໗. ກຸກ຺ກຸຣວຕິກສຸຕ຺ຕວຓ຺ຓນາ

໗໘. ໂກລິເຍສູຕິ ພຫຸວຈນວເສນາຍໍ ປາຬິ ອາຄຕາ. ເອວໍນາມເກ ຊນປເທຕິ ອຕ຺ຖວຈນໍ ກສ຺ມາ ວຸຕ຺ຕນ຺ຕິ ອາຫ ‘‘ໂສ ຫີ’’ຕິອາທິ. ນ ນິຍມິໂຕຕິ ‘‘ອສຸກມ຺ຫິ ນາມ ວິຫາເຣ’’ຕິ ນ ນິຍເມຕ຺ວາ ວຸຕ຺ໂຕ. ເສນາສເນເຍວາຕິ ອາວາເສເຍວ, ນ ຣຸກ຺ຂມູລາທິເກ. ເວສກິຣິຍາ ຆາສຄ຺ຄຫຓາທິນາ ສມາທາຕພ຺ພຏ຺ເຐນ ໂຄວຕໍ, ຕສ຺ມິໍ ນິຍຸຕ຺ໂຕ ໂຄວຕິໂກ. ເຕນາຫ ‘‘ສມາທິນ຺ນໂຄວໂຕ’’ຕິ. ຍໍ ສນ຺ຘາຍາຫຸ ເວທເວທິໂນ – ‘‘ຄຈ຺ຉໍ ຠກ຺ເຂຕິ, ຕິຏ຺ຐໍ ມຸຕ຺ເຕຕິ, ອຸປາຫາ ອຸທກໍ ຘູເປຕິ, ຕິຓານິ ຉິນ຺ທຕີ’’ຕິອາທິ. ອຍໍ ອເຈໂລຕິ ອເຈລກປພ຺ພຊ຺ຊາວເສນ ອເຈໂລ, ປຸຣິໂມ ປນ ໂຄວຕິໂກ ກຸກ຺ກຸຣວຕິໂກຕິ ເອຕ຺ຖ ວຸຕ຺ຕນຍານຸສາເຣນ ອຕ຺ໂຖ ວຕ຺ຕພ຺ໂພ. ປລິກຸຓ຺ຐິຕ຺ວາຕິ ອຸໂຠ ຫຕ຺ເຖ ອຸໂຠ ປາເທ ຈ ສມິຎ຺ຊິຕ຺ວາ. ‘‘ອຸກ຺ກຸຏິໂກ ຫຸຕ຺ວາ’’ຕິປິ ວທນ຺ຕິ. ຄມນໍ ນິປ຺ຜຊ຺ຊນໍ ຄຕີຕິ ອາຫ – ‘‘ກາ ຄຕີຕິ ກາ ນິປ຺ຜຕ຺ຕີ’’ຕິ. ນິປ຺ຜຕ຺ຕິປຣິໂຍສານາ ຫິ ວິປາກຘມ຺ມປ຺ປວຕ຺ຕິ. ກຕູປຈິຕກມ຺ມວເສນ ອຠິສມ຺ປເຣຕິ ເອຕ຺ຖາຕິ ອຠິສມ຺ປຣາໂຍ, ປຣໂລໂກ. ຕຕ຺ຖສ຺ສ ຈ ນິປ຺ຜຕ຺ຕິໍ ປຸຈ຺ຉຕີຕິ ອາຫ – ‘‘ອຠິສມ຺ປຣາຍມ຺ຫິ ກຕ຺ຖ ນິພ຺ພຕ຺ຕີ’’ຕິ. ກຸກ຺ກຸຣວຕສມາທານນ຺ຕິ ກຸກ຺ກຸຣຠາວສມາທານໍ, ‘‘ອຊ຺ຊ ປຏ຺ຐາຍ ອຫໍ ກຸກ຺ກຸໂຣ’’ຕິ ກຸກ຺ກຸຣຠາວາຘິຏ຺ຐານໍ.

໗໙. ປຣິປຸຓ຺ຓນ຺ຕິ ຍຕ຺ຕກາ ກຸກ຺ກຸຣວິກາຣາ, ເຕຫິ ປຣິປຸຓ຺ຓໍ. ເຕນາຫ ‘‘ອນູນ’’ນ຺ຕິ. ອພ຺ໂພກິຓ຺ຓນ຺ຕິ ເຕຫິ ອໂວມິສ຺ສໍ. ກຸກ຺ກຸຣາຈາຣນ຺ຕິ ກຸກ຺ກຸຣານໍ ຄມນາກາໂຣຕິອາທິອາຈາເຣນ ກຸກ຺ກຸຣຠາວາຘິຏ຺ຐານຈິຕ຺ຕມາຫ. ຕຖາ ຕຖາ ອາກປ຺ເປຕພ຺ພໂຕ ອາກປ຺ໂປ, ປວຕ຺ຕິອາກາໂຣ. ໂສ ປເນຕ຺ຖ ຄມນາທິໂກຕິ ອາຫ ‘‘ກຸກ຺ກຸຣານໍ ຄມນາກາໂຣ’’ຕິອາທິ. ອາຈາເຣນາຕິ ກຸກ຺ກຸຣສີລາຈາເຣນ. ວຕສມາທາເນນາຕິ ກຸກ຺ກຸຣວຕາຘິຏ຺ຐາເນນ. ກຸກ຺ກຸຣຈຣິຍາທິເຍວ ທຸກ຺ກຣຕປຈຣຓໍ. ເຕນ ຄຕິວິປຣິເຍສາກາເຣນ ປວຕ຺ຕາ ລທ຺ຘິ. ອສ຺ສ ກຸກ຺ກຸຣວຕິກສ຺ສ ອຎ຺ຎາ ຄຕິ ນຕ຺ຖີຕິ ອິຕຣຄຕິໍ ປຏິກ຺ຂິປຕິ, ອິຕຣາສໍ ປນ ສມ຺ຠໂວ ເອວ ນຕ຺ຖີຕິ. ນິປຊ຺ຊມານນ຺ຕິ ວຕສີລາທີນໍ ສໍໂຄປນວເສນ ສິຊ຺ຌມານໍ. ຍຖາ ສກມ຺ມກຘາຕຸສທ຺ທາ ອຕ຺ຖວິເສສວເສນ ອກມ຺ມກາ ໂຫນ຺ຕິ ‘‘ວິພຸທ຺ໂຘ ປຸຣິໂສ ວິພຸທ຺ໂຘ ກມລສຓ຺ໂຑ’’ຕິ, ເອວໍ ອຕ຺ຖວິເສສວເສນ ອກມ຺ມກາປິ ສກມ຺ມກາ ໂຫນ຺ຕີຕິ ທສ຺ເສນ຺ໂຕ ‘‘ນ ປຣິເທວາມິ ນ ອນຸຕ຺ຖຸນາມີ’’ຕິອາທິມາຫ. ອນຸຕ຺ຖຸນສທ຺ໂທ ຈ ສກມ຺ມກວເສນ ປຍຸຊ຺ຊຕິ ‘‘ປຸຣາຓານິ ອນຸຕ຺ຖຸນ’’ນ຺ຕິອາທີສຸ. ອຍຎ຺ເຈຕ຺ຖ ປໂຍໂຄຕິ ອິມິນາ ຄາຖາຍຎ຺ຈ ອນຸຕ຺ຖຸນນໂຣທນໍ ອຘິປ຺ເປຕນ຺ຕິ ທສ຺ເສຕິ.

໘໐. ວຸຕ຺ຕນເຍເນວາຕິ ອິມິນາ ໂຄວຕນ຺ຕິ ໂຄວຕສມາທານໍ. ໂຄສີລນ຺ຕິ ຄວາຈາຣໍ. ໂຄຈິຕ຺ຕນ຺ຕິ ‘‘ອຊ຺ຊ ປຏ຺ຐາຍ ໂຄຫິ ກາຕພ຺ພໍ ກຣິສ຺ສາມີ’’ຕິ ອຸປ຺ປນ຺ນຈິຕ຺ຕນ຺ຕິ ອິມມຕ຺ຖໍ ອຕິທິສຕິ. ຄ຺ວາກປ຺ເປ ປນ ວຕ຺ຕພ຺ພໍ ອວສິຏ຺ຐໍ ‘‘ກຸກ຺ກຸຣາກປ຺ເປ ວຸຕ຺ຕສທິສເມວາ’’ຕິ ອິມິນາວ ອຕິທິຏ຺ຐໍ, ວິສິຏ຺ຐຎ຺ຈ ຍຖາ ປນ ຕຕ຺ຖາຕິອາທິນາ ວຸຕ຺ຕເມວ. ຍໍ ປເນຕ຺ຖ ວຕ຺ຕພ຺ພໍ, ຕໍ ກຸກ຺ກຸຣວຕາທີສຸ ວຸຕ຺ຕນຍເມວ.

໘໑. ເອກຈ຺ຈກມ຺ມກິຣິຍາວເສນາຕິ ເອກຈ຺ຈສ຺ສ ອກຸສລກມ຺ມສ຺ສ ກຸສລກມ຺ມສ຺ສ ກຣຓປ຺ປສງ຺ເຄນ. ອິເມສນ຺ຕິ ໂຄວຕິກກຸກ຺ກຸຣວຕິການໍ. ກິຣິຍາຕິ ໂຄວຕຠາວນາທິວເສນ ປວຕ຺ຕາ ກິຣິຍາ. ປາກຏາ ຠວິສ຺ສຕີຕິ ‘‘ອິມສ຺ມິໍ ກມ຺ມຈຕຸກ຺ເກ ອິທໍ ນາມ ກມ຺ມໍ ຠຊຕີ’’ຕິ ປາກຏາ ຠວິສ຺ສຕິ.

ກາຬກນ຺ຕິ (ອ. ນິ. ຏີ. ໒.໔.໒໓໒) ມລີນໍ, ຈິຕ຺ຕສ຺ສ ອປຠສ຺ສຣຠາວກຣຓນ຺ຕິ ອຕ຺ໂຖ. ຕໍ ປເນຕ຺ຖ ກມ຺ມປຖສມ຺ປຕ຺ຕເມວ ອຘິປ຺ເປຕນ຺ຕິ ອາຫ ‘‘ທສອກຸສລກມ຺ມປຖ’’ນ຺ຕິ. ກຓ຺ຫນ຺ຕິ ກຓ຺ຫາຠິຊາຕິເຫຕຸໂຕ ວາ ກຓ຺ຫໍ. ເຕນາຫ ‘‘ກຓ຺ຫວິປາກ’’ນ຺ຕິ. ອປາຍູປປຕ຺ຕິ ມນຸສ຺ເສສຸ ຈ ໂທຠຄ຺ຄິຍໍ ກຓ຺ຫວິປາໂກ, ຍຖາ ຕມຠາໂວ ວຸຕ຺ໂຕ, ເອກຕ຺ຕນິທ຺ເທເສນ ປນ ‘‘ອປາເຍ ນິພ຺ພຕ຺ຕນໂຕ’’ຕິ ວຸຕ຺ຕໍ, ນິພ຺ພຕ຺ຕາປນໂຕຕິ ອຕ຺ໂຖ. ສຸກ຺ກນ຺ຕິ ໂອທາຕໍ, ຈິຕ຺ຕສ຺ສ ປຠສ຺ສຣຠາວກຣຓນ຺ຕິ ອຕ຺ໂຖ, ສຸກ຺ກາຠິຊາຕິເຫຕຸໂຕ ວາ ສຸກ຺ກໍ. ເຕນາຫ ‘‘ສຸກ຺ກວິປາກ’’ນ຺ຕິ. ສຄ຺ຄູປປຕ຺ຕິ ມນຸສ຺ສໂລເກ ໂສຠຄ຺ຄິຍຎ຺ຈ ສຸກ຺ກວິປາໂກ, ຍຖາ ຈ ໂຊຕິຠາໂວ ວຸຕ຺ໂຕ, ເອກຕ຺ຕນິທ຺ເທເສນ ປນ ‘‘ສຄ຺ເຄ ນິພ຺ພຕ຺ຕນໂຕ’’ຕິ ວຸຕ຺ຕໍ, ນິພ຺ພຕ຺ຕາປນໂຕຕິ ອຕ຺ໂຖ, ໂວມິສ຺ສກກມ຺ມນ຺ຕິ ກາເລນ ກຓ຺ຫໍ, ກາເລນ ສຸກ຺ກນ຺ຕິ ເອວໍ ມິສ຺ສກວເສນ ກຕກມ຺ມໍ. ‘‘ສຸຂທຸກ຺ຂວິປາກ’’ນ຺ຕິ ວຕ຺ວາ ສຸຂທຸກ຺ຂານໍ ປວຕ຺ຕິອາກາຣໍ ທສ຺ເສຕຸໍ ‘‘ມິສ຺ສກກມ຺ມຎ຺ຫີ’’ຕິອາທິ ວຸຕ຺ຕໍ. ກມ຺ມສ຺ສ ກຓ຺ຫສຸກ຺ກສມຎ຺ຎາ ກຓ຺ຫສຸກ຺ກາຠິຊາຕິເຫຕຸຕາຍາຕິ, ອປຈ຺ຈຍຄາມິຕາຍ ຕທຸຠຍວິນິມຸຕ຺ຕສ຺ສ ກມ຺ມກ຺ຂຍກຣກມ຺ມສ຺ສ ອິຘ ສຸກ຺ກປຣິຍາໂຍປິ ນ ອິຈ຺ຉິໂຕຕິ ອາຫ – ‘‘ອຸຠຍ…ເປ… ອສຸກ຺ກນ຺ຕິ ວຸຕ຺ຕ’’ນ຺ຕິ. ຕຕ຺ຖ ອຸຠຍວິປາກສ຺ສາຕິ ຍຖາຘິຄຕສ຺ສ ວິປາກສ຺ສ. ສມ຺ປຕ຺ຕິຠວປຣິຍາປນ຺ໂນ ຫິ ວິປາໂກ ອິຘ ‘‘ສຸກ຺ກວິປາໂກ’’ຕິ ອຘິປ຺ເປໂຕ, ນ ອຈ຺ຈນ຺ຕປຣິສຸທ຺ໂຘ.

ສທຸກ຺ຂນ຺ຕິ ອຕ຺ຕນາ ອຸປ຺ປາເທຕພ຺ເພນ ທຸກ຺ເຂນ ສທຸກ຺ຂໍ, ທຸກ຺ຂສໍວຕ຺ຕນິກນ຺ຕິ ອຕ຺ໂຖ. ‘‘ອິມສ຺ມິໍ ສຸຕ຺ເຕ ເຈຕນາ ຘຸຣໍ, ອຸປາລິສຸຕ຺ເຕ (ມ. ນິ. ໒.໕໖) ກມ຺ມ’’ນ຺ຕິ ເຫຏ຺ຐາ ວຸຕ຺ຕມ຺ປິ ອຕ຺ຖໍ ອິຘ ສາຘຍຕິ ວິຊານນຕ຺ຖໍ. ອຠິສງ຺ຂຣິຕ຺ວາຕິ ອາຍູຫິຕ຺ວາ. ຕໍ ປນ ປຈ຺ຈຍສມວາຍສິທ຺ຘິໂຕ ສໍກຑ຺ຒນໍ ປິຓ຺ຑນໍ ວິຍ ໂຫຕີຕິ ອາຫ – ‘‘ສງ຺ກຑ຺ຒິຕ຺ວາ, ປິຓ຺ຑໍ ກຕ຺ວາຕິ ອຕ຺ໂຖ’’ຕິ, ສທຸກ຺ຂໍ ໂລກນ຺ຕິ ອປາຍໂລກມາຫ. ວິປາກຜສ຺ສາຕິ ຜສ຺ສສີເສນ ຕຕ຺ຖ ວິປາກປວຕ຺ຕມາຫ. ຠູຕກມ຺ມໂຕຕິ ນິພ຺ພຕ຺ຕກມ຺ມໂຕ ອຕ຺ຕນາ ກຕູປຈິຕກມ຺ມໂຕ. ຍຖາຠູຕນ຺ຕິ ຍາທິສໍ. ກມ຺ມສຠາຄວເສນາຕິ ກມ຺ມສຣິກ຺ຂກວເສນ. ອຸປປຕ຺ຕິ ໂຫຕີຕິ ອປທາທິເຠທາ ອຸປປຕ຺ຕິ. ກມ຺ເມນ ວິຍ ວຸຕ຺ຕາຕິ ຍໍ ກໂຣຕິ, ເຕນ ອຸປປຊ຺ຊຕີຕິ ເອກກມ຺ເມເນວ ຊາຍມານາ ວິຍ ວຸຕ຺ຕາ ອປທາທິເຠທາ. ອຸປປຕ຺ຕິ ຈ ນາມ ວິປາເກນ ໂຫຕິ ວິປາເກ ສມ຺ຠວນ຺ເຕ ເອກໍເສນ ເຕ ອຸປປຕ຺ຕິວິເສສາ ສມ຺ຠວນ຺ຕິ. ຍທິ ເອວໍ ກສ຺ມາ ‘‘ເຕນ ອຸປປຊ຺ຊຕີ’’ຕິ ອຸປປຕ຺ຕິກມ຺ມເຫຕຸກາ ວຸຕ຺ຕາຕິ ອາຫ ‘‘ຍສ຺ມາ ປນາ’’ຕິອາທິ. ເຍນ ກມ຺ມວິປາເກນ ນິພ຺ພຕ຺ໂຕຕິ ເຍນ ກມ຺ມວິປາເກນ ວິປຈ຺ຈມາເນນ ອຍໍ ສຕ຺ໂຕ ນິພ຺ພຕ຺ໂຕຕິ ວຸຈ຺ຈຕິ. ຕໍກມ຺ມວິປາກຜສ຺ສາຕິ ຕສ຺ສ ຕສ຺ສ ກມ຺ມສ຺ສ ວິປາກຠູຕາ ຜສ຺ສາ. ກມ຺ເມນ ທາຕພ຺ພໍ ທາຍໍ ຕພ຺ພິປາກໍ ອາທິຍນ຺ຕີຕິ ກມ຺ມທາຍາທາ, ຜສ຺ສາ. ກມ຺ມສ຺ສ ທາຍຊ຺ຊຕາ ກມ຺ມຜລສ຺ສ ທາຍຊ຺ຊໍ, ຕສ຺ມາ ວຸຕ຺ຕໍ ‘‘ກມ຺ມທາຍຊ຺ຊາ’’ຕິ. ເຕນາຫ ‘‘ກມ຺ມເມວ ເນສໍ ທາຍຊ຺ຊໍ ສນ຺ຕກ’’ນ຺ຕິ.

ຕິສ຺ໂສ ຈ ເຫຏ຺ຐິມຊ຺ຌານເຈຕນາຕິ ອິທໍ ອພ຺ຍາພຊ຺ຌເວທນໍ ເວທິຍນເອກນ຺ຕສຸຂຸປ຺ປຕ຺ຕິຍາ ເຫຕຸຠາວສາຘນໍ. ຍທິ ເອວໍ ຍຖາວຸຕ຺ຕາ ຌານເຈຕນາ ຕາວ ໂຫຕຸ ເອກນ຺ຕສຸຂຸປ຺ປຕ຺ຕິເຫຕຸຠາວໂຕ. ກາມາວຈຣາ ກິນ຺ຕີຕິ ກາມາວຈຣາ ປນ ກຸສລເຈຕນາ ຕໍສຠາວາຠາວໂຕ ກິນ຺ຕິ ເກນ ປກາເຣນ ອພ຺ຍາພຊ຺ຌມໂນສງ຺ຂາໂຣ ນາມ ຊາໂຕຕິ ໂຈເທຕິ, ອິຕໂຣ ປນ ນ ສພ຺ພາ ກາມາວຈຣກຸສລເຈຕນາ ຕຖາ ຄຫິຕາ, ອຖ ໂຂ ເອກຈ຺ຈາ ຌານເຈຕນານຸກູລາຕິ ທສ຺ເສນ຺ໂຕ ‘‘ກສິຓສຊ຺ຊນກາເລ ກສິຓາເສວນກາເລ ລພ຺ຠນ຺ຕີ’’ຕິ ອາຫ. ຕຕ຺ຖ ກສິຓາເສວນເຈຕນາ ຄເຫຕພ຺ພາ, ສາ ອຸປຈາຣຊ຺ຌານສ຺ສ ສາຘິກາ. ເຕນ ກາມາວຈຣເຈຕນາ ປຐມຊ຺ຌານເຈຕນາຍ ຆຏິຕາຕິ ກສິຓສຊ຺ຊນເຈຕນາປິ ກທາຈິ ຕາທິສາ ໂຫຕີຕິ ຄຫິຕາ. ປຣິກມ຺ມາທິວເສນ ຫິ ປວຕ຺ຕາ ຠາວນາມຍາ ກາມາວຈຣກຸສລເຈຕນາ ປຐມຊ຺ຌານສ຺ສ ອາສນ຺ນຕາຍ ວຸຕ຺ຕາ. ຈຕຸຕ຺ຖຊ຺ຌານເຈຕນາ ຕຕິຍຊ຺ຌານເຈຕນາຍ ຆຏິຕາຕິ ອິທໍ ເອກຕ຺ຕກາຍເອກຕ຺ຕສຎ຺ຎີສຕ຺ຕາວາສວຕາຍ ຕໍສຣິກ຺ຂກາ ອຸເປກ຺ຂາປິ ອີທິເສສຸ ຐາເນສຸ ສຸຂສຣິກ຺ຂຕາ, ເອວໍ ສນ຺ຕສຠາວຕາ ຎາຓສຫິຕຕາ ຈ. ເກຈິ ປນ ຈຕຸຕ຺ຖຊ຺ຌານເຈຕນານຸຄຸຓາຕິ ນິທສ຺ເສນ຺ຕາ ກສິຓສຊ຺ຊນກາເລ ກສິຓຊ຺ຌານກາເລ ກສິຓາເສວນກາເລ ລພ຺ຠຕີຕິ ຕຕິຍຊ຺ຌານເຈຕນາຍ ອາສນ຺ນຆຏິຕຕາ ວຸຕ຺ຕາຕິ ວທນ຺ຕິ, ຕໍ ເຕສໍ ມຕິມຕ຺ຕໍ, ວຸຕ຺ຕນເຍເນວ ຕາສໍ ຆຏິຕຕາ ເວທິຕພ຺ພາ. ອຸຠຍມິສ຺ສກວເສນາຕິ ອຸຠເຍສໍ ກຸສລາກຸສລສງ຺ຂາຣານໍ ສຸຂທຸກ຺ຂານຎ຺ຈ ມິສ຺ສກຠາວວເສນ. ເວມານິກເປຕານນ຺ຕິ ອິທໍ ພາຫຸລ຺ລໂຕ ວຸຕ຺ຕໍ, ອິຕເຣສມ຺ປິ ວິນິປາຕິການໍ ກາເລນ ທຸກ຺ຂໍ ໂຫຕິເຍວ.

ຕສ຺ສ ປຫານາຍາຕິ ຕສ຺ສ ຍຖາວຸຕ຺ຕສ຺ສ ກມ຺ມສ຺ສ ອນຸປ຺ປຕ຺ຕິຘມ຺ມຕາປາທນາຍ. ຍາ ເຈຕນາຕິ ຍາ ອປຈຍຄາມິນິເຈຕນາ. ກມ຺ມໍ ປຕ຺ວາຕິ ສຸຂກມ຺ມນ຺ຕິ ວຸຈ຺ຈມາເນ ມຄ຺ຄເຈຕນາຍ ອຎ຺ໂຎ ປຓ຺ຑຣຕໂຣ ຘມ຺ໂມ ນາມ ນຕ຺ຖິ ອຈ຺ຈນ຺ຕປາຣິສຸທ຺ຘິຠາວໂຕ. ອກຓ຺ຫາ ອສຸກ຺ກາຕິ ອາຄຕາຕິ ເອຕ຺ຖ ສຸກ຺ກຠາວປຏິກ຺ເຂປກາຣຓໍ ເຫຏ຺ຐາ ວຸຕ຺ຕນຍເມວ. ເຕນາຫ ‘‘ອິທໍ ປນ ກມ຺ມຈຕຸກ຺ກໍ ປຕ຺ວາ’’ຕິອາທິ.

໘໒. ອນິຍ຺ຍານິກປກ຺ເຂຕິ ອເຈຬກປພ຺ພຊ຺ຊາຍ ກຸກ຺ກຸຣວເຕ ຈ. ໂຍເຄຕິ ຎາຍຘມ຺ມປຏິປຕ຺ຕິຍນ຺ຕິ ອຕ຺ໂຖ. ໂຍເນນາຕິ ໂຍ ຕິຕ຺ຖິຍປຣິວາໂສ ເຕນ ຠຄວຕາ ປຎ຺ຎຕ຺ໂຕ. ຍໍ ຕິຕ຺ຖິຍປຣິວາສໍ ສມາທິຍິຕ຺ວາຕິ ອຍເມຕ຺ຖ ໂຍຊນາ. ຆໍສິຕ຺ວາ ສຸວຓ຺ຓໍ ວິຍ ນິຆໍໂສປ຺ປເລ. ໂກຏ຺ເຏຕ຺ວາ ຫຕ຺ເຖນ ວິຍ ກຸລາລຠາຊນໍ.

ວູປກຏ຺ໂຐຕິ ວິວິຕ຺ໂຕ ເອກີຠູໂຕ. ເປສິຕຕ຺ໂຕຕິ ນິພ຺ພານໍ ປຕິ ເປສິຕຕ຺ໂຕ. ກາມໍ ຕທນຸຕ຺ຕຣໍ ພ຺ຣຫ຺ມຈຣິຍປຣິໂຍສານໍ…ເປ… ວິຫາສີຕິ ອິມິນາວ ອຣຫຕ຺ຕນິກູເຏນ ເທສນາ ນິຏ຺ຐາປິຕາ ໂຫຕິ, ອາຍສ຺ມໂຕ ປນ ເສນິຍສ຺ສ ປຏິປຕ຺ຕິກິຕ຺ຕນປຣເມຕໍ ອຸຊຸກໍ ອາປນ຺ນອຣຫຕ຺ຕຠາວທີປນໍ, ຍທິທໍ ‘‘ອຎ຺ຎຕໂຣ ໂຂ ປນາ’’ຕິອາທິວຈນນ຺ຕິ ອາຫ ‘‘ອຣຫຕ຺ຕນິກູເຏເນວາ’’ຕິ. ອຣຫຕ຺ຕາຘິຄໂມເຍວ ຕສ຺ສ ເຕສໍ ອພ຺ຠນ຺ຕຣຕາ. ເສສໍ ສພ຺ພໍ ສຸວິຎ຺ເຎຍ຺ຍເມວ.

ກຸກ຺ກຸຣວຕິກສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.