໘. ອຠຍຣາຊກຸມາຣສຸຕ຺ຕວຓ຺ຓນາ

໘໓. ຊາຕິຍາ ອສມາໂນ ນິຫີນາຈຣິໂຍ ປຣທຕ຺ຕູປຊີວິກາຍ ມາຕຸຍາ ກຸຈ຺ຉິຍໍ ຊາໂຕ ປາທສິກປຸຕ຺ໂຕ. ນິນ຺ທາວເສນ ວທຕິ ເອເຕນາຕິ ວາໂທ ອຄຸໂຓຕິ ອາຫ – ‘‘ວາທໍ ອາໂຣເປຫີຕິ ໂທສໍ ອາໂຣເປຫີ’’ຕິ. ນິພ຺ພຕ຺ຕວເສນ ນິຣຍໍ ອຣຫຕິ, ນິຣຍສໍວຕ຺ຕນິເຍນ ວາ ກມ຺ເມນ ນິຣເຍ ນິຍຸຕ຺ໂຕ ເນຣຍິໂກ. ອາປາຍິໂກຕິ ເອຕ຺ຖາປິ ເອເສວ ນໂຍ. ອວີຈິມ຺ຫິ ອຸປ຺ປຊ຺ຊິຕ຺ວາ ຕຕ຺ຖ ອາຍຸກປ຺ປສຎ຺ຎິຕໍ ອນ຺ຕຣກປ຺ປໍ ຕິຏ຺ຐຕີຕິ ກປ຺ປຏ຺ໂຐ. ນິຣຍູປປຕ຺ຕິປຣິຫຣຓວເສນ ຕິກິຈ຺ຉິຕຸໍ ສກ຺ກຸເຓຍ຺ໂຍຕິ ເຕກິຈ຺ໂຉ, ນ ເຕກິຈ຺ໂຉ ອເຕກິຈ຺ໂຉ. ທ຺ເວ ອນ຺ເຕ ໂມເຈຕ຺ວາຕິ ຜຣຸສໍ ວາ ອປ຺ປິຍໍ ວາ ກປ຺ເປຍ຺ຍາຕິ ທ຺ເວ ໂກຏ຺ຐາເສ ມຸຎ຺ຈິຕ຺ວາ ເຕ ອນາມສິຕ຺ວາ ປຸຈ຺ຉິຕໍ ອຕ຺ຖໍ ຕໂຕ ພຫິ ກໂຣນ຺ໂຕ ອຸຄ຺ຄິລຕິ ນາມ. ຕໍ ປນ ເອວໍ ກາຕຸໍ ນ ສກ຺ໂກຕີຕິ ອາຫ – ‘‘ອຸຄ຺ຄິລິຕຸໍ ພຫິ ນີຫຣິຕຸໍ ນ ສກ຺ຂິຕີ’’ຕິ. ເອວເມວາຍໍ ປຸຈ຺ຉາ ນ ຄເຫຕພ຺ພາ, ອຍເມຕ຺ຖ ໂທໂສຕິ ຕໍ ອປຸຈ຺ຉໍ ກໂຣນ຺ໂຕ ອປນຍນ຺ໂຕ ໂອຄິລຕິ ນາມ, ຕຖາ ປນ ອສກ຺ໂກນ຺ໂຕ ປຕິຏ຺ຐາເປນ຺ໂຕ ນ ໂອຄິລຕິ ນາມ, ຠຄວາ ປນ ຕມຕ຺ຖໍ ໂອກາສມ຺ປິ ອກໂຣນ຺ໂຕ ອຸຠຍຖາປິ ອສກ຺ຂີຕິ ເວທິຕພ຺ໂພ. ກຖໍ? ຠຄວາ ຫິ ‘‘ນ ຂ຺ເວຕ຺ຖ ຣາຊກຸມາຣ ເອກໍເສນາ’’ຕິ ວທນ຺ໂຕ ນິຄຓ຺ຐສ຺ສ ອຘິປ຺ປາຍໍ ວິປຣິວຕ຺ເຕຕິ, ອຸໂຠ ອນ຺ເຕ ໂມເຈຕ຺ວາ ປຎ຺ຫໍ ວິສ຺ສຊ຺ເຊສິ, ເອວໍ ຕາວ ອຸຄ຺ຄິລິຕຸໍ ອສກ຺ຂິ. ‘‘ນ ຕຕ຺ຣ ຣາຊກຸມາຣ ເອກໍເສນາ’’ຕິ ວທນ຺ໂຕ ເອວ ຈ ‘‘ນາຍໍ ປຸຈ຺ຉາ ເອວໍ ອວິຠາເຄນ ປຸຈ຺ຉິຕພ຺ພາ, ວິຠຊິຕ຺ວາ ປນ ປຸຈ຺ຉິຕພ຺ພາ’’ຕິ ປຸຈ຺ຉາຍ ໂທສໍ ທີເປນ຺ໂຕ ຕໍ ຫາເຣນ຺ໂຕ ໂອຄິລິຕຸມ຺ປິ ສກ຺ຂຕີຕິ.

ອຸຏ຺ຐາຕຸໍ ນ ສກ຺ຂິສ຺ສຕິ ຈິຕ຺ຕສ຺ສ ອຎ຺ຎຖາ ປວຕ຺ຕິຍາ. ອຠໂຍ ທ຺ເວ ມຄ຺ເຄ ກຕປຣິຈໂຍ ເຉໂກ ນິປຸໂຓ ວາທສີໂລ ຈ ຫຸຕ຺ວາ ວິຈຣຕິ. ເຕນາຫ – ‘‘ໂສ ວາທຊ຺ຌາສຍຕາຍ ຕສ຺ສ ວຈນໍ ສມ຺ປຏິຈ຺ຉນ຺ໂຕ ‘ເອວໍ, ຠນ຺ເຕ’ຕິ ອາຫາ’’ຕິ.

໘໕. ເອວຣູປນ຺ຕິ ຍາ ປເຣສໍ ອປ຺ປິຍາ ອມນາປາ ທຸຣຸຕ຺ຕວາຈາ, ເອວຣູປາ ວາຈາ, ນ ປນ ຜຣຸສວາຈາ. ຜຣຸສວາຈາຍ ຫິ ເສຕຸຆາໂຕ ຕຖາຄຕານໍ. ເຈຕນາຜຣຸສຕາຍ ຫິ ຜຣຸສວາຈາ ອິຈ຺ຉິຕາ, ນ ປເຣສໍ ອປ຺ປິຍຕາມຕ຺ເຕນ. ນຏ຺ຐາ ນິຄຓ຺ຐາ ໂອຄິລິກາທິສມ຺ມຕສ຺ສ ປຎ຺ຫສ຺ສ ເອກວຈເນນ ວິທ຺ຘໍສິຕຕ຺ຕາ.

໘໖. ທາຣກສ຺ສ ອງ຺ເກ ນິສີທນສ຺ສ ກາຣຓໍ ທສ຺ເສຕຸໍ ‘‘ເລສວາທິໂນ’’ຕິອາທິ ວຸຕ຺ຕໍ. ຕຕ຺ຖ ເລສວາທິໂນຕິ ຉລວາທິໂນ, ວາທມຄ຺ເຄ ວາ ອປຣິປຸຓ຺ຓຕາຍ ເລສມຕ຺ເຕເນວ ວາທສີລາ. ໂອສຏສງ຺ຄາໂມຕິ ອເນກວາຣໍ ປຣວາທມທ຺ທນວເສນ ໂອຕິຓ຺ຓວາທສງ຺ຄາໂມ. ວິຊ຺ຌິຕ຺ວາຕິ ນເຂນ ວິຊ຺ຌິຕ຺ວາ. ອິມເມວາຕິ ຍ຺ວາຍໍ ທາຣໂກ ອຕ຺ຕໂນ ວາທຠງ຺ຄປຣິຫຣຓຕ຺ຖໍ ອິມິນາ ອງ຺ເກ ນິສີທາປິໂຕ, ອິມເມວ ອສ຺ສ ທາຣກໍ ອຸປມໍ ນິສ຺ສຍໍ ກຕ຺ວາ ວາທໍ ຠິນ຺ທິສ຺ສາມິ. ‘‘ອສ຺ສ ວາທໍ ອປ຺ປຏິຕຕາຍ ອຸປມາຍ ຠຎ຺ຊິສ຺ສາມີ’’ຕິ ຈິນ຺ເຕຕ຺ວາ.

ອປເນຍ຺ຍໍ ອສ຺ສ ອຫນ຺ຕິ ອສ຺ສ ທາຣກສ຺ສ ມຸຂໂຕ ອຫໍ ຕໍ ອປເນຍ຺ຍໍ. ອຠູຕຕ຺ໂຖວ ອຠູຕໍ ອຸຕ຺ຕຣປທໂລເປນາຕິ ອາຫ ‘‘ອຠູຕນ຺ຕິ ອຠູຕຕ຺ຖ’’ນ຺ຕິ. ອຕຈ຺ຉນ຺ຕິ ຕສ຺ເສວ ເວວຈນນ຺ຕິ ອາຫ ‘‘ອຕຈ຺ຉນ຺ຕິ ນ ຕຈ຺ຉ’’ນ຺ຕິ. ອຠູຕນ຺ຕິ ວາ ອສນ຺ຕໍ ອວິຊ຺ຊມານໍ. ອຕຈ຺ຉນ຺ຕິ ອຕຖາກາຣໍ. ອນຕ຺ຖສໍຫິຕນ຺ຕິ ທິຏ຺ຐຘມ຺ມິເກນ, ສມ຺ປຣາຍິເກນ ວາ ອນຕ຺ເຖນ ສໍຫິຕໍ, ອນຕ຺ເຖ ວາ ສໍຫິຕໍ, ນ ອຕ຺ໂຖຕິ ວາ ອນຕ຺ໂຖ, ອຕ຺ຖສ຺ສ ປຏິປກ຺ໂຂ ສຠາໂວ, ເຕນ ສໍຫິຕນ຺ຕິ ອນຕ຺ຖສໍຫິຕໍ, ປິສຸຓວາຈໍ ສມ຺ຜປ຺ປລາປຎ຺ຈາຕິ ອຕ຺ໂຖ. ເອວເມຕ຺ຖ ຈຕຸພ຺ພິຘສ຺ສປິ ວຈີທຸຈ຺ຈຣິຕສ຺ສ ຄຫິຕຕາ ທຏ຺ຐພ຺ພາ.

ທຸປ຺ປຍຸຕ຺ໂຕຕິ ທຸປ຺ປຏິປນ຺ໂນ. ນ ຕໍ ຕຖາຄໂຕ ຠາສຕິ ອຠູຕຕາທິໂທສທຸຏ຺ຐຕ຺ຕາ. ຕມ຺ປິ ຕຖາຄໂຕ ນ ຠາສຕິ ຠູຕຕ຺ເຖປິ ອນຕ຺ຖສໍຫິຕຕາທິໂທສທຸຏ຺ຐຕ຺ຕາ.

ຐານໍ ກາຣຓໍ ເອຕິສ຺ສາ ອຕ຺ຖີຕິ ຐານິຍາ ກ-ກາຣສ຺ສ ຍ-ກາຣໍ ກຕ຺ວາ, ນ ຐານິຍາຕິ ອຏ຺ຐານິຍາ, ນິກ຺ກາຣຓາ ອຍຸຕ຺ຕິຍຸຕ຺ຕາ, ສາ ເອວ ກຖາຕິ ອຏ຺ຐານິຍກຖາ. ອຕ຺ຕປຈ຺ຈກ຺ຂກຖໍ ກເຖມາຕິ ອຕ຺ຕນາ ເອວ ປຈ຺ຈກ຺ຂໍ ກຕ຺ວາ ປວຕ຺ຕິຍມານໍ ຉລກຖໍ ກເຖມ.

ຄາມິກມຫລ຺ລໂກ ‘‘ອິເມ ມໍ ວຎ຺ເຈຕຸກາມາ, ອຫເມວ ທານິ ອິເມ ວຎ຺ເຈສ຺ສາມີ’’ຕິ ຈິນ຺ເຕຕ຺ວາ ‘‘ເອວໍ ຠວິສ຺ສຕີ’’ຕິອາທິມາຫ. ‘‘ນ ມຍໍ ທາສາ’’ຕິປິ ວຕ຺ຕຸໍ ນາສກ຺ຂິໍສຸ ປຸພ຺ເພ ຕຖາກຕິກາຍ ກຕຕ຺ຕາ.

ຕຕິຍໍ ຕຕິຍເມວາຕິ ທ຺ວີສຸປິ ປກ຺ເຂສຸ ຕຕິຍໍ ຕຕິຍເມວ ວາຈໍ. ຠາສິຕພ຺ພກາລໍ ອນຕິກ຺ກມິຕ຺ວາຕິ ຍສ຺ສ ຍທາ ຍຖາ ຠາສິຕພ຺ພໍ, ຕສ຺ສ ຕທາ ຕເຖວ ຈ ຠາສນໂຕ ຠາສິຕພ຺ພໍ ກາຣຓໍ ຠາສິຕພ຺ພກາລຎ຺ຈ ອນຕິກ຺ກມິຕ຺ວາວ ຠາສຕິ.

໘໗. ຐານຸປ຺ປຕ຺ຕິກຎາເຓນາຕິ ຐາເນ ເອວ ອຸປ຺ປຊ຺ຊນກຎາເຓນ. ຕສ຺ມິໍ ຕສ຺ມິໍ ກາຣເຓ ຕສ຺ສ ຕໍ ຕໍ ອວຕ຺ຖາຍ ອຸປ຺ປຊ຺ຊນກຎາເຓນ, ຘມ຺ມານໍ ຍຖາສຠາວໂຕ ອວພຸຊ຺ຌນສຠາໂວຕິ ຘມ຺ມສຠາໂວ. ຘມ຺ເມ ສຠາວຘມ຺ເມ ອນວເສເສ ວາ ຍາຖາວໂຕ ອຸປຘາເຣຕີຕິ ຘມ຺ມຘາຕຸ, ສພ຺ພຎ຺ຎຸຕາ. ເຕນາຫ ‘‘ສພ຺ພຎ຺ຎຸຕຎ຺ຎາຓສ຺ເສຕໍ ອຘິວຈນ’’ນ຺ຕິ. ສຸປ຺ປຏິວິທ຺ຘນ຺ຕິ ສພ຺ພໍ ເຎຍ຺ຍຘມ຺ມໍ ສຸຏ຺ຐຸ ປຏິວິຊ຺ຌນວເສນ, ສຸຏ຺ຐຸ ປຏິວິທ຺ຘນ຺ຕິ ອຕ຺ໂຖ. ເຕນາຫ ‘‘ຫຕ຺ຖຄຕໍ ຠຄວໂຕ’’ຕິ. ເນຍ຺ຍປຸຄ຺ຄລວເສນ ປຣິນິຏ຺ຐິຕາຕິ ກຖາປຣິວິຠາເຄນ ອຍເມວ ເທສນາ ຈຕ຺ຕາຣິ ອຣິຍສຈ຺ຈານິ ທສ຺ເສນ຺ໂຕ ອຣຫຕ຺ຕໍ ປຈ຺ຈກ຺ຂາສີຕິ.

ອຠຍຣາຊກຸມາຣສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.