໑໐. ສງ຺ຄາຣວສຸຕ຺ຕວຓ຺ຓນາ

໔໗໓. ອຠິປ຺ປສນ຺ນາຕິ ອຠິສເມຈ຺ຈ ປສນ຺ນາ. ເຕນາຫ – ‘‘ອເວຈ຺ຈປ຺ປສາທວເສນ ປສນ຺ນາ’’ຕິ. ພ຺ຣາຫ຺ມຓີ ວິຄຕມລມຈ຺ເຉຣຕາຍ ‘‘ຕຸຍ຺ຫໍ ເທຍ຺ຍຘມ຺ມໍ ຣຸຈ຺ຈນກຏ຺ຐາເນ ເທຫີ’’ຕິ ອາຫ. ມຄ຺ເຄເນວ ຫິສ຺ສາ ມຈ຺ຉຣິຍສ຺ສ ປຫີນຕ຺ຕາ ພຸທ຺ຘປກ຺ຂພ຺ຣາຫ຺ມຓປກ຺ຂວເສນ ອຸຠໂຕປກ຺ຂິກາ.

ກິໍສູຕິ ກິນ຺ຕິ ປຸຈ຺ຉາວຈນໍ. ເຉຕ຺ວາ ອນາທິຍິຕ຺ວາ ວິນາເສຕ຺ວາ. ສຸຂໍ ເສຕີຕິ ຈິຕ຺ຕສນ຺ຕາປາຠາເວນ ສຸເຂນ ສຸປຕິ. ນ ໂສຈຕີຕິ ຕໂຕ ເອວ ໂສກໍ ນາມ ວິນາເສຕິ. ໂກຘນ຺ຕິ ກຸຊ຺ຌນລກ຺ຂຓໍ ໂກຘໍ. ເຉຕ຺ວາ ສມຸຈ຺ຉິນ຺ທິຕ຺ວາ. ສຸຂໍ ເສຕີຕິ ໂກຘປຣິຬາເຫນ ອປຣິຑຍ຺ຫມານຕ຺ຕາ ສຸຂໍ ສຸປຕິ. ໂກຘວິນາເສນ ວິນຏ຺ຐໂທມນສ຺ສຕ຺ຕາ ນ ໂສຈຕິ. ວິສມູລສ຺ສາຕິ ທຸກ຺ຂວິປາກສ຺ສ. ມຘຸຣຄ຺ຄສ຺ສາຕິ ອກ຺ໂກສກສ຺ສ ປຈ຺ຈກ຺ໂກສເນນ, ປຫາຣກສ຺ສ ປຏິປ຺ປຫຣເຓນ ຍໍ ສຸຂໍ ອຸປ຺ປຊ຺ຊຕິ, ຕໍ ສນ຺ຘາເຍວ ‘‘ມຘຸຣຄ຺ໂຄ’’ຕິ ວຸຕ຺ໂຕ. ອິມສ຺ມິຎ຺ຫິ ຐາເນ ປຣິໂຍສານໍ ‘‘ອຄ຺ຄ’’ນ຺ຕິ ວຸຕ຺ຕໍ. ອຣິຍາຕິ ພຸທ຺ຘາທໂຍ ອຣິຍາ.

ປຎ຺ຫໍ ກເຖສີຕິ ພ຺ຣາຫ຺ມໂຓ ກິຣ ຈິນ຺ເຕສິ – ‘‘ສມໂຓ ໂຄຕໂມ ໂລກປູຊິໂຕ, ນ ສກ຺ກາ ຍໍ ວາ ຕໍ ວາ ວຕ຺ວາ ສນ຺ຕຊ຺ເຊຕຸໍ, ເອກໍ ສຓ຺ຫປຎ຺ຫໍ ປຸຈ຺ຉິສ຺ສາມີ’’ຕິ. ໂສ ເອກໍ ປຸຈ຺ຉາຄາຖໍ ອຠິສງ຺ຂຣິຕ຺ວາ ‘‘ສເຈ ອສຸກສ຺ສ ນາມ ວຘໍ ໂຣເຈມີຕິ ວກ຺ຂຕິ, ເຍ ຕຸຍ຺ຫໍ ນ ຣຸຈ຺ຈນ຺ຕິ, ເຕ ມາເຣຕຸກາໂມສິ, ໂລກວຘາຍ ອຸປ຺ປນ຺ໂນ ກິໍ ຕຸຍ຺ຫໍ ສມຓຠາເວນາຕິ ນິຄ຺ຄເຫສ຺ສາມິ. ສເຈ ນ ກສ຺ສຈິ ວຘໍ ໂຣເຈມີຕິ ວກ຺ຂຕິ, ອຖ ນໍ ຕ຺ວໍ ຣາຄາທີນມ຺ປິ ວຘໍ ນ ອິຈ຺ຉສິ, ຕສ຺ມາ ສມໂຓ ຫຸຕ຺ວາ ອາຫິຓ຺ຑສີຕິ ນິຄ຺ຄຓ຺ຫິສ຺ສາມີຕິ ອິມໍ ອຸຠໂຕໂກຏິກໍ ປຎ຺ຫໍ ປຸຏ຺ໂຐ ສມໂຓ ໂຄຕໂມ ເນວ ຄິລິຕຸໍ ນ ອຸຄ຺ຄິລິຕຸໍ ສກ຺ຂິສ຺ສຕີ’’ຕິ ເອວໍ ຈິນ຺ເຕຕ຺ວາ ອິມໍ ປຍ຺ຫໍ ປຸຈ຺ຉິ. ຕສ຺ສ ຠຄວາ ອຊ຺ຌາສຍານຸຣູປໍ ກເຖສິ. ໂສ ປຎ຺ຫພ຺ຍາກຣເຓນ ອາຣາຘິຕຈິຕ຺ໂຕ ປພ຺ພຊ຺ຊໍ ຍາຈິ. ສຕ຺ຖາ ຕໍ ປພ຺ພາເຊສິ, ໂສ ປພ຺ພຊ຺ຊາກິຈ຺ຈໍ ມຕ຺ຖກໍ ປາເປສິ. ເຕນ ວຸຕ຺ຕໍ ‘‘ປພ຺ພຊິຕ຺ວາ ອຣຫຕ຺ຕໍ ປຕ຺ໂຕ’’ຕິ.

ອວຠູຕາຕິ ອໂຘຠູຕາ. ອໂຘຠາໂວ ສຕ຺ຕານໍ ອວຑ຺ຒິ ອວມງ຺ຄລນ຺ຕິ ອາຫ – ‘‘ອວຑ຺ຒິຠູຕາ ອວມງ຺ຄລຠູຕາເຍວາ’’ຕິ. ປຣິຠູຕາຕິ ປຣິຠວປ຺ປຕ຺ຕາ. ວິຊ຺ຊມານານນ຺ຕິ ປາຬິຍໍ ອນາທເຣ ສາມິວຈນນ຺ຕິ ຕທຕ຺ຖໍ ທສ຺ເສນ຺ໂຕ ‘‘ວິຊ຺ຊມາເນສູ’’ຕິອາຫ. ປກຏ຺ຐໍ, ປວຑ຺ຒໍ ວາ ຎາຓນ຺ຕິ ປຎ຺ຎາຓນ຺ຕິ ຠຄວໂຕ ຎາຓໍ ວິເສເສຕ຺ວາ ວຸຕ຺ຕໍ.

໔໗໔. ອຠິຊານິຕ຺ວາຕິ ອຠິວິສິຏ຺ເຐນ ຎາເຓນ ຊານິຕ຺ວາ. ໂວສິຕໂວສານາຕິ ກຕກຣຓີຍຕາຍ ສພ຺ພໂສ ປຣິໂສສິຕນິຏ຺ຐາ. ປາຣມິສງ຺ຂາຕນ຺ຕິ ປຣມຸກ຺ກໍສຠາວໂຕ ປາຣມີຕິ ສງ຺ຂາຕໍ. ເຕນາຫ ‘‘ສພ຺ພຘມ຺ມານໍ ປາຣຠູຕ’’ນ຺ຕິ. ພ຺ຣຫ຺ມຈຣິຍສ຺ສາຕິ ສາສນພ຺ຣຫ຺ມຈຣິຍສ຺ສ ອາທິຠູຕໍ. ເຕນາຫ ‘‘ອຸປ຺ປາທກາ ຊນກາ’’ຕິ. ‘‘ອິທເມວໍ ຠວິສ຺ສຕິ ອິທເມວ’’ນ຺ຕິ ຕກ຺ກນໍ ຕກ຺ໂກ, ໂສ ເອຕສ຺ສ ອຕ຺ຖີຕິ ຕກ຺ກີ. ຍສ຺ມາ ໂສ ຕໍ ຕໍ ວຕ຺ຖຸໍ ຕຖາ ຕຖາ ຕກ຺ກິຕ຺ວາ ຄຓ຺ຫຕິ, ຕສ຺ມາ ວຸຕ຺ຕໍ ‘‘ຕກ຺ກຄາຫີ’’ຕິ. ວີມໍສນສີໂລ ວີມໍສີ ປຈ຺ຈກ຺ຂຠູຕມຕ຺ຖໍ ວີມໍສນຠູຕາຍ ປຎ຺ຎາຍ ເກວລໍ ວີມໍສນໂຕ. ເຕນາຫ ‘‘ປຎ຺ຎາຈາຣໍ ຈຣາເປຕ຺ວາ ເອວໍວາທີ’’ຕິ. ຍຖາວຸຕ຺ຕຕກ຺ກີວີມໍສີຠາເວນ ຕກ຺ກປຣິຍາຫຕໍ ວີມໍສານຸຈຣິຕໍ ສຍໍປຏິຠານໍ ເອວເມຕນ຺ຕິ ວຕ຺ວາ.

໔໘໕. ອຏ຺ຐິຕປຘານວຕນ຺ຕິ ອຎ຺ຎຕ຺ຖ ກິສ຺ມິຎ຺ຈິ ປຸຄ຺ຄເລ ອຏ຺ຐິຕປຘານວຕໍ ອນຎ຺ຎສາຘາຣຓໍ ໂຠໂຕ ໂຄຕມສ຺ສ ປຘານໍ ອໂຫສິ. ສປ຺ປຸຣິສປຘານວຕໍ ອໂຫສິ ສປ຺ປຸຣິສປຘານວຕາຘິຄຕານໍ ເອຕາທິສານໍ ອຣຫຕໍ ອຈ຺ຉຣິຍປຸຄ຺ຄລານໍເຍວ ອາເວຓິກປຘານວຕໍ ອໂຫສິ. ອຊານນ຺ໂຕວ ປກາເສຕີຕິ ອຍໍ ປຸຈ຺ຉິຕມຕ຺ຖໍ ສຍໍ ປຈ຺ຈກ຺ຂໂຕ ອຊານນ຺ໂຕ ເອວ ເກວລໍ ສທ຺ທໍ ອຸປ຺ປາເທຕ຺ວາວ ປກາເສສີຕິ ສຎ຺ຎາຍ ອາຫ. ອຊານນຠາເວ ສນ຺ເຕຕິ ອິເມ ອຘິເທວາຕິ ປຈ຺ຈກ຺ຂໂຕ ຊານເນ ອສຕິ. ປຓ຺ຑິເຕນ ມນຸສ຺ເສນາຕິ ໂລກໂວຫາຣກຸສເລນ ມນຸສ຺ເສນ, ຕ຺ວໍ ປນ ໂລກໂວຫາເຣປິ ອກຸສໂລ. ວຈນຕ຺ຖຎ຺ຫິ ອຊານນ຺ໂຕ ຍໍ ກິຎ຺ຈິ ວທຕິ. ອຸຈ຺ເຈນ ສມ຺ມຕນ຺ຕິ ອຸຈ຺ຈໍ ສຸປາກຏໍ ສພ຺ພໂສ ຕຣຸຓທາຣເກຫິປິ ສມ຺ມຕໍ. ຎາຕເມຕໍ ຍທິທໍ ອຕ຺ຖິ ເທວາຕິ. ເຕນາຫ ‘‘ສຸສຸທາຣກາປີ’’ຕິອາທິ. ເທວາຕິ ອຸປປຕ຺ຕິເທວາ. ອຘິເທວາ ນາມ ສມ຺ມຸຕິເທເວຫິ ອຘິກເທວາຕິ ກຕ຺ວາ, ຕທຎ຺ເຎ ຈ ມນຸສ຺ເສ ອຘິກຠາເວ ກິເມວ ວຕ຺ຕພ຺ພໍ. ເສສໍ ສຸວິຎ຺ເຎຍ຺ຍເມວ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ສງ຺ຄາຣວສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.

ນິຏ຺ຐິຕາ ຈ ພ຺ຣາຫ຺ມຓວຄ຺ຄວຓ຺ຓນາ.

ມຊ຺ຌິມປຓ຺ຓາສຏີກາ ສມຕ຺ຕາ.