຎວເສນ ອຎ຺ຎຖາວຈນຸປສໍຫາໂຣ. ທິຏ຺ຐິປຬາໂສຕິ ຍຸຄຄ຺ຄາຫວເສນ ລທ຺ຘິ. ສາ ປນ ຈິຕ຺ຕສ຺ສ ອນາຣາຘນິຍຠາໂວ ສຕ຺ຖຸຈິຕ຺ຕສ຺ສ ອນາຣາຘກຠາໂວ. ກລໂຫຕິ ອຘິກຣຓຸປ຺ປາທວເສນ ປວຕ຺ໂຕ ວິຄ຺ຄໂຫ ຠຓ຺ຑນສ຺ສ ປຸພ຺ພຠາໂຄ.

ເຍນ ກາຣເຓນາຕິ ເຍນ ຘມ຺ເມນ ສຕ຺ຖຸສາສເນນ. ຕເມວ ຫິ ສນ຺ຘາຍ ວທຕິ – ‘‘ຘມ຺ໂມຕິ ສາຣຓີຍຘມ຺ໂມ ອຘິປ຺ເປໂຕ’’ຕິ. ເອຕ຺ຖາຕິ ‘‘ຘມ຺ມສ຺ສ ຈານຸຘມ຺ມ’’ນ຺ຕິ ເອຕ຺ຖ. ຘມ຺ໂມຕິ ສມ຺ພຸທ຺ຘສ຺ສ ຕສ຺ສ ຕຖາ ປວຕ຺ຕໍ ພ຺ຍາກຣຓໍ ຍຖາ ວິວາທາປນ຺ນາ ສຎ຺ຎຕ຺ຕິໍ ຄຈ຺ຉນ຺ຕິ. ເຕນາຫ – ‘‘ເຕສໍ ຠິກ຺ຂູນໍ ສຎ຺ຎຕ຺ຕິກຣຓ’’ນ຺ຕິ. ຕເທວ ພ຺ຍາກຣຓໍ ອນຸຘມ຺ໂມຕິ ຠິກ຺ຂຸນາ ວຸຈ຺ຈມາໂນ ອນຸປວຕ຺ໂຕ ຘມ຺ໂມ. ເຕນາຫ – ‘‘ຕເທວ ພ຺ຍາກໂຣຕິ ນາມາ’’ຕິ. ໂກຈີຕິ ໂຍ ໂກຈິ. ສຫຘມ຺ມິໂກ ສກາຣໂຓ. ອຎ຺ຎຕ຺ໂຖ ອຍໍ ກິໍ ສທ຺ໂທຕິ ອາຫ ‘‘ອຎ຺ໂຎ’’ຕິ. ອສ຺ສາຕິ ວຸຕ຺ຕນເຍນ ປຏິປນ຺ນຠິກ຺ຂຸໂນ, ຕສ຺ສ ປຏິປຕ຺ຕິ ນ ເກນຈິ ຄຣຫຓີຍາ ໂຫຕີຕິ ອຕ຺ໂຖ. ເສສໍ ສພ຺ພໍ ສຸວິຎ຺ເຎຍ຺ຍເມວ.

ກິນ຺ຕິສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.