໙. ຈູຬສກຸລຸທາຍິສຸຕ຺ຕວຓ຺ຓນາ

໒໗໑. ປຎ຺ໂຫຕິ ຎາຕຸໍ ອິຈ຺ຉິໂຕ ອຕ຺ໂຖ, ຕເທວ ຘມ຺ມເທສນາຍ ນິມິຕ຺ຕຠາວໂຕ ກາຣຓໍ. ອຸປຏ຺ຐາຕູຕິ ຎາຓສ຺ສ ໂຄຈຣຠາວໍ ອຸປຄຈ຺ຉຕຸ. ເຍນ ກາຣເຓນາຕິ ເຍນ ຕຸຍ຺ຫໍ ອຸປຏ຺ຐິເຕນ ກາຣເຓນ ຘມ຺ມເທສນາ ອຸປຏ຺ຐເຫຍ຺ຍ, ຕໍ ປນ ປຣິພ຺ພາຊກສ຺ສ ອຊ຺ຌາສຍວເສນ ຕຖາ ວຸຕ຺ຕໍ. ເຕນາຫ ‘‘ເອເຕນ ຫິ…ເປ… ທີເປຕີ’’ຕິ. ເອກງ຺ຄຓານີຕິ ປິຘານາຠາເວນ ເອກງ຺ຄຓສທິສານິ. ເຕນາຫ ‘‘ປາກຏານີ’’ຕິ.

ຊານນ຺ໂຕຕິ ອຕ຺ຕໂນ ຕຖາຠາວໍ ສຍໍ ຊານນ຺ໂຕ. ສກ຺ກຈ຺ຈໍ ສຸສ຺ສູສຕີຕິ ‘‘ຕຖາຠູຕໍເຍວ ມໍ ຕຖາ ອໂວຈາ’’ຕິ ສາທຣໍ ສຸສ຺ສູສຕິ. ຕສ຺ມາຕິ ທິພ຺ພຈກ຺ຂຸລາຠິໂນ ອນາຄຕໍສຎາຓລາຠໂຕ. ເອວມາຫາຕິ ‘‘ໂຍ ໂຂ, ອຸທາຍິ, ທິພ຺ເພນ ຈກ຺ຂຸນາ’’ຕິ ອາຣຠິຕ຺ວາ ‘‘ໂສ ວາ ມໍ ອປຣນ຺ຕໍ ອາຣພ຺ຠ ປຎ຺ຫໍ ປຸຈ຺ເຉຍ຺ຍາ’’ຕິ ເອວໍ ອໂວຈ.

ອິຕຣນ຺ຕິ ອວສິຏ຺ຐໍ ອິມສ຺ມິໍ ຐາເນ ວຕ຺ຕພ຺ພໍ. ວຸຕ຺ຕນຍເມວາຕິ ‘‘ໂຍ ຫິ ລາຠີ’’ຕິອາທິນາ ວຸຕ຺ຕນຍເມວ. ອຕີເຕຕິ ປຸພ຺ເພນິວາສານຸສ຺ສຕິຎາຓສ຺ສ ວິສຍຠູເຕ ອຕ຺ເຖ. ອນາຄເຕຕິ ອນາຄຕໍສຎາຓສ຺ສ ວິສຍຠູເຕ ອນາຄເຕ ອຕ຺ເຖ.

ປໍສຸປເທເສ ນິພ຺ພຕ຺ຕນໂຕ ປໍສຸສໂມກິຓ຺ຓສຣີຣຕາຍ ປໍສຸປິສາຈກໍ. ເອກໍ ມູລໍ ຄເຫຕ຺ວາຕິ ທີຆໂສ ເຫຏ຺ຐິມນ຺ເຕນ ຈຕຸຣງ຺ຄຸລໍ, ອຸປຣິມນ຺ເຕນ ວິທຕ຺ຖິກໍ ຣຸກ຺ຂຄຈ຺ຉລຕາທີສຸ ຍສ຺ສ ກສ຺ສຈິ ເອກໍ ມູລໍ ຄເຫຕ຺ວາ ອຎ຺ຎຊາຕິການໍ ອທິສ຺ສມານກາໂຍ ໂຫຕິ. ອຍໍ ກິຣ ເນສໍ ຊາຕິສິທ຺ຘາ ຘມ຺ມຕາ. ຕຕ຺ຣາຕິ ຕສ຺ສ ມູລວເສນ ອທິສ຺ສມານກຕາຍ. ນ ທິສ຺ສຕິ ຎາເຓນ ນ ປສ຺ສຕິ.

໒໗໒. ນ ຈ ອຕ຺ຖໍ ທີເປຍ຺ຍາຕິ ອຘິປ຺ເປຕມຕ຺ຖໍ ສາ ວາຈາ ສຣູປໂຕ ນ ຈ ທີເປຍ຺ຍ, ເກວລໍ ວາຈາມຕ຺ຕເມວາຕິ ອຘິປ຺ປາໂຍ. ປຏິຫຣິຕພ຺ພຏ຺ເຐນ ປຣສນ຺ຕາເນ ເນຕພ຺ພຏ຺ເຐນ ປຏິຫາຣິຍ-ສທ຺ທທ຺ວາເຣນ ວິຎ຺ຎາຕພ຺ໂພ ຠາວຕ຺ໂຖ, ໂສວ ປາຏິຫີຣໂກ ນິຣຸຕ຺ຕິນເຍນ, ນຕ຺ຖິ ເອຕສ຺ສ ປາຏິຫີຣກນ຺ຕິ ອປ຺ປາຏິຫີຣກຕໍ, ຕ-ສທ຺ເທນ ປທໍ ວຑ຺ເຒຕ຺ວາ ຕຖາ ວຸຕ຺ຕໍ, ອນິຍ຺ຍານໍ. ເຕນາຫ ‘‘ນິຣຕ຺ຖກໍ ສມ຺ປຊ຺ຊຕີ’’ຕິ. ສຸຠກິຓ຺ຫເທວໂລເກ ຂນ຺ຘາ ວິຍ ໂຊເຕຕີຕິ ອິມິນາ – ‘‘ທິພ຺ໂພ ຣູປີ ມໂນມໂຍ ສພ຺ພງ຺ຄປຈ຺ຈງ຺ຄີ ອຫີນິນ຺ທ຺ຣິໂຍ ອຕ຺ຕາ’’ຕິ ອິມມຕ຺ຖໍ ທສ຺ເສຕິ.

໒໗໓. ສອຸປສຄ຺ຄປທສ຺ສ ອຕ຺ໂຖ ອຸປສຄ຺ເຄນ ວິນາປິ ວິຎ຺ຎາຍຕີຕິ ອາຫ ‘‘ວິທ຺ເຘຕິ ອຸພ຺ພິທ຺ເຘ’’ຕິ. ສາ ຈສ຺ສ ອຸພ຺ພິທ຺ຘຕາ ອຸປກ຺ກິເລສວິຄເມນ ສຸຈິຠາເວນ ອຸປຏ຺ຐານນ຺ຕິ ອາຫ ‘‘ເມຆວິຄເມນ ທູຣີຠູເຕ’’ຕິ. ອິນ຺ທນີລມຓິ ວິຍ ທິພ຺ພຕິ ໂຊເຕຕີຕິ ເທໂວ, ອາກາໂສ. ‘‘ອຑ຺ຒຣຕ຺ຕສມເຍ’’ຕິ ວຕ຺ຕພ຺ເພ ຠຸມ຺ມຕ຺ເຖ ວິຫິຕວຈນານໍ ອຈ຺ຈນ຺ຕສໍໂຍຄາຠາວາ ອຸປໂຍຄວຈນໍ ເວທິຕພ຺ພໍ. ປຸຓ຺ຓມາສິຍຎ຺ຫິ ຄຄນມຊ຺ຌສ຺ສ ປຸຣໂຕ ວາ ປຈ຺ຉໂຕ ວາ ອນ຺ເຕ ຐິເຕ ອຑ຺ຒຣຕ຺ເຕ ສມໂຍ ຠິນ຺ໂນ ນາມ ໂຫຕິ, ມຊ຺ເຌ ເອວ ປນ ຐິໂຕ ອຠິນ຺ໂນ ນາມ. ເຕນາຫ ‘‘ອຠິນ຺ເນ ອຑ຺ຒຣຕ຺ຕສມເຍ’’ຕິ.

ເຍ ອນຸໂຠນ຺ຕີຕິ ເຍ ເທວາ ຈນ຺ທິມສູຣິຍານໍ ອາຠາ ອນຸໂຠນ຺ຕິ ວິນິຠຸຎ຺ຊນ຺ຕິ ວຬຎ຺ຊນ຺ຕິ ຈ ເຕຫິ ເທເວຫິ ພຫູ ເຈວ ພຫຸຕຣາ ຈ ຈນ຺ທິມສູຣິຍານໍ ອາຠາ ອນນຸໂຠນ຺ໂຕ. ເຕນາຫ – ‘‘ອຕ຺ຕໂນ ສຣີໂຣຠາເສເນວ ອາໂລກໍ ຜຣິຕ຺ວາ ວິຫຣນ຺ຕີ’’ຕິ.

໒໗໔. ປຸຈ຺ຉາມູຬ຺ໂຫ ປນ ຊາໂຕ ‘‘ອຍໍ ປຣໂມ ວຓ຺ໂຓ’’ຕິ ຄຫິຕປທສ຺ສ ວິຘມເນນ. ອເຈລກປາຬິນ຺ຕິ ‘‘ອເຈລໂກ ໂຫຕິ ມຸຕ຺ຕາຈາໂຣ’’ຕິອາທິນຍປ຺ປວຕ຺ຕໍ (ທີ. ນິ. ໑.໓໙໔) ອເຈລກປຏິປຕ຺ຕິທີປກຄນ຺ຖໍ, ຄນ຺ຖສີເສເນວ ເຕນ ປກາສິຕວາທານິ ວທຕິ. ສຸຣາເມຣຍປານມນຸຍຸຕ຺ຕປຸຄ຺ຄລສ຺ສ ສຸຣາປານໂຕ ວິຣຕິ ຕສ຺ສ ກາຍໍ ຈິຕ຺ຕຎ຺ຈ ຕາເປນ຺ຕີ ສໍວຕ຺ຕຕີຕິ ສຸຣາປານວິຣຕິ (ຕໂປ, ໂສເຍວ ຄຸໂຓ. ເຕນາຫ ‘‘ສຸຣາປານວິຣຕີຕິ ອຕ຺ໂຖ’’ຕິ).

໒໗໕. ເອກນ຺ຕໍ ອຈ຺ຈນ຺ຕເມວ ສຸຂໍ ອສ຺ສາຕິ ເອກນ຺ຕສຸຂໍ. ປຎ຺ຈສຸ ຘມ຺ເມສູຕິ ‘‘ປາຓາຕິປາຕາ ປຏິວິຣຕີ’’ຕິອາທີສຸ ປຎ຺ຈສຸ ສີລາຈາຣຘມ຺ເມສຸ. ນ ຊານິໍສູຕິ ສມ຺ໂມເສນ ອນຸປຏ຺ຐຫນ຺ຕິ ຕທຕ຺ຖໍ ນ ພຸຊ຺ຌນ຺ຕິ. ພຸທ຺ຘຸປ຺ປາເທນ ກິຣ ວິຫຕເຕຊານິ ມຫານຸຠາວານິ ມນ຺ຕປທານິ ວິຍ ພາຫິຣການໍ ໂຍຄາວຈຣຄນ຺ເຖນ ສທ຺ຘິໍ ໂຍຄາວຈຣປຏິປທາ ນສ຺ສຕິ. ອຸຄ຺ຄຓ຺ຫິໍສູຕິ ‘‘ປຎ຺ຈ ປຸພ຺ພຠາຄຘມ຺ເມ’’ຕິອາທິວຈນມຕ຺ຕໍ ອຸຄ຺ຄຓ຺ຫິໍສຸ. ຕຕິຍຊ຺ຌານໂຕຕິ ກາຣໂຓປຈາເຣນ ຜລໍ ວທຕິ, ຜລຠູຕໂຕ ຕຕິຍຊ຺ຌານໂຕ.

໒໗໖. ເອກນ຺ຕສຸຂສ຺ສ ໂລກສ຺ສ ປຏິລາເຠນ ປຕ຺ຕິຍາ ຕຕ຺ຖ ນິພ຺ພຕ຺ຕິ ປຏິລາຠສຈ຺ຉິກິຣິຍາ. ເອກນ຺ຕສຸເຂ ໂລເກ ອນຠິນິພ຺ພຕ຺ຕິຕ຺ວາ ເອວ ອິທ຺ຘິຍາ ຕຕ຺ຖ ຄນ຺ຕ຺ວາ ຕສ຺ສ ສຕ຺ຕໂລກສ຺ສ ຠາຊນໂລກສ຺ສ ຈ ປຈ຺ຈກ຺ຂໂຕ ທສ຺ສນໍ ປຈ຺ຈກ຺ຂສຈ຺ຉິກິຣິຍາ. ເຕນາຫ ‘‘ຕຕ຺ຖາ’’ຕິອາທິ.

໒໗໗. ອຸທຎ຺ຈນິໂກຕິ ອຸທຎ຺ຈໂນ. ວິຎ຺ຌຸປພ຺ພຕປສ຺ເສ ຄາມານໍ ອນິວິຏ຺ຐຕ຺ຕາ ຕິໍສໂຍຊນມຕ຺ຕໍ ຐານໍ ອຏວີ ນາມ, ຕຕ຺ຖ ເສນາສນໍ, ຕສ຺ມິໍ ອຏວິເສນາສເນ ປຘານກມ຺ມິການໍ ຠິກ຺ຂູນໍ ພຫູນໍ ຕຕ຺ຖ ນິວາເສນ ເອກໍ ປຘານຆຣໍ ອໂຫສິ.

ຈູຬສກຸລຸທາຍິສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.