໙. ມຫາສາໂຣປມສຸຕ຺ຕວຓ຺ຓນາ

໓໐໗. ນຈິຣປກ຺ກນ຺ເຕຕິ ນ ຈິຣໍ ປກ຺ກນ຺ເຕ, ປກ຺ກນ຺ຕສ຺ສ ສໂຕ ນ ຈິຣສ຺ເສວ. ສລິງ຺ເຄເນວາຕິ ມຸຓ຺ຑິຍກາສາຍຄ຺ຄຫຓາທິນາ ອຕ຺ຕໂນ ປຸຣິມລິງ຺ເຄເນວ. ປາຏິເຍກ຺ເກ ຊາເຕຕິ ວິປນ຺ນາຈາຣທິຏ຺ຐິຕາຍ ປກາສນີຍກມ຺ມກຣຓໂຕ ປຣໍ ອຎ຺ຎຕິຕ຺ຖິຍສທິເສ ວິສຸໍ ຠູເຕ. ກຸລປຸຕ຺ໂຕຕິ ຊາຕິມຕ຺ເຕນ ກຸລປຸຕ຺ໂຕ. ອສມ຺ຠິນ຺ນາຍາຕິ ສມ຺ເຠທຣຫິຕາຍ, ຊາຕິສງ຺ກຣວິຣຫິຕາຍາຕິ ອຕ຺ໂຕ. ຊາຕິສີເສນ ອິຘ ຊາຕິວຕ຺ຖຸກໍ ທຸກ຺ຂໍ ວຸຕ຺ຕນ຺ຕິ ອາຫ ‘‘ໂອຕິຓ຺ໂຓຕິ ຍສ຺ສ ຊາຕິ ອນ຺ໂຕ ອນຸປວິຏ຺ຐາ’’ຕິ. ຊາໂຕ ຫິ ສຕ຺ໂຕ ຊາຕກາລໂຕ ປຏ຺ຐາຍ ຊາຕິນິມິຕ຺ເຕນ ທຸກ຺ເຂນ ອນ຺ໂຕ ອນຸປວິຏ຺ໂຐ ວິຍ ວິພາຘີຍຕິ. ຊຣາຍາຕິອາທີສຸປິ ເອເສວ ນໂຍ. ຈຕ຺ຕາໂຣ ປຈ຺ຈຍາ ລພ຺ຠນ຺ຕີຕິ ລາຠາ, ຈຕຸນ຺ນໍ ປຈ຺ຈຍານໍ ລພ຺ຠມານານໍ ສຸກຕຠາໂວ ສຸຏ຺ຐຸ ອຠິສງ຺ຂຕຠາໂວ. ວຓ຺ຓຠຓນນ຺ຕິ ຄຸຓກິຕ຺ຕນໍ. ອປຎ຺ຎາຕາຕິ ສມ຺ຠາວນາວເສນ ນ ປຎ຺ຎາຕາ. ລາຠາທິນິພ຺ພຕ຺ຕິຍາຠາວທສ຺ສນຎ຺ເຫຕໍ. ເຕນາຫ ‘‘ຆາສຈ຺ຉາທນມຕ຺ຕມ຺ປິ ນ ລຠນ຺ຕີ’’ຕິ. ອປ຺ເປສກ຺ຂາຕິ ອປ຺ປານຸຠາວາ. ສາ ປນ ອປ຺ເປສກ຺ຂຕາ ອຘິປເຕຍ຺ຍສມ຺ປຕ຺ຕິຍາ ຈ ປຣິວາຣສມ຺ປຕ຺ຕິຍາ ຈ ອຠາເວນ ປາກຏາ ໂຫຕິ. ຕຕ຺ຖ ປຣິວາຣສມ຺ປຕ຺ຕິຍາ ອຠາວໍ ທສ຺ເສນ຺ໂຕ ‘‘ອປ຺ປປຣິວາຣາ’’ຕິ ອາຫ.

ສາເຣນປິ ເກຈິ ອຊານເນນ ອຎ຺ຎາລາເຠນ ວາ ອສາຣຠູຕມ຺ປິ ກຕ຺ຕພ຺ພໍ ກໂຣນ຺ຕີຕິ ຕໂຕ ວິເສສນຕ຺ຖໍ ‘‘ສາເຣນ ສາຣກຣຓີຍ’’ນ຺ຕິ ວຸຕ຺ຕນ຺ຕິ ຕໍ ທສ຺ເສນ຺ໂຕ ‘‘ອກ຺ຂຈກ຺ກຍຸຄນງ຺ຄລາທິກ’’ນ຺ຕິ ອາຫ. ພ຺ຣຫ຺ມຈຣິຍສ຺ສາຕິ ສິກ຺ຂາຕ຺ຕຍສງ຺ຄຫສ຺ສ ສາສນພ຺ຣຫ຺ມຈຣິຍສ຺ສ. ມຫາຣຸກ຺ຂສ຺ສ ມຄ຺ຄຜລສາຣສ຺ສ ຎາຓທສ຺ສນເຜຄ຺ຄຸກສ຺ສ ສມາຘິຕຈສ຺ສ ສີລປປຏິກສ຺ສ ຈຎ຺ຈລສຠາວາ ສໍສປ຺ປຈາຣີຕິ ຈ ຈຕ຺ຕາໂຣ ປຈ຺ຈຍາ ສາຂາປລາສໍ ນາມ. ເຕເນວາຕິ ລາຠສກ຺ກາຣສິໂລກນິພ຺ພຕ຺ຕເນເນວ. ສາໂຣ ເມ ປຕ຺ໂຕຕິ ອິມສ຺ມິໍ ສາສເນ ອຘິຄນ຺ຕພ຺ພສາໂຣ ນາມ ອິມິນາ ລາຠາທິນິພ຺ພຕ຺ຕເນນ ອນຸປ຺ປຕ຺ໂຕຕິ ໂວສານໍ ນິຏ຺ຐິຕກິຈ຺ຈໍ ອາປນ຺ໂນ.

໓໑໐. ຎາຓທສ຺ສນນ຺ຕິ ຎາຓຠູຕໍ ທສ຺ສນໍ ວິສຍສ຺ສ ສຈ຺ຉິກຣຓວເສນ ປວຕ຺ຕໍ ອຠິຎ຺ຎາຎາຓໍ. ສຸຂຸມໍ ຣູປນ຺ຕິ ເທວາທີນໍ, ອຎ຺ຎມ຺ປິ ວາ ສຸຂຸມສຠາວໍ ຣູປໍ. ເຕນາຫ ‘‘ອນ຺ຕມໂສ…ເປ… ວິຫຣນ຺ຕີ’’ຕິ, ທິພ຺ພຈກ຺ຂຸ ຫິ ອິຘ ອຸກ຺ກຏ຺ຐນິທ຺ເທເສນ ‘‘ຎາຓທສ຺ສນ’’ນ຺ຕິ ຄຫິຕໍ.

໓໑໑. ອສມຍວິໂມກ຺ຂໍ ອາຣາເຘຕີຕິ ເອຕ຺ຖ ອຘິປ຺ເປຕໍ ອສມຍວິໂມກ຺ຂໍ ປາຬິຍາ ເອວ ທສ຺ເສຕຸໍ ‘‘ກຕໂມ ອສມຍວິໂມກ຺ໂຂ’’ຕິອາທິ ວຸຕ຺ຕໍ. ອຏ຺ຐນ຺ນຎ຺ຫິ ສມາປຊ຺ຊນສມໂຍປິ ອຕ຺ຖິ ອສມໂຍປິ, ມຄ຺ຄວິໂມກ຺ເຂນ ປນ ວິມຸຈ຺ຈນສ຺ສ ສມໂຍ ວາ ອສມໂຍ ວາ ນຕ຺ຖິ. ຍສ຺ສ ສທ຺ຘາ ພລວຕີ, ວິປສ຺ສນາ ຈ ອາຣທ຺ຘາ, ຕສ຺ສ ຄຈ຺ຉນ຺ຕສ຺ສ ຕິຏ຺ຐນ຺ຕສ຺ສ ນິສີທນ຺ຕສ຺ສ ຠຸຎ຺ຊນ຺ຕສ຺ສ ຈ ມຄ຺ຄຜລປຏິເວໂຘ ນາມ ນ ໂຫຕີຕິ ນ ວຕ຺ຕພ຺ພໍ, ອິຕິ ມຄ຺ຄວິໂມກ຺ເຂນ ວິມຸຈ຺ຈນ຺ຕສ຺ສ ສມໂຍ ວາ ອສມໂຍ ວາ ນຕ຺ຖີຕິ ໂສ ອສມຍວິໂມກ຺ໂຂ. ເຕນາຫ ‘‘ໂລກິຍສມາປຕ຺ຕິໂຍ ຫີ’’ຕິອາທິ.

ນ ກຸປ຺ປຕິ, ນ ນສ຺ສຕີຕິ ອກຸປ຺ປາ, ກທາຈິປິ ອປຣິຫານສຠາວາ. ສພ຺ພສໍກິເລເສຫິ ປຏິປ຺ປສ຺ສທ຺ຘິວເສນ ເຈຕໂສ ວິມຸຕ຺ຕີຕິ ເຈໂຕວິມຸຕ຺ຕິ. ເຕນາຫ ‘‘ອຣຫຕ຺ຕຜລວິມຸຕ຺ຕີ’’ຕິ. ອຍມຕ຺ໂຖ ປໂຍຊນໍ ເອຕສ຺ສາຕິ ເອຕທຕ຺ຖໍ, ສາສນພ຺ຣຫ຺ມຈຣິຍໍ, ຕສ຺ສ ເອສາ ປຣມໂກຏິ. ຍຖາຣທ຺ຘສ຺ສ ສາໂຣປເມນ ຜເລນ ເທສນາ ນິຏ຺ຐາປິຕາຕິ ອາຫ ‘‘ຍຖານຸສນ຺ຘິນາວ ເທສນໍ ນິຏ຺ຐເປສີ’’ຕິ. ຍໍ ປເນຕ຺ຖ ອຕ຺ຖໂຕ ອວິຠຕ຺ຕໍ, ຕໍ ສຸວິຎ຺ເຎຍ຺ຍເມວ.

ມຫາສາໂຣປມສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.