໑໐. ຈູຬປຸຓ຺ຓມສຸຕ຺ຕວຓ຺ຓນາ

໙໑. ຕຸຓ຺ຫີຠູຕໍ ຕຸຓ຺ຫີຠູຕນ຺ຕິ ອາເມຑິຕວຈນໍ ພ຺ຍາປນິຈ຺ຉາວເສນ ວຸຕ຺ຕນ຺ຕິ ອາຫ – ‘‘ຍໍ ຍໍ ທິສ’’ນ຺ຕິອາທິ. ອນຸວິໂລເກຕ຺ວາຕິ ເອຕ຺ຖ ອນຸສທ຺ໂທປິ ພ຺ຍາປນິຈ຺ຉາຍເມວາຕິ ອນຸ ອນຸ ວິໂລເກຕ຺ວາຕິ ອຕ຺ໂຖ. ເຕເນວາຫ – ‘‘ຕໂຕ ຕໂຕ ວິໂລເກຕ຺ວາ’’ຕິ. ອສນ຺ໂຕ ນີໂຈ ປຸຣິໂສຕິ ອສປ຺ປຸຣິໂສຕິ ອາຫ – ‘‘ປາປປຸຣິໂສ ລາມກປຸຣິໂສ’’ຕິ. ໂສຕິ ອສປ຺ປຸຣິໂສ. ຕນ຺ຕິ ອສປ຺ປຸຣິສໍ ຊານິຕຸໍ ນ ສກ຺ໂກຕິ ອສປ຺ປຸຣິສຘມ຺ມານໍ ຍາຖາວໂຕ ອຊານນໂຕ. ປາປຘມ຺ມສມນ຺ນາຄໂຕຕິ ກາຍທຸຈ຺ຈຣິຕາທິອສນ຺ຕຸຏ຺ຐິຕາທິລາມກຘມ຺ມສມນ຺ນາຄໂຕ. ອສປ຺ປຸຣິເສ ຠຕ຺ຕິ ເອຕສ຺ສາຕິ ອສປ຺ປຸຣິສຠຕ຺ຕິ. ເຕນາຫ – ‘‘ອສປ຺ປຸຣິສເສວໂນ’’ຕິ. ອສປ຺ປຸຣິສຘມ຺ໂມ ອສປ຺ປຸຣິໂສ ອຸຕ຺ຕຣປທໂລເປນ, ເຕສໍ ຈິນ຺ຕນສີໂລຕິ ອສປ຺ປຸຣິສຈິນ຺ຕີ. ເຕນາຫ ‘‘ອສປ຺ປຸຣິສຈິນ຺ຕາຍ ຈິນ຺ຕໂກ’’ຕິ, ທຸຈ຺ຈິນ຺ຕິຕຈິນ຺ຕີຕິ ອຕ຺ໂຖ. ອສປ຺ປຸຣິສມນ຺ຕນນ຺ຕິ ອສາຘຸຊນວິຈາຣໍ ອສປ຺ປຸຣິສວີມໍສໍ. ອສປ຺ປຸຣິສວາຈນ຺ຕິ ຈຕຸພ຺ພິຘໍ ທຸພ຺ຠາສິຕໍ. ອສປ຺ປຸຣິສກມ຺ມໍ ນາມ ຕິວິຘມ຺ປິ ກາຍທຸຈ຺ຈຣິຕໍ. ອສປ຺ປຸຣິສທິຏ຺ຐິ ນາມ ວິເສສໂຕ ທສວຕ຺ຖຸກາ ມິຈ຺ຉາທິຏ຺ຐິ, ຕາຍ ສມນ຺ນາຄໂຕ ອສປ຺ປຸຣິສທິຏ຺ຐິຍາ ສມນ຺ນາຄໂຕ, ອສປ຺ປຸຣິສທານໍ ນາມ ອສກ຺ກຈ຺ຈທານາທິ. ສພ຺ໂພປາຍມຕ຺ໂຖ ປາຬິໂຕ ເອວ ວິຎ຺ຎາຍຕິ.

‘‘ປາຓໍ ຫນິສ຺ສາມີ’’ຕິອາທິກາ ເຈຕນາ ກາມໍ ປຣພ຺ຍາພາຘາຍປິ ໂຫຕິເຍວ, ຍຖາ ປນ ສາ ອຕ຺ຕໂນ ພລວຕຣທຸກ຺ຂຕ຺ຖາຍ ໂຫຕິ, ຕຖາ ນ ປຣສ຺ສາຕິ ອິມມຕ຺ຖໍ ທສ຺ເສຕຸໍ, ‘‘ອຕ຺ຕໂນ ທຸກ຺ຂຕ຺ຖາຍ ຈິນ຺ເຕຕິ’’ອິຈ຺ເຈວ ວຸຕ຺ໂຕ. ຍຖາ ອສຸໂກ ອສຸກນ຺ຕິອາທີຫິ ປາປໂກ ປາປວິປາເກກເທສໍ ພລວໍ ຄຣຸຕຣໍ ວາ ປຈ຺ຈນຸໂຠນ຺ໂຕປິ ຍຖາ ປໂຣ ປຈ຺ຈນຸໂຠຕິ, ນ ຕຖາ ສຍນ຺ຕິ ທສ຺ເສຕິ. ເຕນາຫ ‘‘ປຣພ຺ຍາພາຘາຍາ’’ຕິ. ຄເຫຕ຺ວາຕິ ປາປກິຣິຍາຍ ສຫາຍຠາເວນ ຄເຫຕ຺ວາ.

ອສກ຺ກຈ຺ຈນ຺ຕິ ອນາທຣໍ ກຕ຺ວາ. ເທຍ຺ຍຘມ຺ມສ຺ສ ອສກ຺ກຣຓໍ ອປ຺ປສນ຺ນາກາໂຣ, ປຸຄ຺ຄລສ຺ສ ອສກ຺ກຣຓໍ ອຄຣຸກຣຓນ຺ຕິ ອິມມຕ຺ຖໍ ທສ຺ເສນ຺ໂຕ, ‘‘ເທຍ຺ຍຘມ຺ມໍ ນ ສກ຺ກໂຣຕິ ນາມາ’’ຕິອາທິມາຫ. ອຈິຕ຺ຕີກຕ຺ວາຕິ ນ ຈິຕ຺ເຕ ກຕ຺ວາ, ນ ປູເຊຕ຺ວາຕິ ອຕ຺ໂຖ. ປູເຊນ຺ໂຕ ຫິ ປູເຊຕພ຺ພວຕ຺ຖຸໍ ຈິຕ຺ເຕ ຐເປຕິ, ຕໂຕ ນ ພຫິ ກໂຣຕິ. ຈິຕ຺ຕໍ ວາ ອຈ຺ຉຣິຍໍ ກຕ຺ວາ ປຏິປຕ຺ຕິ ຈິຕ຺ຕີກຣຓໍ, ສມ຺ຠາວນກິຣິຍາ. ຕປ຺ປຏິກ຺ເຂປໂຕ ອຈິຕ຺ຕີກຣຓໍ, ອສມ຺ຠາວນກິຣິຍາ. ອປວິທ຺ຘນ຺ຕິ ອຸຈ຺ຉິຏ຺ຐາທິຉຑ຺ຑນີຍຘມ຺ມໍ ວິຍ ອວຂິຕ຺ຕກໍ. ເຕນາຫ – ‘‘ຉຑ຺ເຑຕຸກາໂມ ວິຍາ’’ຕິອາທິ. ໂຣຄໍ ປກ຺ຂິປນ຺ໂຕ ວິຍາຕິ ໂຣຄິກສຣີຣໍ ໂອທນາທີຫິ ປມຊ຺ຊິຕ຺ວາ ວມ຺ມິເກ ໂຣຄໍ ປກ຺ຂິປນ຺ໂຕ ວິຍ. ອທ຺ຘາ ອິມສ຺ສ ທານສ຺ສ ຜລໍ ມເມວ ອາຄຈ຺ຉຕີຕິ ເອວໍ ຍສ຺ສ ຕຖາ ທິຏ຺ຐິ ອຕ຺ຖິ, ໂສ ອາຄມນທິຏ຺ຐິໂກ, ອຍໍ ປນ ນ ຕາທິໂສຕິ ອາຫ ‘‘ອນາຄມນທິຏ຺ຐິໂກ’’ຕິ. ເຕນາຫ – ‘‘ໂນ ຜລປາຏິກງ຺ຂີ ຫຸຕ຺ວາ ເທຕີ’’ຕິ.

ກາມຎ຺ຈາຍໍ ຍຖາວຸຕ຺ຕປຸຄ຺ຄໂລ ອສທ຺ຘມ຺ມາທີຫິ ປາປຘມ຺ເມຫິ ສມນ຺ນາຄໂຕ, ເຕຫິ ປນ ສພ຺ເພຫິປິ ມິຈ຺ຉາທສ຺ສນໍ ມຫາສາວຊ຺ຊນ຺ຕິ ທສ຺ເສຕຸໍ, ‘‘ຕາຍ ມິຈ຺ຉາທິຏ຺ຐິຍາ ນິຣເຍ ອຸປປຊ຺ຊຕີ’’ຕິ ວຸຕ຺ຕໍ. ວຸຕ຺ຕປຏິປກ຺ຂນເຍນາຕິ ກຓ຺ຫປກ຺ເຂ ວຸຕ຺ຕສ຺ສ ອຕ຺ຖສ຺ສ ວິປຣິຍາເຍນ ສຸກ຺ກປກ຺ເຂ ອຕ຺ໂຖ ເວທິຕພ຺ໂພ. ‘‘ສເທວກໍ ໂລກ’’ນ຺ຕິອາທີສຸ (ປາຣາ. ໑) ເທວສທ຺ໂທ ຉກາມາວຈຣເທເວສຸ, ເອວມິຘາຕິ ອາຫ ‘‘ຉກາມາວຈຣເທວາ’’ຕິ. ຕຕ຺ຖ ພ຺ຣຫ຺ມານໍ ວິສຸໍ ຄຫິຕຕ຺ຕາ ກາມາວຈຣເທວຄ຺ຄຫຓນ຺ຕິ ເຈ? ອິຘ ທານຜລສ຺ສ ອຘິປ຺ເປຕຕ຺ຕາ ກາມາວຈຣເທວຄ຺ຄຫຓໍ, ຕຕ຺ຖາປິ ຉກາມາວຈຣຄ຺ຄຫຓໍ ທຏ຺ຐພ຺ພໍ ເທວມຫຕ຺ຕຕາທິວຈນໂຕ. ຕິຓ຺ຓໍ ກຸລານໍ ສມ຺ປຕ຺ຕີຕິ ຂຕ຺ຕິຍມຫຕ຺ຕາທີນໍ ຕິຓ຺ຓໍ ກຸລານໍ ສມ຺ປຕ຺ຕິ, ນ ເກວລໍ ກຸລສມ຺ປທາ ເອວ ອຘິປ຺ເປຕາ, ອຖ ໂຂ ຕຕ຺ຖ ອາຍຸວຓ຺ຓຍສໂຠຄອິສ຺ສຣິຍາທິສມ຺ປທາປິ ອຘິປ຺ເປຕາຕິ ທຏ຺ຐພ຺ພໍ ອຸຬາຣສ຺ສ ທານມຍປຸຎ຺ຎສ຺ສ ວເສນ ເຕສມ຺ປິ ສມິຊ຺ຌນໂຕ. ສຸທ຺ຘວຏ຺ຏວເສເນວ ກຖິຕໍ ສຸກ຺ກປກ຺ເຂປິ ສພ຺ພໂສ ວິວຏ຺ຏສ຺ສ ອນາມຏ຺ຐຕ຺ຕາ. ສທ຺ຘາທໂຍ ຫິ ໂລກິຍກຸສລສມ຺ຠາຣາ ເອເວຕ຺ຖ ອຘິປ຺ເປຕາຕິ. ເສສໍ ສຸວິຎ຺ເຎຍ຺ຍເມວ.

ຈູຬປຸຓ຺ຓມສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.

ນິຏ຺ຐິຕາ ຈ ເທວທຫວຄ຺ຄວຓ຺ຓນາ.